ཁེ་ན་ཌ་གཞུང་གིས་སྣེ་འཁྲིད་དེ་འཛམ་གླིང་རྒྱལ་ཁབ་མང་པོ་མཉམ་འབྲེལ་གྱི་ཚོགས་པ་བཙུགས་ཏེ་རྒྱ་ནག་དང་དེའི་མཐུན་ཕྱོགས་རྒྱལ་ཁབ་ཁག་གིས་ཕྱི་རྒྱལ་གྱི་མི་སེར་དོན་མེད་དུ་འཛིན་བཟུང་བཀག་ཉར་བྱེད་བཞིན་པར་ངོ་རྒོལ་གྱི་བསྒྲགས་གཏམ་སྤེལ་འདུག
ཟླ་འདིའི་ཕྱི་ཚེས་ ༡༥ ཉིན་ཁེ་ན་ཌ་གཞུང་གིས་སྣེ་འཁྲིད་དེ་ནུབ་ཕྱོགས་རྒྱལ་ཁབ་ཁག་མཉམ་འབྲེལ་གྱི་ཚོགས་པ་ཞིག་གིས་རྒྱ་ནག་དང་ཨེ་རག ཨུ་རུ་སུ། བྱང་ཀོ་རི་ཡ་སོགས་ཀྱིས་ཕྱིའི་རྒྱལ་ཁབ་ཁག་གི་མི་སྣ་འཛིན་བཟུང་བཀག་ཉར་བྱས་པར་མཐའ་གཅིག་ཏུ་ངོ་རྒོལ་གྱི་དྲ་ལམ་བསྒྲགས་གཏམ་ཞིག་སྤེལ་ཡོད་པ་དང་། ནུབ་ཕྱོགས་རྒྱལ་ཁབ་ཁག་གཙོ་བོར་གྱུར་བའི་ངོ་རྒོལ་ནང་ཞུགས་མཁན་རྒྱལ་ཁབ་ ༥༨ ནང་དུ་ཨ་རི་དང་ཉི་ཧོང་། ཨོ་སི་ཊོ་ལི་ཡ། ཡུ་རོབ་མཐུན་ཚོགས་ཀྱི་ཁོངས་གཏོགས་རྒྱལ་ཁབ་ཕལ་ཆེར་ཚང་མས་བསྒྲགས་གཏམ་དེར་རྒྱབ་སྐྱོར་མཚན་རྟགས་བརྒྱབ་ཡོད་འདུག
ཁེ་ན་ཌའི་ཕྱི་སྲིད་བློན་ཆེན་མཱར་གྷར་ནོ་ (Marc Garneau) ལགས་ཀྱིས། ངོ་རྒོལ་ལས་འགུལ་དེས་རྒྱལ་ཁབ་གཅིག་ཙམ་དམིགས་འབེན་དུ་བཟུང་མེད་པར་གནད་དོན་དེར་བཟོད་སྒོམ་བྱེད་པརཕྱི་འབྲེལ་གནོན་ཤུགས་སྤྲོད་པའི་ཆེད་དུ་ཡིན་སྐོར་དང་། ཁྲིམས་དང་འགལ་ཞིང་བཟང་སྤྱོད་ལས་བརྒལ་བའི་བཙོན་འཇུག་བྱེད་ཐབས་དེ་དག་ལ་འགོག་རྒོལ་བྱེད་པར་རྒྱལ་ཁབ་གཞན་ནས་རྒྱབ་སྐྱོར་རག་ཐབས་བྱེད་ཀྱི་ཡོད་ལ། རྒྱལ་ཁབ་གཞན་གྱི་རྒྱབ་སྐྱོར་འོག་ནས་བཙན་དབང་གིས་འཛིན་བཟུང་དང་བཀག་ཉར་བྱེད་མཁན་གྱི་རྒྱལ་ཁབ་དེ་དག་ལ་གནོན་ཤུགས་སྤྲོད་ཐུབ་པར་ཡིད་ཆེས་བྱེད་ཀྱི་ཡོད་སྐོར་བརྗོད་འདུག
དྲ་ཐོག་ཚོགས་འདུར་ཞུགས་པའི་ཨ་རི་དང་དབྱིན་ཡུལ། འཇར་མན་སོགས་ཀྱི་སྐུ་ཚབ་ནས་རྒྱབ་སྐྱོར་གྱི་གཏམ་བཤད་བྱས་ཡོད་པ་དང་། དབྱིན་ཡུལ་ཕྱི་སྲིད་དྲུང་ཆེ་ཌོ་མི་ནིག་རབ་ (Dominic Raab) ལགས་ཀྱིས། གཞན་ལ་འཇིགས་སྐུལ་དང་ཤུགས་རྐྱེན་སྤྲོད་ཆེད་བཙན་དབང་གིས་བཙོན་འཇུག་བྱས་པ་ནི་གདུག་རྩུབ་ཅན་དང་ནོར་འཁྲུལ་གྱི་བྱེད་ཐབས་ཤིག་ཡིན་པས། དབྱིན་ཡུལ་གྱིས་དེ་རིགས་ལ་བཟོད་སྒོམ་བྱེད་ཐུབ་ཀྱི་མེད་སྐོར་བརྗོད་འདུག
དྲ་ཐོག་ཚོགས་འདུ་གྲོལ་མ་ཐག་ཁེ་ན་ཌར་ཡོད་པའི་རྒྱ་ནག་གཞུང་ཚབ་ཁང་ནས་རྒྱལ་ཁབ་ཁག་གི་མཉམ་འབྲེལ་བྱ་སྤྱོད་དེ་ནི་དྲག་ཤུགས་དང་གདུག་རྩུབ་ཅན་གྱི་བྱེད་བབ་ཅིག་ལ་ངོས་འཛིན་བྱེད་ཀྱི་ཡོད་པས་ངོས་ལེན་མེད་ལ། རྒྱ་ནག་ལ་མིང་ཤས་བཟོ་ཐབས་དང་གནོན་ཤུགས་སྤྲོད་ཀྱི་ཡོད་ལུགས་རྒྱ་ནག་གི་གོ་ལའི་དུས་བབ་ནང་སྤེལ་འདུག་པ་མ་ཟད། ཁ་སང་ཕྱི་ཚེས་ ༡༧ ཉིན་གསར་ཁང་དེའི་དྲ་རྒྱའི་ཐོག ཁེ་ན་ཌས་ཧྭ་ཝེ་ཡི་ནོར་དོན་སྤྱི་གཉེར་བ་མོང་ཝན་ཀྲུའུ་(Meng Wanzhou) ཁྲིམས་འགལ་གྱིས་འཛིན་བཟུང་བྱས་པར་འགན་འཁྲི་ཡོད་སྟབས། ཁེ་ན་ཌའི་ཕྱི་སྲིད་བློན་ཆེན་མཱར་གྷར་ནོ་ཡིས་བཙན་དབང་གིས་བཙོན་འཇུག་ལ་དགག་པ་ཡོད་པའི་ཁྱབ་བསྒྲགས་བྱས་པ་དེར་ཧང་སངས་དགོས་སྐོར་བརྗོད་འདུག་པ་མ་ཟད། ནུབ་ཕྱོགས་རྒྱལ་ཁབ་ཁག་གིས་འཛམ་གླིང་ལ་མགོ་སྐོར་བསླུ་བྲིད་གཏོང་ཐབས་དེ་ག་དུས་མཚམས་འཇོག་བྱ་རྒྱུ་ཡིན་པ་དང་། འགྲོ་བ་མིའི་ཐོབ་ཐང་སྐོར་རྒྱུན་དུ་བཤད་ཀྱང་གཞི་རྩའི་འགྲོ་བ་མིའི་ཐོབ་ཐང་གི་ཁྲིམས་ལ་མི་རྩི་མཁན་གྱི་རྒྱལ་ཁབ་ཀྱིས་འགྲོ་བ་མིའི་ཐོབ་ཐང་སྐོར་ལ་ག་རེ་བཤད་ཀྱི་ཡོད་པ་དང་། ནུབ་ཕྱོགས་རྒྱལ་ཁབ་ཡོངས་ཀྱིས་རང་ཉིད་ལ་མེ་ལོང་ནང་ལེགས་པོ་བལྟ་དགོས་སྐོར་བསྒྲགས་འདུག
ཨ་རིའི་གཞུང་གི་རེ་སྐུལ་བཞིན་ཕྱི་ལོ་ ༢༠༡༨ ཟླ་ ༡༡ ཚེས་ ༡ ཉིན། ཁ་ན་ཌ་གཞུང་གིས་རྒྱ་ནག་གི་ཚན་རྩལ་བཟོ་ཚོང་ཁང་ཆེ་གྲས་ཧྭ་ཝེ་ (Huawei) ཡི་ནོར་དོན་སྤྱི་གཉེར་བ་མེང་ཝན་ཀྲུའུ་ (Meng Wanzhou)ཁ་ན་ཌའི་ཝན་ཁོ་ཝིར་རྒྱལ་སྤྱིའི་གནམ་ཐང་ནས་འཛིན་བཟུང་བྱས་ཏེ་ཉིན་ཤས་ལས་མ་འགོར་བར། རྒྱ་ནག་ནང་ཡོད་པའི་ཁ་ན་ཌའི་ཕྱི་འབྲེལ་མི་སྣ་ཟུར་པ་མེ་ཁལ་ཀོབ་རིག (Michael kovrig) དང་། ཚོང་པ་མེ་ཁལ་སི་པེ་ཝོར་ (Michael Spavor) གཉིས་སྔ་གཞུག་ཏུ་འཛིན་བྱས་ཡོད་པར་བརྟེན། ཡུལ་གཉིས་ཀྱི་རྒྱལ་ཁབ་གཉིས་བར་ཚོང་འབྲེལ་དང་མི་མང་བར་གྱི་འབྲེལ་ལམ་བཅས་ཇེ་སྡུག་ཏུ་འགྲོ་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ།
