བསྟན་འཛིན་གངས་དཀར་ལས་འཕྲོས་ཏེ་ཕྱིར་སྡོད་བོད་མིའི་བྱིས་པ་ཚོ་གླེང་བ།

ཀླུ་སྨྱོན་ཧེ་རུ་ཀ

—འགྲོ་བ་མི་སུ་ཞིག་ཡིན་ཡང་རང་ཉིད་འཚོ་གནས་བྱེད་ས་དེར་རང་གི་ཕ་སྐད་མ་ཡིག་བེད་སྤྱོད་མེད་ན། གནས་དེར་ཕྱིའི་ཁྲ་ཁྲ་ཟང་ཟིང་ཅི་ཙམ་རྒྱས་མིན་ལ་མ་ལྟོས་པར། དེ་ནི་མུན་ནག་གི་ཁྲོད་དུ་འཚོ་བ་ཡིན་ཞེས་བདག་གིས་ཁ་ཚོན་བཅད་ནས་བརྗོད་ཐུབ།

སྤྱི་ལོ་ཉིས་སྟོང་བཅུ་གསུམ་ལོའི་དཔྱིད་ཀར་ངས་མི་ལོ་ཉི་ཤུའི་རྗེས་སུ་རང་གི་དྲིན་ཅན་ཕ་མ་གཉིས་དང་ནུ་བོ་ཐ་ཆུང་བཅས་ཤར་ཕྱོགས་ཀྱི་མུ་ཏིག་གྲོང་ཁྱེར་དུ་གྲགས་པའི་ཧོང་ཀོང་ལ་གདན་འདྲེན་ཞུས་ཏེ་ས་མཐའི་ནང་མི་མཉམ་འཛོམས་ཀྱི་སྤྲོ་སྐྱིད་ལ་ཐེངས་གཅིག་རོལ་བའི་སྐལ་བ་ལྡན་སོང་། ལྷན་འཛོམས་འདི་ནི་ཁོང་ཕ་མ་གཉིས་དང་ནུ་བོ། ད་དུང་ང་རང་བཅས་ལ་མཚོན་ན་ཇི་འདྲའི་དོན་སྙིང་ལྡན་པ་ཞིག་རེད་ཨང་། སྐབས་དེར་ངས་ལྷན་འཛོམས་འདི་འདྲ་ཞིག་མ་འོངས་པར་སླར་ཡང་འབྱུང་རྒྱུའི་རེ་སྨོན་བཅངས་པ་དང་ལྷན་དུ། ཕྱོགས་གཞན་ཞིག་ནས་ལྷན་འཛོམས་འདི་འདྲ་ཞིག་ཡང་བསྐྱར་འབྱུང་མི་ཐུབ་པའང་སྲིད་སྙམ་སྟེ། ངེད་ཅག་གི་ལྷན་འཛོམས་དེའི་མགོ་མཇུག་བར་གསུམ་ཚང་མ་བརྙན་དུ་བླངས་ཤིང་ཟིན་བྲིས་སུ་བཏབ་པ་ཡིན་ལ། རྗེས་སུ་བརྙན་དེ་དག་ཕྱོགས་བསྒྲིགས་ཀྱིས་<<མི་ལོ་ཉི་ཤུའི་རྗེས་སུ>>ཞེས་པའི་དངོས་བཤུས་གློག་བརྙན་ཞིག་བཟོས་པ་ཡིན། ལོ་གཅིག་གི་སྔོན་དུ་ཨ་མ་དྲིན་ཅན་མ་འོད་དུ་ཡལ་བ་དང་། དེ་ནས་ཅང་མ་འགོར་བར་མཁས་བཙུན་བཟང་གསུམ་འཛོམས་པའི་ཕུ་བོ་རྩོམ་པ་པོ་དང་སྙན་ངག་པ། ཞིབ་འཇུག་པ་དང་དགེ་རྒན་བཅས་ཡིན་པའི་བླ་ནག་ཡེ་ཤེས་བཟང་པོའམ་ལྡོང་ཕྲུག་ཀྱང་གློ་བུར་དུ་གཤེགས་པས། རང་ཉིད་དང་རང་ཉིད་ལྟ་བུའི་བོད་གཞིས་བྱེས་གཉིས་སུ་གྱེས་ཏེ་བྲལ་གདུང་གིས་གཟིར་བའི་གངས་ཅན་པ་ཁྲི་སྟོང་གི་སྡུག་བསྔལ་དེ་ཡིད་ངོར་ཧ་ཅང་གཏིང་ཟབ་ཏུ་བརྐོས་སོང་།

སྐབས་བབ་ཀྱི་གླེང་བྱ་སྟེ། བོད་པ་རྣམས་བོད་ནས་རྒྱ་བལ་འབྲུག་གསུམ་དང་དེ་ནས་ནུབ་ཕྱོགས་སུ་གཞིས་ཆགས་པའི་ལོ་རྒན་དྲུག་ཅུའི་རིང་ལ། རང་རེའི་ཕ་མེས་ནས་བརྒྱུད་པའི་ཆོས་དང་རིག་གཞུང་རིན་ཐང་བྲལ་བ་འདི་ལ་དགའ་འོས་པའི་འཕེལ་རྒྱས་དང་སྐྱོ་དགོས་པའི་ཆག་འཇིག་མང་པོ་ཞིག་ཀྱང་བྱུང་ཟིན་པ་རེད་ཨང་། ལོ་ཟླ་ཉིན་ཞག་དང་དུས་ཚོད་སྐར་མའི་འཁོར་སྐྱོད་ཀྱི་འགྲོས་དང་འགྲོགས་ཏེ། མི་རབས་ཕྱི་མ་རྣམས་འཇིག་རྟེན་ཕྱི་མར་བཞུད་པའི་ཤུལ་དུ་མི་རབས་གསར་པ་ཞིག་གིས་སྔར་བཞིན་མི་ཚེའི་འཚོ་ཚིས་ལ་འབད་པ་དང་། རྒྱ་བལ་འབྲུག་གསུམ་དུ་གཞིས་ཆགས་པའི་མི་རབས་རྙིང་པ་མང་པོ་ཞིག་ཀྱང་མཇུག་རྫོགས་ལ་ཉེ་བའི་དུས་སུ་བསླེབས་འདུག ལོ་རབས་དགུ་བཅུ་པ་ནི་བོད་ཕྱི་ནང་གི་འབྲེལ་ལམ་དེ་སྔར་ལས་ཀྱང་ཡངས་པར་གྱུར་པའི་རྫོགས་ལྡན་གྱི་དུས་སྐབས་ཤིག་ལ་བརྩི་ཆོག་པ་སྟེ། ལམ་ཡིག་བཟུང་སྟེ་རྒྱལ་མཚམས་འགག་སྒོ་བརྒལ་ནས་ཕྱི་ཕྱོགས་སུ་གཉེན་འཕྲད་དང་གནས་སྐོར་ལ་ཡོང་མཁན་དང་། ལམ་ཡིག་མེད་པར་འཛམ་གླིང་གི་སྒལ་ཚིགས་སུ་གྲགས་པའི་ཧི་མ་ལ་ཡའི་རི་ཚོགས་ཚེ་སྲོག་གཏའ་མར་བཞག་སྟེ་བརྒལ་མཁན་ཁྲི་སྟོང་མང་པོ་ཞིག་བྱུང་།

དེ་དག་གི་ཁྲོད་དུ་རྩོམ་ཡིག་འདིའི་གླེང་བྱའི་བུ་ཆུང་བསྟན་འཛིན་གངས་དཀར་(གཤམ་དུ་གངས་དཀར་ཞེས་འབྲི་རྒྱུ།) གྱི་ཕ་མ་གཉིས་ཀྱང་ཡོད། ཁོ་བོས་གངས་དཀར་གྱི་ཨ་མ་རྩོམ་པ་པོ་ཉི་མ་འཚོ་ལ་དྲ་འབྲེལ་བཙུགས་ནས་ལོ་ཤས་ཀྱི་རྗེས་ཏེ། གོང་དུ་བརྗོད་པའི་ནང་མི་ལྷན་འཛོམས་དེའི་རྗེས་སུ། རང་ཉིད་ཀྱི་ཨ་རིའི་སློབ་མ་ཁག་ཅིག་ཁྲིད་དེ་རྒྱ་གར་གནས་སྐོར་ལ་ཕྱིན་པའི་རྗེས་སུ། སློབ་མ་གཉིས་ཁྲིད་ནས་རྒྱ་གར་ནུབ་བྱང་ཕྱོགས་ཀྱི་ས་གནས་ཁག་ཅིག་ཏུ་བསྐྱོད་ཅིང་། དེའི་ལམ་ཞོར་ལྟ་བུར་རྡ་རམ་ས་ལ་དང་ནོར་བུ་གླིང་ཁར་ཡང་བསྐྱོད་པ་ཡིན། ངེད་ཅག་ས་གནས་དེར་ཞོགས་པ་སྔ་བོ་ཞིག་ལ་འབྱོར་བ་དང་། སྐབས་དེར་གནམ་སྔོན་པོར་ཐད་ཀར་ཟུག་པའི་རྡོ་ལ་བརྡར་རི་བོའི་རྩེ་རུ་ཞོགས་པའི་ཉི་འོད་ད་དུང་འཕྲོས་མི་འདུག རྡ་ཤོད་རླངས་འཁོར་འབབ་ཚུགས་ནས་ངེད་ཅག་ཐད་ཀར་ཉི་མ་འཚོ་ཚང་ལ་ཞོགས་ཇ་འཐུང་དུ་སོང་བ་ཡིན། སྐབས་དེར་ངས་ཤ་བཟའ་གི་ཡོད་པས་ཉི་མ་འཚོ་བཟའ་ཟླ་གཉིས་ཀྱིས་མདུན་ཅོག་སྟེང་བཤམས་པའི་རྩམ་པ་དང་ཤ་ཚོད་སོགས་ཀྱི་ཟ་མ་དེ་ཚོའི་བྲོ་བ་ནི་དེ་འདྲའི་ཞིམ་པོ་ཞིག་རེད་ཨང་། དེ་དུས་གངས་དཀར་ཕལ་ཆེར་ལོ་གསུམ་ཙམ་ཡིན་རྒྱུ་རེད། བྱིས་པ་རྣམ་རིག་བཀྲ་ཞིང་སྐྱེ་གཟུགས་ལེགས་པ། གཤིས་ཀ་བབ་ཆགས་ཤིང་འགྲོག་བདེ་བ་ཞིག་ཡིན་པའི་ཚོར་སྣང་ཞིག་སྤྲད་བྱུང་། ཁོའི་ཨ་ཕ་ནི་མི་ཁ་གྲག་རྒྱུར་དེ་ཙམ་མི་དགའ་ཞིང་གཟབ་ནན་ཅན་ཞིག་ཏུ་སྣང་། ཉི་མ་འཚོ་ནི་མོའི་རྩོམ་ཡིག་དག་གི་ཁྲོད་དུ་སྣང་བ་ལྟར་གུ་ཡངས་གཤིས་འཇམ། སྣང་བ་སྐྱིད་པོ་མགྲོན་ལ་དགའ་ཞིང་ཕྱི་ཐག་རིང་བ་ཞིག་རེད།

ཕ་མ་གཉིས་ཀ་ཤེས་ལྡན་པ་ཡིན་པའི་ཁྱིམ་ཚང་གི་བྱིས་པར་མཚོན་ན། སློབ་སྦྱོང་ནི་ཉིན་རེའི་འཚོ་བ་དང་དཔེ་ཆ་ནི་འབྲལ་མེད་རྩེད་རོགས་ཤིག་ཅི་ལ་མིན། ད་དུང་བྱིས་པར་མཚོན་ན་ནར་སོན་སའི་ཁོར་ཡུག་དེ་ཡང་ཧ་ཅང་གལ་ཆེ་བ་ཞིག་སྟེ། གངས་དཀར་སྐྱེས་ནས་ད་བར་དུ་ཁོ་ཚང་གནས་ས་དེ་ནི་བོད་ཀྱི་རིག་གཞུང་སྣ་མང་ཞིག་གི་དཀྱིལ་འཁོར་ཏེ། རྡ་ཤོད་ནོར་བུ་གླིང་ག་ཞེས་པ་བོད་ཀྱི་ཆོས་དང་རིག་གཞུང་གི་ཐོན་རྫས་འདྲ་མིན་སྟོང་ཕྲག་མང་པོ་ཞིག་བཟོ་སྐྲུན་བྱེད་སའི་ཚོགས་སྡེ་ཞིག་ཏུ་འཚར་ལོངས་བྱུང་དང་འབྱུང་བཞིན་ཡོད་པས། ཁོས་ཉི་མ་རེ་རེ་བཞིན་མཐོང་ཐོས་མྱོང་གསུམ་བྱེད་ཡུལ་དུ་གྱུར་པའི་ནོར་གླིང་གི་བོད་ལུགས་ཁང་བརྩེགས་དེ་དག་གི་ཕྱི་ནང་གི་བཀོད་པ། ཡིག་དྲུག་སོགས་ཀྱི་གཟུངས་སྔགས་ཀྱིས་ཕྱུར་བུར་གཏམས་པའི་མ་ཎི་འཁོར་ལོ་ (སྐབས་དེར་ནོར་གླིང་དུ་མ་ཎི་ཆུ་འཁོར་ཞིག་ཀྱང་མཐོང་།) དང་ཚོས་སྣ་ལྔ་ལྡན་གྱི་དར་ལྕོག་སྣ་ཚོགས། ཆོས་ལུགས་ཀྱི་ནང་དོན་འདྲ་མིན་ལྡན་པའི་ཐང་ཀ་དང་སྐུ་བརྙན་སྣ་ཚོགས་དང་། བོད་ཆོལ་ཁ་གསུམ་གྱི་ཁྱད་ཆོས་ལྡན་པའི་གྱོན་ཆས་འདྲ་མིན། ཐ་ན་བོད་ལུགས་ཀྱི་ཁུག་མ་ཆེ་ཆུང་དང་བསང་སྤོས་སྣ་ཚོགས་སོགས་ཏེ། གངས་དཀར་གྱིས་རང་ཁྱིམ་གྱི་སྒོ་ཕྱི་ནང་ཀུན་ནས་ཉིན་མཚན་དུས་དྲུག་ཏུ་བོད་རང་གི་ཁྱད་ཆོས་ལྡན་པའི་རིག་གཞུང་གི་མཚོན་རྟགས་མང་པོ་ཞིག་གི་བྱིན་རླབས་རམ་རྫོགས་མཐའ་བྲལ་བ་ཞིག་མ་བཅོས་རང་བྱུང་དུ་ཁོའི་གཟུགས་པོ་ཆུང་ཆུང་དེའི་ཁྲག་རྩའི་ནང་དུ་བཞུར་གྱིན་པ་དང་རྒྱུ་བཞིན་པ་དེ་ཚོར་ཐུབ།

དེ་ལས་ཀྱང་གལ་ཆེ་བ་ཞིག་སྟེ། གངས་དཀར་གྱི་ཨ་མ་ཉི་མ་འཚོས་འདས་པའི་ལོ་མང་པོ་ཞིག་གི་རིང་ལ། དཀའ་སྤྱད་ལྷོད་མེད་ཀྱིས་ལས་ཞོར་དུ་བྱིས་པའི་ཀློག་དེབ་མང་པོ་ཞིག་རང་གི་སྙིང་ནས་གཅེས་པའི་བུ་ཆུང་གངས་དཀར་དང་ཁོའི་ནུ་བོ་ཆུང་ཆུང་དེ། ད་དུང་གངས་དཀར་འདྲ་བའི་གངས་རིའི་བྱིས་པ་ཁྲི་སྟོང་གི་ཆེད་དུ་དམིགས་ནས་སྒྱུར་དཔར་འགྲེམ་གསུམ་གྱི་ཕྱོགས་སུ་ཉིན་མོའི་ཟས་དང་མཚན་མོའི་གཉིད་ཐེབས་བཅག་སོང་ལ། བོད་ཕྱི་ནང་གིས་མཚོན་པའི་རྒྱལ་ཁབ་འདྲ་མིན་དུ་ཡོད་པའི་ཉི་མ་འཚོ་བཟའ་ཟླ་གཉིས་དང་འདྲ་བའི་ཕ་མ་མང་པོ་ཞིག་གིས་ཀྱང་རང་རང་གི་བྱིས་པ་ཚོའི་ཆེད་དུ་དམིགས་ནས། ཉི་མ་འཚོས་བསྒྱུར་ཏེ་བཀྲམས་པའི་བྱིས་པའི་ཀློག་དེབ་དེ་ཚོ་མངགས་ཉོ་བྱས་དང་བྱེད་བཞིན་འདུག་པ་ནི་ཅི་འདྲའི་དགའ་འོས་པ་ཞིག་རེད་ཨང་། ང་ཚོས་ནམ་རྒྱུན་ཁྱིམ་ཚང་སློབ་གསོ་ཞེས་བསྐྱར་ཟློས་ཡང་ཟློས་བྱེད་བཞིན་ཡོད་པ་ལྟར། ཁྱིམ་ཚང་དེའི་ཨ་མའམ་ཡང་ན་ཨ་ཕས་བྱིས་པའི་ཀློག་དེབ་རྩོམ་པ་དང་སྒྱུར་བ། ཉོ་བ་དང་ཀློག་པ་སོགས་བྱེད་རྒྱུ་ནི་ཐད་ཀར་རང་གི་ཁྱིམ་དེའི་བྱིས་པ་དེ་དང་དེར་ཤུགས་རྐྱེན་ཐེབས་ཐུབ་པ་ཞིག་ཡིན་ལ། བྱིས་པར་དཔེ་དེབ་དང་ཡི་གེ་ངོ་སྤྲོད་བྱེད་རྒྱུ་ཙམ་ཞིག་མ་ཡིན་པར། རང་གི་བྱིས་པ་དང་ལྷན་དུ་བོད་རང་གི་ཕ་སྐད་མ་གདངས་སྤྱད་དེ་ཁ་བརྡ་བྱེད་རྒྱུ་འདི་ནི་ཧ་ཅང་གནད་འགག་ཅིག་ཡིན་ལ། དེ་ལྟ་བུའི་ཁ་བརྡ་བྱེད་སྐབས་ཀྱང་ཚིག་གང་སྙན་སྙན་དང་ནང་དོན་གང་ཞི་བདེ་ལྷག་བསམ་དང་ཡ་རབས་དྲང་བདེན་དང་ཐད་ཀར་དང་ཤུགས་ནས་འབྲེལ་ཡོད་པ་ཞིག་ནི་ཅི་བས་ཀྱང་གལ་ཆེ་བ་ལགས། བྱིས་སྒྲུང་གིས་བྱིས་པའི་ཤེས་ཡོན་དང་མི་གཤིས། ད་ལྟའི་མི་ཚེ་དང་མ་འོངས་པའི་མདུན་ལམ་བཅས་ལ་ཤུགས་རྐྱེན་ཧ་ཅང་ཆེན་པོ་ཞིག་ཐེབས་བཞིན་ཡོད་པས། བྱིས་སྒྲུང་ཕུན་སུམ་ཚོགས་པ་ཡོད་པའི་མི་རིགས་དེའི་མི་རབས་རྗེས་མར་རེ་བ་ཡོད་པ་དང་། བྱིས་སྒྲུང་ལ་མཐོང་ཆེན་མི་བྱེད་པའི་མི་རིགས་དེའི་མི་རབས་རྗེས་མ་དག་ནི་ཕྱོགས་གང་ཅིའི་ཐད་ནས་རྗེས་ལུས་ཡིན་པ་ནི་ཟུར་བལྟས་ལེབ་མཐོང་རེད།

རྡ་སའི་བོད་ཁྱིམ་སློབ་གྲྭ་ལ་མཚོན་ན། ཕྱིར་སྡོད་བོད་རིགས་བྱིས་པ་ཁྲི་སྟོང་མང་པོ་ཞིག་གི་ཤེས་རིག་གི་ཕ་ས་མ་ཡུལ་ཡིན་པས། གངས་དཀར་གྱིས་ཀྱང་ནོར་བུ་གླིང་ག་ནས་གོམ་པ་ཆུང་ཆུང་འོད་དུ་འཚེར་བ་རེ་རེ་རྡ་སའི་བོད་ཁྱིམ་གྱི་ཕྱོགས་སུ་སྤོས་སོང་། གོམ་པ་དེ་ཚོའི་སྣེ་མོ་དེར། གངས་དཀར་དང་ཤ་རུས་གདུང་བརྒྱུད་གཅིག་པའི་བོད་རིགས་བྱིས་པ་སྟོང་ཕྲག་དུ་མའི་བདེ་སྐྱིད་ཀྱི་དགོད་སྒྲ་དང་མ་འོངས་པའི་ཕུགས་བསམ། སློབ་སྦྱོང་གི་རྔུལ་ཆུ་དང་གཅེས་འོས་པའི་འཛུམ་མདངས་ཡོད་པ་རེད། གངས་དཀར་གྱིས་རང་གི་ཉིན་རེའི་སློབ་སྦྱོང་རེའུ་མིག་དེ་ཡང་བོད་ཡིག་ནང་བྲིས་འདུག་ཅིང་། ཁོས་བཤད་པའི་སྐད་ཆ་དེ་ཚོ་ཡང་སྦྲགས་སྐད་དང་མ་འདྲེས་པའི་བོད་སྐད་གཙང་མ་ཞིག་རེད་ཨང་། འདི་གཅིག་པོས་ཀྱང་དབྱིན་སྐད་མ་གཏོགས་མི་བཤད་པའི་ཨ་རི་དང་ཡོ་རོབ་སོགས་ནུབ་སྡོད་བོད་རིགས་བྱིས་པ་ཕལ་མོ་ཆེ་ཞིག་མུན་ནག་གི་ཁྲོད་དུ་འཚོ་གནས་བྱེད་བཞིན་པ་འདི་ངའི་ཡིད་ལ་མི་འཆར་དབང་མེད་ཅིག་བྱུང་། འགྲོ་བ་མི་སུ་ཞིག་ཡིན་ཡང་རང་ཉིད་འཚོ་གནས་བྱེད་ས་དེར་རང་གི་ཕ་སྐད་མ་ཡིག་བེད་སྤྱོད་མེད་ན། གནས་དེར་ཕྱིའི་ཁྲ་ཁྲ་ཟང་ཟིང་ཅི་ཙམ་རྒྱས་མིན་ལ་མ་ལྟོས་པར། དེ་ནི་མུན་ནག་གི་ཁྲོད་དུ་འཚོ་བ་ཡིན་ཞེས་བདག་གིས་ཁ་ཚོན་བཅད་ནས་བརྗོད་ཐུབ།

གངས་དཀར་ལ་བཅར་འདྲི་བྱས་པའི་བརྙན་ཐུང་དེའི་ནང་དུ་ཆེས་ཐོག་མར་དོ་སྣང་འབྱུང་སའམ་གནད་འགག་ཅིག་ནི་ཞོགས་ཟས་དེ་དག་གི་ཁྲོད་ཀྱི་རྩམ་པ་དེ་རེད། བུ་ཆུང་གངས་དཀར་གྱི་མདུན་ཅོག་སྟེང་གི་དྲི་ཞིམ་འཐུལ་བའི་རྩམ་ཇ་དེས་ང་ཚོ་ཚང་མར་བརྗོད་མི་ཚར་བའི་ཕ་མེས་ཡང་མེས་ཀྱི་གངས་རིའི་འདབས་དང་རྩྭ་ཐང་སྟེང་གི་གཏམ་རྒྱུད་ཁྲི་སྟོང་མང་པོ་ཞིག་ཕྱིར་དྲན་བྱེད་དུ་བཅུག་མ་སོང་ངམ། མ་མཐར་ཡང་ང་ལ་མཚོན་ན་དེ་འདྲ་རང་ཡིན་པ་སྟེ། དེང་སྐབས་བོད་ཕྱི་ནང་གི་བོད་མི་མང་པོ་ཞིག་གིས་བོད་ཟས་མི་བཟའ་བ་དང་བོད་ལྭ་མི་གྱོན་པ། བོད་མགོ་མི་བྱེད་པ་དང་(བུད་མེད་ཚོས་སྐྲ་མི་སླ་བ་དང་སྐྱེས་པ་ཚོས་སྐྲ་རིང་པོ་མི་འཇོག་པ་ལ་གོ་དགོས།) བོད་སྐད་མི་བཤད་པ་སོགས། བོད་ཀྱི་རིག་གཞུང་རྒྱུན་འཛིན་བྱེད་པའི་ཕྱོགས་སུ་དགག་སྒྲ་དགུ་བརྩེགས་ཀྱི་དུས་རབས་ཤིིག་ཏུ་བསླེབས་ཡོད་པས། གངས་དཀར་གྱིས་བརྗོད་པ་བཞིན། བྱིས་དེབ་ཀློག་པའི་གོམས་སྲོལ་གྱིས་སྔོན་ཆད་མ་ཤེས་པའི་ཐ་སྙད་མང་པོ་ཞིག་ཤེས་ཡོང་བ་དང་། མ་འོངས་པར་མི་རིགས་སྤྱི་དང་བྱེ་བྲག་ལ་ཕན་པའི་བསམ་བློ་བོད་པའི་བྱིས་པ་ཞིག་ཏུ་འཚར་བའི་མི་ཚེའི་བརྒྱུད་རིམ་ལ་བསམས་ན། བལྟས་མ་ཐག་ཏུ་ཆེས་སྟབས་བདེ་ཡིན་པའི་བཅར་འདྲི་འདི་ཡི་རྒྱབ་ལོགས་སུ་གངས་དཀར་གྱི་ཕ་མ་གཉིས་ཀྱི་དཀའ་སྤྱད་འབད་བརྩོན་གྱི་རྔུལ་ཆུ་དང་། གངས་དཀར་རང་ཉིད་ཀྱི་ཆུ་ཐིགས་བསགས་ཏེ་རྒྱ་མཚོར་གྲུབ་པའི་གྲུབ་འབྲས་གཡུར་དུ་ཟ་ཞིང་འོད་དུ་འཚེར་བ་ཞིག་མཐོ་རུ་བརྩེགས་ཤིང་དཔང་དུ་བསྲིངས་འདུག བོད་རིགས་བྱིས་པ་འདི་ཚོའི་ཕ་མ་དང་དགེ་རྒན། གྲོགས་པོ་དང་གྲོགས་མོ་སོགས་གང་ཡང་རུང་བ་ཞིག་ཡིན་པའི་ངེད་ཅག་ལ་མཚོན་ན། གངས་དཀར་ལྟ་བུའི་གངས་ལྗོངས་ཀྱི་མི་རབས་རྗེས་མ་ཚོའི་སློབ་སྦྱོང་གི་ཁ་ཕྱོགས་དང་མི་གཤིས་ཀྱི་མཛེས་པ། སྤྱི་ཚོགས་ཀྱི་འགན་འཁྲི་དང་མ་འོངས་པའི་མདུན་ལམ་སོགས་ལ་མ་མཐའ་ཡང་སེམས་ཁུར་ཞིག་ཅིས་ཀྱང་བྱེད་དགོས། གངས་དཀར་གྱིས་དཔེ་ཀློག་གི་བྱ་འགུལ་ཞིག་ཀྱང་སྤེལ་བཞིན་ཡོད་པ་དང་། དེ་ནི་བྱིས་པའི་ལྷན་སྐྱེས་ཀྱི་ནུས་པ་དང་སློབ་སྦྱོང་གི་སྤྲོ་སྣང་གོང་འཕེལ་དུ་གཏོང་རྒྱུར་ཧ་ཅང་གལ་འགངས་ཆེ་བ་ཞིག་ཡིན།

བྱིས་པ་ཞིག་གིས་རང་གི་ཕ་མེས་ཀྱི་རིག་གཞུང་རྒྱུན་འཛིན་བྱེད་ཐུབ་མིན་དེ་ནི། ཆེས་ཐོག་མར་ཕ་མ་དང་ལྷན་དུ། དེ་ནས་དགེ་རྒན་དང་ལྷན་དུ། དེ་ནས་དཔེ་དེབ་དང་ལྷན་དུ། དེ་ནས་ཁོར་ཡུག་དང་མཉམ་དུ་རིག་གཞུང་དེ་བེད་སྤྱོད་བྱེད་པ་བཅས་ལ་རག་ལས་པ་དང་། གངས་དཀར་གྱིས་བསླབས་ཟིན་པ་དང་སློབ་བཞིན་པའི་བོད་རང་གི་ཁྱད་ཆོས་ལྡན་པའི་ཤེས་ཡོན་དེ་དག་གི་མ་འོངས་པ་ལ་ཡང་ང་ཚོས་བསམ་བློ་གཏིང་ཟབ་ཅིག་མི་གཏོང་ཀ་མེད་ཡིན། གངས་དཀར་གྱི་དྭངས་གཙང་གི་བྱིས་བློ་དེ་ནི་དཀར་གཙང་གི་གངས་རི་ཆུང་ཆུང་ཞིག་ཡིན། དེའི་ཉིན་རྒྱབ་ཀུན་ཏུ་ཕ་མ་དང་དགེ་རྒན། གྲོགས་པོ་དང་ཁོར་ཡུག་ཀུན་ནས་ཁ་བའི་འདབ་མ་ཁྲི་སྟོང་མང་པོ་ཞིག་བབས་དང་འབབ་བཞིན་ཡོད་པས། དུས་ཚོད་དང་ཉི་མ། གཟའ་འཁོར་དང་ཟླ་བ། ལོ་འཁོར་དང་བསམ་གཞིག་མང་པོ་ཞིག་བརྒྱུད་རྗེས། གངས་དཀར་གྱི་མི་རབས་དེའི་ཁྲོད་དུའང་གངས་དཀར་ལྟ་བུའི་བོད་གངས་ཅན་པའི་ཤེས་རིག་ལ་དུང་བ་ཟབ་ཅིང་། བོད་ཀྱི་མི་རིགས་འདིའི་མ་འོངས་པའི་མི་རབས་ལ་རེ་བ་ཞིག་འདུག་ཨང་སྙམ་པའི་སྤོབས་པ་སྟེར་ཐུབ་པའི་བྱིས་པ་གང་ལ་གང་འཚམ་ཞིག་ཡོད་པ་འདི་ལ་བསམས་ན། ཀློག་པ་པོ་ཁྱེད་ཅག་ཀྱང་བསྟན་འཛིན་གངས་དཀར་གྱི་ཕ་མ་དང་འདྲ་བར་སྨོན། ཁྱེད་ཅག་གི་སྙིང་ཉེ་བའི་བྱིས་པ་དེ་དག་ཀྱང་བསྟན་འཛིན་གངས་དཀར་དང་མཚུངས་པར་ཤོག།