དེ་རིང་རྒྱ་གར་རྒྱལ་ས་ལྡི་ལིར་བོད་ཀྱི་གཞོན་ནུ་ལྷན་ཚོགས་ཀྱིས་རྒྱ་ནག་གཞུང་ཚབ་ཁང་གི་མདུན་ཐང་དུ་ངོ་རྒོལ་བྱེད་སྐབས་འཛིན་བཟུང་བྱས་པ་རྣམས་ཕྱི་དྲོའི་ཆུ་ཚོད་ལྔ་པར་ཀློད་འདུག
དེ་རིང་སྔ་དྲོའི་ཆུ་ཚོད་ ༡༡ ཐོག་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དང་ས་གནས་ཁག་ཁ་ཤས་ནས་ཡོང་བའི་ས་གཞོན་རྒྱུན་ལས་མི་གྲངས་ལྔ་བཅུ་ཙམ་གྱིས། གསུམ་བཅུའི་དུས་དྲན་ཐེངས་ ༦༢ པ་སྲུང་གཙི་དང་འབྲེལ་རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གི་མདུན་ཐང་དུ་ངོ་རྒོལ་སྐད་འབོད་བྱས་ཡོད་པ་དང་། ངོ་རྒོལ་སྐད་འབོད་མགོ་བཙུགས་ཏེ་སྐར་མ་ཁ་ཤས་རྗེས་རྒྱ་གར་གྱི་ཉེན་རྟོག་པས་ཁོང་ཚོ་འཛིན་བཟུང་གིས་སྤྱི་སྤྱོད་རླངས་འཁོར་ཞིག་གི་ནང་བཅུག་ཏེ། རྒྱ་ནག་གཞུང་ཚབ་ཁང་གི་ཉེ་འགྲམ་ཉེན་རྟོག་ཁང་མཱན་དིར་མར་གཱ་(Mandir Marg)ཞེས་པར་བཀག་ཉར་བྱས་ཡོད་པ་རེད། ངོ་རྒོལ་བ་ཚོས་ཟེར་ན་ཁོང་ཚོས་ངོ་རྒོལ་སྐད་འབོད་བྱེད་སྐབས་རྒྱ་ནག་གཞུང་ཚབ་ཁང་གི་རྒྱ་མི་རེ་གཉིས་ཕྱིར་ཐོན་ཏེ་བརྙན་དང་པར་བརྒྱབས་སོང་ཟེར།
ལྡི་ལི་ས་གནས་བོད་ཀྱི་གཞོན་ནུ་ལྷན་ཚོགས་ཀྱི་རྒྱུན་ལས་རྣམས་ཀྱིས་རྒྱ་གར་དཔོན་རིགས་དང་ཉེན་རྟོག་མགོ་བ་ཚོར་འབྲེལ་བ་བྱས་རྗེས། ངོ་རྒོལ་བ་རྣམས་ཉེན་རྟོག་པས་ཕྱི་དྲོའི་ཆུ་ཚོད་ ༥ པའི་སྟེང་ཉེན་རྟོག་ཁང་ནས་ཀློད་གྲོལ་བཏང་ཡོད་པ་དང་། ཁོང་ཚོ་བསམ་ཡས་གླིང་བོད་སྒར་དུ་འབྱོར་སྐབས་ལྡི་ལི་བསམ་ཡས་གླིང་ས་གནས་བོད་ཀྱི་གཞོན་ནུ་དང་བུད་མེད་ལྷན་ཚོགས། དེ་བཞིན་མི་མང་རྣམས་ཀྱིས་ཁ་བཏགས་གཡོགས་ཏེ་སྣེ་ལེན་དང་ཕེབས་བསུ་ཞུས་སོང་།
ལོ་ལྟར་བོད་ཀྱི་གཞོན་ནུ་ལྷན་ཚོགས་ཀྱི་སྣེ་ཁྲིད་དེ་ལྡི་ལི་མཐོ་སློབ་ཀྱི་མི་རིགས་སློབ་ཕྲུག་དང་མི་མང་མི་ཉུང་བས་གསུམ་བཅུའི་དུས་དྲན་ཉིན་རྒྱ་ནག་གཞུང་ཚབ་ཁང་དུ་ངོ་རྒོལ་སྐད་འབོད་བྱས་ཡོད་ཀྱང་། འདི་ལོར་ཏོག་དབྱིབས་གཉན་རིམས་ཀྱི་རྐྱེན་པའི་ད་ལྟ་སློབ་གྲྭ་དང་མཐོ་སློབ་ཏུ་རྒྱུན་ལྡན་གྱི་སློབ་ཁྲིད་བྱེད་ཀྱི་མེད་སྟབས། མཐོ་སློབ་ཀྱི་སློབ་མ་ཚོས་མཉམ་ཞུགས་ཐུབ་མེད་པ་རེད།
རྒྱལ་ས་ལྡི་ལི་གསར་འགོད་པ་ཉི་མ་ཚེ་རིང་།
