ཕྱི་ཚེས་ ༡༡ ནས་ ༡༣ བར་དུ་༧གོང་ས་རྒྱལ་བ་རིན་པོ་ཆེ་མཆོག་ནས་དྲ་ལམ་ཐད་གཏོང་བརྒྱུད་སོག་རིགས་གཞོན་སྐྱེས་ཚོར་ཚན་རིག་དང་ནང་ཆོས་ཀྱི་སྐོར་ལ་བཀའ་སློབ་དང་ཆོས་འབྲེལ་བཀའ་དྲིན་སྐྱོང་བཞིན་འདུག
དེ་རིང་ཕྱི་ཚེས་ ༡༡ ཉིན་༧གོང་ས་མཆོག་གིས་སོག་རིགས་གཞོན་སྐྱེས་ཚོར་ཚན་རིག་དང་ནང་ཆོས་ཀྱི་སྐོར་ནས་བཀའ་སློབ་དང་དྲི་བ་དྲིས་ལན་གནང་སྐབས། ༧གོང་ས་རྒྱལ་བ་རིན་པོ་ཆེ་མཆོག་ནས་ལོ་སར་གྱི་འཚམས་འདྲི་མཛད་པ་དང་སྦྲགས། ཧོར་གྱི་མི་རིགས་རྣམས་ལོ་རྒྱུས་ཀྱི་ཐོག་ནས་ནང་པའི་ཆོས་བྱེད་མཁན་དང་ནང་པའི་ཆོས་དེ་བོད་གངས་ཅན་ལྗོངས་ནས་དར་ཏེ་བོད་སོག་གཉིས་ལ་ཐུན་མོང་མ་ཡིན་པའི་འབྲེལ་བ་ཡོད་པ་དང་། རྒྱལ་མཆོག་སྐུ་ཕྲེང་གསུམ་པ་བསོད་ནམས་རྒྱ་མཚོ་མཆོག་སོག་ཡུལ་དུ་ཕེབས་ཏེ། སངས་རྒྱས་ཀྱི་བསྟན་པ་ལ་ཐོས་བསམ་སྒོམ་གསུམ་དང་བཤད་སྒྲུབ་ཟུང་འབྲེལ་གྱི་ཐོག་ནས་དར་བར་མཛད་པ་དང་། ཏཱ་ལའི་བླ་མ་ཞུ་བའི་མཚན་ཡང་སོག་ཡུལ་ནས་བྱུང་སྟེ་རྒྱལ་དབང་སྐུ་ཕྲེང་རིམ་བྱོན་དང་ཐུན་མོང་མ་ཡིན་པའི་འབྲེལ་བ་ཡོད་པ་ལྟར། སོག་པོ་རྣམས་དད་པ་བརྟན་པོ་ཡོད་སྐོར་གསུངས།
ཡང་༧གོང་ས་མཆོག་གིས། སྤྱིར་འཛམ་གླིང་འདིའི་སྒང་ལ་ཆོས་ལུགས་མི་འདྲ་བ་མང་པོ་ཡོད་རེད། བཅོམ་ལྡན་འདས་ཀྱི་སྐབས་སུའང་གདུལ་བྱའི་ཁམས་དང་མོས་པ་ཚང་བ་དགོས་ཀྱི་རེད་གསུངས་ཀྱི་འདུག བཅོམ་ལྡན་འདས་ཀྱིས་ཚང་མ་ནང་པ་བྱ་དགོས་པ་ཕལ་ཆེར་གསུངས་ཡོད་མ་རེད། བཅོམ་ལྡན་འདས་ཀྱི་ཆོས་འདི་དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟགས་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། ཟེར་བ་འདི་ཚན་རིག་དང་མཐུན་པ། རྒྱུ་མཚན་ལྡན་པ་ཞིག་དང་བློ་གུ་ཡངས་པོའི་ཐོག་ནས་གསུངས་འདུག སངས་རྒྱས་པའི་ཆོས་འདི་དམིགས་བསལ་གྱིས་རྒྱུ་མཚན་ལ་བརྟག་དཔྱད་བྱེད་ཀྱི་ཡོད་རེད། བྱས་ཙང་སོག་པོའི་ཆོས་གྲོགས་ཚོར་ཆ་བཞག་ན། སངས་རྒྱས་པའི་ཆོས་ལ་དད་པ་གཅིག་པོའི་ཐོག་ནས་མི་འགྲོ་བར་སངས་རྒྱས་ཀྱི་ཆོས་གང་འདྲ་ཡིན་མིན་རྩད་གཅོད་བྱས་པའི་ཐོག་ནས་སངས་རྒྱས་ཀྱི་ཆོས་ལ་ཤེས་ནས་དད་པ་ཐོབ་པའི་དད་པ་དགོས་ཀྱི་ཡོད་རེད། སྤྱིར་བཏང་ནང་པའི་ཡུལ་གྲུ་ཤྲིལངྒ (Sri Lanka) དང་འབར་མ། ཐའེ་ཝན་བཅས་སུ་ནང་པ་དར་ཁྱབ་ཆེན་པོ་ཡོད་པ་རེད། ཁོ་ཚོ་པཱ་ལིའི་གཞུང་ལ་བརྟེན་ནས་དད་པ་གཙོ་བོ་མ་གཏོགས་བཅོམ་ལྡན་འདས་ཀྱི་གསུངས་པ་རེད་ཟེར་ནས་ལུང་ལ་གཙོ་བོ་བསྟེན་གྱི་ཡོད་པ་ཆགས་བསྡད་ཀྱི་འདུག བོད་ལ་ཁྲི་སྲོང་ལྡེའུ་བཙན་གྱིས་མཁན་ཆེན་ཞི་བ་འཚོ་གདན་ཞུ་གནང་ནས་ནཱ་ལེནྡྲའི་ཆོས་བརྒྱུད་བོད་ལ་ངོ་སྤྲོད་གནང་པ་རེད། ནཱ་ལེནྡྲའི་ཆོས་བརྒྱུད་འདི་ཀླུ་སྒྲུབ་ཡབ་སྲས་ལ་སོགས་པས་རྒྱ་གར་གྱི་རིག་པ་སྨྲ་བ། མཁས་པའི་དབང་པོ་དེ་ཚོས་སློབ་གཉེར་གནང་བ་དང་བསྟན་པའི་བྱ་བ་མཛད་ཡུལ་ནཱ་ལེནྡྲའི་ཆགས་ཀྱི་ཡོད་རེད། བོད་གངས་ཅན་གྱི་ལྗོངས་སུ་ནཱ་ལེནྡྲའི་ཆོས་བརྒྱུད་འདི་མཁན་ཆེན་ཞི་བ་འཚོས་བཙུགས་གནང་བ་རེད་ལ། ཆོས་བརྒྱུད་འདི་ལུང་ལ་བསྟེན་གྱི་རེད་དེ་གཙོ་བོ་རིག་པ་རང་གི་ཐོག་ནས་སྒྲུབ་ཀྱི་ཡོད་རེད། དེ་སྔ་བོད་ལ་ཡོད་དུས་ཚན་རིག་པ་དང་འབྲེལ་བ་ཡོད་མ་རེད། རྒྱ་མི་གུང་ཁྲན་གྱིས་ཆོས་ཟེར་བ་འདི་རྨོངས་དད་རེད་བཤད་ཀྱི་ཡོད་རེད། རྒྱ་གར་ལ་བསླེབས་ཏེ་ཆོས་ལུགས་རིས་སུ་མ་ཆད་པའི་མཁས་པ་མང་པོར་ཐུག་ནས་བོད་ཀྱི་ནང་པའི་ཆོས་ལ་རིག་པས་བརྟག་དཔྱད་བྱེད་ཀྱི་ཡོད་རེད། མདོར་ན་བཅོམ་ལྡན་འདས་ཀྱི་བཀའ་ཡིན་ནའང་རིག་པ་དང་འགལ་ན་བཞག་ནས་འགྲོ་བ་མ་གཏོགས་བཅོམ་ལྡན་འདས་ཀྱི་གསུངས་པ་དེ་དེ་བཞིན་ནོ་ལབ་ཀྱི་ཡོད་མ་རེད། རྒྱ་གར་ལ་བསླེབས་ཏེ་ཚན་རིག་པ་དང་མཉམ་དུ་འབྲེལ་བ་བྱས་དུས། ང་ཚོས་ཚན་རིག་གི་རིག་གནས་གསར་པ་དེ་ཚོ་ཉར་རྒྱུ་དང་གཙོ་བོ་སེམས་ཁམས་རིག་པའི་སྐོར་ལ་ཚན་རིག་པ་ལ་བཤད་རྒྱུ་མེད། ནཱ་ལེནྡྲའི་ཆོས་བརྒྱུད་ཀྱི་སེམས་ཁམས་རིག་པའི་སྐོར་ལ་འགྲེལ་བཤད་རྒྱག་དུས་ཚན་རིག་པ་ཚོས་དགའ་པོ་བྱེད་ཀྱི་འདུག བོད་དང་སོག་པོ་ནཱ་ལེནྡྲའི་ཆོས་བརྒྱུད་ཡིན་པ་ཤེས་པའི་ཐོག་ནས་ཚད་མ་རིག་པ་ལ་གཙོ་བོ་སློབ་སྦྱོང་བྱ་རྒྱུ་ནི་གལ་ཆེན་པོ་རེད། བོད་དང་སོག་པོ་ཚོ་ཚན་རིག་དང་མཉམ་དུ་འགྲོ་ཐུབ་པ་ཏན་ཏན་འདུག ངོས་རང་གི་ཉམས་མྱོང་གི་ཐོག་ནས་ཞུ་ཡི་ཡོད། དེར་བརྟེན་སོག་རིགས་ཚོས་ཚན་རིག་སློབ་སྦྱོང་བྱེད་རྒྱུ་དང་སངས་རྒྱས་པའི་ཚད་མ་རིག་པ་དང་སེམས་ཁམས་རིག་པ། ལྟ་གྲུབ་ཟུང་འབྲེལ་བྱས་ནས་སློབ་སྦྱོང་བྱེད་རྒྱུ་བྱུང་ན་ཡག་པོ་ཡོང་གི་རེད། ཕྱོགས་གཅིག་ནས་སོག་པོ་ཁྱེད་ཚོ་ལ་རང་དབང་ཡོད་རེད། ཨུ་རུ་སུའི་ནང་ལའང་ནང་པའི་ཆོས་ལ་དོ་སྣང་ཡོད་པ་ཕལ་ཆེར་ཤུགས་ཆེ་རུ་ཆེ་རུ་འགྲོ་ཡི་ཡོད་པ་འདྲ་པོ་འདུག དེ་ཙམ་དུ་མ་ཟད་ནུབ་ཕྱོགས་རྒྱལ་ཁབ་ནང་ལའང་སེམས་ཁམས་རིག་པའི་སྐོར་ལ་དོ་སྣང་ཡོད་མཁན་ཚོས་དམིགས་བསལ་གྱིས་ནང་པའི་ལྟ་གྲུབ་ལ་དོ་སྣང་བྱེད་ཀྱི་འདུག དེ་སྔ་ནང་པ་དང་འབྲེལ་བ་མེད་མཁན་ཚོས་བོད་ཀྱི་ནཱ་ལེནྡྲའི་ཆོས་བརྒྱུད་ལ་དོ་སྣང་གསར་པ་བྱེད་སྐབས། ང་ཚོ་ཕ་མེས་ནས་ནཱ་ལེནྡྲའི་ཆོས་བརྒྱུད་འཛིན་མཁན་ཆགས་ཡོད་དུས། ང་ཚོས་དམིགས་བསལ་གྱིས་དོ་སྣང་བྱས་ནས་གཞོན་སྐྱེས་ཚོར་ཆོས་ཟེར་བ་རྨོངས་དད་ཡིན་མིན་བརྟག་དཔྱད་བྱས་ཏེ་སློབ་སྦྱོང་བྱེད་དགོས། སངས་རྒྱས་པའི་ཆོས་རིག་པའི་ལམ་ནས་ཤེས་པ་དང་གཉིས་ནས་སེམས་ཁམས་རིག་པ་ནང་བསམ་བློ་ལ་སྦྱར་ཡོང་དུས་སེམས་ལ་ཞི་བདེ་ཡོང་བ་དང་སེམས་ལྷོད་ལྷོད་ཆགས་ཏེ་གཟུགས་པོ་བདེ་པོ་ཡོང་བར་ཕན་ཐོགས་ཡོད་རེད། སོག་རིགས་སྤྱི་ཡོངས་དང་ལྷག་པར་དུ་སོག་པོའི་གཞོན་སྐྱེས་ཚོས་བོད་ཀྱི་ནཱ་ལེནྡྲའི་ཆོས་བརྒྱུད་འགྲེལ་བཤད་གང་འདྲ་རྒྱག་གི་ཡོད་པ་དང་། ཚན་རིག་པས་ནང་པའི་གཞུང་ནས་སེམས་ཁམས་རིག་པའི་འགྲེལ་བཤད་ལེན་གྱི་ཡོད་རེད། དེར་བརྟེན་སོག་པོ་ཚོས་དོ་སྣང་བྱས་ཏེ་རྒྱུ་མཚན་ལ་བསམ་བློ་བཏང་ནས་བརྟག་དཔྱད་བྱས་ན་ཕན་ཐོགས་ཡོང་གི་རེད། ཅེས་གསུངས་སོང་།
དྲི་བ་དྲིས་ལན་སྐབས། ནང་ཆོས་དང་ཚན་རིག་ཟུང་འབྲེལ་གྱི་ཐོག་ནས་ཉམས་ལེན་གང་འདྲ་བྱེད་དགོས་མིན་སྐོར་བཀའ་འདྲི་ཞུས་པར་༧གོང་ས་མཆོག་གིས། ནང་ཆོས་ཟེར་བ་དེ་སེམས་ཁམས་རིག་པ་དང་འབྲེལ་བ་ཞིག་ཆགས་ཀྱི་འདུག ནང་ཆོས་ཀྱི་ནང་ནས་སེམས་ལ་ཞེ་སྡང་དང་ཁོང་ཁྲོའི་དབང་གིས་སེམས་འཁྲུག་པ། ཆགས་སྡང་ཤུགས་དྲག་པོས་སེམས་འཁྲུག་བསྡད་པ་ཡོང་གི་ཡོད་རེད། ཆགས་སྡང་གཉིས་ཀྱི་གཉེན་པོ་བསྟེན་སྟངས་དཀོན་མཆོག་ལ་སྐྱབས་སུ་མཆི་ལབ་པ་གཅིག་པོ་མིན་པར་རྒྱུ་རྐྱེན་ལ་ཞིབ་འཇུག་བྱས་ནས་ཆགས་སྡང་གི་ཤུགས་ཆུང་དུ་བཏང་གི་ཡོད་རེད། ནང་པའི་ཆོས་ནས་གསུངས་པའི་རིག་པའི་འགྲོ་སྟངས་འདི་ཆོས་ཀྱི་བསླབ་བྱ་རེད། ནང་པའི་ཆོས་ཀྱི་བསླབ་བྱ་རེད་ཟེར་ནས་མ་བཞག་པར་ཚན་རིག་དང་མཐུན་པའི་སེམས་ཁམས་རིག་པ་ལ་བསྟེན་ཏེ་སེམས་ལ་མ་སྐྱིད་པ་ཡོང་དུས་སེམས་ཁམས་རིག་པའི་སྟེང་ནས་སེམས་ཀྱི་ཞི་བདེ་ཡོང་གི་ཡོད་རེད། ངོས་རང་གི་ངོ་ཤེས་པའི་ཚན་རིག་པ་མང་པོས་ནང་པའི་གཞུང་ནས་སེམས་ཁམས་རིག་པའི་ཐོག་ནས་སེམས་ཀྱི་ཞི་བདེ་སྒྲུབ་རྒྱུ་ཡོད་པ་དེ་ལ་དོ་སྣང་དང་དགའ་པོ་བྱེད་ཀྱི་འདུག དེར་བརྟེན་ནང་ཆོས་དང་ཚན་རིག་སྤྱི་ཡོངས་ཀྱི་ཐོག་ནས་དངོས་ཁམས་རིག་པ་དེ་ཚོ་སེམས་ཁམས་རིག་པ་དང་འབྲེལ་བ་མི་འདུག ཚན་རིག་ནང་ལ་དེ་སྔ་གཙོ་བོ་ཕྱིའི་མིག་གིས་མཐོང་བ་དེ་ཆགས་ཀྱི་ཡོད་རེད། བར་སྐབས་ཚན་རིག་ཡར་རྒྱས་ཕྱིན་ནས་ཕྱི་དངོས་པོའི་གནས་ཚུལ་ཙམ་མིན་པར་ནང་བསམ་བློའི་སྐོར་ལ་ཚན་རིག་པས་དོ་སྣང་བྱེད་ཀྱི་འདུག སེམས་ཁམས་རིག་པར་དོ་སྣང་བྱས་དུས་སེམས་ཁམས་རིག་པའི་འགྲེལ་བཤད་དེ་ནང་པའི་གཞུང་ལ་ཡོད་པ་མ་གཏོགས་ཆོས་ལུགས་གཞན་དག་ཕལ་ཆེ་བས་དད་པ་གཙོ་བོ་བྱས་པ་ཙམ་ལས་སེམས་ཁམས་རིག་པའི་ཐོག་ནས་རྒྱུ་མཚན་ལ་བསམ་བློ་བཏང་ནས་དཔྱད་པ་བྱ་རྒྱུ་དེ་མེད། སེམས་ཁམས་རིག་པར་དོ་སྣང་བྱེད་མཁན་ཚོས་ནང་པའི་གཞུང་ནས་གསུངས་པའི་སེམས་ཀྱི་ཞི་བདེ་སྒྲུབ་སྟངས་དང་ཆགས་སྡང་གིས་སེམས་དཀྲུག་ཡོང་དུས་ཤུགས་ཆུང་དུ་གཏོང་བར་ཚན་རིག་པ་ཚོས་དོ་སྣང་བྱེད་ཀྱི་འདུག ནང་ཆོས་དང་ཚན་རིག་སྤྱི་ཡོངས་ནས་བཤད་ན་དངོས་ཁམས་རིག་པའི་སྐོར་ལ་ནང་པའི་གཞུང་ལ་ཡོད་མ་རེད། ནང་ཆོས་ནང་ནས་སེམས་ཁམས་རིག་པ་གཙོ་བོ་རེད་འདུག ཅེས་སོགས་གསུངས་སོང་།
མཛད་འཆར་ལྟར་ན། སང་ཉིན་ཕྱི་ཚེས་ ༡༢ དང་ ༡༣ ཉིན་གཉིས་རིང་སོག་པོའི་དད་ལྡན་མི་མང་ལ་ནཱ་ལེནྡྲའི་པཎ་གྲུབ་བཅུ་བདུན་གྱི་གསོལ་འདེབས་དང་། རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་ཆོས་འབྲེལ་བཀའ་དྲིན་སྩལ་རྒྱུ་ཡིན་འདུག
གསར་འགོད་པ། བསྟན་འཛིན་ཕུར་བུ།
