སྲིད་སྐྱོང་བློ་བཟང་སེང་གེ་མཆོག་ནས་རྒྱ་གཞུང་གི་གླ་བ་དྲ་འབུ་ཚོས་དྲ་ཐོག་འཇབ་རྒོལ་བྱེད་ཐབས་ལ་ཤུགས་སྣོན་བྱེད་ཀྱི་ཡོད་པ་ལྟར་བོད་མིའི་སྒྲིག་འཛུགས་ཀྱིས་ཀྱང་ཆེད་ལས་མི་སྣ་གྲགས་ཅན་དེ་འདྲ་གླས་ཏེ་ཡར་རྒྱས་གཏོང་བར་ཕྱོགས་ཡོངས་ནས་འབད་བརྩོན་བྱེད་ཀྱི་སྐོར་སོགས་གསུངས་སོང་།
འདས་པའི་ལོ་གཅིག་གཉིས་ནང་བཙན་བྱོལ་བོད་མིའི་སྤྱི་ཚོགས་ནང་ནས་རྒྱ་ནག་གི་གསང་བའི་མྱུལ་ཞིབ་པ་འཛིན་བཟུང་བྱས་ཏེ། འབྲེལ་ཆགས་བོད་མི་གང་ཙམ་ཞིག་ལ་འདྲི་ཞིབ་བྱེད་བཞིན་ཡོད་པའི་གནས་ཚུལ་ཕྱི་ནང་གི་གསར་འགྱུར་བརྒྱུད་ལམ་མང་པོའི་ནང་ཐོན་རྗེས། སྤྱི་ཚོགས་ནང་གླེང་སློང་དང་དོགས་འགྲོགས་མང་པོ་བྱུང་ཡོད་པ་ལྟར། དེ་རིང་ཉིན་རྒྱབ་གྲོས་ཚོགས་ནང་ཨ་རིའི་སྐུ་ཚབ་དོན་ཁང་གི་སྔོན་རྩིས་སྐོར་ལ་བགྲོ་གླེང་གནང་སྐབས། ཕྱི་འབྲེལ་བཀའ་བློན་བློ་བཟང་སེང་གེ་མཆོག་གིས། ང་ཚོའི་སྤྱི་ཚོགས་ནང་ལ་རྒྱ་མིའི་སོ་བ་ཡོད་པ་དེ་གསལ་པོ་གསལ་རྐྱང་དང་། དེ་ལ་རྩོད་པ་གང་ཡང་མེད་པས་ཚང་མས་དེ་རིགས་ཀྱི་རྒྱབ་ལྗོངས་ལ་ཞིབ་འཇུག་དང་གཟབ་ནན་དགོས་སྐོར་གསུངས་སོང་།
སྤྱི་འཐུས་རྡོ་རྗེ་ཚེ་བརྟན་ལགས་ཀྱིས་རྒྱ་ནག་གཞུང་ནས་འཐབ་ཕྱོགས་གཅིག་གྱུར་ཁང་བརྒྱུད་ནས་བོད་མིའི་སྤྱི་ཚོགས་ནང་ཁུལ་ལ་དཀའ་ངལ་བཟོ་རྒྱུའི་ཐབས་ཇུས་འདིང་གི་ཡོད་པ་དང་། འདས་ལོར་ཨ་རིའི་གཞུང་གིས་ཨ་རིའི་དམག་མིའི་ནང་ཞུགས་མྱོང་མཁན་གྱི་ཉེན་རྟོག་མི་སྣ་ཞིག་འཛིན་བཟུང་བྱས་པ་དང་། མི་སྣ་དེས་རང་གི་གོ་གནས་བེད་སྤྱོད་བྱས་ཏེ་བཙན་བྱོལ་སྤྱི་ཚོགས་ཀྱི་གནས་ཚུལ་མཁོ་སྒྲུབ་ཙམ་མ་ཡིན་པར་གནོན་ཤུགས་སྤྲོད་ཐབས་ཀྱང་བྱས་ཡོད་སྟབས། དོགས་གཞིའི་འོག་འཛིན་བཟུང་བྱས་ཡོད་སྐོར་དང་། དེང་སང་ཨ་རི་དང་རྒྱ་གར་སོགས་རྒྱལ་ཁབ་མང་པོས་རྒྱ་ནག་ལ་དོགས་ཟོན་བྱས་པའི་ཐོག་ནས་ཞིབ་འཇུག་བྱེད་ཀྱི་ཡོད་པ་ལྟར། རང་རེའི་བོད་མིའི་སྒྲིག་འཛུགས་ངོས་ནས་དོགས་གཞི་ཅན་གྱི་མི་སྣ་རྣམས་རྩིས་སྤྲོད་སོགས་བྱེད་ཀྱི་ཡོད་མེད་བཀའ་འདྲི་ཞུས་སོང་།
བཀའ་འདྲི་དེར་ཕྱི་དྲིལ་བཀའ་བློན་བློ་བཟང་སེང་གེ་མཆོག་གིས། ཨ་རིའི་གཞུང་གིས་ནེའུ་ཡོག་ནས་རྒྱ་མིའི་སོ་བ་བཟུང་ནས་ཁ་མཆུ་བརྒྱབ་ཡོད་པ་རེད་ལ། ཁ་མཆུའི་དོན་ཚན་ནང་རྒྱ་ནག་གཞུང་ཚབ་ཀྱི་ལས་བྱེད་དང་ཁོ་གཉིས་བར་ལ་བཀའ་མོལ་རེ་གནང་ཡོད་མེད་ཀྱི་ཊེབ་ཐག་ཚང་མ་ཡིག་ཐོག་ལ་ཕབ་སྟེ་དྲ་རྒྱ་བརྒྱུད་བཀྲམ་ཡོད་པ་རེད། དེར་ཚང་མས་གཟིགས་རོགས་གནང་། དེ་གསལ་པོ་ཞེ་དྲགས་རེད། དེའི་ནང་སོ་བ་རང་བྱས་ནས་བེད་སྤྱོད་གཏོང་གི་ཡོད་པ་གསལ་པོ་རེད། དེ་བཞིན་དེ་སྔ་སི་ཝེ་ཌན་ (Sweden) ནས་ཀྱང་སོ་བ་འཛིན་བཟུང་བྱས་པ་རེད། སི་ཝེ་ཌན་གཞུང་རང་གིས་ཁ་མཆུ་བརྒྱབ་ནས་མཐའ་མ་དེར་གཞུང་གིས་ཕྱིར་སློག་གཏོང་རྒྱུའི་ཐག་གཅོད་བྱས་པ་རེད། སྦེལ་ཇམ་ (Belgium) ནང་དུའང་དེ་མཚུངས་ཀྱི་གནས་ཚུལ་བྱུང་བ་རེད། རྒྱ་གར་ལའང་ཉེ་ཆར་བྱུང་བ་རེད། ཆར་ལེ་ཕེན་ (Charlie Peng) གཅིག་པུ་མ་རེད། ད་དུང་བུ་ལོན་གཡར་མཁན་ཡིན་ཟེར་བའི་རྒྱ་མི་སྦྱིན་བདག་ཅིག་གིས་བོད་མི་གཉིས་ཀྱི་མིང་བཏོན་ཡོད་ལ། ཚགས་པར་སྒང་ལ་ཐོན་ཡོད་པ་རེད། དེར་བརྟེན་ཨ་རི་དང་སྦེལ་ཇམ་སོགས་ཀྱི་འབྲེལ་ཡོད་ལས་ཁུངས་ཚང་མས་རྒྱ་ནག་གཞུང་ཚབ་ཀྱིས་བོད་པ་བེད་སྤྱོད་བཏང་ནས་སོ་མྱུལ་བྱེད་ཀྱི་འདུག་ཟེར་གྱི་ཡོད་པ་རེད། དེ་ཁོ་ཚོས་འཛིན་བཟུང་རང་བྱས་ཏེ་སྟོན་གྱི་ཡོད་པ་རེད། དེ་བཞིན་ཨོ་གླིང་ནང་དུའང་ཡོད་པ་རེད། གཞུང་ཚབ་མཉམ་དུ་འབྲེལ་བ་བྱས་ཏེ་ལས་ཤོག་དང་ཚོགས་པའང་འཛུགས་ཀྱི་ཡོད་པ་རེད། དེ་དག་ཆ་ཚང་ལ་བལྟས་པ་ཡིན་ན། ང་ཚོའི་སྤྱི་ཚོགས་ནང་ལ་རྒྱ་མིའི་སོ་བ་ཡོད་པ་དེ་གསལ་པོ་གསལ་རྐྱང་རེད། དེར་རྩོད་པ་གང་ཡང་ཡོད་པ་མ་རེད། ཅེས་དང་། སྤྱི་ཚོགས་དྲ་ལམ་དུ་འུར་སྒྲ་སྒྲོག་མཁན་ཚོའི་རྒྱབ་ལྗོངས་ལ་ཞིབ་འཇུག་བྱེད་དགོས་པ་དང་། རྒྱ་ནག་གི་སོ་མྱུལ་བ་དེ་ཚོས་བོད་མིའི་འོས་བསྡུའི་ནང་དུའང་ཐེ་བྱུས་བྱེད་ཀྱི་ཡོད་པ་བརྗོད་མི་དགོས་སྐོར་གསུངས་སོང་།
དེ་བཞིན་ཁོང་གིས། འདས་ལོར་ང་ཚོས་དྲ་རྒྱ་བརྒྱུད་ནས་སུད་སིའི་ཇེ་ནི་ཝ་གླེང་སྟེགས་ (Geneva Forum) དང་འབྲེལ་ནས་ཚོགས་འདུ་ཉིན་གྲངས་གསུམ་ཚོགས་པ་རེད། སྐབས་དེར་རྒྱ་མི་ལ་ཕྱོགས་གཏོགས་དང་ང་ཚོར་སྐྱོན་བརྗོད་བྱེད་པའི་བོད་ཡིག་དང་དབྱིན་ཇི། རྒྱ་སྐད་ཐོག་གི་མཆན་ཁྲི་ ༥ ཐམ་པ་བརྒྱབ་པ་རེད། ང་ཚོས་སྐུ་མགྲོན་གདན་འདྲེན་ཞུས་ནས་བོད་ཀྱི་འགྲོ་བ་མིའི་ཐོབ་ཐང་དང་ཆོས་དད་རང་དབང་ཐོག་བཀའ་མོལ་གནང་གི་ཡོད་རེད་དེ། འོག་ལ་རྒྱ་མིའི་རྒྱུག་ཁྱི་དང་རྒྱ་མིའི་ཕོག་བཟའ་མཁན་ཚོས་མཆན་ཁྲི་ ༥ ཐམ་པ་རྒྱག་གི་ཡོད་པ་རེད། དེ་བཞིན་༧གོང་ས་མཆོག་གི་གསུང་ཆོས་རྣམས་རྒྱ་སྐད་ཀྱི་དྲ་རྒྱ་ནས་རྒྱང་སྲིང་གནང་སྐབས། དེར་མཆན་དང་སྐྱོན་བརྗོད་བྱེད་མཁན་ཁྲི་ཕྲག་མང་པོ་ཡོང་གི་ཡོད་པ་རེད། ཉིན་གསུམ་གྱི་ཚོགས་འདུ་ལ་མཆན་ཁྲི་ ༥ དང་ཆུ་ཚོད་ ༣ ལྷག་གི་གསུང་ཆོས་ལ་མཆན་ཁྲི་ཕྲག་མང་པོ་རྒྱག་གི་ཡོད་ན། རྒྱ་མིས་སྤྱི་ཚོགས་དྲ་ལམ་བརྒྱུད་ནས་བོད་པའི་སྤྱི་ཚོགས་ནང་ལ་དཀྲོག་གཏམ་སྤེལ་མཁན་ལས་བྱེད་ག་ཚོད་བཞག་ཡོད་པ་རེད་དམ། དེར་བརྟེན་སྤྱི་ཚོགས་དྲ་བ་བརྒྱུད་གནས་ཚུལ་སླེབས་པ་དེ་ཚོར་ཡིད་ཆེས་མ་བྱེད། ལྟ་མཁན་ཞིག་ཡིན་ནའང་ཞིབ་འཇུག་ཡག་པོ་བྱེད་དགོས་ཞེས་ཞུ་ཡི་ཡོད། ཅེས་དང་། སོ་སོའི་ལུང་ཚན་གྱི་སྐད་འཕྲིན་དང་སྤྱི་ཚོགས་དྲ་བའི་ནང་གཏན་གཏན་སོ་བ་འཛུལ་ཡོད་པ་རེད། དེའི་ནང་ནས་སྐད་ཤུགས་ཆེ་ཤོས་དང་ཧམ་པ་ཆེ་ཤོས། སྐྱོན་བརྗོད་ཆེ་ཤོས་སུས་བྱེད་ཀྱི་ཡོད་མེད་དང་། དེའི་རྒྱབ་ལྗོངས་ལོ་རྒྱུས་སོགས་བསྔོག་ཐུབ་པ་དགོས་ལ། སོ་སོའི་ངོས་ནས་སྤྱང་གྲུང་བྱས་ནས་སྡོད་དགོས་པའི་འབོད་སྐུལ་ཞུ་ཡི་ཡོད། ཅེས་གསུངས་སོང་།
སྤྱི་འཐུས་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་ནས་དེང་སྐབས་དྲ་ལམ་བརྒྱུད་ཚོགས་འདུ་སོགས་མང་པོ་ཞིག་འཚོག་དགོས་ཀྱི་ཡོད་པ་དང་། བོད་མིའི་སྒྲིག་འཛུགས་ཀྱི་ངོ་དེབ་ཀྱི་དྲ་ལམ་ཁག་དང་༧གོང་ས་རྒྱལ་བ་རིན་པོ་ཆེ་མཆོག་གི་དྲ་ལམ་ཁག་ཏུ་དྲ་འབུ་མང་པོ་ཞིག་གཏོང་གི་ཡོད་སྟབས། མ་འོངས་པར་དེ་ཚོ་དང་འབྲེལ་ནས་གདོང་ལེན་གནང་སྟངས་ཀྱི་ལམ་ཁ་ཞིག་ཡོད་མེད་བཀའ་འདྲི་གནང་བར། ཕྱི་འབྲེལ་བཀའ་བློན་བློ་བཟང་སེང་གེ་མཆོག་ནས་དྲ་རྒྱ་བརྒྱུད་མཆན་མང་པོ་ཞིག་རྒྱག་མཁན་ཡོད་པ་དང་། བོད་ཀྱི་སྒྲིག་འཛུགས་ཀྱི་དྲ་རྒྱ་བརྒྱུད་ནད་འབུ་མང་པོ་ཞིག་གཏོང་གི་ཡོད་པ་དང་། དེ་སྔོན་ནད་འབུ་ཞིག་སླེབས་པ་དང་ལྷན་ཁང་ཆ་ཚང་གི་གློག་ཀླད་སྒོ་བརྒྱབས་ཏེ་ནད་འབུ་འཚོལ་དགོས་ཀྱི་ཡོད་ནའང་། དེང་སྐབས་མཉེན་ཆས་མང་པོ་ཞིག་ཡར་རྒྱས་བཏང་སྟེ། ནད་འབུ་དེ་གང་དུ་ཡོད་ན་གློག་ཀླད་དེ་གཅིག་པུ་གཙང་སེལ་བྱས་ན་འགྲིག་པ་ཞིག་གི་གནས་སྟངས་ཆགས་ཡོད་པ་དང་། ནད་འབུ་མང་པོ་བཏང་ཡོད་ན་སོ་སོའི་གློག་འཕྲིན་ནང་མི་ཡོང་བར་ཐད་ཀར་སྙིགས་སྣོད་དུ་འགྲོ་བ་ཞིག་བཟོས་ཡོད་སྐོར། དེ་བཞིན་མཆན་རྫུན་མ་མང་པོ་ཞིག་འབྲི་མཁན་རྣམས་འགོག་པ་དང་། སྐར་མ་ལྔའི་ནང་མཆན་བཅུ་བྲིས་ཚེ་མཆན་འབྲི་མཚམས་འཇོག་བྱེད་ཐབས་བྱེད་ཀྱི་ཡོད་པ་མ་ཟད། ཁོང་ཚོས་ཐབས་ཇུས་སྡུག་ཏུ་དང་ངན་ཏུ་གཏོང་གི་ཡོད་པ་དང་། བོད་མིའི་སྒྲིག་འཛུགས་ཀྱིས་ཀྱང་ཆེད་ལས་མི་སྣ་གྲགས་ཅན་དེ་འདྲ་གླས་ཏེ་ཡར་རྒྱས་གཏོང་བར་ཕྱོགས་ཡོངས་ནས་འབད་བརྩོན་བྱེད་ཀྱི་སྐོར་སོགས་གསུངས་སོང་།
གསར་འགོད་པ། ཀླུ་མགོན་ཐར་དང་། པ་སངས་ཚེ་རིང་།
