རྒྱ་ནག་གཞུང་གིས་ཕྱི་ལོ་ ༢༠༡༥ ནས་ ༢༠༢༠ ལོ་བར་དུ་ཞིང་འབྲོག་ཁུལ་གྱི་བོད་མི་ས་ཡ་ ༢།༨ གཞི་རིམ་གྱི་ལས་རིགས་ནས་གནས་སྤོ་རུ་བཅུག་སྟེ་གཞུང་ལམ་འཛུགས་སྐྲུན་སོགས་བཟོ་བསྐྲུན་ལས་རིགས་ལ་བཙན་གྱིས་ཞུགས་སུ་བཅུག་ཡོད་པའི་སྙན་ཐོ་བཏོན།
དེ་རིང་བོད་དོན་གཞུང་འབྲེལ་མ་ཡིན་པའི་ཚོགས་པ་སྐོར་ཞིག་གིས་མཉམ་འབྲེལ་ཐོག རྒྱ་ནག་གཞུང་གིས་བོད་ནང་སྔར་མེད་ཀྱི་བཙན་གནོན་གྱི་སྲིད་ཇུས་སྤེལ་བཞིན་པའི་སྐོར་ལ་ཞིབ་འཇུག་སྙན་ཐོ་(Tibet Advocacy Coalition)ཞེས་པ་ཞིག་བཏོན་པའི་ནང་། རྒྱ་ནག་གཞུང་གིས་བོད་ནང་གི་བྱིས་པ་ཚུན་ཆད་ལའང་བསམ་བློ་བཅོས་བསྒྱུར་གྱི་སློབ་གསོ་སྤེལ་གྱི་ཡོད་པ་དང་། གྲོང་ཁྱེར་ཅན་དུ་སྒྱུར་ཐབས་དང་ལས་ཞུགས་གནས་སྤོས་སོགས་སྔར་མེད་ཀྱི་བཙན་གནོན་གྱི་སྲིད་ཇུས་སྤེལ་བ་བརྒྱུད་བོད་མིའི་ངོ་བོ་བཅོམ་བརླག་ཏུ་གཏོང་ཐབས་བྱེད་ཀྱི་ཡོད་སྐོར་བཀོད་འདུག
ཤོག་གྲངས་ ༤༦ ལྷག་ཡོད་པའི་སྙན་ཐོ་དེས་རྒྱ་ནག་གི་གཞུང་འབྲེལ་ཡིག་ཆ་ཁག་དང་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་རྣམས་ལ་གཞིར་བཟུང་སྟེ། ཕྱི་ལོ་ ༢༠༢༠ ནས་ ༢༠༢༡ བར་གྱི་བོད་ནང་གི་གནས་སྟངས་ལ་རྟོག་ཞིབ་བྱས་ཡོད་ཅིང་། དེའི་ནང་། འདས་ལོའི་ཕྱི་ཟླ་ ༨ པའི་ནང་ཚོགས་པའི་བོད་དོན་བཞུགས་མོལ་ཚོགས་འདུའི་ཐོག་ཞི་ཅིན་ཕིན་གྱིས་བོད་ནང་རྒྱ་ནག་དམར་ཤོག་ཚོགས་པའི་སྲིད་དབང་སྲ་བརྟན་གཏོང་ཐབས་ཆེད་བཙན་གནོན་གྱི་སྲིད་ཇུས་གཏན་འབེབ་བྱས་ཡོད་པ་དང་། དེ་ཡང་དེང་རབས་ཅན་འཛུགས་སྐྲུན་དང་། དཔལ་འབྱོར་འཛུགས་སྐྲུན། དབུལ་གྲོལ་འགག་སྒྲོལ། ལག་ཤེས་སྦྱོང་བརྡར། སྐད་གཉིས་སློབ་གསོ་བཅས་ཀྱི་མིང་ཐོག་ནས་སྲིད་བྱུས་དེ་དག་ལག་བསྟར་བྱས་ཡོད་སྐོར་དང་། གཞན་ཡང་ཕྱི་ལོ་ ༢༠༠༨ ལོའི་བོད་ནང་གི་ཞི་རྒོལ་རྗེས། རྒྱ་ནག་གཞུང་གིས་སྲིད་ཇུས་དེ་དྲག་གནོན་ནས་སྔོན་འགོག་གི་ཕྱོགས་སུ་གྱུར་ཏེ། སྲིད་ཇུས་དེའི་འོག་ནས་རྒྱ་ནག་གཞུང་གི་མགོ་འཁྲིད་ཚོས་རྒྱ་ནག་གཞུང་ལ་ངོ་རྒོལ་དང་སྐྱོན་བརྗོད་བྱེད་མཁན་རྣམས་སྔོན་ཚུད་ནས་རྩ་མེད་གཏོང་བ་དང་། དེ་ཡང་འགོག་རྒོལ་དང་རིག་གཞུང་གི་ངོ་བོ་བརྟན་པོ་ཡོད་པའི་བོད་མིའི་བསམ་བློ་ལ་བཅོས་བསྒྱུར་བཏང་སྟེ་རྒྱ་ནག་དམར་ཤོག་གཞུང་ལ་ཡིད་ཆེས་བློས་འགེལ་བྱེད་མཁན་དུ་སྐྲུན་ཐབས་བྱེད་ཀྱི་ཡོད་སྐོར་བཀོད་འདུག
བོད་རིགས་རྣམས་ལ་བྱིས་དུས་ནས་བསམ་བློ་བཅོས་བསྒྱུར་བྱེད་ཀྱིན་ཡོད་སྐོར་བཀོད་པའི་ནང་། བོད་ས་ཁྱོན་ཡོངས་སུ་བསམ་བློ་བཅོས་བསྒྱུར་གྱི་བྱིས་གསོ་ཁང་རྒྱ་བསྐྱེད་བྱས་ཡོད་པ་མ་ཟད། བྱིས་པའི་བསླབ་གཞིའི་ནང་དམག་དོན་དང་འབྲེལ་བའི་ཆབ་སྲིད་ཀྱི་སློབ་གསོ་བཅུག་ཏེ་བྱིས་པས་རྒྱ་དམག་གི་སྒྲིག་ཆས་གྱོན་དགོས་པ་དང་རྒྱལ་དར་སྒྲེང་འཛུགས་དང་རྒྱལ་གླུ་ལེན་དགོས་པ། གཞུང་འབྲེལ་གྱི་བྱིས་གསོ་ཁང་ཁག་གི་ནང་སྐད་གཉིས་སློབ་གསོའི་སྲིད་ཇུས་ཟེར་བ་ལག་བསྟར་བྱས་ཏེ། བོད་རིགས་བྱིས་པར་རྒྱའི་སྐད་ཡིག་གཙོར་བཟུང་གིས་སློབ་གསོ་སྤྲོད་བཞིན་པར་བརྟེན། མཚམས་རེར་བྱིས་པ་རྣམས་རང་ཁྱིམ་དུ་ལོག་སྐབས་རྒྱ་སྐད་མི་ཤེས་པའི་བོད་མི་རྒན་པ་རྣམས་དང་གོ་བརྡ་འཕྲོད་ཀྱི་མེད་པའི་དཀའ་ངལ་འབྱུང་གི་ཡོད་པ། གཏན་སློབ་ཁག་ཏུ་བོད་རིགས་བྱིས་པ་མང་དུ་བཏང་སྟེ་མི་རིགས་མཐུན་སྒྲིལ་དང་རྒྱལ་ཞེན་དགོས་པ། རྒྱ་རིགས་དགེ་རྒན་དང་བྱིས་པར་རྩིས་སྤྲོད་བྱེད་པའི་སློབ་གསོའི་སྲིད་ཇུས་ལག་བསྟར་བྱས་ཡོད་སྐོར་བཀོད་འདུག
བོད་རིགས་ཞིང་འབྲོང་མང་ཚོགས་བཙན་དབང་གིས་གནས་སྤོ་བྱེད་དུ་འཇུག་གི་ཡོད་པའི་ཐད། ཕྱི་ལོ་ ༢༠༡༥ ནས་ ༢༠༢༠ ལོ་བར་དུ་ཞིང་འབྲོག་ཁུལ་གྱི་བོད་པ་ས་ཡ་ ༢།༨ གཞི་རིམ་གྱི་ལས་རིགས་ནས་གནས་སྤོ་བྱེད་དུ་བཅུག་སྟེ། བཟོ་བསྐྲུན་ལས་རིགས་ལ་ཞུགས་སུ་བཅུག་ཡོད་པ་དང་། སྤྱི་ཚོགས་བརྟན་བརླིང་དང་དམར་ཤོག་ཚོགས་པའི་ཁུར་བོ་ཡིན་པ་ལ་གདོང་ལེན་བྱེད་པ། དེ་བཞིན་སྤྱི་དམངས་བཟང་པོ་ཞིག་ཏུ་བཟོ་བ་ཟེར་བ་སོགས་བརྗོད་དེ་བོད་ཀྱི་ཆབ་སྲིད་བཙོན་པ་ཚོར་དམིགས་ཏེ་ལས་གཞི་འདྲ་མིན་སྤེལ་བ། དེ་བཞིན་བོད་རང་སྐྱོང་ལྗོངས་ཟེར་བའི་དམར་ཤོག་དྲུང་ཆེ་ཝུ་ཡེན་ཅེ་ (Wu Yingjie) ཡིས། ༧གོང་ས་རྒྱལ་བ་རིན་པོ་ཆེ་མཆོག་བོད་མི་མང་གི་བསམ་བློའི་ནང་ནས་འདོར་དགོས་པ་དང་། ནང་བསྟན་དང་མི་ཚེ་ཁ་འབྲལ་དགོས་སྐོར་བརྗོད་ཡོད་ལ། དེ་ཡིས་རྒྱ་ནག་གཞུང་གིས་བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བར་འབད་བརྩོན་དང་བོད་མིའི་བསམ་བློར་སྟངས་འཛིན་བྱེད་ཀྱི་ཡོད་པ་མཚོན་པ། བཙན་དབང་གིས་བོད་ཀྱི་ཆོས་ལུགས་མི་སྣར་༧གོང་ས་མཆོག་ལ་མཚན་སྨད་ཞུ་རུ་འཇུག་པ་དང་དམར་ཤོག་ཚོགས་པའི་ཆབ་སྲིད་ཀྱི་དྲིལ་བསྒྲགས་ཁག་བློར་འཛིན་བྱེད་དུ་འཇུག་པ་སོགས་བྱེད་ཀྱི་ཡོད་སྐོར་བཀོད་འདུག
སྙན་ཐོའི་མཇུག་ཏུ་རྒྱ་ནག་གི་མགོ་འཁྲིད་ཚོར་བསམ་འཆར་རེ་སྐུལ་ཞུས་པའི་ནང་། རྒྱ་ནག་གཞུང་གིས་བོད་ནང་གི་སློབ་གྲྭའི་བསླབ་གཞིའི་ནང་ཆབ་སྲིད་དང་དམག་དོན་གྱི་བསམ་བློའི་སློབ་གསོ་སྤེལ་མཚམས་འཇོག་དགོས་པ་དང་། སྐད་གཉིས་སློབ་གསོའི་སྲིད་ཇུས་འཕྲལ་དུ་མཚམས་འཇོག་བྱས་ཏེ། བོད་ཕྲུག་རྣམས་ལ་རང་གི་སྐད་ཡིག་དང་། རིག་གནས། ལོ་རྒྱུས་དང་བཅས་པ་སྦྱོང་རྒྱུའི་གོ་སྐབས་བསྐྲུན་དགོས་པ། དེ་བཞིན་རྒྱ་ནག་གཞུང་གིས་ལག་ཤེས་སྦྱོང་བརྡར་སོགས་ཀྱི་མིང་ཐོག་ནས་བོད་མི་རྣམས་ལ་ཆབ་སྲིད་ཀྱི་བསམ་བློའི་སློབ་གསོ་སྤྲོད་མཚམས་འཇོག་དགོས་པ་མ་ཟད། ད་ལྟ་ལག་བསྟར་བྱེད་བཞིན་པའི་ལས་གཞི་དེ་དག་ལ་རང་དབང་ལྡན་པའི་རྒྱལ་སྤྱིའི་ཆེད་མཁས་པས་བསྐྱར་ཞིབ་དགོས་པ། རྒྱ་ནག་གཞུང་གིས་དབུལ་གྲོལ་འགག་སྒྲོལ་གྱི་མིང་ཐོག་ནས་བོད་མི་འབྲོག་པ་རྣམས་ཀྱི་རྩྭ་ས་བཙན་འཕྲོག་བྱས་པ་དག་ཕྱིར་སློག་དགོས་པ་མ་ཟད། ཁོ་ཚོར་གུན་གསབ་སྤྲོད་དགོས་སྐོར་སོགས་བརྗོད་ཡོད་འདུག དེ་བཞིན་རྒྱ་ནག་དམར་ཤོག་གཞུང་གིས་བོད་ཀྱི་གྲྭ་བཙུན་རྣམས་ལ་དམིགས་པའི་ཆབ་སྲིད་སློབ་གསོའི་རྩ་འཛུགས་རིགས་འཕྲལ་དུ་སྒོ་བརྒྱབ་དགོས་སྐོར་བཀོད་འདུག
གཞན་ཡང་། གཞུང་འབྲེལ་མ་ཡིན་པའི་ཚོགས་སྡེ་ཁག་གིས་སྙན་ཐོའི་གྲུབ་དོན་གཞིར་བཟུང་འཛམ་གླིང་མཉམ་འབྲེལ་རྒྱལ་ཚོགས་ཀྱི་གཙོས་པའི་སྲིད་གཞུང་ཁག་ལ་སྲིད་ཇུས་བསམ་འཆར་ཕུལ་བའི་ནང་། རྒྱ་ནག་གཞུང་གི་མགོ་འཁྲིད་ཚོས་བོད་ནང་འགྲོ་བ་མིའི་ཐོབ་ཐང་རྡོག་རོལ་བཏང་བར་ཉེན་ཆད་གཅོད་དགོས་པ་དང་། རྒྱ་ནག་གཞུང་དང་ཕྱི་འབྲེལ་འཛུགས་སྐབས་དང་བསྒྲགས་གཏམ་སོགས་སྤེལ་སྐབས་རྒྱ་ནག་གཞུང་གི་བྱེད་ཕྱོགས་ངན་པ་དག་ཐེར་འདོན་དགོས་པ། རྒྱལ་སྤྱིའི་མཉམ་འབྲེལ་རྒྱལ་ཚོགས་ངོས་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་རྟོག་ཞིབ་བྱ་རྒྱུའི་ལམ་སྲོལ་བཟང་པོར་རྒྱུན་སྐྱོང་གིས་བོད་ནང་གི་སྨྲ་བརྗོད་རང་དབང་དང་། འདུ་འཛོམས་རང་དབང་ལ་སོགས་པའི་སྤྱི་འབངས་ཀྱི་རང་དབང་དག་ལ་གུ་ཡངས་པོའི་ཐོག་ནས་ཞིབ་འཇུག་བྱེད་དགོས་པའི་འབོད་སྐུལ་ཞུས་ཡོད་འདུག
Tibet Advocacy Coalition ཞེས་པ་དེ་ནི་ཕྱི་ལོ་ ༢༠༡༣ ལོར། རྒྱལ་སྤྱིའི་བོད་དོན་འབྲེལ་མཐུད་ཁང་དང་། བོད་དོན་དྲང་བདེན་ལྟེ་གནས་ཁང་ (Tibet Justice Center)། བོད་རང་བཙན་སློབ་ཕྲུག་ཚོགས་བཅས་གསུམ་གྱིས། རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ལ་བོད་ནང་གི་གནས་ཚུལ་ཞུ་གཏུག་ཆེད་བཙུགས་པ་ཞིག་ཡིན་པ་དང་། ད་ལྟའི་ཆར་མཉམ་འབྲེལ་གྱི་མཐུན་ཚོགས་དེའི་ནང་ཡོ་རོབ་བོད་རིགས་གཞོན་ནུའི་མཐུན་ཚོགས་དང་།Tibet Initiative Deutschland ཅེས་པའི་བོད་དོན་ཚོགས་སྡེ་གཉིས་ཀྱང་ཡོད་འདུག
གསར་འགོད་པ། ཀླུ་མགོན་ཐར། པ་སངས་ཚེ་རིང་།
