ཨ་མཆོག་མཚན་ཉིད་དགོན་གྱི་གྲྭ་པ་གཉིས་ཀློད་གྲོལ་བཏང་ཡོད་འདུག

ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས་འཛིན་བཟུང་གིས་བཙོན་འཇུག་ཁྲིམས་ཐག་བཅད་པའི་ཨ་མཆོག་མཚན་ཉིད་དགོན་གྱི་གྲྭ་ཀླུ་སྒྲུབ་ཡེ་ཤེས་ལགས་དང་གྲྭ་ཀླུ་སྒྲུབ་ཕུན་ཚོགས་ལགས་གཉིས་བཙོན་འཇུག་དུས་ཡུན་རྫོགས་ཏེ་སྔ་གཞུག་ཏུ་ཀློད་གྲོལ་བཏང་ཡོད་འདུག

འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༠༨ ལོར་བོད་ས་ཡོངས་ལ་ས་བྱི་ཞི་རྒོལ་ཆེན་མོ་བྱུང་བ་དང་བསྟུན། རྒྱ་ནག་གིས་བོད་ས་ཡོངས་ནས་བོད་མི་མང་པོ་འཛིན་བཟུང་བཀག་ཉར་གྱིས་རིམ་པ་འདྲ་མིན་སྣ་ཚོགས་ཀྱི་བཙོན་འཇུག་ཁྲིམས་ཐག་བཅད་ཡོད་པ་ལྟར། ལོ་ ༡༣ དང་ཕྱེད་ཀའི་རིང་བཙོན་འཇུག་ཁྲིམས་ཐག་བཅད་པའི་རྔ་བ་རྫོང་ཨ་མཆོག་མཚན་ཉིད་དགོན་འཇམ་དབྱས་སྨྲ་སེང་གླིང་གི་དགེ་འདུན་པ་ཀླུ་སྒྲུབ་ཡེ་ཤེས་ལགས་དང་ལོ་ ༡༣ ལྷག་རིང་བཙོན་འཇུག་བྱས་པའི་གྲྭ་ཀླུ་སྒྲུབ་ཕུན་ཚོགས་ལགས་གཉིས་ཀློད་གྲོལ་བཏང་སྟེ། རང་དགོན་ཨ་མཆོག་མཚན་ཉིད་དགོན་དུ་འབྱོར་ཡོད་འདུག

ཕྱི་ལོ་ ༢༠༠༨ ལོའི་ཕྱི་ཟླ་ ༡༠ ཚེས་ ༢༨ ཉིན་རྔ་བ་ཁུལ་གྱི་ལྟེ་གནས་འབར་ཁམས་འབྲིང་རིམ་མི་མང་ཁྲིམས་ཁང་ནས་སྤྱི་ཚོགས་ཟིང་འཁྲུག་བསླངས་བ་སོགས་ལ་འབྲེལ་བ་བཏགས་ཏེ། སྐབས་དེར་རང་ལོ་ ༢༣ ལ་སོན་པའི་གྲྭ་ཀླུ་སྒྲུབ་ཕུན་ཚོགས་ལ་ལོ་ ༡༣ དང་། རང་ལོ་ ༣༣ ལ་སོན་པའི་གྲྭ་ཀླུ་སྒྲུབ་ཡེ་ཤེས་ལ་ལོ་ ༡༣ དང་ཕྱེད་ཀ་བཅས་ཀྱི་བཙོན་འཇུག་ཁྲིམས་ཐག་བཅད་ཡོད་ཅིང་། ཕུན་ཚོགས་ལགས་ནི་ཨ་མཆོག་མཚན་ཉིད་དགོན་གྱི་ ༼སྨྲ་སེང་བཞད་སྒྲ་༽ ཞེས་པའི་དུས་དེབ་རྩོམ་སྒྲིག་པ་ཡིན་ལ། སྐབས་དེར་ད་དུང་ཁོང་གཉིས་དང་ལྷན་དུ་རང་དགོན་གཅིག་པའི་རང་ལོ་ ༤༢ ཡིན་པའི་གྲྭ་ཚུལ་ཁྲིམས་རྒྱ་མཚོ་ལགས་ལ་ལོ་ ༩ དང་རང་ལོ་ ༤༣ ལ་སོན་པའི་གྲྭ་ཀླུ་སྒྲུབ་བསྟན་དར་ལ་ལོ་ ༣ བཅས་ཀྱི་ཁྲིམས་ཐག་བཅད་ཡོད་འདུག

སྤྱིར་བཏང་ཕྱི་ལོ་ ༢༠༠༨ ཟླ་ ༣ ཚེས་ ༡༧ ཉིན་གྱི་དགོང་མོའི་ཆུ་ཚོད་ ༧ ཐོག་རྔ་བ་རྫོང་ཨ་མཆོག་མཚན་ཉིད་དགོན་པའི་གྲྭ་བ་བརྒྱ་ཕྲག་ཁ་ཤས་ཀྱིས་སྣེ་ཁྲིད་དེ་སེར་སྐྱ་མི་མང་ཆིག་སྟོང་མ་ཟིན་ཙམ་གྱིས། དགོན་པའི་ཉེ་འཁྲིས་ཀྱི་ས་གནས་མི་དམངས་སྲིད་གཞུང་གི་ཐོག་ཁའི་དར་དམར་མར་ཕབ་སྟེ་བོད་ཀྱི་རྒྱལ་དར་བསྒྲེངས་འཛུགས་གནང་བ་དང་། བོད་ནང་འགྲོ་བ་མིའི་ཐོབ་ཐང་དགོས་པ། ༧གོང་ས་མཆོག་བོད་ནང་གདན་འདྲེན་ཞུ་དགོས་པ། དེ་བཞིན་༧པཎ་ཆེན་ཆུང་སྲིད་རིན་པོ་ཆེ་མྱུར་དུ་ཀློད་གྲོལ་དགོས་པ་སོགས་ཀྱི་སྐད་འབོད་འོག་རྒྱ་ནག་གིས་བོད་ནང་འཛིན་པའི་དྲག་གནོན་སྲིད་ཇུས་ལ་ཞི་བའི་ངོ་རྒོལ་གནང་ཡོད་པ་དང་། ཕྱི་ཚེས་ ༡༨ ཉིན་ནས་རྒྱ་ནག་གི་དྲག་ཆས་སྤྲས་པའི་དམག་མི་འབོར་ཆེན་གྱིས་ཨ་མཆོག་མཚན་ཉིད་དགོན་པའི་ཉིན་རེའི་བྱེད་སྒོ་ཡོངས་དང་དགེ་འདུན་པ་ཡོངས་ཀྱི་འགྲོ་བསྐྱོད་རང་དབང་ལ་བཀག་སྡོམ་གྱིས། ཉིན་མོར་དགེ་འདུན་པ་རྣམས་ལ་དྲི་རྩད་དང་མཚན་མོར་འཇབ་སྒུག་གིས་འཛིན་བཟུང་བྱས་ཡོད་པ་རེད།

དེ་བཞིན་གྲྭ་ཀླུ་སྒྲུབ་ཡེ་ཤེས་ལགས་དང་ཀླུ་སྒྲུབ་ཕུན་ཚོགས་ལགས་གཉིས་ནི་སྐབས་དེར་འཛིན་བཟུང་གིས་ཟླ་དྲུག་རིང་བཀག་ཉར་འོག་བཞག་སྟེ་ཕྱིས་སུ་བཙོན་འཇུག་ཁྲིམས་བཅད་ཡོད་ཅིང་། གྲྭ་ཡེ་ཤེས་ལགས་ནི་རྔ་པ་ཁུལ་རྐ་ཁོག་རྫོང་གི་ཨ་མཆོག་ཕྱུགས་ལས་ཀྱི་ཞལ་དཀར་ཚང་གི་བུ་ཡིན་པ་དང་། གྲྭ་ཕུན་ཚོགས་ལགས་ནི་རྐ་ཁོག་རྫོང་ཨ་མཆོག་མའི་ཚེ་རིང་བཀྲ་ཤིས་ཚང་གི་ཡིན་འདུག

གསར་འགོད་པ། སྐལ་བཟང་སྦྱིན་པ།