ཁ་སང་ཕྱི་ཚེས་ ༡༢ ཉིན་དབུས་འོས་བསྡུ་ལས་ཁང་གིས་ཕྱི་ལོ་ ༢༠༡༦ ལོའི་བོད་མི་མང་སྤྱི་འཐུས་ཀྱི་འོས་བསྡུའི་སྐབས་དབུས་གཙང་ཆོལ་ཁའི་སྒུག་ཐོ་དང་པོ་རྣམ་རྒྱལ་ཁྱུ་གསར་ལགས་ཚབ་གསར་དུ་བསྐོས་བཞག་གནང་འདུག
ཉེ་ལམ་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་ནས་སྐབས་ ༡༦ པའི་བོད་མི་མང་སྤྱི་འཐུས་ཀྱི་ལས་གནས་ནས་དགོངས་པ་ཞུས་ཟིན་པ་ལྟར། དབུས་འོས་བསྡུ་ལས་ཁང་ནས་རྣམ་རྒྱལ་ཁྱུ་གསར་ལགས་བརྡ་ཐོ་བཏང་གནང་བའི་ནང་། ཕྱི་ལོ་ ༢༠༡༦ ལོའི་བོད་མི་མང་སྤྱི་འཐུས་སྐབས་ ༡༦ པའི་དབུས་གཙང་ཆོལ་ཁའི་དངོས་གཞིའི་འོས་གྲངས་ཕྱོགས་བསྡོམས་ཐོར་བཀོད་ནང་སྐུ་ཉིད་ཨང་རིམ་ ༡༣ པ་དང་སྒུག་ཐོ་ཨང་དང་པོ་རེད་འདུག་ན། དབུས་འོས་བསྡུ་ལས་ཁང་ནས་སྒྲིག་གསལ་སྐུ་ཉིད་ལ་བོད་མི་མང་སྤྱི་འཐུས་སྐབས་ ༡༦ པའི་དབུས་གཙང་སྤྱི་འཐུས་ལ་བསྐོ་གཞག་ཞུས་པར་འཚམས་འདྲི་བཀྲ་ཤིས་བདེ་ལེགས་ཞུ་བ་དང་ཆབ་གཅིག་སྤྱི་དོན་ཕྱག་ལས་ཁག་གཟེངས་འཐོན་ཡོང་བའི་སྨོན་འདུན་དང་། ཕྱི་ལོ་ ༢༠༢༡ ཟླ་ ༤ ཚེས་ ༡༣ ཉིན་བོད་མི་མང་སྤྱི་འཐུས་ཚོགས་དྲུང་ལས་ཁུངས་སུ་འབྲེལ་བ་གནང་ཕྱོགས་ཡོང་བ་དེ་དོན་དགོངས་འཇགས་ཞུ། ཞེས་བཀོད་འདུག
འདི་གའི་གསར་འགོད་པས་གནས་ཚུལ་རྒྱུས་ལོན་ཆེད་ཚོགས་དྲུང་ལས་ཁུངས་སུ་ཞལ་པར་ཕུལ་ཡང་ཚོགས་དྲུང་བཞུགས་མེད་སྟབས་འབྲེལ་ཡོད་ལས་བྱེད་ཅིག་གིས། རྣམ་རྒྱལ་ཁྱུ་གསར་ལགས་ཀྱིས་སང་ཉིན་དམ་འབུལ་ཞུ་ཡི་ཡོད་སྐོར་འགྲེལ་བརྗོད་གནང་བྱུང་ལ། ཟླ་འདིའི་ཕྱི་ཚེས་ ༨ ཉིན་སྤྱི་འཐུས་བློ་བཟང་ཆོས་འབྱོར་ལགས་ནས་སྐབས་བཅུ་དྲུག་པའི་བོད་མི་མང་སྤྱི་འཐུས་ནས་རྩ་དགོངས་ཞུས་ཟིན་པ་ལྟར། ཕྱི་ཚེས་ ༩ ཉིན་སྐབས་བཅུ་དྲུག་པའི་མདོ་སྨད་སྤྱི་འཐུས་ཀྱི་དངོས་གཞིའི་འོས་གྲངས་ཕྱོགས་བསྡོམས་ཀྱི་སྒུག་ཐོ་དང་པོ་སྟེ། མདོ་སྨད་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་དགེ་བཤེས་གངས་རི་ལགས་ཚབ་གསར་དུ་བསྐོ་བཞག་གནང་ཡོད་པ་རེད།
བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་བདུན་པའི་ནང་། འདེམས་ཐོན་སྤྱི་འཐུས་ཁོངས་ནས་སྤྱི་འཐུས་ལས་རྒྱུན་རིང་ཤོས་དེར་སྤྱི་འཐུས་རྒྱུན་ལས་ཀྱིས་བར་བརྒལ་ཚོགས་གཙོར་བསྐོ་གཞག་བྱེད་དགོས། གལ་ཏེ་ལས་རྒྱུན་འདྲ་མཉམ་བྱུང་ཚེ་དེའི་ཁོངས་ནས་རང་ལོ་བགྲེས་ཤོས་དེར་བསྐོ་གཞག་བྱེད་དགོས། བར་བརྒལ་ཚོགས་གཙོས་ཆེས་མཐོའི་ཁྲིམས་ཞིབ་པ་ཆེ་བའི་མདུན་སར་དམ་འབུལ་ཞུས་རྗེས། སྤྱི་འཐུས་རེ་རེས་རང་ཉིད་སྤྱི་འཐུས་ཀྱི་ལས་འཁུར་དུ་མ་ཞུགས་གོང་བར་བརྒལ་ཚོགས་གཙོའི་མདུན་སར་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་བྱེད་དགོས། ཚོགས་གཙོ་དང་ཚོགས་གཞོན་འདེམས་ཐོན་བྱུང་རྗེས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང༌། ཚོགས་གཙོ་ས་གནས་སུ་མེད་སྐབས་ཚོགས་གཞོན་མདུན་སར་དམ་འབུལ་ཞུ་དགོས། ཞེས་གསལ་ཡོད་པ་ལྟར། བོད་མི་མང་སྤྱི་འཐུས་རྣམས་ཀྱིས་ཚོགས་གཙོའི་མདུན་སར་དམ་འབུལ་ཞུ་དགོས་པ་དང་། ཚོགས་གཙོ་ས་གནས་སུ་མེད་ཚེ་ཚོགས་གཞོན་གྱི་མདུན་དུ་དམ་འབུལ་ཞུ་དགོས་པ་རེད།
གསར་འགོད་པ། ཀླུ་མགོན་ཐར།
སྨན་པ་ཁྱུ་གསར་རྣམ་རྒྱལ་ལགས་བོད་མི་མང་སྤྱི་འཐུས་སྐབས་བཅུ་དྲུག་པའི་དབུས་གཙང་སྤྱི་འཐུས་སུ་ཕེབས་པ་ལ་དགའ་བསུའི་འཚམས་འདྲི་ཞུ་གི་ཡོད་།