བསྟན་འཛིན་སྒྲོལ་མ་ལགས་བོད་ཀྱི་བུད་མེད་ལྷན་ཚོགས་སྐབས་ ༡༣ པའི་དབུས་རྒྱུན་ཚོགས་གཙོར་བདམས།

བོད་ཀྱི་བུད་མེད་ལྷན་ཚོགས་ཀྱི་དབུས་རྒྱུན་སྐབས་ ༡༣ པའི་ཚོགས་གཙོར་བསྟན་འཛིན་སྒྲོལ་མ་ལགས་དང་ཚོགས་གཞོན་དུ་ཚེ་རིང་སྒྲོལ་མ་ལགས་བདམས་སོང་།

བོད་ཀྱི་བུད་མེད་ལྷན་ཚོགས་ཀྱི་ཚོགས་ཆེན་ཐེངས་བཅུ་གསུམ་པ་དྷ་ས་བོད་ཀྱི་ཟློས་གར་ཁང་དུ་ཉིན་གྲངས་གསུམ་རིང་ཚོགས་ཏེ་གྲོས་ཆོད་དོན་ཚན་དགུ་བཞག་ཡོད་པ་དང་། དེ་རིང་ཚོགས་ཆེན་གྱི་ཉིན་མཐའ་མར་དྷ་ས་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་བཞི་ཡི་ཚོགས་གཙོ་སོགས་སྐུ་ཚབ་རྣམས་ཟུར་དཔང་དུ་ཡོད་པའི་ཐོག་ནས་སྐབས་ ༡༣ པའི་དབུས་རྒྱུན་ ༧ འོས་འདེམས་བྱུང་བའི་ཁྲོད། བསྟན་འཛིན་སྒྲོལ་མ་ལགས་ཚོགས་གཙོ་དང་ཚེ་རིང་སྒྲོལ་མ་ལགས་ཚོགས་གཞོན། སྐལ་བཟང་སྒྲོལ་མ་ལགས་དྲུང་ཆེར་བདམས་ཏེ། རྒྱུན་ལས་གསར་པ་རྣམས་ནས་ལས་འཁུར་དམ་བཅའ་ཕུལ་སོང་།

ཐེངས་འདིའི་ཚོགས་ཆེན་ཐོག་ཁྱོན་གྲོས་ཆོད་དོན་ཚན་དགུ་བཞག་ཡོད་པའི་ནང་། བོད་མི་རྒན་གཞོན་བར་གསུམ་ཚང་མའི་རྒྱུད་ལ་ཆོས་ཀྱི་སློབ་གསོ་གོང་འཕེལ་གཏོང་རྒྱུའི་ཆེད་ས་གནས་ཁག་ཏུ་བླ་སྤྲུལ་དགེ་བཤེས་ཁག་གདན་ཞུ་དང་། སྐྱབས་འགྲོ་དང་ལས་འབྲས་ཀྱི་བཀའ་སློབ་གསུང་བཤད་གནང་རྒྱུ་དང་། དེ་བཞིན་ཕྱི་རྒྱལ་ཡུལ་གྲུ་ཁག་ཏུ་གནས་སྡོད་ཕྲུ་གུ་རྣམས་ཀྱི་བོད་ཀྱི་སྐད་ཡིག་གོང་འཕེལ་ཡོང་སླད་བོད་ཡིག་སློབ་ཁྲིད་གནང་མཁན་གྱི་དགེ་རྒན་རྣམས་ལ་ལེགས་གསོལ་འབུལ་བ། ད་དུང་བོད་ཕྲུག་ཚོའི་བོད་སྐད་དང་བོད་ཡིག་ཡར་རྒྱས་ཡོང་ཆེད་སློབ་གྲྭ་ཁག་ཏུ་རྩོམ་ཡིག་འགྲན་བསྡུར་བྱ་རྒྱུ། བུད་མེད་དབུས་ས་གཉིས་ནས་ཕྲུ་གུའི་ཕ་མ་རྣམས་ལ་བོད་སྐད་ཡིག་སྲུང་སྐྱོབ་ཀྱིས་མཚོན་པའི་ཤེས་ཡོན་དང་། ཀུན་སྤྱོད་སློབ་གསོ་སོགས་ནུས་རྩལ་གོང་མཐོར་གཏོང་ཕྱོགས་ཐད་སློབ་གསོ་དང་ཟབ་སྦྱོང་གང་མང་གོ་སྒྲིག

རྒྱ་དམར་གཞུང་གིས་བོད་ཀྱི་ཁོར་ཡུག་ཉམ་ཆག་བཏང་དང་གཏོང་བཞིན་པར་བརྟེན། འཛམ་གླིང་ཡོངས་དང་ཨེ་ཤ་ཡའི་ཁྱིམ་མཚེས་རྒྱལ་ཁབ་རྣམས་ལ་བོད་ཀྱི་སྐྱེས་ཁམས་ཁོར་ཡུག་གལ་གནད་ཆེ་བའི་སྐོར་གོ་རྟོགས་སྤེལ་བ་དང་། རྒྱ་དམར་གཞུང་གིས་བོད་ཀྱི་ཁོར་ཡུག་འབག་བཙོག་དང་གཏོར་བཅོམ་བཏང་ཡོད་ན། བོད་ནང་ཤིང་ནགས་གསར་འཛུགས་དགོས་པ་དང་བོད་ཀྱི་ཁོར་ཡུག་བདག་གཅེས་གནང་གལ་ཐད་རྒྱལ་སྤྱིའི་ཁོར་ཡུག་སྡེ་ཚན་ཁག་ལ་ཞུ་གཏུགས་ལས་འགུལ་སྤེལ་རྒྱུ་དང་། ད་དུང་རྒྱ་དམར་གཞུང་གིས་བོད་ཀྱི་འབྲོག་སྡེ་རྣམས་སྤོ་བཤུག་བྱས་ནས་རྩ་མེད་བཟོ་ཐབས་བྱེད་བཞིན་པར་བརྟེན། དེ་རིགས་མཚམས་འཇོག་དགོས་པའི་ཞུ་སྐུལ་མཉམ་འབྲེལ་རྒྱལ་ཚོགས་ལ་འབུལ་རྒྱུ་ཡིན་འདུག

གཞན་ཡང་། གྲོས་ཆོད་ནང་བོད་ཀྱི་དབུས་ས་གཉིས་ནས་བུད་མེད་ནུས་སྟོབས་གོང་འཕེལ་གཏོང་ཐབས་སུ་ཤེས་ཡོན་སྡེ་ཚན་ཁག་གིས་བུད་མེད་ཚོར་དམིགས་བསལ་གྱི་སློབ་ཡོན་ས་མིག་གནང་རྒྱུའི་འབོད་སྐུལ་ཞུ་རྒྱུ་དང་། བུད་མེད་ལྷན་ཚོགས་ཀྱི་ངོས་ནས་བོད་ཀྱི་སྐུ་སྐྱེད་མ་ཚོར་ཟབ་སྦྱོང་དང་བུད་མེད་ནུས་སྟོབས་སྤེལ་ཕྱོགས་ཀྱི་སློབ་གསོ་གང་མང་གནང་རྒྱུ། བོད་ནང་དུ་རྒྱ་དམར་གཞུང་གིས་བོད་མི་རིགས་རྩ་བརླག་གཏོང་ཐབས་ཀྱིས་ཐབས་ཇུས་སྣ་ཚོགས་སྤེལ་བཞིན་པ་དང་། བོད་ཀྱི་བུད་མེད་རྣམས་ཀྱི་སྐྱེ་སྒོ་བཀག་བཅུག་གི་ཡོད་པས་བོད་ཀྱི་དབུས་ས་གཉིས་ནས་རང་དབང་ལུང་པའི་ནང་གནས་བཞུགས་བོད་ཀྱི་བུད་མེད་རྣམས་ནས་སེམས་ཤུགས་ཆེར་བསྐྱེད་ཐོག་ཕྲུ་གུ་གང་མང་བཙལ་རྒྱུའི་འབོད་སྐུལ་དང་། དེ་བཞིན་བཙན་བྱོལ་བོད་མིའི་སྤྱི་ཚོགས་ཁྲོད་བུ་ཕྲུག་ལྔ་ཡན་ལ་དབུས་བུད་མེད་ལྷན་ཚོགས་ནས་དགོངས་བཞེས་རྒྱ་ཆེའི་ཐོག་སློབ་གྲོན་ངན་སེལ་གྱི་རྨང་གཞིར་ལེགས་སྐྱེས་ཧིན་སྒོར་ ༡༥༠༠༠ རེ་གནང་མུས་ཡོད་བཞིན་པ་དེ་དག་མུ་མཐུད་གནང་རྒྱུ་དང་། ས་གནས་སོ་སོ་ནས་འགན་འཁུར་དང་ལེན་གྱིས་ཁྱིམ་ཚང་ཕྲུ་གུ་མང་བའི་དཀའ་ངལ་ཡོད་པ་རྣམས་ལ་བོད་ཕྲུག་ཁྱིམ་སྡེ་སོགས་ལ་འཇུག་ཐབས་བྱ་རྒྱུ། གཞན་ཡང་ཕྲུ་གུ་གསར་སྐྱེས་དང་ཕྲུ་གུ་མང་བ་རྣམས་ལ་ས་གནས་སོ་སོའི་བབ་བསྟུན་ལེགས་སྐྱེས་སོགས་གནང་རྒྱུ་དང་། བོད་ཀྱི་བུད་མེད་ལྷན་ཚོགས་དབུས་ས་གཉིས་ནས་ཕྲུ་གུ་ལྔ་ཡན་ཡོད་མཁན་ཕ་མ་རྣམས་ལ་ཕ་མའི་ཉིན་མོར་བྱ་དགའ་གསོལ་རས་གནང་རྒྱུ་ཡིན་པ་རེད།

རྒྱལ་སྤྱིའི་རྩེད་འགྲན་ཨོ་ལིམ་པིག་༢༠༢༢ ལོར་རྒྱ་ནག་ལ་འཚོགས་རྒྱུ་གཏན་འཁེལ་བྱུང་བར་བརྟེན། རྒྱ་ནག་གིས་མ་རུང་བྱ་སྤྱོད་ཁག་འཐེར་འདོན་གྱིས་བོད་དོན་རྒྱབ་སྐྱོར་ཚོགས་པ་དང་། དེ་བཞིན་གཞུང་དང་གཞུང་འབྲེལ་མ་ཡིན་པའི་ཚོགས་སྒེར་ཐུན་མོང་མཉམ་སྦྲེལ་གྱིས་ངོ་རྒོལ་བཀག་འགོག་མཐའ་གཅིག་ཏུ་བྱུ་རྒྱུ་དང་། ཕྱི་ལོ་ ༢༠༢༢ ལོའི་རྒྱལ་སྤྱིའི་ཨོ་ལིམ་པིག་རྩེད་འགྲན་དེ་ཉིད་རྒྱ་ནག་ཏུ་འཚོགས་རྒྱུ་ངོས་ལེན་མེད་པས། དབུས་ས་གཉིས་ནས་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་དང་ཚོགས་སྡེ་ཁག་ལ་བོད་དང་གྲངས་ཉུང་མི་རིགས་རྣམས་ལ་འགྲོ་བ་མིའི་ཐོབ་ཐང་གི་རང་དབང་མེད་པའི་སྙན་ཞུ་དང་ས་རྟགས་བསྡུ་འགོད་གནང་རྒྱུ། དེ་བཞིན་རྒྱ་ནག་ནས་བྱུང་བའི་ཏོག་དབྱིབས་གཉན་རིམས་ ༡༩ དེའི་རྐྱེན་པས་འཛམ་གླིང་ས་ཕྱོགས་ཀུན་ཏུ་དཀའ་ངལ་བཟོས་ཡོད་སྟབས། གོ་སྐབས་དེ་བརྒྱུད་ཕྱི་ལོ་ ༢༠༢༢ ལོའི་རྒྱལ་སྤྱིའི་རྩེད་འགྲན་ཨོ་ལིམ་པིཀ་རྒྱ་ནག་ནང་ཚོགས་རྒྱུའི་ཐོབ་ཐང་མེད་པར་རྒྱལ་སྤྱིའི་རྩེད་འགྲན་ཚོགས་ཆུང་ནས་ཕྱིར་བསྡུ་ཡོང་ཐབས་ཀྱི་དབུས་ས་གཉིས་ནས་ལས་འགུལ་གང་མང་སྤེལ་རྒྱུ་བཅས་བཀོད་འདུག

གསར་འགོད་པ། བསྟན་འཛིན་ཕུར་བུ། ཀླུ་མགོན་ཐར།