དེ་རིང་གོ་ལའི་ཉིན་མོ་དང་བསྟུན་ཨ་རིའི་སྲིད་འཛིན་རྗོ་བྷའེ་ཌིན་མཆོག་གིས་དབུ་འཁྲིད་དེ་འཛམ་གླིང་རྒྱལ་ཁབ་མང་པོའི་མགོ་འཁྲིད་ཚོས་བགྲོ་གླེང་ལྷན་ཚོགས་བསྐོང་གི་ཡོད་པ་དེར་༧གོང་ས་མཆོག་གི་དབུས་ནོ་བྷེལ་གཟེངས་རྟགས་བཞེས་མཁན་ ༡༠༠ ལྷག་གིས་འབོད་སྐུལ་གནང་ཡོད་འདུག
དེ་རིང་ནས་ཉིན་གཉིས་རིང་ཨ་རིའི་སྲིད་འཛིན་རྗོ་བྷའེ་ཌན་མཆོག་གི་དབུ་འཁྲིད་འོག་གོ་ལའི་གནམ་གཤིས་འགྱུར་ལྡོག་གི་སྐོར་ལ་དྲ་ལམ་བགྲོ་གླེང་ཞིག་གནང་གི་ཡོད་པ་དང་། ཐེངས་འདིའི་བགྲོ་གླེང་ལྷན་ཚོགས་ནང་རྒྱ་གར་དང་ཨོ་གླིང་། ཌན་མག ཧྤ་རན་སི། འཇར་མ་ནི། ཨི་ཊ་ལི། སི་པིན། ཊོར་ཀི་སོགས་འཛམ་གླིང་རྒྱལ་ཁབ་ ༤༠ ཡི་དབུ་འཁྲིད་རྣམས་ལ་མགྲོན་འབོད་གནང་འདུག བགྲོ་གླེང་ལྷན་ཚོགས་དེར་༧གོང་ས་རྒྱལ་བ་རིན་པོ་ཆེ་མཆོག་གི་དབུས་པའི་ནོ་བྷེལ་གཟེངས་རྟགས་བཞེས་མྱོང་མཁན་གནད་ཡོད་མི་སྣ་ ༡༠༠ ལྷག་ནས་ཡོངས་ཁྱབ་ཐོག རང་བྱུང་རྡོ་སྣུམ་དང་རླངས་རྫས། རྡོ་སོལ་སོགས་བཀོལ་སྤྱོད་མཚམས་འཇོག་གནང་དགོས་པའི་འབོད་སྐུལ་གནང་འདུག
རྗོ་བྷའེ་ཌན་མཆོག་གིས་སྲིད་འཛིན་གྱི་འོས་བསྡུའི་དྲིལ་བསྒྲགས་སྐབས་དང་སྲིད་འཛིན་གྱི་དམ་འབུལ་མཛད་སྒོ་སོགས་སུ། གལ་ཏེ་ཁོང་སྲིད་འཛིན་ཆགས་པ་ཡིན་ན༔ ཕེ་རི་སའི་གནམ་གཤིས་འགྱུར་ལྡོག་གི་གྲོས་ཆིངས་ནང་གང་མགྱོགས་འཛུལ་ཞུགས་གནང་རྒྱུ་ཡིན་སྐོར་གསུངས་ཡོད་པ་ལྟར། ཐེངས་འདིའི་ལྷན་ཚོགས་ཐོག་དབུ་འཁྲིད་རྣམས་ཀྱིས་གོ་ལའི་ཚ་དྲོད་རྒྱས་བཞིན་པའི་ཛ་དྲག་གི་གནས་སྟངས་ལས་སྐྱོབ་ཐབས་སྐོར་ལ་བགྲོ་གླེང་གནང་རྒྱུ་དང་། རྒྱལ་ཁབ་ཡོངས་ནས་ས་སྣུམ་དང་རྡོ་སྣུམ་བེད་སྤྱོད་མཚམས་འཇོག་ཡོང་ཐབས་ཀྱི་དམིགས་ཡུལ་འཛིན་གྱི་ཡོད་འདུག
ཁོར་ཡུག་སྲུང་སྐྱོབ་ཀྱི་ལས་གཞིའི་སྐོར་ལ་སྲིད་འཛིན་བྷའེ་ཌན་མཆོག་གིས་གོ་ལ་འདིའི་སྟེང་དུ་མི་གྲངས་འཕེལ་རྒྱས་འགྲོ་བཞིན་ཡོད་པས་རྡོ་སྣུམ་དང་ས་སྣུམ་གྱི་ཐོན་སྐྱེད་རྒྱ་ཁྱབ་ཏུ་གཏོང་བཞིན་པ་མཚམས་འཇོག་དགོས་པ་དང་། བསྐྱར་བཟོ་བྱེད་རུང་བའི་དངོས་པོར་མ་རྩ་འཇོག་དགོས་པའི་སྐོར་དང་། རྡོ་སྣུམ་དང་ས་སྣུམ་ལ་སོགས་པ་མེར་སྲེག་གཏོང་བ་དེ་ཡིས་བརྒྱ་ཆ་ ༨༠ རླངས་རྫས་ཐོན་གྱི་ཡོད་པ་དང་། དེ་བཞིན་གཏེར་ཁ་སྔོག་འདོན་སོགས་ཀྱིས་ཁོར་ཡུག་དང་འཕྲོད་བསྟེན་ལ་གནོད་སྐྱོན་ཆེན་འབྱུང་གི་ཡོད་པར་བརྟེན། གོ་ལ་དང་མིའི་རིགས་ཀྱི་ཆེད་དུ་ཁོར་ཡུག་ལ་གནོད་སྐྱོན་བྱུང་བ་རྣམས་འགོག་ཐབས་བྱེད་པར་མུ་མཐུད་རྒྱབ་སྐྱོར་བྱེད་དགོས་སྐོར་གསུངས་འདུག
སྲིད་འཛིན་མཆོག་ནས་ཕེ་རི་སའི་གྲོས་ཆིངས་(Paris Agreement) ནང་དུ་སྣུམ་དང་རླངས་རྫས། རྡོ་སོལ་སོགས་ཀྱི་སྐོར་ལ་བརྗོད་མེད་ཀྱང་། ས་སྣུམ་གྱི་བཟོ་གྲྭས་ལས་འཆར་གསར་པ་བཟོ་འཆར་ཡོད་སྟབས། ང་ཚོས་ས་སྣུམ་དང་རྡོ་སྣུམ་རྣམས་རང་གནས་སུ་འཇོག་དགོས་ལ། སྣུམ་དང་རླངས་རྫས། རྡོ་སོལ་སོགས་ཀྱི་ཐོན་སྐྱེད་མཚམས་འཇོག་བྱེད་དགོས། གོ་ལའི་ཁོར་ཡུག་ཡར་རྒྱས་ཡོང་བར་རྡོ་སྣུམ་བེད་སྤྱོད་མི་བྱེད་པའི་ཐོག་ནས་འཆར་གཞི་གསར་པ་གང་ཡོད་པ་དེ་ལ་དཔལ་འབྱོར་སོགས་ཀྱི་ཐོག་ནས་རྒྱབ་སྐྱོར་བརྒྱ་ཆ་ ༡༠༠ དགོས་པའི་ལས་གཞི་ལ་རྒྱལ་ཁབ་ཀྱི་མགོ་ཁྲིད་རྣམ་པས་ནུས་པ་མཉམ་སྤུངས་དགོས་པའི་དགོངས་ཚུལ་བཏོན་ཡོད་འདུག་ལ། ས་སྣུམ་དང་རྡོ་སྣུམ་ནི་གོ་ལའི་གནམ་གཤིས་འགྱུར་ལྡོག་གི་རྐྱེན་རྩ་གཙོ་བོ་ཞིག་ཡིན་འདུག
འདས་ལོའི་ཕྱི་ཟླ་ ༡༡ ཚེས་ ༤ ཉིན་ཨ་རིའི་སྲིད་འཛིན་ཟུར་པ་ཊོམ་ཕུ་མཆོག་ནས་ཕེ་རི་སའི་གནམ་གཤིས་འགྱུར་ལྡོག་གི་གྲོས་ཆིངས་ནས་ཕྱིར་འཐེན་གནང་རྗེས། འཛམ་གླིང་གི་ཁོར་ཡུག་སྲུང་སྐྱོབ་པ་སོགས་གནད་ཡོད་མི་སྣ་མང་པོས་ཨ་རིའི་གཞུང་ལ་སྐྱོན་བརྗོད་བྱས། འཛམ་གླིང་ཐོན་ཁུངས་ཞིབ་འཇུག་ལྟེ་གནས་ཁང་གི་འགན་འཛིན་གཞོན་པ་ཧི་ལིན་མོ་ཧྥོ་ཌི་(Helen Moutford) ལགས་ཀྱིས། ཕེ་རི་སའི་གནམ་གཤིས་འགྱུར་ལྡོག་གི་གྲོས་ཆོད་ནས་ཕྱིར་འཐེན་བྱས་པའི་གསལ་བསྒྲགས་བཏང་བ་དེ་ནོར་འཁྲུལ་་ཡིན་ལ། ད་ལྟའང་ནོར་གྱི་འདུག ཅེས་བརྗོད་འདུག་ལ། ཨ་རིའི་སྲིད་གཞུང་གསར་པའི་ཁོར་ཡུག་སྲུང་སྐྱོབ་ཀྱི་ལས་གཞི་དེར་བསྔགས་བརྗོད་དང་གོ་ལའི་གནོད་སྐྱོན་ཉུང་དུ་འགྲོ་བར་ཕན་ཐོགས་ཡོད་པའི་འཆར་གཞི་ཞིག་ལ་ངོས་འཛིན་བྱེད་ཀྱི་ཡོད་ཀྱང་། ཁོར་ཡུག་སྐོར་གྱི་ཁྲིམས་རྩོད་པ་སོགས་ནས་གནམ་གཤིས་འགྱུར་ལྡོག་འགོག་ཐབས་ལ་ཨ་སྒོར་ཁྲག་ཁྲིག་ ༢ གཏོང་འཆར་ཡོད་པ་དེས་འདང་གི་མེད་པའི་སྐྱོན་བརྗོད་བྱེད་ཀྱི་ཡོད་འདུག
གསར་འགོད་པ། བསྟན་འཛིན་ཕུར་བུ།
