ལམ་ལུགས་མེད་སར་གླང་ཆེན་ས་གཤག

བོན་རྒྱ་བསྟན་འཛིན་རབ་རྒྱས།

       ང་ཚོ་བཙན་བྱོལ་བ་འདྲ་འདྲའི་ནང་གི་མི་འདྲ་བ་ཞིག་ཡིན་ཞེས་ཚང་མས་འུར། ཡིན་ནའང་། རྒྱུ་མཚན་ངོ་མ་བཤད་ཤེས་མཁན་ཧ་ཅང་ཉུང་། འཛམ་གླིང་འདིར་བཙན་བྱོལ་བ་མང་ལ། བཙན་བྱོལ་བ་སྒྲིག་འཛུགས་ཅན་ཡང་ཡོད། བཙན་བྱོལ་བའི་སྒྲིག་འཛུགས་འཛིན་སྐྱོང་ལམ་ལུགས་ཅན་ཡང་ཡོད། ཡིན་ནའང་། བཙན་བྱོལ་བའི་སྒྲིག་འཛུགས་འཛིན་སྐྱོང་དང་ཁྲིམས་བཟོ་གཉིས་ལྡན་ཅན་མེད་ལ། ཁྲིམས་ལུགས་དབང་འཛིན་ཅན་དེ་བས་ཀྱང་མེད། དེར་བརྟེན། ང་ཚོ་བོད་པ་བཙན་བྱོལ་བ་འདྲ་འདྲའི་ནང་ནས་མི་འདྲ་བ་ཡིན་ཞེས་རྒྱལ་བ་རིན་པོ་ཆེས་ཀྱང་ཡང་ཡང་གསུངས་པ་རེད།

དཔེར་ན། བཅའ་ཁྲིམས་ཟིན་བྲིས་ཚོགས་ཆུང་ལའང་ཁྲིམས་ལུགས་དབང་འཛིན་གྱི་ལམ་ལུགས་འཛུགས་པའི་བློ་སྤོབས་ལྡན་མེད་པར་མ་ཟད། རྒྱལ་ཁབ་གཅིག་ནང་ཁྲིམས་ལུགས་གཉིས་གནས་ཐབས་མེད་པས། བཙན་བྱོལ་དུ་གནས་རིང་ཁྲིམས་ལུགས་དབང་འཛིན་གྱི་ལམ་ལུགས་འཚམས་པོ་མེད་པའི་དགོངས་བཞེས་གནང་མཁན་མང་དུ་བྱུང་ཡོད། ཡིན་ནའང་། སྐྱབས་མགོན་རིན་པོ་ཆེས་བཀའ་ནན་ཕེབས་པར་བསྟེན་ཁྲིམས་ལུགས་དབང་འཛིན་ལམ་ལུགས་བཙུགས་པ་རེད། ཀ་བ་རེ་རེ་བཞིན་འདི་ལྟར་སྐྱབས་མགོན་རིན་པོ་ཆེས་བློ་སྟོབས་ཆེན་པོ་དང་། རྣམ་དཔྱོད་གཞལ་མེད་ཀྱི་གཟིགས་པ་སྔོན་སོང་གིས་གསར་འཛུགས་བྱས་པར་བརྟེན། “རྒྱལ་བ་རིན་པོ་ཆེས་མང་གཙོ་གསོལ་རས་གནང་”ཞེས་པའི་ཐ་སྙད་འདི་བྱུང་བ་ལས། ཐ་སྙད་འདི་ཁོང་ལ་དད་ཤུགས་ཆེ་བའི་ཆེ་བསྟོད་ཙམ་མ་རེད།

གང་ལྟར་དུས་དེ་ནས་བཟུང་། བཙན་བྱོལ་ནང་མང་གཙོའི་ལམ་སྲོལ་ཕྲ་ཚུགས་དང་མང་གཙོའི་ཆ་ལག་ཡོངས་སུ་ཚང་བ་ཡིན། ལྷག་པར་ཁྲིམས་ཞིབ་ཁང་བཙུགས་པ་དེས་མང་གཙོའི་ཁེ་ཕན་འདྲ་མཉམ་དུ་ཡོང་བ་མངོན་གྱུར་བྱས་པ་ཡིན། ཁྲིམས་ལུགས་དབང་འཛིན་མེད་ན་ད་ལྟའི་གནས་སྐབས་ལྟ་བུ་རེད། མི་མང་ལ་མང་གཙོའི་ཁེ་ཕན་འདྲ་མཉམ་ཡོང་བ་ལྟ་ཅི། སུ་ཞིག་གིས་ཁྲིམས་འགལ་དང་བཅའ་ཁྲིམས་རྩེད་ཆས་བྱས་ཀྱང་ཞུ་གཏུགས་ཞུ་ས་མེད། དེ་ནི་ཁྲིམས་ཀྱིས་དབང་བསྒྱུར་མ་ཐུབ་པ་དང་མང་གཙོའི་ཆ་ལག་མ་ཚང་བའི་རྒྱུ་མཚན་ལ་ཐུག་ཡོད། ཁྲིམས་ཞིབ་ཁང་བཙུགས་པའི་དགོས་པ་ནི། སྒྲིག་འཛུགས་ཀྱང་ཁྲིམས་ཀྱི་དབང་བསྒྱུར་བརྟན་པོའི་སྒོ་ནས་བསྐྱོད་པ་དང་།  བོད་མི་ཚང་མས་མང་གཙོའི་ཐོབ་ཐང་ལ་འདྲ་མཉམ་དུ་ལོངས་སྤྱོད་ཐུབ་པ་། མ་འོངས་བོད་ཀྱི་རྩ་ཁྲིམས་ལག་བསྟར་གྱི་སྐབས་སུ། ཐ་ན་རྒྱ་ནག་གིས་ཀྱང་དཔེར་ལྟ་འོས་པ་ཞིག་དང་། མི་མང་སྐྱོ་བོ་ཚོས་ཀྱང་འགྲོ་གྲོན་ཆེན་པོ་གཏོང་མི་དགོས་པར་བདེ་སྡུག་ཞུ་ས་ཡོད་པ་ཞིག་གི་ཆེད་དུ་བཙུགས་ནའང་། ཆབ་སྲིད་པ་ལ་ལས་དགོས་པ་ཕྱི་མ་འདི་ལས་གླེང་ཐུབ་ཀི་མེད། རྒྱུ་མཚན་འདི་དག་ཐང་མར་བརྡལ་ན་ད་གཟོད་ཁྲིམས་ལུགས་དབང་འཛིན་གྱི་གལ་ཆེ་བའི་ངོས་དང་། རྒྱལ་བའི་བཀའ་དྲིན། མང་གཙོའི་ངོས་འཛིན་བཅས་ལ་བསམ་བློའི་བརྟན་ས་ཟིན་པ་ཡིན།

ཁྲིམས་ལུགས་དབང་འཛིན་ལ་ཁྲིམས་བཟོའི་དབང་ཚད་ཡོད་མེད་ཀྱི་དོགས་པ་དང་རྩོད་པ་བྱེད་པ་ནི་མུ་ཅོར་ཁོ་ན་ཡིན། ང་ཚོའི་ཁྲིམས་དེབ་གསུམ་༼ ཁྲིམས་ལུགས་དབང་འཛིན་གྱི་རྩ་འཛིན་ཁྲིམས་ཡིག སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག དཔང་རྟགས་རྩ་འཛིན་ཁྲིམས་ཡིག༽   ཁྲིམས་ཞིབ་ཁང་གིས་བཟོས་པ་ལས་སྤྱི་འཐུས་ལྷན་ཚོགས་ཀྱིས་བཟོས་པ་མིན། རྒྱལ་བ་རིན་པོ་ཆེས་སྲིད་དབང་བཞེས་པའི་སྐབས་སུ། རྒྱལ་བ་རིན་པོ་ཆེ་དང་སྤྱི་འཐུས་ལྷན་ཚོགས་གཉིས་དབར་ཁྲིམས་བཟོའི་དབང་ཚད་ཅིག་ཆ་བགོས་བྱས་ཡོད། སྤྱི་འཐུས་ལྷན་ཚོགས་ཀྱིས་ཁྲིམས་བཟོས་ན་སྐུ་མདུན་ལ་དེ་ཆོད་སློག་གི་སྐུ་དབང་མེད་ཀྱང་། ཕྱིར་སློག་བྱས་ཏེ་བསྐྱར་ཞིབ་བྱེད་འཇུག་པའི་སྐུ་དབང་ཡོད་ལ། འོས་བབ་གཟིགས་ན་སྐྱབས་མགོན་རིན་པོ་ཆེས་མཚན་རྟགས་གནང་ཞིང་། དེ་ནས་བཟུང་ལག་ལེན་མགོ་འཛུགས་བྱེད་པ་རེད། སྐྱབས་མགོན་རིན་པོ་ཆེ་དང་ཆེས་མཐོའི་ཁྲིམས་ཞིབ་ཁང་དབར་དུ། བཅའ་ཁྲིམས་དོན་ཚན་རེ་བདུན་པའི་འོག ཁྲིམས་དོན་དང་ཁྲིམས་ཞིབ་དང་འབྲེལ་བའི་ཁྲིམས་བཟོའི་སྐུ་དབང་ཆ་བགོས་བྱས་ཡོད་ཀྱང་། རྒྱལ་བ་རིན་པོ་ཆེས་མཚན་རྟགས་སྩོལ་བ་ལས་ཕྱིར་སློག་གི་སྐུ་དབང་ཡང་བཞེས་མེད། ཕྱིར་སློག་གི་སྐུ་དབང་མི་བཞེས་པའི་རྒྱུ་མཚན་ནི། ཁྲིམས་དོན་དང་ཁྲིམས་ཞིབ་དང་འབྲེལ་བའི་ཁྲིམས་ཡིག་རྣམས་རྒྱལ་སྤྱིའི་ཁྲིམས་དང་ཡུལ་མིའི་ཁྲིམས་ལུགས་གང་དུའང་ཚིག་ཟིན་ཙམ་ཡང་མ་འགལ་བ་དགོས་པའི་རྒྱུ་མཚན་ཡིན་ལ། དེར་བརྟེན། ཁྲིམས་ཞིབ་པ་ལའང་ཁྲིམས་ཞིབ་མཁས་པའི་གྲལ་དུ་ལོ་བཅུའི་རིང་གདན་ཐབས་ཟིན་མྱོང་བ་ཞིག་དགོས་པའི་དམིགས་ཚད་བཟུང་པ་རེད། ཁ་སང་ཁྲིམས་ཞིབ་ཁང་གིས་<ཁྲིམས་ཀྱིས་ངོས་བཞེས་>བཟོ་དུས་རྒྱ་གར་དང་རྒྱལ་སྤྱིའི་ཁྲིམས་ལུགས་ཆེད་མཁས་པ་གདན་དྲངས་རབས་ཀྱི་ལོ་རྒྱུས་མང་དུ་དྲངས་དོན་ཡང་གནད་འགག་དེ་རེད། དེར་བརྟེན། ཁྲིམས་ཞིབ་ཁང་ལ་བཅའ་ཁྲིམས་དོན་ཚན་རེ་བདུན་པའི་སྐུ་དབང་འོག ཁྲིམས་དོན་དང་ཁྲིམས་ཞིབ་དང་འབྲེལ་བའི་ཁྲིམས་བཟོའི་སྐུ་དབང་ཆ་ཚང་བཅའ་ཁྲིམས་ཀྱིས་ཕུལ་ཡོད། གནད་དོན་འདི་འདྲ་དྲ་འབུ་སྣང་བ་མཐའ་ཡས་ཚོས་ནམ་དུའང་མི་མཁྱེན།

ཁ་སྔོན་ངས་ད་རེ་ང་ཚོའི་མང་གཙོ་ལ་འཕྲད་པའི་དཀའ་ངལ་འདི་བསལ་ཐབས་ཀྱི་ཐ་མའི་ལམ་ཁ་ལ་མཛུབ་མོ་བཙུགས་ནས། པད་མ་འབྱུང་གནས་སླེབས་ཀྱང་ཁྲིམས་ཞིབ་པ་བསྐོ་རྒྱུ་ནི་གདམ་ག་རེད་ཅེས་རྩོམ་ཡིག་ཅིག་བྲིས་པ་ཡིན། དེ་ནི་དངོས་ཡོད་ཀྱི་ཐག་གཅོད་ཐ་མ་གསལ་འདོན་བྱས་པ་ཡིན། གལ་ཏེ་པད་མ་འབྱུང་གནས་ལྟ་བུ། ལོ་ལྔའི་ཁྲིམས་དཔོན་གྱི་ལས་འཁུར་ཞུས་མ་མྱོང་བ། ཉུང་མཐའ་ཡང་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་མ་ཚུད་པ་ཞིག ཁྲིམས་ཞིབ་པ་ཆེ་བ་དང་གཞན་གཉིས་གང་དུ་བསྐོས་ཀྱང་། སྤྱི་ལོ་ ༢༠༢༡ ལོའི་ཟླ་ ༦ ཚེས་ ༢༨ རྗེས་ནས་ནམ་དུའང་འཕོ་འགྱུར་བཏང་ཆོག་ཆོག་ཡིན། རྒྱུ་མཚན་ཅིའི་ཕྱིར་ཞེ་ན། ཉིན་དེར་བཅའ་ཁྲིམས་རིན་པོ་ཆེ་ལག་བསྟར་མགོ་འཛུགས་བྱས་ནས་ལོ་སུམ་ཅུ་འགོར་བ་ཡིན། ལོ་སུམ་ཅུའི་རྗེས་ནས་དེ་འདྲའི་ཉམས་མྱོང་མེད་པའི་ཁྲིམས་ཞིབ་པ་རྣམས་ཀྱི་དུས་ཡུན་རྫོགས་ཚར་བ་ཡིན། འདིའི་སྐོར་བཅའ་ཁྲིམས་རིན་པོ་ཆེ་དང་ཁྲིམས་དེབ་གཉིས་ཀར་གསལ། ད་ནི་བོང་བུས་ཀྱང་གོ་ཚོད་ཡིན།

འདི་འབྲེལ་དུ་ཤེས་དགོས་པ་ཞིག་ཡོད་པ་ནི། ཁྲིམས་དོན་གྱི་ཆད་ལྷག་གི་ངོས་དེ་ཡིན། ཁྲིམས་དོན་ཀྱི་ཆད་ལྷག་ཁ་སྐོང་མ་ཐུབ་པའི་འགན་དེ། ཁྲིམས་ཞིབ་ཁང་དང་སྤྱི་འཐུས་ལྷན་ཚོགས་གཉིས་ཀར་ཡོད་པ་ཡིན། དཔེར་ན། ལོ་སུམ་ཅུའི་རྗེས་སུ་ཁྲིམས་ཞིབ་པར་ཚང་དགོས་པའི་འོས་ཆོས་དེ་ཟླ་ཤས་རྗེས་ནས་ཁྲིམས་ཞིབ་པ་ནམ་བསྐོ་ལ་ལག་ལེན་བསྟར་དགོས་མོད། བཙན་བྱོལ་ནང་དེ་འདྲའི་འོས་ཆོས་ཅན་མི་རྙེད་པའི་དཀའ་ངལ་འཕྲད་རྒྱུ་ཡིན། མི་རྙེད་ན་བསྐྱར་བཅོས་བྱ་དགོས་པ་ཡིན། དེ་བཞིན་ཁྲིམས་འགྲེལ་ལ་མཚོན་ན། ཉེ་སྔོན་རྩོད་པ་བྱུང་བའི་”སུ་རུང་” ལྟ་བུ་ལ་ཁ་གསལ་གྱི་ཁྲིམས་འགྲེལ་དགོས་མོད་དེ་བཟོ་ཐུབ་མེད། དེ་འབྲེལ་”འོས་བབ་ཡོད་པ་མ་ཡིན་” ལྟ་བུ་ཡོད་ལ། དེའང་སུ་རུང་ལྟར་འཐེན་རྒྱུ་ཡོད་པས་ཁྲིམས་འགྲེལ་དགོས་པ་ཡིན། ད་ལྟ་ང་ཚོར་ཁྲིམས་དེབ་གསུམ་ལས་མེད་ལ། དེ་ནི་ཁྲིམས་ཀྱི་དོན་ཚན་ཁག་འགྲེལ་བརྗོད་བྱས་པ་ཙམ་ལས། ཁྲིམས་འགྲེལ་རིགས་གཅིག་ཀྱང་ཐོན་མེད། མ་འོངས་པར་ནམ་དུའང་ཟམ་གདོང་རིན་པོ་ཆེས་ལག་རྟེན་བསྣམས་ནས་ཕེབས་ཚོད་མེད་པས། ཁྲིམས་འགྲེལ་གྱི་དེབ་ཐོན་དགོས་ཤིང་། ཁྲིམས་འགྲེལ་ཚང་མ་ཁྲིམས་ཞིབ་ཁང་གི་ཁྲིམས་རིག་ཆེད་མཁས་པས་བཟོ་དགོས་པ་ལས། མི་མང་གི་སྐུ་ཚབ་ཚོར་དེ་དག་བཟོ་བའི་ཤེས་ཚད་མེད་ལ། བཟོས་ཀྱང་ལམ་ལུགས་མེད་སར་གླང་ཆེན་ས་གཤག་བྱས་པ་ཡིན། གླང་ཆེན་ས་གཤག་ག་ས་གང་ལ་གང་ལ་བྱས་ན། ཉེ་སྔོན་གྱི་གནས་ཚུལ་ལྟར་མི་རྣམས་ཧང་སངས་ཤིང་ཡ་མཚར་བའི་དོན་རྐྱེན་དེ་འདྲ་སློང་བ་ཡིན།

ཁ་སང་སྤྱི་འཐུས་གཉིས་དམ་འབུལ་གྱི་སྐབས་སུ། སྤྱི་འཐུས་ཚོགས་གཞོན་གྱིས་གསུང་བཤད་གནང་བར་གཞིགས་ན། ཕྱི་སྣུར་བྱེད་རྒྱུ་ལས་མུ་མཐུད་མུན་ནག་གི་ཕྱོགས་སུ་བསྐྱོད་རྒྱུ་མིན་པའི་རེ་བ་ཡོད་པས། དེ་ནི་ཆེས་བསམ་ཤེས་དང་ཕུན་སུམ་ཚོགས་པ་རེད། མུན་ནག་གི་ཕྱོགས་སུ་བསྐྱོད་ཀྱང་ལོ་རྒྱུས་ཀྱི་ནག་ཉེས་སྐབས་དེའི་སྤྱི་འཐུས་ལྷན་ཚོགས་ཀྱིས་ཁུར་བ་ཙམ་ལས། ཁོ་ཚོར་ཡང་དགོས་པ་དང་ཁེ་བཟང་ལྷག་པོ་གང་ཡང་མེད་པས། ད་ནི་ཁོ་ཚོས་ཀྱང་དེ་ལ་ངོས་ཟིན་ཐོབ་ཡོད་པ་འདྲ། གསུང་བཤད་ཐུང་ཐུང་དེའི་ནང་དུ། རྒྱལ་བ་ཐམས་ཅད་མཁྱེན་པའི་ཐུགས་ཀྱི་དགོངས་གཞི་དང་། རྒྱལ་བ་ཐམས་ཅད་མཁྱེན་པའི་ཐུགས་མ་ཕམ་པ་ཞིག་བྱེད་རྒྱུ་ཡིན་ཞེས་ལན་བཅུ་གྲངས་ལ་གསུངས་སོང་། ད་དུང་གཞིས་ལ་ཡོད་པའི་རྒྱ་ཆེའི་མི་མང་གི་ཐུགས་མ་ཕམ་པ་དང་། རྒྱ་ཆེའི་མང་ཚོགས་ཀྱི་བློ་མ་ཕམ་པ་བྱེད་པ། སྤྱི་འཐུས་གསར་རྙིང་བར་དུ་མཐུད་ཀ་རྒྱག་པ་ཚུལ་མཐུན་གྱི་སྟེང་ནས་ཕེབས་ཐུབ་པ་དང་། ཕེབས་ཐུབ་པའི་འགན་སྤྱི་འཐུས་ལྷན་ཚོགས་ལ་ཡོད་རབས། ནན་གྱིས་བཤད་སྟངས་ལས་རེ་བ་མཐོང་བ་ཞིག་རེད། རེ་བ་དེ་ལེགས་འགྲུབ་ཡོང་བའི་སྨོན་ལམ་སྙིང་ནས་འདེབས།

དཀའ་ངལ་རེ་འཕྲད་པ་དང་རྒྱལ་བ་རིན་པོ་ཆེ་ལ་ཞུ་དགོས་པ་རེད། ཁོང་གིས་ཅིག་གནང་དགོས་པ་རེད། ཅིག་གནང་གི་རེད་ཅེས་སྐད་རྒྱག་པ་ནི། དཀའ་ངལ་རེ་འཕྲད་དུས་རྒྱལ་བ་རིན་པོ་ཆེ་ཉིད་ཡིད་ལ་དྲན་གི་ཡོད་པའི་རྟགས་སུ་འཁུམས་པས། བསམ་ཤེས་ཐུབ་ཀྱང་། ད་དུང་ཁོང་སྐུ་ཚེགས་ལ་མ་གཏད་པར་བཅོས་སུ་ཡོད་པ་ཡིན་པས། ཐབས་མེད་ཀྱི་གནས་སུ་མ་གྱར་བར་དུ་རྒྱལ་བ་རིན་པོ་ཆེ་སྐུ་ཚེགས་ལ་མི་གཏོད་རྒྱུ་ངེས་པར་སྙིང་བཅངས་བྱེད་དགོས་པ་ཞིག་རེད། སྤྱི་འཐུས་ལྷན་ཚོགས་ལ་དཀའ་ངལ་དེ་སེལ་བའི་ནུས་པ་མཐའ་དག་ཡོད་བཞིན་དུ་རྒྱལ་བ་རིན་པོ་ཆེ་སྐུ་ཚེགས་ལ་གཏོད་པར་བྲེལ་བ་རྣམས་ནི། ཕྱོགས་གཅིག་ནས་ཚད་ལས་བརྒལ་གྱི་ཧམ་པ་རེད།

མ་འོངས་པར་ནད་ཡམས་ཀྱི་དཀའ་ངལ་འཕྲད་ཀྱང་། སྤྱི་འཐུས་འཚོགས་པ་ལ་དྲ་ཐོག་ནས་འཚོགས་མི་ཆོག་པའི་ཆ་རྐྱེན་བཅའ་ཁྲིམས་ནང་མེད་པས་དྲ་ཐོག་ནས་འཚོགས་ཆོག་ལ། དྲ་ཐོག་ནས་གྲོས་ཆོད་དེ་ནུས་མེད་དུ་བཏང་ན། དེ་ག་རང་གིས་དཀའ་ངལ་མཐའ་དག་སེལ་བ་རེད། ཡང་ན་ཁྲིམས་ཞིབ་པ་ཞིག་བསྐོས་ནའང་དཀའ་ངལ་སེལ་བ་རེད། ཁྲིམས་ཞིབ་པ་བསྐོས་ན་ཁ་སང་གི་ཁྲིམས་ཞིབ་པ་ཆེ་བའི་མདུན་ནས་དམ་འབུལ་ཞུ་དགོས་ཤིང་། མ་ཞུས་ན་བཅའ་ཁྲིམས་དང་དངོས་སུ་འགལ་བས་བཅའ་ཁྲིམས་བསྐྱར་བཅོས་ཀྱང་འགྲོ་དགོས་པ་རེད། དཀའ་ངལ་དང་གང་ཟག་ལ་ལྟོས་ཏེ་བཅའ་ཁྲིམས་ལ་ལག་པ་འཆང་ཐལ་ན། བཅའ་ཁྲིམས་བརྟན་པོ་མེད་པ་དང་། དེ་བཞིན་མང་གཙོ་བརྟན་པོ་མེད་པར་གྱུར་པ་རེད། དེ་ལས་གཞན་གྱི་མི་མང་གི་འབོད་སྒྲའང་རྒྱུན་མི་ཆད་པ་ཡིན། དེར་བརྟེན། ཕྱི་ནུར་བྱེད་པ་ནི་གདམ་ག་ཡག་ཤོས་དང་། ཁྲིམས་ཞིབ་པ་བསྐོ་རྒྱུ་ནི་འུ་ཐུག་པའམ་ཐ་མའི་གདམ་ག་ཡིན། གནད་འགག་གི་སྐབས་སུ།  མི་མང་གི་སྐུ་ཚབ་ཚོས་རྩ་དོན་ལ་སེམས་ཁུར་དང་འགན་ཁུར་ཇི་འདྲ་ཞིག་གནང་མིན་ནི། མང་གཙོ་ལ་དོ་ཕོག་མེད་པ་དང་། སྒྲིག་འཛུགས་ལ་གས་ཁ་མི་འཆོར་བ། སྲིད་སྐྱོང་ལ་བཀྲ་ཤིས་པའི་རྩིས་སྤྲོད་ཅིག་ཡོང་བ་སོགས་དང་ལྟོས་བཅས་ཀྱི་འབྲེལ་བ་གྲུབ་ཡོད།

མཆན། གོང་བཀོད་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།