༧པཎ་ཆེན་རིན་པོ་ཆེ་བཙན་ཁྲིད་བྱས་པའི་ཉིན་མོར་བཀའ་སྤྱི་གཉིས་ནས་རྒྱལ་སྤྱིའི་ཐོག་འབོད་སྐུལ་ཞུས།

དེ་རིང་རྒྱ་ནག་དམར་པོའི་གཞུང་གིས་༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་དང་། ཁོང་གི་ཡབ་ཡུམ་སྐུ་འཁོར་དང་བཅས་པ་བཙན་ཁྲིད་བྱས་ཏེ་གར་སོང་ཆ་མེད་དུ་གྱུར་ནས་ལོ་ངོ་ ༢༦ འཁོར་བའི་ཉིན་མོ་དང་བསྟུན། བོད་མིའི་སྒྲིག་འཛུགས་ཀྱི་བཀའ་སྤྱི་གཉིས་ནས་ཡོངས་ཁྱབ་བསྒྲགས་གཏམ་སྤེལ་བའི་ནང་། རྒྱལ་སྤྱིའི་གཞུང་དང་ཚོགས་སྡེ་ཁག་ལ་༸པཎ་ཆེན་རིན་པོ་ཆེ་མཆོག་ད་ལྟ་ཞལ་བཞུགས་ཡོད་མེད་རྩད་གཅོད་ཡོང་རྒྱུར་རམ་འདེབས་གནང་རྒྱུའི་རེ་སྐུལ་ཞུས་ཡོད་འདུག

བཀའ་ཤག་གི་ཡིག་ཐོག་བསྒྲགས་གཏམ་ནང་། ང་ཚོའི་ངོས་ནས་རྒྱ་ནག་གཞུང་ལ་༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་། ཡབ་ཡུམ་ནང་མི། བཀྲས་ལྷུན་བྱ་བྲལ་རིན་པོ་ཆེ། ཁོང་དང་འབྲེལ་ཡོད་མི་སྣ་གཞན་བཅས་པ་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་གློད་བཀྲོལ་གཏོང་དགོས་པའི་རེ་སྐུལ་ནན་པོ་བྱ་རྒྱུ་ཡིན། ཉེ་ཆར་ཨ་རིའི་ཕྱི་སྲིད་མགྲིན་ཚབ་པས་གསུངས་དོན་ལྟར། རྒྱ་ནག་གཞུང་ནས་༸ཀུན་གཟིགས་པཎ་ཆེན་རིན་པོ་ཆེ་གང་དུ་ཡོད་མེད་ཚང་མས་ཤེས་པ་བཟོ་དགོས་པ་དང་། ༧པཎ་ཆེན་རིན་པོ་ཆེ་ང་ཚོ་ཚང་མས་དངོས་སུ་མཇལ་རྒྱུའི་གོ་སྐབས་ངེས་པར་བསྐྲུན་དགོས། ཞེས་བཀོད་འདུག

བོད་མི་མང་སྤྱི་འཐུས་ལྷན་ཚོགས་ངོས་ནས་རེ་སྐུལ་དོན་ཚན་ལྔ་ཅན་གྱི་བསྒྲགས་གཏམ་ཞིག་སྤེལ་བའི་ནང་།  རྒྱལ་སྤྱིའི་གཞུང་དང་ཚོགས་སྡེ་ཁག་བཅས་ཀྱི་ངོས་ནས། པཎ་ཆེན་རིན་པོ་ཆེ་མཆོག་མི་ལོ་ ༢༦ རིང་གར་སོང་ཆ་མེད་དུ་སོང་བ་འདི་ནི་ལོ་རྒྱུས་ཐོག་བྱུང་མ་མྱོང་བ་ལྟ་བུ་ཞིག་ཡིན་པས་འཛམ་གླིང་ལོ་རྒྱུས་ཀྱི་ཟིན་ཐོའི་ནང་འགོད་རྒྱུར་རམ་འདེབས་གནང་རྒྱུ་དང་། གཞིས་བྱེས་བོད་མི་ཡོངས་ཀྱིས་༸གོང་ས་མཆོག་ནས་ངོས་འཛིན་གནང་བའི་པཎ་ཆེན་དགེ་འདུན་ཆོས་ཀྱི་ཉི་མ་ལས་རྒྱ་ནག་དམར་གཞུང་གིས་ཆེད་དུ་བསྐོས་པའི་རྒྱལ་མཚན་ནོར་བུར་དད་གུས་དང་བརྩི་བཀུར་བྱེད་ཀྱི་མེད་པ་ལྟར། རྒྱ་ནག་དམར་གཞུང་དང་འབྲེལ་ལམ་གནང་སྐབས་དེ་ལུགས་གོ་བརྡ་འཕྲོད་ངེས་གནང་རྒྱུ་དང་། ཨ་རི་གཙོས་པའི་རྒྱལ་ཁབ་མང་དག་ཅིག་གི་དབུ་ཁྲིད་རྣམ་པས། རྒྱ་གཞུང་ལ་༸པཎ་ཆེན་རིན་པོ་ཆེ་སྐུ་འཚོ་བཞུགས་ཡོད་མེད་ཀྱི་གནས་ཚུལ་གསལ་སྟོན་དགོས་པའི་དགོས་འདུན་བཏོན་ ཡོད་ནའང་། རྒྱ་གཞུང་གིས་དབུ་སྐོར་རྫུན་གཏམ་འབའ་ཞིག་ལ་བརྟེན་ནས་གཡོལ་ཐབས་བྱས་ཡོད་སྟབས། གཞུང་སྒེར་གྱི་རྒྱབ་སྐྱོར་བ་རྣམས་ཀྱིས་༸པཎ་ཆེན་རིན་པོ་ཆེ་མཆོག་གློད་གྲོལ་མ་བྱུང་གི་བར་སྔར་བཞིན་རྒྱ་དམར་གཞུང་ལ་དགོས་འདུན་དང་སྐུལ་ལྕག་གནང་རྒྱུ་བཅས་ཀྱི་འབོད་སྐུལ་ཞུས་འདུག

གཞན་ཡང་། སྤྱི་ལྷན་གྱི་བསྒྲགས་གཏམ་ནང་། ༸གོང་ས་རྒྱལ་བ་རིན་པོ་ཆེ་མཆོག་ནས་ཕྱི་ལོ་ ༡༩༩༥ ལོའི་ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་མཆོག་༸པཎ་ཆེན་སྐུ་ཕྲེང་བཅུ་གཅིག་པར་ངོས་འཛིན་གནང་སྟེ། ཉིན་གསུམ་ལས་མ་འགོར་བར་ལོ་དེའི་ཕྱི་ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༸པཎ་ཆེན་རིན་པོ་ཆེ་མཆོག་དང་། ཁོང་གི་ཡབ་ཡུམ། ཡང་སྲིད་བརྩད་འཚོལ་འགན་འཁུར་བ་བྱ་བྲལ་རིན་པོ་ཆེ་བཅས་བཙན་ཁྲིད་ཀྱིས་གར་སོར་ཆ་མེད་དུ་གྱུར་ཡོད་སྐོར་དང་། རྒྱ་ནག་གཞུང་གིས་ཆབ་སྲིད་ཀྱི་དགོས་མཁོར་དམིགས་ཏེ་རྒྱལ་མཚན་ནོར་བུ་ཟེར་བའི་ཁྱེའུ་ཞིག་པཎ་ཆེན་སྐུ་ཕྲེང་བཅུ་གཅིག་པ་ཡིན་ཚུལ་སྒྲོག་བཞིན་ཡོད་སྐོར་བཀོད་འདུག་ཅིང་། བཀའ་ཤག་གི་ངོས་ནས། རྒྱ་ནག་གཞུང་གིས་༸པཎ་ཆེན་རིན་པོ་ཆེ་མཆོག་བཙན་ཁྲིད་བྱས་པ་དེ་ནི འཛམ་གླིང་ནང་གི་ཆབ་སྲིད་བཙོན་པ་ལོ་ན་གཞོན་ཤོས་དེ་ཆགས་ཡོད་པ་དང་། བྱིས་པ་ལོ་གཞོན་དེ་འདྲ་ཉེས་མེད་བཙན་ཁྲིད་བྱས་པ་ནི་སྤྱིར་མི་སྤྱོད་ལས་འདས་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་དང་ཁྱད་པར་བྱིས་པའི་ཐོབ་ཐང་གི་ཁྲིམས་ལུགས་ཁག་དང་ཡོངས་སུ་འགལ་བ་ཞིག་ཆགས་ཡོད། ལྷག་པར་དུ་རྒྱ་ནག་གཞུང་ནས་༸རྒྱལ་དབང་ཐམས་ཅད་མཁྱེན་པ་དང་༸ཀུན་གཟིགས་པཎ་ཆེན་རིན་པོ་ཆེ་རྣམ་གཉིས་ཀྱི་ཡང་སྤྲུལ་ངོས་འཛིན་བྱེད་ཕྱོགས་སོགས་བོད་ཀྱི་ཐུན་མོང་མ་ཡིན་པའི་ཆོས་ལུགས་དང་སྲོལ་རྒྱུན་གྱི་བྱེད་སྒོ་གང་སར་ཐེ་བྱུས་ཀྱིས་དེ་དག་སྲིད་དོན་གྱི་ལག་ཆར་མཁོ་སྤྱོད་བྱེད་སླད། བཀའ་རྒྱ་ཨང་ ༥ པ་ཟེར་བ་སོགས་ཁྱབ་བསྒྲགས་བྱས་ཡོད་པ་ནི། བོད་ཀྱི་ཆོས་དང་རིག་གཞུང་ལ་ཁྱད་གསོད་དང་། བོད་མི་ས་ཡ་དྲུག་གི་ཆོས་དད་དང་སེམས་ཚོར་ལ་བརྩི་མེད་རྡོག་རོལ་བཏང་བ་ཞིག་ཆགས་ཡོད་ན། ད་རེས་གོ་སྐབས་འདི་བརྒྱུད་ནས་རྒྱ་ནག་གཞུང་གི་བྱ་སྤྱོད་ཐ་ཞན་དེ་དག་ལ་བློ་ཕམ་ཚད་མེད་དང་སྦྲགས་ངོ་རྒོལ་མཐའ་གཅིག་ཏུ་ཡོད་ཅེས་བརྗོད་རྒྱུ་ཡིན། ཞེས་བཀོད་འདུག

དེ་བཞིན་༸པཎ་ཆེན་དགེ་འདུན་ཆོས་ཀྱི་ཉི་མ་མཆོག་ཕྱི་ལོ་ ༡༩༩༥ ལོར་བཙན་ཁྲིད་བྱས་པ་ནས་བཟུང་ད་བར་དུ་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་དང་། བྱིས་པའི་ཐོབ་ཐང་ཚོགས་ཆུང་། བཙན་དབང་འོག་གར་སོང་ཆ་མེད་དུ་གྱུར་པའི་ལས་དོན་ཚོགས་ཆུང་། མནར་གཅོད་ཁ་གཏད་ཚོགས་ཆུང་སོགས་རྒྱལ་ཚོགས་ཀྱི་ལས་དོན་ཚོགས་ཆུང་ཁག་དང་། རྒྱལ་སྤྱིའི་ཚོགས་པ་གཞན་བཅས་ནས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་རྒྱུས་ལོན་དང་གློད་བཀྲོལ་ཡོང་ཐབས་སུ་ཞུ་གཏུག་ལན་མང་གནང་ཡོད་པ་མ་ཟད། པཎ་ཆེན་རིན་པོ་ཆེའི་གནས་སྟངས་ཞིབ་རྩད་གནང་མཁན་རང་དབང་ལྡན་པའི་ཁྱད་མཁས་མི་སྣའི་ཚོགས་ཆུང་གཏོང་དགོས་པའི་རེ་སྐུལ་ཡང་ཞུས་ཡོད། དེ་བཞིན་ཡུ་རོབ་གྲོས་ཚོགས་དང་། ཨ་རི། ཨིན་ཡུལ། ཁེ་ན་ཌ་སོགས་རྒྱལ་ཁབ་མང་པོའི་གྲོས་ཚོགས་དང་། སྲིད་གཞུང་། རྒྱབ་སྐྱོར་ཚོགས་པ་བཅས་ཀྱིས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གི་གནས་སྟངས་ཇི་ཡིན་གསལ་བཤད་དང་གློད་བཀྲོལ་གཏོང་དགོས་པའི་གྲོས་ཆོད་དང་། སྙན་ཐོ་སོགས་བཏོན་ནས་འབོད་སྐུལ་གནང་ཡོད། བོད་མིའི་སྒྲིག་འཛུགས་དང་གཞུང་འབྲེལ་མ་ཡིན་པའི་ཚོགས་སྒེར་མང་པོས་ཀྱང་ལས་འགུལ་རྒྱུན་མ་ཆད་པར་སྤེལ་དང་སྤེལ་མུས་ཡིན་ཡང་། རྒྱ་ནག་གཞུང་ནས་ད་བར་དུ་ཚང་མའི་ཁ་འགོག་ཐབས་ཀྱི་ལན་ཐུང་གཅིག་ཁོ་ན་བསྐྱར་ཟློས་བྱས་པ་ལས། དངོས་ཡོད་གནས་སྟངས་དང་མཐུན་པའི་འགན་ཁུར་ལན་འདེབས་ཤིག་རྩ་བ་ནས་བྱས་མེད།  འདི་ལོའི་ཟླ་ ༤ ཚེས་ ༢༡ ཉིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་ལོ་འཁོར་སྙན་ཐོའི་ནང་བོད་ནང་ཆོས་དད་རང་དབང་ཐོག་དམ་བསྒྲགས་མུ་མཐུད་བྱེད་ཀྱི་ཡོད་སྐོར་གསལ་པོ་འཁོད་ཡོད། ཅེས་བཀོད་འདུག

དེ་རིང་ཕྱི་དྲོར་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ངོས་ནས་དྲ་ལམ་བརྒྱུད་རྐུ་ལ་ཤོར་བའི་བོད་ཀྱི་བྱིས་པ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་མཛད་རྣམ་རྗེས་དྲན། ཞེས་པའི་བོད་དབྱིན་གཉིས་ཀྱི་དཔེ་དེབ་ཅིག་དབུ་འབྱེད་དང་སྦྲགས་དྲ་ལམ་གཏམ་བཤད་ཅིག་གོ་སྒྲིག་གནང་འདུག

དྲ་ལམ་གྱི་ལས་རིམ་དེའི་ཐོག་ཕེབས་པའི་གསུང་བཤད་པ་བཀྲ་ཤིས་ལྷུན་པོའི་སྐྱབས་རྗེ་གཟིག་རྒྱབ་རིན་པོ་ཆེ་མཆོག་གིས། དེ་རིང་ཀུན་གཟིགས་པཎ་ཆེན་རིན་པོ་ཆེ་མཆོག་གར་སོང་ཆ་མེད་དུ་སོང་བའི་གནད་དོན་དང་འབྲེལ་ནས་ཕྱག་དེབ་དབུ་འབྱེད་མཛད་སྒོར་ཆིབས་སྒྱུར་བསྐྱངས་པའི་མཁས་དབང་བློ་བཟང་སེང་གེ་མཆོག་དང་། རྒྱ་གར་གཞུང་གི་གྲོས་ཚོགས་ཀྱི་འཐུས་མི་སྐུ་ཞབས་ (Anantkumar Hegde) གཙོས་པའི་གསན་གཟིགས་གནང་མཁན་ཡོངས་ལ་འཚམས་འདྲི་ཞུས་པ་དང་། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་༧ཀུན་གཟིགས་པཎ་ཆེན་རིན་པོ་ཆེའི་གནད་དོན་དང་འབྲེལ་བའི་ཕྱག་དེབ་དབུ་འབྱེད་གནང་བ་ལ་སེམས་གཏིང་ནས་དགའ་ཚོར་དང་ཐུགས་རྗེ་ཆེ་ཞུ་རྒྱུ་ཡིན། ཀུན་གཟིགས་༧པཎ་ཆེན་རིན་པོ་ཆེའི་གནད་དོན་འདི་བོད་དང་ཧི་མ་ལ་ཡ་ཙམ་མིན་པར་འཛམ་གླིང་སྤྱི་ལ་གལ་གནད་ཆེན་པོ་ཆགས་ཀྱི་ཡོད་པ་རེད། རྒྱུ་མཚན་ནི་བོད་ཀྱི་ལོ་རྒྱུས་ལ་གནམ་ལ་ཉི་མ་ཟླ་བ་ས་ལ་རྒྱལ་བ་པཎ་ཆེན་ཟེར་བའི་གསུང་སྲོལ་ཡོད་པ་ལྟར། རྒྱལ་མཆོག་ཡབ་སྲས་རྣམ་གཉིས་ཕན་ཚུན་བླ་སློབ་ཀྱི་འབྲེལ་བ་དང་ཡང་སྲིད་ངོས་འཛིན་གྱི་འབྲེལ་བའི་གནས་སྟངས་ཆགས་ཀྱི་ཡོད་པ་རེད། དེ་སྔོན་གྱི་པཎ་ཆེན་རྣམས་ལ་ལ་གཅེན་གཅུང་གི་ཚུལ་དུ་ཕེབས་པ་དང་ལ་ལ་དགེ་སློབ་ཀྱི་ཚུལ་དུ་ཕེབས་པ་ལ་སོགས་པའི་མདོར་ན་རྒྱལ་མཆོག་ཡབ་སྲས་རྣམ་གཉིས་བླ་སློབ་དང་ཡང་སྲིད་ངོས་འཛིན། གཉེན་རྫོགས་ཀྱི་སྡོམ་པ་བཞེས་སྲོལ། གཙུག་ཕུད་བཞེས་སྲོལ་ལ་སོགས་པའི་ཐུན་མོང་མ་ཡིན་པའི་རླབས་ཆེན་གྱི་མཛད་པ་བསམ་གྱིས་མི་ཁྱབ་པ་ཡོད་རེད། དེ་བཞིན་ཀུན་གཟིགས་༧པཎ་ཆེན་བཅུ་པ་ཆེན་པོ་མཆོག་གིས་བོད་མི་རིགས་ཀྱི་དོན་དུ་ཆོས་དང་རིག་གཞུང་། སྐད་ཡིག་སོགས་ལ་སྐུ་ལས་ཚད་མེད་བསྐྱོན་ཏེ་ཉམས་པ་སླར་གསོ་གནང་ཡོད་རེད། དེ་མིན་ཆོས་བརྒྱུད་ཁག་གི་དགོན་སྡེ་ཁག་ཉམས་གསོ་གནང་བ་དང་ཆོས་ཕྱོགས་ཀྱི་མཛད་པ་ཉམས་པ་སླར་གསོ་གནང་བ་རེད། ཤེས་བྱ་ཟུང་འབྲེལ་གྱི་སློབ་གྲྭ་གསར་འཛུགས་གནང་བ་སོགས་རླབས་ཆེན་གྱི་མཛད་པ་བཞེས་ཡོད་པ་རེད། དེ་ནས་༧པཎ་ཆེན་སྐུ་ཕྲེང་བཅུ་པ་ཐུགས་ཀྱི་དགོངས་པ་རྫོགས་ཏེ་༧པཎ་ཆེན་སྐུ་ཕྲེང་བཅུ་གཅིག་པ་ངོས་འཛིན་གནང་རྗེས། རྒྱ་ནག་གཞུང་གིས་༧པཎ་ཆེན་དགེ་འདུན་ཆོས་ཀྱི་ཉི་མ་བཙན་ཁྲིད་གནང་སྟེ་ད་བར་དུ་ལོ་ངོ་ ༢༦ འཁོར་ཡོད་པ་རེད། དབུས་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ནས་ཐུགས་འཁུར་ཆེ་བཞེས་ཀྱིས་༧པཎ་ཆེན་རིན་པོ་ཆེ་གར་སོང་ཆ་མེད་དུ་འགྱུར་བའི་གནས་ཚུལ་ཕྱོགས་སྒྲིག་དང་པར་བསྐྲུན་འགྲེམ་སྤེལ་གནང་ཐུབ་པ་དེ་དགེ་མཚན་ཆེན་པོ་དང་དོན་སྙིང་དང་ལྡན་པ་བྱུང་ཡོད་རེད་བསམ་གྱི་འདུག དེ་རིང་ང་ཚོས་དབུ་འབྱེད་གནང་བཞིན་པའི་ཕྱག་དེབ་འདི་བརྒྱུད་ནས་འཛམ་གླིང་མི་མང་ལ་ཀུན་གཟིགས་༧པཎ་ཆེན་རིན་པོ་ཆེའི་ཡང་སྲིད་ཀྱི་ཛ་དྲག་གི་གནད་དོན་ལ་གོ་རྟོགས་གསལ་དུ་འགྲོ་བ་དང་༧པཎ་ཆེན་པོ་རིན་པོ་ཆེ་སྐུ་ཞབས་བྱ་གྲལ་རིན་པོ་ཆེ་དང་ཡབ་ཡུམ་བཅས་ཆེད་དུ་ཀློད་གྲོལ་ཡོང་བའི་ནུས་པ་གསལ་པོ་ཐོན་གྱི་འདུག ཕྱག་དེབ་འདི་ལ་ཐུགས་འགན་བཞེས་གནང་མཁན་གཙོ་བོ་རང་གཞུང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དབུས་མཛད་གཙོ་རྣམ་པ་དང་། རྩོམ་སྒྲིག་ཕྱག་ལས་གནང་མཁན་གྱི་འབྲེལ་ཡོད་ལས་བྱེད་ཡོངས་ལ་ངས་གཞིས་བྱེས་གདན་ས་བཀྲ་ཤིས་ལྷུན་པོའི་དགེ་འདུན་འདུས་མང་དང་འབྲེལ་ཡོད་ཚང་མའི་སྐུ་ཚབ་ཞུས་ཏེ་སྙིང་དབུས་ནས་བཀའ་དྲིན་ཆེ་ཞུ་ཡི་ཡིན། འབྱུང་འགྱུར་རང་གཞུང་གི་འབྲེལ་ཡོད་མཛད་གཙོ་རྣམ་པས་༧པཎ་ཆེན་རིན་པོ་ཆེའི་སྐོར་ལ་ལས་འགུལ་གང་མང་སྤེལ་རྒྱུའི་ཡིད་ཆེས་དང་རེ་འདུན་ཞུས་ཀྱི་ཡོད། ཅེས་གསུངས་འདུག

དེ་ནས་གྲོས་ཚོགས་འཐུས་མི་ (MP Anantkumar Hegde) ལགས་ཀྱིས། ལོ་ངོ་ ༢༦ སྔོན་ལ་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་བཙན་ཁྲིད་བྱས་པའི་གནད་དོན་ཐད་དེབ་དབུ་འབྱེད་གནང་བར་རྒྱབ་སྐྱོར་ཡོད་པ་དང་། ང་ཚོས་༧པཎ་ཆེན་བླ་མ་གར་སོང་ཆ་མེད་ས་སོང་སྟེ་ལོ་ངོ་ ༢༦ འཁོར་ཡོད་ཀྱང་། ང་ཚོའི་རེ་བ་ལ་ཁོང་ད་ལྟ་གསོན་པོ་ཡོད་པ་དང་རྒྱ་ནག་གཞུང་གིས་ཁོང་ཀློད་གྲོལ་གཏང་དགོས་ཀྱི་ཡོད་པ་རེད། བོད་པའི་གཞོན་སྐྱེས་ཕོ་མོ་ཡོངས་ལ་རང་གི་རྒྱལ་ཁབ་ཀྱི་དོན་དུ་སེམས་ཤུགས་ནམ་ཡང་མི་ཆགས་པ་དང་ཞི་བའི་འཐབ་རྩོད་མུ་མཐུད་བྱེད་དགོས་རེད། འཛམ་གླིང་ཡོངས་ལ་བོད་པའི་རིག་གཞུང་ནི་བླ་ན་མེད་པ་དང་རྒྱ་གར་ནི་ནམ་ཡང་བོད་ལ་རྒྱབ་སྐྱོར་ཡོད། ཅེས་གསུངས་སོང་།

མཐའ་མ་དེར་སྲིད་སྐྱོང་བློ་བཟང་སེང་གེ་མཆོག་གིས། ༧པཎ་ཆེན་རིན་པོ་ཆེ་གར་སོང་ཆ་སོང་སྟེ་ལོ་ངོ་ ༢༦ འཁོར་བའི་དུས་དྲན་གྱི་ཉིན་མོ་ཡིན་པ་དང་། ཁོང་ལོ་ན་ཆུང་དུས་ནས་བཙན་ཁྲིད་གནང་ཡོད་པ་ནི་སེམས་སྐྱོ་བའི་གནས་སྟངས་ཤིག་རེད། ལོ་མང་པོའི་རིང་ལ་ཕྱིའི་རྒྱལ་ཁབ་མང་པོས་ཁོང་གི་གནས་ཚུལ་ཤེས་འདོད་བྱས་ཡོད་ཀྱང་ད་བར་དུ་ཁོང་གསོན་པོ་གནས་ཡོད་མེད་ཀྱི་གནས་ཚུལ་གཅིག་ཀྱང་ཤེས་ཀྱི་མེད་པ་རེད། དེ་རིང་ངས་སླར་ཡང་རྒྱ་ནག་གཞུང་ལ་རེ་འདུན་ཞུས་པར། གལ་ཏེ་༧པཎ་ཆེན་བླ་མ་གསོན་པོར་གནས་ཡོད་ན་ཁོང་ཀློད་གྲོལ་གནང་རོགས་གནང་ཞུ་རྒྱུ་དང་འདི་ནི་གཞི་རྩའི་འགྲོ་བ་མིའི་ཐོབ་ཐང་རེད། དེ་རིང་ང་ཚོས་ཕྱག་དེབ་དེ་དབུ་འབྱེད་གནང་སྟེ་ཀུན་གཟིགས་༧པཎ་ཆེན་བླ་མའི་གནད་དོན་དེ་དག་འཛམ་གླིང་ཡོངས་ལ་གོ་རྟོགས་སྤེལ་རྒྱུ་དང་བོད་ནང་གི་གནས་སྟངས་དེ་ཛ་དྲག་ཡིན་པ་དང་། འཛམ་གླིང་ཡོངས་ལ་ཡོད་པའི་མི་མང་རྣམས་བོད་ཀྱི་གནད་དོན་ཤེས་རྟོགས་བྱུང་ཆེད་དུ་དེབ་འདི་ཀློག་རོགས་གནང་ཞུ་རྒྱུ་ཡིན། ཅེས་གསུངས་སོང་།

གསར་འགོད་པ། བསྟན་འཛིན་ཕུར་བུ། པ་སངས་ཚེ་རིང་།