སྲིད་སྐྱོང་མཆོག་ནས་ཧི་མ་ཅལ་མངའ་སྡེ་གཞུང་མང་གཉིས་ནས་༧གོང་ས་མཆོག་དབུས་པའི་བོད་མི་རྣམས་ལ་རྒྱབ་སྐྱོར་མཐུན་སྦྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས་མུ་མཐུད་རྒྱབ་སྐྱོར་གནང་བའི་འབོད་སྐུལ་ཞུས་ཡོད་འདུག
ཧི་མ་ཅལ་མངའ་སྡེ་གཞུང་གི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་སིམ་ལ་སྤྱི་ཁྱབ་བསྟན་འཛིན་སྣང་བ་ལགས་བརྒྱུད་ཧི་མ་ཅལ་མངའ་སྡེ་སྤྱི་ཁྱབ་བློན་ཆེན་ཇའེ་རམ་ཐཱ་གོར་མཆོག་གི་མཚན་ཐོག་ཏུ། འཕྲིན་ཡིག་ཅིག་ཕུལ་བ་བརྒྱུད་སྲིད་སྐྱོང་གསར་པའི་ངོས་ནས་འཚམས་འདྲི་དང་འབྲེལ་ནས་ཧི་མ་ཅལ་མངའ་སྡེ་གཞུང་ནས་ད་བར་བཙན་བྱོལ་གཞུང་མང་གཉིས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད་པ་རེད།
འཕྲིན་ཡིག་ཏུ་སྲིད་སྐྱོང་མཆོག་གིས། ཧི་མ་ཅལ་མངའ་སྡེ་གཞུང་དང་མི་མང་ནས་༧གོང་ས་མཆོག་དབུས་པའི་བཙན་བྱོལ་བོད་མི་རྣམས་ལ་གནས་སྡོད་ཆོག་པ་སོགས་ཀྱི་རྒྱབ་སྐྱོར་མཐུན་སྦྱོར་གནང་བར་བོད་མི་ཡོངས་ཀྱི་ཚབ་བྱས་ནས་ཐུགས་རྗེ་ཆེ་ཞུ་ཡི་ཡོད། ཅེས་དང་། ཧི་མ་ཅལ་མངའ་སྡེ་གཞུང་མང་གཉིས་ནས་མུ་མཐུད་བཙན་བྱོལ་བོད་མི་རྣམས་ལ་རྒྱབ་སྐྱོར་མཐུན་སྦྱོར་ཡོང་བའི་འབོད་སྐུལ་ཞུས་ཡོད་སྐོར་སོགས་གསུངས་ཡོད་པ་རེད།
ད་རེས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ནས་ཕུལ་བའི་འཕྲིན་ཡིག་དང་འབྲེལ་བའི་གནས་ཚུལ་དེ་ཧི་མ་ཅལ་མངའ་སྡེ་གཞུང་གི་དྲ་ཐོག་ཏུ་སྤེལ་ཡོད་པར་བརྟེན། ཧི་མ་ཅལ་གྱི་བརྒྱུད་ལམ་ཁག་མི་ཉུང་བ་ཞིག་གིས་ཀྱང་སྤེལ་འདུག་ལ། ད་རེས་ནི་སྲིད་སྐྱོང་སྤེན་པ་ཚེ་རིང་མཆོག་ནས་ཧི་མ་ཅལ་མངའ་སྡེ་བློན་ཆེན་མཆོག་ལ་འཚམས་འདྲི་དང་འབྲེལ་གཞུང་མང་གཉིས་ལ་ཐུགས་རྗེ་ཆེ་ཞུས་པ་ཐོག་མ་ཡིན་པ་དང་། ཐུགས་རྗེ་ཆེ་ཞུའི་འཕྲིན་ཡིག་དེ་སིམ་ལ་སྤྱི་ཁྱབ་བསྟན་འཛིན་སྣང་བ་ལགས་དང་དྲུང་ཆེ་ཚེ་རིང་ཆོས་འཛོམས་ལགས་གཉིས་ནས་དངོས་སུ་མངའ་སྡེ་བློན་ཆེན་གྱི་ཕྱག་ཏུ་ཕུལ་གནང་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
