ཞི་ཅིན་ཕིན་ཕྱིན་པ་དང་མཚོ་སྔོན་ཕྱོགས་སུ་ཏང་གི་སྒྲིག་གཞི་འཐུས་ཚང་དུ་བཏང་སྟེ་ཞི་ཡི་གལ་ཆེན་གཏམ་བཤད་ཀྱི་དགོངས་དོན་ཟེར་བར་སློབ་སྦྱོང་དང་དོན་འཁྱོལ་ལག་བསྟར་བྱེད་དགོས་སྐོར་བསྒྲགས་འདུག
ཉེ་སྔོན་རྒྱ་ནག་གི་སྲིད་འཛིན་ཞི་ཅིན་ཕིན་མཚོ་སྔོན་དུ་རྟོག་ཞིབ་ཟེར་བའི་སླད་དུ་ཡོང་ནས་མདོ་སྨད་རྐང་ཚ་དང་ཟི་ལིང་ཁུལ་གྱི་བོད་རིགས་དང་རྒྱ་རིགས་མི་མང་ལ་གཏམ་བཤད་སྤེལ་ཡོད་པ་ལྟར། རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ནང་། ཕྱི་ཚེས་ ༡༡ ཉིན་མཚོ་སྔོན་ཞིང་ཆེན་དམར་ཤོག་ཚོགས་པས་ཞི་ཡི་གཏམ་བཤད་ཀྱི་དགོངས་དོན་སློབ་སྦྱོང་ཟེར་བའི་ཚོགས་འདུ་ཞིག་བསྡུས་ཏེ། ད་ལྟའི་ཆར་མཚོ་སྔོན་ཁུལ་དུ་ཞི་ཅིན་ཕིན་གྱི་གཏམ་བཤད་ཀྱི་གལ་ཆེན་དགོངས་དོན་ཟེར་བ་དྲིལ་བསྒྲགས་དང་སློབ་སྦྱོང་བྱེད་དགོས་པའི་བཀའ་བཏང་ཡོད་འདུག
ད་ལྟའི་ཆར་རྒྱ་ནག་གུང་ཁྲན་ཏང་བཙུགས་ཏེ་ལོ་བརྒྱ་འཁོར་གྱི་ཡོད་ཟེར་བའི་གནས་སྟངས་འོག རྒྱ་ནག་གིས་བོད་ས་ཡོངས་ལ་དམར་ཤོག་ཚོགས་པའི་ཆབ་སྲིད་ཀྱི་དྲིལ་བསྒྲགས་ཤུགས་ཆེན་བྱེད་བཞིན་ཡོད་པ་ལྟར། ཉེ་སྔོན་ཞི་ཅིན་ཕིན་གྱིས་མཚོ་སྔོན་དུ་མི་རིགས་ཁག་གི་ལག་གདང་སྦྲེལ་ཏེ་གཅིག་སེམས་གཅིག་སྒྲིལ་གྱི་སྲོལ་རྒྱུན་བཟང་པོ་དར་སྤེལ་གཏོང་བ་དང་། མི་རིགས་མཐུན་སྒྲིལ་ཁྱིམ་གཅིག་ལྟར་བརྩེ་བའི་ཞི་མཐུན་གྱི་གཞིས་ཁྱིམ་ལྷན་དུ་འཛུགས་སྐྲུན་དགོས་ཞེས་བོད་རྒྱ་གཉིས་མི་རིགས་གཅིག་དང་ཁྱིམ་ཚང་ཡིན་པའི་གཏམ་བཤད་སྤེལ་དོན་བཞིན། ད་ལྟའི་ཆར་མཚོ་སྔོན་ཕྱོགས་སུ་བོད་རྒྱ་གཉིས་མི་རིགས་གཅིག་དང་ཏང་གི་སྒྲིག་གཞི་འཐུས་ཚང་དུ་བཏང་སྟེ། ཏང་ཡོན་ལས་བྱེད་པ་དང་མང་ཚོགས་ནས་ཏང་ལ་བློ་དཀར་དགོས་པ་སོགས་ཀྱི་ཆབ་སྲིད་དྲིལ་བསྒྲགས་སྤེལ་གྱི་ཡོད་པ་མ་ཟད། ཞི་ཡི་གལ་ཆེན་གཏམ་བཤད་ཀྱི་དགོངས་དོན་ཟེར་བ་དོན་འཁྱོལ་ལག་བསྟར་བྱེད་དགོས་སྐོར་སོགས་བསྒྲགས་འདུག
ཡང་མཚོ་སྔོན་ཁུལ་དུ་ཆབ་སྲིད་ཀྱི་དྲིལ་བསྒྲགས་ཤུགས་ཆེན་སྤེལ་གྱི་ཡོད་པའི་རྣམ་པ་གཞན་ཞིག་ནི། མཚོ་ལྷོ་བོད་རིགས་རང་སྐྱོང་ཁུལ་ཐུན་ཏེ་རྫོང་ཟེར་བས་དྲ་རྒྱའི་སྟེགས་བུ་སྣ་ཚོགས་སྤྱད་དེ། དྲ་ཐོག་ནས་ཐུན་ཏེ་རྫོང་ཁོངས་ཀྱི་མི་མང་ལ་ཏང་གི་ལོ་རྒྱུས་སྐོར་ལ་ཟབ་སྦྱོང་དང་སློབ་སྦྱོང་བྱེད་དུ་བཅུག་སྟེ་ཏང་ཡོན་ལས་བྱེད་པའི་དགོངས་དོན་ཟེར་བ་དང་དམར་ཤོག་ཚོགས་པའི་ལྟ་གྲུབ་རྒྱ་སྐྱེད་གཏོང་ཐབས་བྱེད་ཀྱི་ཡོད་འདུག
ཡང་ཉེ་ལམ་ཞི་ཅིན་ཕིན་གྱིས་མཚོ་སྔོན་ཁུལ་དུ་རྟོག་ཞིབ་བྱེད་པའི་སྐབས་སུ་རང་བྱུང་ཁོར་ཡུག་སྲུང་སྐྱོབ་སོགས་ཀྱི་ལས་དོན་ལ་རྒྱུས་ལོན་བྱས་ཡོད་པའི་སྐོར་རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ཏུ་འགྲེལ་བརྗོད་བྱས་ཡོད་ཀྱང་། དོན་དངོས་སུ་ས་གནས་མང་ཚོགས་ཀྱི་འདོད་བློ་མེད་བཞིན་དུ། མདོ་ལ་རིང་མོའི་ལྷོ་ངོས་ཀྱི་ས་ཁུལ་གྱི་མུ་རུ་རྩ་ཐང་གཙོས་པའི་གཏེར་ཁ་བསྔོག་འདོན་གྱི་ལས་གཞི་ཤུགས་ཆེན་སྤེལ་བ་དང་། ད་ལྟའང་ཡུལ་སྐོར་སྤྲོ་འཆམ་གྱི་ལས་རིགས་གོང་འཕེལ་གཏོང་རྒྱུའི་ཆེད་དུ་འཛུགས་སྐྲུན་འདྲ་མིན་བྱས་ཏེ། ས་གནས་བོད་མིའི་འཚོ་གནས་དང་འབྲེལ་ཡུལ་ཁམས་སྙོམས་སྒྲིག་སོགས་ལ་གཏེར་སྐྱོན་ཤུགས་ཆེན་བཏང་དང་གཏོང་མུས་ཡིན་པ་རེད།
གསར་འགོད་པ། བསྟན་འཛིན་ཕུར་བུ།
