རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་བོད་དང་ཧོང་ཀོང་། ཡུ་གུར་གཙོས་པའི་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐད་བློ་འཚབ་དང་འབྲེལ་རྒྱ་ནག་གཞུང་ལ་ངོ་རྒོལ་མཚོན་པའི་མཉམ་འབྲེལ་བསྒྲགས་གཏམ་སྤེལ་འདུག
ཁ་སང་ཕྱི་ཚེས་ ༢༢ ཉིན་སུད་སིའི་གྲོང་ཁྱེར་ཇེ་ནི་ཝ་རུ་འཚོག་བཞིན་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་འདུ་ཐེངས་ ༤༧ པའི་སྟེང་། ཁེ་ན་ཌ་དང་ཨ་རིས་གཙོས་པའི་ཚོགས་ཁོངས་རྒྱལ་ཁབ་ ༤༤ ཡིས་རྒྱ་ནག་དམར་གཞུང་གིས་ཤར་ཊུར་ཀི་སི་ཐན་དང་། བོད། ཧོང་ཀོང་བཅས་ནང་དྲག་གནོན་གྱི་སྲིད་ཇུས་སྤེལ་བཞིན་པར་བློ་འཚབ་དང་ངོ་རྒོལ་ཡོད་པའི་མཉམ་འབྲེལ་བསྒྲགས་གཏམ་སྤེལ་ཡོད་པ་རེད།
ཁེ་ན་ཌའི་རྒྱལ་ཚོགས་ཀྱི་སྐུ་ཚབ་སྐུ་ལྕམ་ལེ་སི་ལི་ཨི་ནོར་ཊོན་ (Leslie E. Norton) གྱིས་ཚོགས་ཐོག་ཏུ་མཉམ་འབྲེལ་གྱི་བསྒྲགས་གཏམ་དེ་སྒྲོག་སྦྱང་གནང་བའི་ནང་། ང་ཚོས་ད་ལྟའི་ཤིན་ཅང་ཡུ་གུར་རང་སྐྱོང་ཁུལ་གྱི་འགྲོ་བ་མིའི་ཐོབ་ཐང་གི་གནས་སྟངས་ལ་བློ་འཚབ་ཆེན་པོ་བྱེད་ཀྱི་ཡོད། ད་བར་ཤིན་ཅང་ནང་མི་གྲངས་ས་ཡ་ ༡ ལྷག་བཀག་ཉར་བྱས་ཡོད་པ་མ་ཟད། ཁུལ་དེའི་ཡུ་གུར་མི་རིགས་གཙོས་པའི་གྲངས་ཉུང་མི་རིགས་གཞན་རྣམས་ཀྱི་སྟེང་དོགས་ཟོན་མྱུལ་ཞིབ་དང་། ཁོང་ཚོའི་གཞི་རྩའི་རང་དབང་དང་རིག་གཞུང་བཅས་པར་དམ་བསྒྲགས་ཤུགས་ཆེན་པོ་བྱེད་ཀྱི་ཡོད་པའི་གནས་ཚུལ་ཁུངས་འཕེར་ཐོན་གྱིན་འདུག མགོ་ཁྲིད་ཚོས་མི་ཆོས་ལས་འདས་པའི་མནར་གཅོད་དང་ཉེས་ཆད་གཅོད་ཀྱི་ཡོད་པ་མ་ཟད། སྦྲུམ་མ་རྣམས་ཀྱི་སྐྱེ་སྒོ་བཙན་གྱིས་འགོག་པ་དང་། རྩུབ་སྤྱོད་སྤེལ་བ། བཙན་གྱིས་ཕ་མ་བུ་ཕྲུག་ཁ་བྲལ་དུ་གཏོང་གི་ཡོད་པའི་གནས་ཚུལ་ཡང་ཐོན་གྱི་ཡོད། ཅེས་བརྗོད་འདུག
བསྒྲགས་གཏམ་གྱི་མཐའ་མཇུག་དེར། རྒྱ་ནག་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ལག་བསྟར་བྱས་རྐྱེན་ཧོང་ཀོང་ནང་གི་གཞི་རྩའི་རང་དབང་གི་གནས་སྟངས་ཇེ་སྡུག་ཏུ་འགྲོ་བཞིན་པ་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་ང་ཚོས་སྔར་བཞིན་བློ་འཚབ་ཆེན་པོ་བྱེད་ཀྱི་ཡོད། ང་ཚོའི་ངོས་ནས་རྒྱ་ནག་གཞུང་གིས་རང་གི་ཕྲག་ཐོག་ཏུ་བབས་པའི་འགྲོ་བ་མིའི་ཐོབ་ཐང་སྲུང་སྐྱོབ་དང་འབྲེལ་བའི་ཁས་ལེན་རྣམས་ལག་ལེན་དུ་བསྟར་དགོས་པའི་སྐུལ་འདེད་བྱེད་ཀྱི་ཡོད། ཅེས་བརྗོད་ཡོད་པ་དང་། ད་རེས་དམིགས་བསལ་རྒྱལ་ཚོགས་ཀྱི་རྒྱལ་ཁབ་ ༤༤ ངོས་ནས་རྒྱ་ནག་གཞུང་གིས་འཕྲལ་དུ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་དང་རང་དབང་ཅན་གྱི་དབྱེ་ཞིབ་པ་རྣམས་ཤིན་ཅང་གི་དངོས་ཡོད་གནས་སྟངས་ཤེས་རྟོགས་ཆེད་ཁུལ་དེར་བསྐྱོད་ཆོག་པའི་དགོས་འདུན་བཏོན་འདུག
ཐེངས་འདིའི་མཉམ་འབྲེལ་བསྒྲགས་གཏམ་དེ་ནི་རྒྱལ་ཚོགས་ཀྱི་ཚོགས་ཁོངས་རྒྱལ་ཁབ་ཨོ་གླིང་དང་། བྷེལ་ཇམ། ཌེན་མག ཧྥ་རན་སི། འཇར་མ་ནི། ཨི་ཛི་རལ། ཉི་ཧོང་། ཨི་ཊ་ལི། ནེའུ་ཛི་ལན་ཌི། སེ་ཝེ་ཌན། སུད་སི། དབྱིན་ཡུལ། པོ་ལན་ཌི། ནོར་ཝེ། ཡུ་ཀེ་རན་ (Ukraine) སོ་ལོ་ཝ་ཀི་ཡ་(Solovakia) སོགས་ཀྱིས་མཚན་པའི་ཤར་ནུབ་ཀྱི་རྒྱལ་ཁབ་ ༤༤ ཡིས་སྤེལ་བ་ཞིག་ཡིན་འདུག་ལ། ད་ལྟའི་ཆར་རྒྱ་ནག་གཞུང་ངོས་ནས་དེར་ལན་འདེབས་ལྟ་བུ་གང་ཡང་བྱས་མི་འདུག
གསར་འགོད་པ། པ་སངས་ཚེ་རིང་།
