རྒྱ་ནག་གཞུང་གིས་བོད་ཁུལ་དུ་རྣམ་པ་འདྲ་མིན་གྱི་ཐོག་ནས་རྒྱ་ནག་དམར་ཤོག་ཚོགས་པ་བཙུགས་ནས་ལོ་ ༡༠༠ ལོན་པར་རྟེན་འབྲེལ་གྱི་བྱ་འགུལ་རིགས་སྤེལ་དུ་འཇུག་བཞིན་པ་དེས་བོད་མིའི་སེམས་ལ་རྨ་ཁ་བཟོ་ཡི་ཡོད་འདུག
སང་ཉིན་ཕྱི་ཟླ་ ༧ ཚེས་ ༡ ཉིན་རྒྱ་ནག་དམར་ཤོག་ཚོགས་པ་བཙུགས་ནས་ལོ་ ༡༠༠ ལོན་གྱི་ཡོད་པར་བརྟེན་རྒྱ་ནག་གཞུང་གིས་བོད་ཁུལ་དུ་ཉིན་མོ་དེ་དང་འབྲེལ་བའི་བྱ་འགུལ་རིགས་སྣ་ཚོགས་སྤེལ་དུ་འཇུག་བཞིན་འདུག མདང་དགོང་སྤྱི་ཚོགས་དྲ་ལམ་དུ་ཕོ་བྲང་པོ་ཏཱ་ལའི་མདུན་ཐང་གི་བརྙན་ཐུང་ཞིག་འགྲེམས་སྤེལ་གནང་བའི་ནང་། ཕོ་བྲང་པོ་ཏཱའི་རྩིག་ངོས་སུ་རྒྱ་ནག་དམར་ཤོག་ཚོགས་པ་བཙུགས་ནས་ལོ་བརྒྱ་ལོན་པར་སྤྲོ་སེམས་འཁོར་བའི་ངང་ནས་རྟེན་འབྲེལ་ཞུ་ཞེས་པ་དང་། གཡས་གཡོན་དུ་སྐར་མ་སེར་པོ་མང་པོ་འཆར་བའི་བརྙན་རིས་ཆེན་པོ་ཞིག་མཐོང་གི་འདུག་ལ། བོད་མི་ཞིག་གིས་ཕོ་བྲང་པོ་ཏཱ་ལའི་ངོས་སུ་དེ་འདྲ་བཟོས་ནས་ཧམ་པ་ལ། དེ་ཚོས་བསམ་བློ་ག་འདྲ་བཏང་བ་ཡིན་ན། རྒྱ་རིགས་ཀྱིས་ཁེངས་ཏེ་རྦད་དེ་རྒྱ་ནག་ནང་བསླེབས་པ་དང་གཅིག་པ་རེད་འདུག་ཅེས་བློ་ཕམ་ཆེན་པོས་བརྗོད་འདུག་ལ། ཡང་ཕོ་བྲང་པོ་ཏཱ་ལའི་མདུན་ཐང་གི་བརྙན་ཐུང་གཞན་ཞིག་གི་ནང་དུ། བོད་མི་ཞིག་གིས་ཞབས་སྐོར་ལ་ང་ཚོ་རྐང་གཅིག་འགྲོ་ཆོག་གི་མི་འདུག་ཅེས་ངུ་བཞིན་འདུག་ལ། པར་ཁག་ཅིག་དང་བརྙན་ཐུང་དེ་གཉིས་སྤྱི་ཚོགས་དྲ་ལམ་ཁག་ཏུ་ཤུགས་ཆེན་པོ་སྤེལ་གྱི་འདུག་ལ། མི་མང་པོས་བློ་འཚབ་དང་གདུང་སེམས་མཉམ་སྐྱེད་བྱེད་ཀྱི་འདུག
རྒྱ་ནག་གཞུང་གིས་བོད་ཁུལ་གང་སར་དམར་ཤོག་ཚོགས་པའི་བཀའ་དྲིན་མཚོན་པའི་བྱ་འགུལ་རིགས་སྤེལ་དགོས་པའི་བཀའ་བཀོད་བཏང་ཡོད་པ་ལྟར། ཉེ་སྔོན་ནས་བཟུང་བོད་ཡུལ་དུ་དམར་ཤོག་ཚོགས་པར་བསྟོད་གླུ་ལེན་ཞིང་། དགའ་སྤྲོའི་རྣམ་པ་སྟོན་པའི་འདུ་འཛོམས་རིགས་མང་པོ་བྱེད་ཀྱི་འདུག དེ་རིང་འདི་གའི་གསར་འགོད་པར་བོད་ནང་གི་བོད་མི་ཞིག་གི་གནས་ཚུལ་མཁོ་སྤྲོད་གནང་བ་ལྟར་ན། ད་ལོ་བོད་ས་ཡོངས་ལ་རྒྱ་ནག་གུང་ཁྲན་ཏང་བཙུགས་ནས་མི་ལོ་བརྒྱ་འཁོར་བའི་མཛད་སྒོར་ཡུལ་ལུང་སོ་སོའི་སློབ་གྲྭ་དང་། སྤྲོ་ཚོགས་ཁང་ཁག་ཏུ་མི་མང་མཉམ་འཛོམས་བྱས་ཏེ་ཡུལ་ལུང་སོ་སོའི་དམངས་ཁྲོད་ཀྱི་རིག་གནས་ལ་གཞིགས་སྟེ། གུང་ཁྲན་ཏང་ལ་བསྟོད་ཅིང་རྟེན་འབྲེལ་མཚོན་བྱེད་ཀྱི་གླུ་ལེན་གར་རྩེད་དང་། ཤིས་ཚིག་གྱེར་འདོན་སོགས་ཀྱི་བྱ་འགུལ་རིགས་སྤེལ་དགོས་པའི་བཀའ་བཏང་ཡོད་སྐོར་དང་། བོད་ནང་གི་ལས་བྱེད་མང་པོ་ཞིག་གིས་རྒྱ་ནག་བརྒྱ་སྟོན་ལ་རྟེན་འབྲེལ་ཞུ་བའི་ཡི་གེ་དང་པར་རིས་མང་པོ་ཞིག་སྤེལ་གྱི་ཡོད་པ་དེ་དག་ང་རང་གི་མིག་ལམ་ལ་གཏན་ནས་མི་མཛེས་པ་ཞིག་དང་། སེམས་སུ་ན་ཟུག་དྲག་པོ་སྐྱེ་ཡི་འདུག ཅེས་དང་། ཡང་ཁོང་གིས། ༧པན་ཆེན་རིན་པོ་ཆེས་གསུངས་པ་བཞིན། རྒྱལ་ཁབ་བོར་ཟིན་པའི་མི་ཞིག་ལ། རྒྱལ་སྟོན་དུས་ཆེན་ཞེས་པ་ཞིག་ཡོད་སྲིད་རྒྱུ་མ་རེད། ཅེས་བརྗོད་བྱུང་།
གཞན་ཡང་། འདི་ལོའི་ལོ་མགོ་ཁོ་ནར་བོད་མདོ་སྨད་ཕྱོགས་ནས་རྩོམ་པ་པོ་དང་ཤེས་ཡོན་པ་སྙན་གྲགས་ཅན་ཁག་ཅིག་རྒྱ་ནག་གཞུང་གིས་ཉེས་མིང་སྣ་ཚོགས་གཡོགས་ཏེ་འཛིན་བཟུང་བྱས་ཡོད་པ་དང་། བོད་ཕྱི་ཕྱོགས་ཀྱི་གསར་འགྱུར་བརྒྱུད་ལམ་ཁག་ཏུ་ཁོང་ཚོ་ཁག་ཅིག་གི་གནས་ཚུལ་ཐོན་ཡོད་ཀྱང་ད་དུང་ཁག་ཅིག་གི་གནས་ཚུལ་གཏན་ནས་ཕྱི་རུ་འབྱོར་ཐུབ་ཀྱི་མེད་པའི་གནས་ཚུལ་འདི་གའི་གསར་འགོད་པར་འབྲེལ་ཡོད་ནས་བརྗོད་ཀྱི་འདུག་ལ། གོང་བརྗོད་བོད་ནང་གི་བོད་མི་དེས། སེམས་སྨྲེང་བ་ཞིག་ལ། འུ་ཅག་གི་ས་འདི་ནས་རྒྱུག་ཐག་ཆོད་ཀྱི་རྟ་ཕོ་འགའ་གོ་མེད་ཚོར་མེད་དུ་སྒ་སྲབ་དང་བཅས་བོར་སོང་མོད། རྐུན་མ་རྐུན་མ་རེད་ཟེར་ཕོད་མཁན་ནི་གཅིག་ཀྱང་མི་འདུག དཔེར་ན། དྷི་ལྷ་དང་། སྒོ་ཤེར། རོང་བོ་དགེ་འདུན་ལྷུན་འགྲུབ། གངས་སྐྱེས་སྒྲུབ་པ་སྐྱབས། འདི་དག་ནི་ཧ་ཅང་གློ་བུར་དུ་གོ་མེད་ཚོར་མེད་དུ་མུན་པའི་འོབས་སུ་བཙུད་སོང་། སྐད་ཆ་ཡང་གོ་ཐབས་བྲལ། ཞེས་འཕྲིན་ཐུང་གི་ལམ་ནས་བརྗོད་བྱུང་།
སང་ཉིན་རྒྱ་ནག་དམར་ཤོག་ཚོགས་པ་བཙུགས་ནས་ལོ་ ༡༠༠ ལོན་གྱི་ཡོད་པའི་ཉིན་མོ་དང་བསྟུན་བཙན་བྱོལ་བོད་མིའི་སྤྱི་ཚོགས་ནང་རྒྱ་ནག་དམར་ཤོག་ཚོགས་པས་བོད་གཙོ་བོར་གྱུར་བའི་གྲངས་ཉུང་མི་རིགས་ལ་བཙན་གནོན་གདུག་རྩུབ་ཅན་གྱི་སྲིད་ཇུས་ལག་བསྟར་བྱེད་བཞིན་པ་ཐེར་འདོན་དང་། འཛམ་གླིང་མི་མང་གིས་རྒྱ་ནག་གཞུང་གི་འགྲོ་བ་མིའི་རིགས་ལ་རྒོལ་བའི་བྱ་སྤྱོད་རྣམས་ངོས་ཟིན་པ་བྱས་ཏེ་མཚམས་འཇོག་ཡོང་ཐབས་སུ་གནོན་ཤུགས་སྤྲོད་དགོས་པ་སོགས་ཀྱི་ལས་འགུལ་རིགས་སྤེལ་འཆར་འདུག་ལ། ཡུ་གུར་དང་ཧོང་ཀོང་། ཆོས་འཁོར་རྩ་རླུང་སྒོམ་སྒྲུབ་པ་སོགས་ནས་ཀྱང་རྒྱ་ནག་གཞུང་ལ་ངོ་རྒོལ་གྱི་ལས་འགུལ་རིགས་སྤེལ་རྩིས་ཡོད་འདུག
དཔལ་ལྡན།
