ཉེ་བའི་བདུན་གཅིག་ཙམ་རིང་ཧི་མ་ཅལ་མངའ་སྡེའི་ནང་ཏོག་དབྱིབས་ནད་པའི་གྲངས་འབོར་ཇེ་མང་དུ་འགྲོ་ཡི་ཡོད་སྟབས། མངའ་སྡེ་གཞུང་ནས་ཏོག་དབྱིབས་ན་ཚ་མེད་པའི་བརྟག་འབྲས་དང་འགོག་ཁབ་བརྒྱབ་ཚར་མཁན་རྣམས་ཧི་མ་ཅལ་ནང་ཡོང་ཆོག་གི་ཡོད་སྐོར་བརྗོད་འདུག
རྒྱ་གར་གྱི་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཉེ་བའི་བདུན་ཕྲག་གཅིག་ཙམ་རིང་རྒྱ་གར་གྱི་མངའ་སྡེ་ཧི་མ་ཅལ་ནང་ཏོག་དབྱིབས་གཉན་རིམས་འགོས་ཁྱབ་བྱུང་བའི་མི་གྲངས་ཇེ་མང་དུ་ཕྱིན་ཡོད་སྟབས། དེ་རིང་མངའ་སྡེ་སྤྱི་ཁྱབ་བློན་ཆེན་ཇའེ་རམ་ཐ་ཀོར་མཆོག་གིས། ཧི་མ་ཅལ་མངའ་སྡེའི་ནང་ཡོང་མཁན་ཚོར་ཆུ་ཚོད་ ༧༢ ནང་ཚུད་ཀྱི་ཏོག་དབྱིབས་ནད་རྟགས་མེད་པའི་བརྟག་འབྲས་ངེས་པར་དགོས་ཀྱི་ཡོད་པའི་བཀའ་བཏང་ཡོད་པ་རེད།
ཧི་མ་ཅལ་མངའ་སྡེའི་སྤྱི་ཚོགས་བདེ་ཐང་དོ་དམ་ཚན་པས་བཀོད་ཁྱབ་གསར་བ་ཞིག་བཏང་བའི་ནང་། ཧི་མ་ཅལ་མངའ་སྡེའི་ནང་སྤྲོ་འཆམ་དུ་ཡོང་མཁན་ཚོར་ངེས་པར་ཆུ་ཚོད་ ༧༢ ལས་མ་བརྒལ་བའི་ཏོག་དབྱིབས་གཉན་རིམས་མེད་པའི་བརྟག་འབྲས་དགོས་ཀྱི་ཡོད། ཏོག་དབྱིབས་འགོག་ཁབ་ཚར་དང་པོ་བརྒྱབ་ཟིན་པ་དང་ཡང་ན་འགོག་ཁབ་གཉི་ག་བརྒྱབ་ཟིན་པ་རྣམས་ཡོང་ཆོག་གི་ཡོད། ཅེས་བརྗོད་པ་དང་། ཁ་སང་གཅིག་པུ་ཧི་མ་ཅལ་ནང་ཏོག་དབྱིབས་ནད་པ་གསར་བ་མི་གྲངས་ ༢༤༣ བྱུང་བ་དང་མི་ ༤ རྐྱེན་འདས་སུ་ཕྱིན་ཡོད་འདུག
ཧི་མ་ཅལ་གྱི་མངའ་སྡེ་བློན་ཆེན་ཇའེ་རམ་ཐ་ཀོར་མཆོག་གིས། ཏོག་དབྱིབས་གཉན་རིམས་འགོས་ཁྱབ་ཀྱི་དཀའ་ངལ་སླར་ཡང་འཕྲད་ཀྱི་ཡོད་པས། ཟླ་འདིའི་ཕྱི་ཚེས་ ༩ ཉིན་མངའ་སྡེའི་བློན་ཆེན་ལྷན་ཚོགས་བགྱིས་ཏེ། ཏོག་དབྱིབས་འགོས་ཁྱབ་མཚམས་འཇོག་དང་འབྲེལ་བའི་དམ་དྲག་ཁག་ཅིག་བསྐྱར་དུ་སྤེལ་སྲིད་པ་རེད། ཅེས་བརྗོད་ཡོད་པ་དང་། ཟླ་སྔོན་མའི་ནང་ཧི་མ་ཅལ་མངའ་སྡེ་གཞུང་གིས་ས་མཚམས་སྒོ་འབྱེད་ཀྱིས་ཡུལ་སྐོར་བར་སྣེ་ལེན་བྱེད་པའི་མགོ་བརྩམས་པ་དང་སྐབས་དེར་མངའ་སྡེ་གཞུང་ནས་ཕྱི་ནས་ཡོང་མཁན་དག་ལ་ནད་མེད་བརྟག་འབྲས་དགོས་པའི་བཀའ་ཁྱབ་གང་ཡང་བཏང་མེད་པ་རེད་ལ། ཧི་མ་ཅལ་གྱི་ས་མཚམས་སྒོ་འབྱེད་བྱེད་དུས་ཧི་མ་ཅལ་ནང་ཁྱོན་ཏོག་དབྱིབས་ནད་པ་གཅིག་སྟོང་མ་ཟིན་ཙམ་ལས་མེད་པ་རེད།
ད་སྔ་བར་ཧི་མ་ཅལ་མངའ་སྡེའི་ནང་ཏོག་དབྱིབས་ནད་པ་ཁྱོན་ ༢༠༦༥༨༩ བྱུང་ཡོད་པའི་ཁྲོད། མི་གྲངས་ ༣༥༢༣ རྐྱེན་འདས་སུ་ཕྱིན་ཞིང་། མི་གྲངས་ ༢༠༡༦༥༢ དྲག་སྐྱེད་བྱུང་ཡོད་པ་རེད། ད་ལྟ་ནད་པ་ཁྱོན་ ༡༤༡༤ ཡོད་པ་དང་ད་སྔ་བར་ཀང་རཱ་རྫོང་ཁོངས་སུ་ནད་པ་ཁྱོན་ ༤༦༤༠༠ བྱུང་སྟེ་ཧི་མ་ཅལ་མངའ་སྡེའི་ནད་པ་མང་ཤོས་ཀྱི་ས་ཁུལ་ཆགས་ཡོད་པ་དང་། ད་ལྟའི་ཆར་ཧི་མ་ཅལ་ནང་ཉིན་རེའི་ནད་པའི་གྲངས་འབོར་འཕེལ་ཚད་མྱུར་མོ་མིན་ནའང་། རིམ་བཞིན་ནད་པ་ཇེ་མང་དུ་འགྲོ་ཡི་ཡོད་པའི་ཉེན་ཁའི་འོག་གཞུང་ངོས་ནས་ཏོག་དབྱིབས་དང་འབྲེལ་དམ་དྲག་བཀོད་ཁྱབ་ཁག་ཅིག་གཏོང་འཆར་གནང་གི་འདུག
གསར་འགོད་པ། སྐལ་བཟང་སྦྱིན་པ།
