འདས་པའི་བདུན་ཕྲག་ནང་བོད་མི་ཏོག་དབྱིབས་ནད་པ་ཇེ་མང་དུ་སོང་འདུག

འདས་པའི་བདུན་ཕྲག་གཅིག་ནང་རྒྱ་གར་དང་བལ་ཡུལ་ནང་བོད་མི་ཏོག་དབྱིབས་ནད་པ་གསར་པ་ ༢༣༢ བྱུང་བའི་ཁྲོད་ནས་ལོ་ན་མཐོ་ཤོས་ ༩༢ དང་ལོ་ན་ཆུང་ཤོས་ཟླ་བ་གཅིག་ཙམ་ཡིན་ཞིང་བོད་མི་ ༢ འདས་གྲོངས་སུ་ཕྱིན་ཡོད་འདུག

ཁ་སང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༡ པ་ལྟར་ན། བདུན་ཕྲག་སྔ་མའི་ནང་རྒྱ་གར་དང་བལ་ཡུལ་ནང་ནད་གཞི་གསར་པ་ཕོག་པའི་བོད་མི་ ༢༣༢ བྱུང་བའི་ཁྲོད་ནས་ལོ་ན་མཐོ་ཤོས་ ༩༢ དང་ལོ་ན་ཆུང་ཤོས་ཟླ་བ་གཅིག་ཙམ་ཡིན་པ་དང་། བོད་མི་ ༢ འདས་གྲོངས་སུ་ཕྱིན་ཡོད་འདུག ད་ལྟ་བར་དུ་རྒྱ་གར་དང་བལ་ཡུལ་ནང་བོད་མི་ཏོག་དབྱིབས་ནད་པ་ ༥༩༤༨ བྱུང་བའི་ཁྲོད་དྲག་སྐྱེད་ཟིན་པ་ ༥༣༥༤་དང་། རྐྱེན་འདས་སུ་ཕྱིན་པ་ ༡༤༠། ཏོག་ནད་ཀྱིས་མནར་བཞིན་པ་ ༤༥༤ ཡོད་འདུག

ཏོག་དབྱིབས་ལས་དོན་ཚོགས་ཆུང་གི་ལས་བསྡོམས་ལྟར་ན། རྒྱ་གར་ནང་གི་བོད་མི་འབུམ་ ༢ (༢༡༡།༠༠༧)ལྷག་ལ་འགོག་ཁབ་དང་པོ་ཐོབ་ཡོད་པ་དང་། བོད་མི་ ༢༨། ༧༢༦ ལ་འགོག་ཁབ་གཉིས་པ་ཐོབ་ཡོད་འདུག བལ་ཡུལ་ནང་གི་བོད་མི་གྲངས་ ༢༠༣༩ ལ་ Johson and Johnson ཡི་འགོག་ཁབ་ཐོབ་ཡོོད་པ་དང་།   བོད་མི་ ༨༣༡ ལ་ (COVID SHIED) ཡི་འགོག་ཁབ་དང་པོ་ཐོབ་འདུག དེ་བཞིན། འདས་པའི་བདུན་ཕྲག་གཅིག་ནང་རྒྱ་གར་ནང་གི་ས་གནས་གྲངས་ ༡༣ དང་བལ་ཡུལ་ནང་དུ་ས་གནས་གྲངས་ ༦ ལ་རང་ཁྱིམ་དུ་ཟུར་བཀག་ལ་འདུག་མཁན་བོད་མི་གྲངས་ ༨༨༠ དང་ཚོགས་སྡེའི་ཟུར་བཀག་ནང་འདུག་མཁན་མི་གྲངས་ ༧༥ བྱུང་ཡོད་འདུག

གསར་འགོད་གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས། ཉེ་སྔོན་ཏོག་དབྱིབས་རིམས་ནད་ཕོག་ནས་དྲག་སྐྱེད་བྱུང་ཟིན་ནའང་། མུ་མཐུད་ནད་རྟགས་ལྷག་སྟེ་གཟུགས་པོ་ཐང་ཆད་པ་དང་། དབུགས་གཏོང་ལེན་ལ་དཀའ་ངལ་ཡོད་པ། ཚ་བ་འཕར་བ། གློ་བ་དྲག་སྐྱེད་མ་བྱུང་བ་འདུག་པས། ཚང་མས་སོ་སོའི་འཕྲོད་བསྟེན་ལ་དོ་སྣང་བྱས་ཏེ། ཏོག་དབྱིབས་རིམས་ནད་ཀྱི་ནད་རྟགས་ཡོད་ཚེ་སྣང་མེད་དུ་མ་བཞག་པར། བོད་ལུགས་དང་ཕྱི་ལུགས་ཀྱི་སྨན་པར་བསྟེན་གཏུགས་དང་། གཟུགས་གཞི་བརྟག་དཔྱད་བྱ་རྒྱུ་གལ་ཆེན་པོ་རེད། ཅེས་ལམ་སྟོན་གནང་འདུག

ཡང་ཕྱི་ལུགས་སྨན་པ་བརྩོན་འགྲུས་ལགས་ཀྱིས། སྤྱིར་རྒྱ་གར་ནང་གི་ཏོག་དབྱིབས་རིམས་ནད་ཀྱི་གནས་སྟངས་ཡག་པོ་ཆགས་ཀྱི་ཡོད་ཀྱང་།  མ་ཧཱ་རཱ་ཤི་ཊ (Maharashtra) དང་ཀེ་རཱ་ལ་ ( kerala)  གཉིས་ཀྱི་གནས་སྟངས་ཡག་པོ་མེད་པ་རེད། དེ་བཞིན་ཧི་མ་ཅལ་ལ་མཚོན་ན་ཏོག་དབྱིབས་ནད་པ་མི་གྲངས་ ༢༤༣ གསར་དུ་ཐོན་ཡོད་པ་དང་། མི་གྲངས་ ༤ རྐྱེན་འདས་སུ་ཕྱིན་ཏེ་གནས་སྟངས་ཇེ་སྡུག་ཏུ་འགྲོ་ཡི་ཡོད་པས། ཧི་མ་ཅལ་མངའ་སྡེ་རུ་ཡོང་མཁན་གྱི་ཡུལ་སྐོར་སྤྲོ་འཆམ་པ་ཚོས་ཆུ་ཚོད་ ༧༢ ནང་ཚུད་ཀྱི་ཏོག་དབྱིབས་ནད་རྟགས་མེད་པའི་བརྟག་དཔྱད་གྲུབ་འབྲས་དགོས་པ་དང་། མེག་ལོར་ཁུལ་དུ་ཕྱི་ལོག་ནས་ཡུལ་སྐོར་སྤྲོ་འཆམ་པ་མང་པོ་ཞིག་ཡོང་གི་ཡོད་སྟབས། ཐང་ཁྲོམ་གཉེར་མཁན་དང་། ཟ་ཁང་གཉེར་མཁན་གྱི་བོད་མི་ཚོས་ཁ་རས་ཡག་པོ་གྱོན་ནས་སོ་སོས་གཟབ་གཟབ་བྱ་དགོས་སྐོར་དང་།  ཏོག་དབྱིབས་ནད་རྟགས་ཐོན་ཡང་། ཏོག་དབྱིབས་འགོག་ཁབ་བརྒྱབ་ཡོད་ཚེ་བདེ་འཇགས་ཆེ་བ་དང་ལྷག་པར་ངོ་བོ་འགྱུར་བའི་ཏོག་དབྱིབས་གཉན་རིམས་དེ་ལ་འགོག་ཁབ་སྨན་ནུས་ཆེན་པོ་ཡོད་པས། འགོག་ཁབ་སྐྱོན་མེད་མཁན་ཚོས་ངེས་པར་དུ་འགོག་ཁབ་བརྒྱག་དགོས་པ་རེད་ཅེས་འབོད་སྐུལ་གནང་འདུག

དཔལ་ལྡན།