རྒྱ་གར་ནས་བོད་ལ་འགྲོ་མཁན་ཚོས་སྐྱབས་བཅོལ་ཡིག་ཆ་དང་སྡོད་གནས་ཁ་བྱང་སོགས་བོད་ལ་བཏང་ནས་རྫོང་ཕྱིར་སྡོད་བོད་མིའི་གཞུང་ལས་ཁང་ཟེར་བ་དེས་ཡིག་ཆ་བཟོ་ཡོང་གི་ཡོད་འདུག
ཕྱི་ལོ་༢༠༢༠ཟླ་༣ཙམ་ནས་བཟུང་རྒྱ་གར་རྒྱལ་ཡོངས་ནང་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་༡༩་པ་རྒྱ་ཁྱབ་ཏུ་ཕྱིན་པའི་མགོ་བརྩམས་པར་བརྟེན། རྒྱ་གར་རྒྱལ་ཡོངས་ནང་ཐེམ་སྤང་བཀའ་རྒྱ་རིམ་པར་བསྒྲགས་དགོས་བྱུང་བ་དང་འགྲོ་འོང་བཀག་སྡོམ་ད་ལྟའང་ཡོངས་སུ་ཀློད་མེད་པའི་གནས་སྟངས་འོག་ཡོད་ལ། རྒྱ་གར་ནང་གནས་སྡོད་བོད་མིའི་ཁྲོད་བོད་དུ་འགྲོ་འདོད་འདུག་ཀྱང་། དེང་སང་བོད་ལ་གཉེན་འཕྲད་སོགས་སུ་འགྲོ་ཐུབ་ཀྱི་ཡོད་མེད་སྐོར་སྐད་ཆ་དྲི་མཁན་མི་ཉུང་བ་ཞིག་འདུག
ཉིན་ཤས་སྔོན་འདི་གའི་གསར་འགོད་པས་ཁ་པར་བརྒྱུད་ལྡི་ལིའི་རྒྱ་ནག་གཞུང་ཚབ་ཁང་ལ་བོད་དུ་འགྲོ་བའི་ཐོངས་མཆན་སྤྲོད་ཀྱི་ཡོད་མེད་དྲིས་པར་ཁོ་ཚོས། ལྡི་ལི་གཞུང་ཚབ་ཁང་ནས་སྔར་གྱི་གཉེན་འཕྲད་སོགས་སུ་འགྲོ་བའི་ཡིག་ཆ་ད་དུང་ལོ་གཅིག་ཙམ་ལ་བཟོ་རྒྱུ་མིན་སྐོར་དང་། བོད་ལ་འགྲོ་འདོད་ཡོད་ཚེ། ཕ་ཡུལ་གྱི་ནང་མི་སྤུན་མཆེད་ནས་རྒྱ་གར་ནས་ཡོང་མཁན་གྱི་ད་ལྟའི་སྡོད་གནས་དང་ཁ་པར་ཨང་གྲངས་སོགས་གནས་ཚུལ་ཞིབ་ཕྲ་སྤྲད་དེ་ཐོ་འགོད་བྱེད་དགོས་པ་དང་། ཐོ་འགོད་བྱེད་ས་ནི། ས་གནས་སོ་སོའི་རྫོང་ཕྱིར་སྡོད་རང་མིའི་གཞུང་ལས་ཁང་ཟེར་བ་ཞིག་བཙུགས་ཡོད་པ་དེར་ཐོ་འགོད་བྱེད་དགོས་པ་དང་། ལས་ཁུངས་དེས་གློག་འཕྲིན་བརྒྱུད་ནས་ལྡི་ལིའི་རྒྱ་ནག་གཞུང་འཚབ་ཁང་ལ་ཡིག་ཆ་གཏོང་བ་དང་། དེ་ནས་གཞུང་ཚབ་ཁང་གིས་མི་དེར་འབྲེལ་གཏུག་བྱེད་ཡོང་གི་ཡོད་འདུག་ལ། འབྲེལ་ཡོད་ཐོངས་མཆན་ཞུ་མཁན་ཁག་ཅིག་ནས་ལས་ཁང་དེ་བརྒྱུད་ནས་ཡིག་ཆ་ཐོབ་མཁན་ཚོ་བོད་ནང་གཏན་སྡོད་བྱས་ཏེ། ཕྱིར་རྒྱ་གར་ནང་ལོག་ཆོག་གི་མེད་སྐོར་ཡང་བརྗོད་བྱུང་།
སྔོན་མ་ཡིན་ན་རྒྱ་གར་ནང་གནས་སྡོད་བོད་མི་བོད་ལ་གཏན་དུ་འགྲོ་ལོག་མཁན་དང་གཉེན་འཕྲད་དུ་འགྲོ་མཁན་ཚོ་རྒྱ་གར་རྒྱལ་ས་ལྡི་ལི་གསར་པའི་རྒྱ་ནག་གཞུང་ཚབ་ཁང་དུ་ཕྱིན་ཏེ། སོ་སོའི་ད་ལྟའི་སྡོད་གནས་ཁ་བྱང་དང་བོད་དུ་ཡོད་པའི་སྤུན་ཆེད་སོགས་ཀྱི་ཁ་པར་ཨང་གྲངས་དང་ཁ་བྱང་སོགས་ཁ་གསལ་སྤྲད་རྗེས། ཉུང་མཐར་ཟླ་བ་བཞི་ཡས་མས་ཀྱི་རྗེས་ནས་ཡིག་ཆ་རག་མིན་གསལ་པོ་ཆགས་ཐུབ་ཀྱི་ཡོད་ལ། བོད་ནང་ནས་ལས་དོན་དེ་དག་ཞིང་ཆེན་དང་ཁུལ། གྲོང་ཁྱེར་རིམ་པའི་ནང་རྒྱ་ནག་འཐབ་ཕྱོགས་གཅིག་གྱུར་ཁང་གི་ཕྱིར་སྡོད་རང་མིའི་གཞུང་ལས་ཁང་ཟེར་བ་ཞིག་བཙུགས་ཡོད་པ་དེས་བྱེད་ཀྱི་ཡོད་འདུག
འདས་པའི་ལོ་མང་རིང་བཙན་བྱོལ་ནང་སློབ་གཉེར་བྱས་ཡོད་པ་དང་། ད་ལྟ་བསླབ་པ་མཐར་སོན་ཏེ་ཕྱིར་བོད་དུ་ལོག་པའི་ཐོངས་མཆན་རག་ཡོད་པའི་བོད་མི་ཁག་ཅིག་ལ་འདི་གའི་གསར་འགོད་པས་སྐད་ཆ་དྲིས་དུས། ཕ་མ་རྣམས་དགུང་ལོ་མཐོན་པོ་ཆགས་ཡོད་པ་དང་། ག་དུས་ཡིན་ནའང་ལོག་ཤོག་ལབ་ཀྱི་འདུག དེར་བརྟེན་ད་ལོ་གོ་སྐབས་འདི་བརྒྱུད་ནས་བོད་ལ་འགྲོ་འཆར་ཡོད། ཅེས་བརྗོད་བྱུང་ལ། ཁོང་ཚོས་སོ་སོའི་ད་ལྟའི་སྡོད་གནས་ཁ་བྱང་དང་ཁ་པར་ཨང་གྲངས། དེ་བཞིན་རྒྱ་གར་ནང་གནས་སྡོད་ཆོག་པའི་སྐྱབས་བཅོལ་ཡིག་ཆ་སོགས་ཕ་ཡུལ་དུ་བསྐུར་ནས་ཐོ་འགོད་བྱེད་དུ་བཅུག་ཡོད་པ་དང་། ཟླ་གཅིག་ཙམ་གྱི་རྗེས་སུ། ལྡི་ལིར་ཡོད་པའི་རྒྱ་ནག་གཞུང་ཚབ་ཁང་གིས་ཁ་པར་བསླེབས་ཏེ། ཕ་ཡུལ་ནས་ཁྱེད་ལ་ཡིག་ཆ་ཞིག་བསླེབས་འདུག་ཅེས་བརྡ་ལན་བསླེབས་ཡོད་པ་དང་། བརྡ་ལན་དེ་བསླེབས་རྗེས་སོ་སོའི་པར་རེ་གཞུང་ཚབ་ཁང་ལ་སྤྲོད་དགོས་སྐོར་བརྗོད་བྱུང་།
འདི་གའི་གསར་འགོད་པས་བོད་ནང་གི་འབྲེལ་ཡོད་ཁག་ཅིག་ལ་ས་གནས་རྫོང་རིམ་པར་ཕྱིར་སྡོད་རང་མིའི་གཞུང་ལས་ཁང་ཟེར་བ་དེ་བཙུགས་ཡོད་མེད་སྐད་ཆ་དྲིས་དུས། སྔོན་ཆད་ཡིན་ན་ལས་དོན་དེ་རིགས་ཕྱོགས་བསྡུས་གཞུང་ལས་ཁང་ཟེར་བ་ཞིག་གིས་བྱེད་བཞིན་ཡོད་ཀྱང་། མཚོ་སྔོན་ཞིང་ཆེན་ནང་ལྟ་བུར་མཚོན་ན། ཕྱི་ལོ་༢༠༢༠ཟླ་ ༥ ཙམ་གྱི་ནང་ཞིང་ཆེན་དེའི་རྫོང་ཁག་མང་པོའི་ནང་རྫོང་ཕྱིར་སྡོད་རང་མིའི་གཞུང་ལས་ཁང་ཟེར་བ་དེ་བཙུགས་པའི་མགོ་བརྩམས་ཡོད་པ་དང་། དེ་བཞིན་དཀར་མཛེས་ཁུལ་གྱི་རྫོང་ཁག་ཁ་ཤས་ནང་དུའང་ལས་ཁང་དེ་ཡོད་པ་མ་ཟད། ས་གནས་མི་མང་ལ་ཆེད་དུ་ཕྱི་ལོག་ན་ནང་མི་སྤུན་མཆེད་དེ་འདྲ་ཡོད་ཚེ། ཕྱིར་ལོག་རྒྱུར་ཐོ་འགོད་བྱས་ན་ལས་ཁང་དེས་ཞབས་ཞུ་ཆ་ཚང་བ་སྒྲུབ་ཀྱི་ཡོད་སྐོར་གསལ་བསྒྲགས་དེ་འདྲའང་བྱས་འདུག
འདི་གའི་གསར་འགོད་པར་མགོ་ལོག་ཁུལ་གྱི་རྫོང་ཞིག་གི་རྫོང་ཕྱིར་སྡོད་རང་མིའི་གཞུང་ལས་ཁང་ཟེར་བའི་སྒོ་བྱང་གི་འདྲ་པར་ཞིག་མཁོ་སྤྲོད་གནང་བའི་ནང་། རྫོང་དེའི་འཐབ་ཕྱོགས་གཅིག་གྱུར་ཁང་གིས་རྫོང་ཕྱིར་སྡོད་རང་མིའི་གཞུང་ལས་ཁང་དང་ཕྱོགས་བསྡུས་གཞུང་ལས་ཁང་ཟེར་བ་གཉིས་ཀྱི་ཐོག་ནས་ཕྱི་མིར་འབྲེལ་ལམ་དང་དྲིལ་བསྒྲགས་ཀྱི་ལས་དོན་རིགས་བྱེད་བཞིན་ཡོད་འདུག་ལ། ཕྱི་ལོ་ ༢༠༡༨ ལོར་བོད་རང་སྐྱོང་ལྗོངས་ཟེར་བའི་ཕྱིར་སྡོད་རང་མིའི་ལས་དོན་གཞུང་ལས་ཁང་ཟེར་བ་དེའི་སྐོར་འདི་ག་གསར་ཁང་ལ་མཁོ་སྤྲོད་གནང་བའི་ནང་། ཕྱི་ལོ་ ༢༠༡༦ ལོ་ནས་བཟུང་རྒྱ་ནག་གཞུང་གིས། བཙན་བྱོལ་ནས་ཕྱིར་བོད་དུ་ལོག་པའི་བོད་མི་ཚོ་རྒྱ་ནག་གི་གྲོང་ཁྱེར་ཆེ་ཁག་ནང་ལྟ་སྐོར་དུ་འཁྲིད་དེ་རྒྱ་ནག་གི་འཕེལ་རྒྱས་དང་གུང་ཁྲན་ཏང་གི་སྟོབས་ཤུགས་ཟེར་བ་སོགས་ངོ་སྤྲོད་བྱེད་པའི་ལས་གཞི་ཞིག་མགོ་འཛུགས་བྱས་ཡོད་པ་དང་། ལས་གཞི་དེའི་དམིགས་ཡུལ་གཙོ་བོ་ནི་ཕྱི་ལོག་ནས་ཡོང་མཁན་ཚོར་རྒྱ་ནག་དང་བོད་འཕེལ་རྒྱས་སུ་ཕྱིན་ཡོད་ཟེར་བའི་ཆེད་དུ་ཡིན་འདུག
ལྟ་སྐོར་དུ་ཁྲིད་པའི་བོད་མི་ཞིག་གིས་འདི་གའི་གསར་འགོད་པར། ལོ་སྔོན་མ་རྣམས་སུ་རྒྱ་ནག་གི་ནན་ཅིན་དང་ཞི་ཨན་སོགས་གནའ་བོའི་གྲོང་ཁྱེར་ཁག་ཏུ་འཁྲིད་ཀྱི་ཡོད་ན་ཡང་། ཕྱི་ལོ་ ༢༠༡༨ ནས་རྒྱ་ནག་གི་པེ་ཅིན་གྲོང་ཁྱེར་སོགས་ལ་འཁྲིད་ཀྱི་འདུག ཅེས་བརྗོད་བྱུང་།
རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།
འདི་དངོས་གནས་ཡིན་ནམ། གནས་ཚུལ་ཁུངས་ལྡན་རེད་དམ།