–མུ་འགོད་རྩོམ་ཡིག་འདི་ནི་གུས་པས་སྐྱབས་རྗེ་མགར་ཆེན་རིན་པོ་ཆེའི་མཛད་རྣམ་དབྱིན་དེབ་<<ཚེ་རབས་ཀྱི་བླ་མ་>>ཞེས་པའི་དེབ་གཉིས་པ་ལས་བདམས་ཏེ་བསྒྱུར་པ་ཞིག་ཡིན།
ཀླུ་སྨྱོན་ཧེ་རུ་ཀའམ་སྤྲུལ་སྐུ་ཆོས་དབྱིངས་ཡེ་ཤེས།
ཉིན་ཞིག ཨ་ལྡེའུ་རིན་པོ་ཆེས་ང་ལ། ཁྱེད་ཀྱིས་ངེས་པར་དུ་མཁན་པོ་མུན་སེལ་མཇལ་དགོས། ཁོང་ཀཿཐོག་དགོན་པ་ནས་ཡིན་པ་དང་རྫོགས་ཆེན་སྙིང་ཐིག་གི་བརྒྱུད་པའི་ཉམས་ལེན་ལ་བརྟེན་ནས་རྟོགས་པ་ཚད་མཐོན་པོ་བརྙེས་པ་ཞིག་རེད། ཁོང་ནི་ཧ་ཅང་དམིགས་བསལ་བ་ཞིག་རེད། ཁོང་ནི་མཁས་གྲུབ་གཉིས་ལྡན་གྱི་བླ་མ་ཀློང་ཆེན་རབ་འབྱམས་པའི་སྐུའི་ཟློས་གར་ཞིག་རེད། དེ་བཞིན་ཀཿཐོག་མཁན་པོ་ངག་དབང་དཔལ་བཟང་གི་སློབ་མ་ཞིག་ཀྱང་རེད། ཁྱེད་ངེས་པར་དུ་གོ་སྐབས་ཤིག་བཟུང་སྟེ་ཁོང་ལ་མཇལ་དགོས། ཞེས་གསུངས་བྱུང་།
ཁོང་གིས་ད་དུང་མཁན་པོ་མུན་སེལ་ང་ཚོའི་བཙོན་ཁང་དུ་གནས་སྤོས་མ་བྱས་པའི་སྔོན་དུ་རྫོང་གི་བཙོན་ཁང་དུ་ལོ་གཅིག་ལྷག་བཞུགས་པ་དང་། ཁོང་ལ་ནག་ཉེས་ཚབས་ཆེ་ཤོས་དེ་བཀལ་ནས་འཛིན་བཟུང་བྱས་པ་མ་ཟད་གྲོངས་ལ་ཁད་ཀྱི་རྡུང་རྡེག་ཀྱང་བཏང་འདུག ཁོང་ལ་འདྲི་གཅོད་བྱེད་པའི་སྐབས་དེར། ཁོང་གིས་འཇབ་རྒོལ་གྱི་བརྒྱུད་རིམ་ཧྲིལ་བོར་ཐུགས་དགོངས་ཞི་བདེའི་ངང་དུ་གནས་པ་ཞིག་གནང་འདུག ཁོང་ལ་ཚབས་ཆེའི་ནག་ཉེས་ཀྱི་གྱོད་དོན་བཙུགས་རྗེས། མཁན་པོ་མུན་སེལ་ཉེན་ཁ་ཆེས་ཚབས་ཆེ་བའི་བཙོན་ཁང་དུ་བཅུག་འདུག དེ་འདྲ་བའི་བཙོན་ཁང་དུ་བཅུག་པའི་སྐབས་སུ་ཡང་ཁོང་ལ་རང་དབང་ཆ་ཚང་བ་ཞིག་ཡོད། དེ་ནི་ས་གནས་སྲིད་གཞུང་དང་རྒྱལ་ཁབ་ཀྱིས་སྤྲད་པ་ཞིག་མིན་པར་རང་བཞིན་གྱིས་བྱུང་བ་ཞིག་རེད་འདུག དེ་ནི་བཙོན་ཁང་ངམ་སྲིད་གཞུང་གིས་གནང་བ་ཞིག་མིན་པར་ཁོང་གི་ཁྱད་དུ་འཕགས་པའི་ལས་དབང་གིས་བྱུང་བ་ཞིག་རེད།
བཙོན་ཁང་ནང་དུ། རྒྱ་མིའི་ལས་བྱེད་ཚོས་བཙོན་མ་ཚོའི་རྐང་པར་ཁབ་གཙགས་བྱས་ཏེ་ཁོ་ཚོས་རང་ཉིད་ཞ་འཐེང་ཡིན་ལུགས་ཀྱི་རྫུན་བཤད་མི་ཐུབ་པའི་ཁུངས་སྐྱེལ་བཙལ། སྐབས་དེར་རྒྱ་མིས་བཙོན་པ་ཚོར་ཁབ་བརྒྱབ་སྟེ་ནད་པ་མིན་པ་ཚོ་ཡང་ནད་པ་བཟོ་གི་ཡོད། དཔེར་ན། ཁ་ཆེའི་བླ་མ་ཞིག་བཙོན་ཁང་དུ་མ་ཡོང་སྔོན་གཟུགས་པོར་ན་ཚ་མེད་ཀྱང་རྒྱ་མིས་ཁབ་དེ་བརྒྱབ་པའི་རྗེས་སུ་ནད་པ་ཆགས་པ་ལྟ་བུ་རེད། ཁོ་རྗེས་སུ་ཞིང་ཁར་ངལ་རྩོལ་བྱེད་དུ་བཏང་བ་རེད། གང་ལྟར། ང་ཚོའི་བཙོན་ཁང་གི་སྨན་པའི་འགོ་བ་དེས་མཁན་པོ་མུན་སེལ་གྱི་ཞབས་རྐང་ལ་ཡང་ཁབ་གཙགས་བྱས་ཏེ་ཁོང་གིས་ངལ་རྩོལ་ལྕི་མོའི་རིགས་བྱེད་མི་དགོས་པའི་ཐག་གཅོད་བྱས་འདུག ཁོ་ཚོས་མཁན་པོ་མུན་སེལ་གྱི་ཞབས་རྐང་ལ་ན་ཚ་ཡོད་པའི་སྙན་ཞུ་སྤྲད་པ་དང་། ཁོང་གིས་ཞབས་གོམ་སྐྱོན་དུས་འཁར་རྒྱུགས་ཤིག་བསྣམ་གྱི་ཡོད། མཁན་པོ་མུན་སེལ་གྱིས་བཙོན་ཁང་ནང་མགོ་ནས་མཇུག་བར་དུ་ལས་ཀ་གནང་མ་དགོས་པ་ཞིག་བྱུང་། རྒྱ་མིའི་ལས་བྱེད་ཚོས་ཁོང་ལ་ལག་བཟོའི་ལས་ཀ་ཞིག་སྒྲུབ་ཏུ་བཅུག་པ་དང་། དེ་བཞིན་ཉིན་རེའི་གསར་འགྱུར་དེ་རིགས་ཀྱང་ཀློག་ཏུ་བཅུག་སྟེ་དེའི་ནང་གི་རྩོམ་ཡིག་དེ་ཚོའི་ཟིན་ཐོ་ཞིབ་ཕྲ་རེ་འབྲི་རུ་བཅུག
མཁན་པོ་མུན་སེལ་ཚང་བཙོན་རོགས་ནད་པ་ཚབས་ཆེན་གསང་སྤྱོད་ཀྱི་སྣོད་ཕྱི་རོལ་ཏུ་བཤོ་བ་ཙམ་མ་གཏོགས་ལས་ཀར་འགྲོ་མི་ཐུབ་པ་དྲུག་དང་ལྷན་དུ་བཞུགས་པ་དང་། ཁོང་གིས་ཉི་མ་རྟག་པར་ཉིན་རེའི་ཚགས་པར་དེ་ཚོ་ཀློག་དགོས།
སྔོན་ཆད་ཀྱི་ཐོག་མའི་འདྲི་རྩད་ཀྱི་བརྒྱུད་རིམ་ཁྲོད་དུ། རྒྱ་མིའི་ལས་བྱེད་ཚོས་མཁན་པོ་མུན་སེལ་གྱི་མཚན་དེ་རང་ཁོང་གི་ཁྲིམས་མཐུན་གྱི་མིང་ཐོར་བྲིས། མི་དེ་ཚོས་མཁན་པོ་ཞེས་པའི་མིང་ཚིག་དེའི་གོ་དོན་ནི་གཞུང་ལུགས་ལ་སྦྱངས་པ་མཐར་ཕྱིན་པའི་མཁས་དབང་གི་མིང་ཡིན་པ་མི་ཤེས། དེར་བརྟེན། མཁན་པོ་མུན་སེལ་ང་ཚོའི་བཙོན་ཁང་དུ་གནས་སྤོས་བྱས་པའི་རྗེས་སུ་ཡང་། མི་ཚང་མས་ཁོང་ལ་ལུགས་སྲོལ་རྙིང་པ་རྒྱུན་འཛིན་བྱས་ནས་གསར་བརྗེར་ངོ་རྒོལ་གྱི་ཉེས་ཆད་བཅད་ཡོད་པ་ཞིག་དང་མི་འདྲ་བར་མུ་མཐུད་དུ་ “མཁན་པོ་མུན་སེལ་” ཞེས་འབོད་ཀྱི་ཡོད། དེ་བཞིན་རྒྱ་མིའི་ལས་བྱེད་མི་སྣས་ཀྱང་ཁོང་ལ་མཁན་པོ་ཞེས་འབོད་པ་དང་། ཁོང་གི་མིང་རྟགས་སྟེང་དུ་ཡང་མཁན་པོ་མུན་སེལ་ཞེས་བྲིས་ཡོད། ཁོ་ཚོས་མཁན་པོ་ཞེས་པ་དེ་ཁོང་གི་མིང་ཡིག་ཐོག་མ་དེ་རེད་བསམས་ཡོད།
ཨ་ལྡེའུ་རིན་པོ་ཆེས་ང་ལ་མཁན་པོ་མུན་སེལ་ཚང་དགུང་གྲངས་བཞི་བཅུ་ཞེ་དྲུག་ཞེ་བདུན་ཙམ་ཡིན་ལུགས་གསུངས་པ་དང་འབྲེལ།
“ཁྱེད་ཀྱི་པ་ལགས་བྱེད་རྒྱུའི་ལོ་ཚད་འདང་ངེས་ཤིག་ཡོད།” ཅེས་ཚིག་མཇུག་བསྡུས།
མཁན་པོ་མུན་སེལ་ཚང་ནི་ཨ་མདོའི་མགོ་ལོག་ལྕགས་མོའི་ཡུལ་དུ་བོད་མེ་འབྲུག་སྤྱི་ལོ་ ༡༩༡༦ ལོའི་དགུན་ཁའི་ཟླ་བ་ཞིག་གི་གནམ་གང་ཉིན་སྐུ་འཁྲུངས་འདུག དེར་བརྟེན་ཁོང་ང་ལས་ལོ་ཉི་ཤུ་རྩ་གཅིག་གིས་བགྲེས་པ་རེད་འདུག
དེ་ནས་ཉི་མ་གཅིག ངས་ན་རྫུ་བྱས་ཏེ་མཁན་པོ་མུན་སེལ་རིན་པོ་ཆེར་མཇལ་དུ་ཕྱིན་པ་ཡིན།
བཙོན་པ་མང་པོའི་གནས་སྟངས་ལ་གདུང་སེམས་མཉམ་སྐྱེད་བྱེད་མཁན་སྨན་པའི་འགོ་བ་ང་ལ་ཆ་རྒྱུས་ཡག་པོ་ཡོད་པ་ཞིག་གིས། ཉིན་དེར་ང་ལ་ལས་ཀར་འགྲོ་མི་དགོས་པའི་ཆོག་མཆན་སྤྲད་བྱུང་། མཁན་པོ་མུན་སེལ་གྱི་བཞུགས་ས་དེ་ངའི་སྡོད་གནས་ནས་ཐག་རིང་པོ་མེད་པ་ཞིག་ཏུ་ཡོད། དོན་དངོས་སུ་དེ་ནི་ངའི་སྡོད་གནས་དང་མུ་འབྲེལ་གཅིག་པ་རེད། དེར་བརྟེན། ང་ཕྱི་རོལ་གྱི་གསང་སྤྱོད་དུ་འགྲོ་བའི་ལམ་བར་ནས་མྱུར་དུ་ཁོང་གི་བཞུགས་གནས་སུ་སོང་བ་ཡིན།
ངས་ལོ་དེ་ཧ་ཅང་གསལ་བོར་དྲན་སོས། དེ་ནི་སྤྱི་ལོ་ ༡༩༦༢ ལོ་ཡིན། ངས་ད་དུང་དེའི་སྔོན་ཙམ་དེར་ང་ཚོའི་བཙོན་ཁང་གི་གནས་སྟངས་ལ་འགྱུར་བ་ཕྲན་བུ་བཏང་བ་དེ་ཡང་དྲན་སོས། དེ་ནས་སྤྱི་ལོ་ ༡༩༦༣ ལོར། བཙོན་ཁང་གི་ཟ་མའི་གནས་སྟངས་ཅུང་ཟད་ཇེ་ལེགས་སུ་བཏང་བ་དང་། དེ་བཞིན་བཙོན་མའི་སྒྲིག་ཁྲིམས་དེ་ཚོ་ཡང་ཅུང་ཟད་གུ་ཡངས་སུ་ཕྱིན།
ང་ཁང་ཆུང་དེའི་ནང་དུ་འཛུལ་དུས། མཁན་པོ་མུན་སེལ་ཚང་ཁོང་གི་འཁར་རྒྱུགས་དེ་འཁྲིས་སུ་བཞག་སྟེ་བཞུགས་འདུག ངས་ཁོང་ལ་གུས་ཞབས་དང་བཅས་ཨ་ལྡེའུ་རིན་པོ་ཆེ་དང་བླ་མ་གཞན་དག་ལས་ཁོང་གི་སྐོར་གོ་ཐོས་བྱུང་ལུགས་ཞུས་པ་ཡིན།
“ཁྱོད་ཀྱི་མིང་ལ་ཅི་ཟེར། དགོན་པ་གང་ནས་ཡིན།”
མཁན་པོ་མུན་སེལ་གྱིས་ང་ལ་གཟིགས་པ་དང་མགྱོགས་པོར་ཁེངས་སྐྱུངས་ཀྱི་གསུང་གདངས་དང་བཅས་ངའི་ལོ་རྒྱུས་བཀའ་འདྲི་གནང་བྱུང་། ངས་ཆེས་ཐོག་མར་མཁན་པོ་མུན་སེལ་གྱི་གསུང་དེ་ཐོས་པ་དང་མཉམ་དུ་ངས་རང་གི་དྲིན་ཆེན་རྩ་བའི་བླ་མ་མགར་འཆི་མེད་རྡོ་རྗེ་མཆོག་དྲན་བྱུང་བ་དང་། སྐད་ཅིག་མ་དེའི་རིང་ལ། མཁན་པོ་མུན་སེལ་ཚང་གི་འོད་འབར་བའི་སྤྱན་མིག་ནག་པོ་དེའི་གཏིང་ཟབ་པའི་གྲིབ་མར་གུས་པ་ཆེན་པོ་ཞིག་སྐྱེས་བྱུང་།
ངས་སྔོན་ཆད་ཐོས་པ་ལྟར། མཁན་པོ་མུན་སེལ་ཚང་ལ་ “ཁང་གསར་བན་ཡག་མ་” ཞེས་པའི་མཚན་ཞིག་ཐོགས་མྱོང་བ་དང་། དེ་དུས་ཁོང་ནི་སྤྱང་གྲུང་དང་ཤེས་རབ་འཛོམས་པའི་གཞོན་ནུ་ཞིག་ཡིན་འདུག ངས་མཐའ་མར་ཁོང་གི་དྲུང་དུ་བཅར་དུས་ངས་དེ་བདེན་པ་ཡིན་པ་རྟོགས་བྱུང་། ཆེས་དམིགས་བསལ་བ་དང་མཉེས་གཤིན་གྱི་ནུས་ཤུགས་ཁྱད་པར་བ་ཞིག ཁོང་གི་དོ་སྣང་བྱེད་དགོས་པའི་ཉམས་འགྱུར་གྱི་ཁྱད་ཆོས་དང་། ཁོང་གི་ཕུལ་དུ་བྱུང་བ་དག ཁོང་གི་མཛེས་སྡུག་ལྡན་པའི་མཇོང་དབྱིབས་ཀྱི་ཞལ་རས་དང་གཏིང་ཟབ་ཅིང་ཟབ་པའི་སྤྱན་ཟུང་ལས་མཆེད་ཡོང་གིན་འདུག
མི་ཚེ་འདིའི་ནང་གློ་བུར་དུ་མཁན་པོ་མུན་སེལ་རིན་པོ་ཆེ་མཇལ་བའི་ཚོར་སྣང་ནི། ཡུལ་གྱར་བའི་ཕྲུ་གུ་ཞིག་གིས་ཐག་རིང་ངལ་དུབ་ཀྱི་འགྲུལ་བཞུད་ཅིག་གི་རྗེས་སུ་བསམ་ཡུལ་ལས་འདས་པའི་ངང་ནས་རང་གི་ཁྱིམ་གཞིས་རྙེད་པ་འདྲ་བོ་ཞིག་བྱུང་། དེ་བཞིན་དེ་ནི་རང་ཉིད་ལ་ཡོད་པའི་བྱམས་བརྩེ་ཅན་གྱི་ཡབ་ཆེན་ཞིག་ཡོད་པ་ངོས་མ་ཟིན་པ་དང་ཡང་འདྲ། ང་རང་དུས་ཡུན་རིང་པོའི་ནང་གི་སེམས་ནང་གི་ཡི་ཆད་ཀྱི་གནོན་ཤུགས་དེའི་ཀློང་ནས་འཛེམ་དོགས་མེད་པར་ཁོང་གི་པང་དུ་འགྱེལ་འདོད།
ང་རང་ཉིད་ཀྱི་བླ་མར་བཙོན་ཁང་ནང་གློ་བུར་དུ་མཇལ་བ་དེ་དེ་འདྲའི་སྟབས་བདེ་བོ་ཞིག་ཡིན་ཡང་། ཁོང་གི་རྩ་ཆེ་བའི་བྱིན་རླབས་ཀྱིས་ང་རང་ཉེས་ལྟུང་ལས་བསྐྱབས་སོང་།
ཐོག་མའི་དུས་སུ། བཙོན་ཁང་ནི་ང་ལ་མཚོན་ན་དམྱལ་བ་རང་རེད། བར་དུ། ངས་མཁན་པོ་མུན་སེལ་རིན་པོ་ཆེ་མཆོག་མཇལ་བའི་རྗེས་སུ། ངལ་རྩོལ་ལྕི་མོ་དེ་ཚོ་ན་ཟུག་ཅན་དང་འབྲས་བུ་མེད་པར་བསམས་པ་དེ་ཚོ་ག་ལེར་ངའི་ཉིན་རེའི་ནང་ཆོས་ཀྱི་ཉམས་ལེན་དུ་གྱུར་སོང་། ཆེས་མཇུག་མཐའི་གནས་སྐབས་སུ། ངའི་བླ་མའི་གཏིང་མཐའ་གཞལ་ཐབས་བྲལ་བའི་བྱམས་བརྩེའི་བཀའ་དྲིན་ལ་བརྟེན་ནས། བཙོན་ཁང་དེ་རིན་པོ་ཆེའི་གླིང་ལྟ་བུར་གྱུར་སོང་། ངའི་དགྲ་བོར་བཅངས་པའི་ཞེ་འཁོན་དང་སྡང་སེམས་དེ་ཚོ་ཡོངས་སུ་ཞི་བར་གྱུར། ང་བཙོན་ཁང་ནས་ལག་པ་སྟོང་པར་ཕྱིར་ལོག་དགོས་བྱུང་མ་སོང་།
སྡུག་བསྔལ་དང་ཟུག་གཟེར་དེ་ཚོ་གསེར་འགྱུར་གྱི་རྩི་རུ་གྱུར་སོང་། ངས་མཁན་པོ་མུན་སེལ་གྱི་བཀའ་སློབ་ལམ་སྟོན་འོག་ནས་རང་ཉིད་ཀྱི་གཞན་ཕན་སྨོན་འདུན་དེ་ཚོ་འཕེལ་རྒྱས་སུ་གཏོང་ཐུབ་སོང་ལ། དེ་ཚོ་བརྒྱུད་ནས་ངས་རང་ཉིད་ཀྱི་འཇིག་རྟེན་མི་ཡི་སྐྱེ་བ་འདིའི་དོན་སྙིང་དེ་སྒྲུབ་ཐུབ་སོང་། ཡིན་ན་ཡང་ངས་ཐེ་ཚོམ་སྤུ་ཙམ་ཡང་མེད་པའི་སྒོ་ནས་བརྗོད་ཐུབ་པ་ཞིག་སྟེ། སྡུག་བསྔལ་ནི་ང་ལ་རིན་ཐང་བྲལ་བའི་ལམ་སྟོན་གནང་མཁན་གྱི་བླ་མ་དང་སློབ་དཔོན་ངོ་མ་དེ་རེད། སྡུག་བསྔལ་ནི་ངའི་ཆེས་རླབས་ཆེ་བའི་སློབ་དཔོན་དེ་ཡིན།
དེའི་རྐྱེན་གྱིས། ངའི་བཙོན་ཁང་གི་དུས་ཚོད་དེ་ཚོ་རིན་པོ་ཆེ་རུ་གྱུར། དོན་དག་སྙིང་པོ་དེ་ལས་ངས་ཁྱེད་ཀྱིས་རང་གི་དགྲ་བོར་ཡང་དམིགས་ཏེ་བྱམས་བརྩེའི་ཉམས་ལེན་བྱེད་ཐུབ་པའི་ངེས་ཤེས་རྙེད། དེ་ནི་ཆེས་རླབས་ཆེ་བའི་བྱམས་བརྩེ་དེ་དང་དེ་ནི་བྱང་ཆུབ་ཀྱི་སེམས་སུ་འགྱུར་ཐུབ།
ངས་མཁན་པོ་མུན་སེལ་ཚང་ལ་ཁ་གསལ་བོའི་སྒོ་ནས་བཀའ་ཆོས་གསུང་སྐུལ་ཞུ་མི་ཕོད་པ་ནི་བརྗོད་མ་དགོས་པ་ཞིག་རེད། དེ་ནི་དྲི་བ་མེད་པར་བཀག་འགོག་བྱས་ཡོད་པ་ཞིག་རེད།
ངེད་གཉིས་ཐེངས་མང་པོ་ཞིག་ལ་གསང་སྤྱོད་ནང་དུ་མཇལ་འཕྲད་བྱུང་བ་དང་། དོང་དབྱིབས་གསང་སྤྱོད་ནང་དུ་བཀའ་མོལ་བསྡུས་པ་རེ་ཟུང་ཞུ་རྒྱུ་བྱུང་། སྐབས་རེར་མི་སུ་ཡང་ཉེ་འཁོར་དུ་མེད་དུས་ངེད་གཉིས་ཀྱིས་དྲི་བ་དྲིས་ལན་ཏོག་ཙམ་རེ་བྱེད་རྒྱུ་བྱུང་། དེར་བརྟེན། ཁྱེད་ཀྱིས་གསང་སྤྱོད་ཁང་དེ་ནི་ངེད་གཉིས་སྒེར་གྱི་འདུ་འཛོམས་བྱེད་སའི་ས་ཆ་དེ་རེད་ཅེས་བརྗོད་ཆོག
གཟའ་ཉི་མ་དེ་ཚོ་ནི་བཙོན་ཁང་ནང་གི་ངལ་གསོའི་ཉི་མ་དེ་ཡིན། ཉིན་དེར་ང་ཚོ་རང་གི་བཙོན་གྲོགས་གཞན་དག་གི་ཁང་པར་ཡང་བསྐྱོད་ཆོག སྐབས་དེར་དུས་ཚོད་མང་ཆེ་བར་ང་ཚོས་བཙོན་གྲོགས་ཚོ་དང་མཉམ་དུ་རང་རང་གི་མི་ཚེའི་བྱུང་བ་བརྗོད་ཆོག་གི་ཡོད་པས། ངས་ཀྱང་གཟའ་ཉི་མ་ཕལ་མོ་ཆེར་ཁོ་ཚོར་ཐུག་འཕྲད་བྱེད་ཀྱི་ཡོད། ང་རང་ཁོང་ཚོར་ངའི་འདས་དུས་ཀྱི་ཉེན་མཆོང་དེ་ཚོའི་སྐོར་བརྗོད་རྒྱུར་དགའ་བོ་ཡོད། མཚམས་རེར་གཏམ་རྒྱུད་དེ་ཚོ་རང་བཞིན་གྱི་རང་ཕྱིར་ཐོན་ཡོང་གི་ཡོད་པ་དང་། ང་ལ་ངའི་གྲོགས་པོ་ཚོར་བཤད་པའི་སྐད་ཆ་དེ་ཚོའི་སྟེང་ནས་རྙོག་དྲ་བཟོ་མཁན་མེད། རང་རང་གི་བྱུང་བ་བརྗོད་རེས་བྱེད་པ་དེ་ནི་སྐབས་དེའི་དགའ་མོས་ཆེ་ཤོས་ཤིག་ཡིན། ཉིན་གཅིག ངས་གྲོགས་པོ་ཁག་ཅིག་ལ་ངས་རང་གི་ཚོགས་པ་དེ་གང་ཡིན་དང་ང་དེར་ཇི་ལྟར་འཛུལ་ཞུགས་བྱས་ལུགས་བརྗོད་པ་ཡིན་ལ། ངས་ཇི་ལྟར་རྒྱ་དམག་ལ་རྒོལ་འཛིང་བྱས་ལུགས་ཀྱང་བརྗོད་པ་ཡིན། མཁན་པོ་མུན་སེལ་ཚང་ཡང་དེར་བཞུགས་ཡོད་པ་དང་། ཁོང་གིས་ཏན་ཏན་ཏིག་ཏིག་གིས་གསན་བཞིན་འདུག
སྐབས་དེར། ངས་ཁོང་ཚོར། “མི་རེ་ཟུང་གིས་ང་ལ་གལ་སྲིད་ངས་རྒྱ་དམག་ཅིག་བསད་པ་ཡིན་ན། ངས་མཆོད་རྟེན་ཞིག་བཞེངས་པའི་བསོད་ནམས་གསོག་ཐུབ། ཅེས་བརྗོད་བྱུང་།”
མཁན་པོ་མུན་སེལ་ཚང་གིས་ངའི་འགྲེལ་བརྗོད་དེ་གསན་ནས་དངངས་སྐྲག་སྐྱེས་ཡོད་པ་ཏན་ཏན་རེད་འདུག ཁོང་གིས་ང་ལ་གཤེ་གཤེ་གཏོང་བཞིན། “དེ་ཚོ་སྐྱར་ཟློས་མ་བྱེད། མི་སུ་ཞིག་གིས་དེ་ལྟར་བརྗོད་པ་ཡིན་ན་ཡང་། མི་དེ་ཚོ་ནི་ནང་པ་སངས་རྒྱས་པ་ཞིག་མ་རེད། མི་དེ་ཚོས་སྐད་ཆ་དེ་འདྲ་ཞིག་བཤད་པ་ཡིས་ཁོ་ཚོ་ནང་པ་སངས་རྒྱས་པ་ཞིག་ཏུ་འགྱུར་མི་ཐུབ།”
རེད། ཡིན་ན་ཡང་ངས་བསམས་ན་དེ་ནི་བདེན་པ་རེད། ངའི་སེམས་ནང་གི་འཐབ་འཛིང་བ་གཞོན་ནུ་དེས་ལམ་སེང་རྩོད་པ་རྒྱག་མགོ་བཙུགས་བྱུང་།
“རྒྱུ་མཚན་ནི་རྒྱ་མིའི་དམག་མི་དེ་ཚོ་ནི་སངས་རྒྱས་ཀྱི་དམ་པའི་ཆོས་ཀྱི་དགྲ་བོ་རེད།” དེ་ནས་ངས། “དེ་ཚོས་དམ་པའི་ཆོས་བསྣུབས་པ་དང་ང་ཚོ་མུན་ནག་གི་བསྐལ་པའི་ནང་དུ་ཁྲིད་སོང་། གསང་སྔགས་རྡོ་རྗེ་ཐེག་པ་ལྟར་ན་དེ་བདེན་པ་མ་རེད་དམ། གལ་སྲིད་མི་ཞིག་སྡིག་པའི་དབང་དུ་སོང་སྟེ་གཞན་ལ་གནོད་འཚེ་བཏང་བ་དང་། ཁྱེད་ཀྱིས་མི་དེ་སྤྱང་གྲུང་གི་སྒོ་ནས་སྡིག་པའི་ལས་ཚབས་ཆེན་དེ་ལས་སྐྱོབ་དགོས་པ་ཞིག་མ་རེད་དམ། དེའི་ཕྱིར་དེ་ཚོ་ལ་དགོངས་པ་སྤྲད་ཡོད་པ་མ་རེད་དམ། སངས་རྒྱས་ཀྱིས་ཀྱང་ཁོང་གི་སློབ་པ་ལམ་གྱི་གནས་སྐབས་སུ་སྡིག་ཅན་ཞིག་གིས་བྱང་ཆུབ་སེམས་དཔའ་ལྔ་བརྒྱ་གསོད་པའི་ལས་ངན་ལས་བསྐྱབས་ཡོད་པ་མ་རེད་དམ།”
མཁན་པོ་མུན་སེལ་ཚང་གིས་ངའི་འགྲེལ་བཤད་དེ་ཚོ་གསན་པས་ཁོང་ལྷག་པར་དུ་ཐུགས་ཕམ་བྱུང་བ་རེད། ཁོང་གིས་ང་ལ་ཡང་སྐྱར་གཤེ་གཤེ་བཏང་བ་དང་ལྷན་དུ་འགྲེལ་བཤད་ཧ་ཅང་སྟབས་བདེ་བོ་ཞིག་བསྐྱོན་གནང་བྱུང་།
“ང་ཚོའི་ལུང་པར་འཐབ་འཛིང་གི་ཆེད་དུ་བསླེབས་པའི་རྒྱ་མིའི་དམག་མི་དེ་ཚོར་བསམ་བློ་ཞིག་ཐོངས་དང་། དེ་ཚོ་དམག་སྐུལ་བྱས་ཏེ་ཡོང་བ་ཞིག་རེད། དེ་ནི་གོང་རིམ་གྱི་བཀོད་འདོམས་ལས་བྱུང་བ་རེད། དེ་ནས་དེ་ཚོ་འཐབ་འཛིང་པར་གྱུར་པ་རེད། དེ་ཚོས་རང་ཉིད་ཀྱིས་མི་སུ་འདྲ་ཞིག་གསོད་ཀྱི་ཡོད་པ་ཡང་ཤེས་ཀྱི་ཡོད་པ་མ་རེད། དེ་བཞིན་དེ་ཚོས་ཁོ་ཚོ་གསོན་པོར་ཕྱིར་ལོག་སྟེ་ཡང་སྐྱར་རང་རང་གི་ནང་མི་དང་གཉེན་ཉེ་ཚོར་འཕྲད་རྒྱུ་ཡོད་མེད་ཙམ་ཡང་ཤེས་ཀྱི་ཡོད་པ་མ་རེད།”
“གལ་སྲིད་ཁྱེད་རང་ཁྱེད་ཀྱིས་བཤད་པ་ལྟར་ལས་རྒྱུ་འབྲས་ལ་ཡིད་ཆེས་ཡོད་ན།” མཁན་པོ་མུན་སེལ་ཚང་གིས་རྩོད་པ་བསྐྱོན་སྟེ། “དེ་ནས་ང་རང་ཚོའི་སྟེང་དུ་གནས་ཚུལ་ག་རེ་བྱུང་བ་ཡིན་ན་ཡང་དེ་ནི་ང་རང་ཚོའི་སྐྱེ་བ་སྔོན་མའི་ལས་འབྲས་དེ་ཚོ་རེད། རྒྱ་མིས་ང་ཚོའི་ལུང་པར་ག་རེ་བྱས་པ་དེ་ཚོ་དང་། ང་ཚོའི་མི་དམངས་ཀྱི་འཇིགས་སྣང་། དེ་ཚོ་ནི་གུང་ཁྲན་ཏང་གཅིག་པོས་ང་ཚོར་སྡུག་བསྔལ་སྤྲད་པ་ཙམ་ཞིག་མ་རེད། ང་ཚོ་ནི་ང་ཚོ་རང་ཉིད་ཀྱི་སྡུག་བསྔལ་འཆར་འགོད་བྱེད་མཁན་དེ་རང་རེད།
སྐྱེ་བ་གྲངས་མེད་པ་ཞིག་བརྒྱུད་པའི་རིང་ལ། ཁྱེད་དང་ང་། སེམས་ཅན་ཐམས་ཅད་ཀྱིས་རང་རང་གི་ལས་འབྲས་ཀྱི་ས་བོན་འདེབ་ལེན་བྱས་ནས་ཡོང་བ་རེད། ད་ལྟ་རྐྱེན་ངན་རང་ཐོག་ཏུ་སྨིན་ཡོང་དུས། ང་ཚོས་མེ་ཏོག་གི་ཁ་ཕྱེས་པ་ཙམ་ཞིག་མཐོང་བ་རེད། ཡིན་ན་ཡང་། གུང་ཁྲན་ཏང་ནི་ལྷན་ཅིག་བྱེད་རྐྱེན་ཙམ་ཞིག་རེད།”
“དེར་བརྟེན། ད་ལྟ་ང་ཚོས་མྱོང་བཞིན་པའི་སྡུག་བསྔལ་འདི་དག་གི་རྒྱུ་གང་ཞིག་རེད།” མཁན་པོ་མུན་སེལ་གྱིས་བཀའ་འདྲི་གནང་རྒྱུར།
“རྒྱུ་དེ་ཚོ་ནི་འདོད་ཆགས་དང་ཞེ་སྡང་། གཏི་མུག་དང་ང་རྒྱལ། ཕྲག་དོག་ལ་སོགས་པ་རེད། དེ་ཚོ་ནི་སྡུག་བསྔལ་གྱི་རྒྱུ་ངོ་མ་དེ་ཚོ་རེད། དེ་ཚོས་ང་ཚོ་སྡུག་བསྔལ་བར་བྱས་པ་རེད། ཇི་སྲིད་དེ་ཚོ་ཡོད་པ་དེ་སྲིད་དུ་ཁྱོད་རང་གནས་གང་ཞིག་ཏུ་ཡོད་མེད་ལ་མ་ལྟོས་པར་ཁྱེད་རང་གྲངས་མེད་པའི་སྡུག་བསྔལ་ལ་སྦྱོར་གྱི་རེད།
གལ་སྲིད་ཁྱེད་ཀྱིས་དངོས་གནས་ལས་རྒྱུ་འབྲས་ཧ་གོ་བ་དང་། གལ་སྲིད་ཁྱེད་ཀྱིས་ལས་འབྲས་ཀྱིས་ཁྱེད་རང་གི་སེམས་རྒྱུད་དུ་ཐོག་མ་དང་མཐའ་མར་བག་ཆགས་འཇོག་སྟངས་ཧ་གོ་བ་ཡིན་ན། དེ་ནི་མི་ཚེ་གཅིག་པོར་ཕན་པ་ཙམ་དུ་མ་ཟད། ཁྱེད་རང་གི་སྐྱེ་བ་ནས་སྐྱེ་བ་དང་ཚེ་རབས་ནས་ཚེ་རབས་སུ་ཕན་ཐོགས་ཡོད་པ་ཞིག་རེད།
ལས་འབྲས་ཀྱི་གོ་དོན་རྟོགས་པ་དེ་ཁྱེད་རང་གཅིག་པོ་ཙམ་ཞིག་མ་ཡིན་པར་རང་གཞན་གཉིས་ཕན་ཞིག་རེད། གལ་སྲིད་ཁྱེད་ཀྱིས་དངོས་གནས་ལས་འབྲས་ཀྱི་གོ་དོན་རྟོགས་པ་ཡིན་ན། ཞེ་འཁོན་ལས་ཐར་བ་དང་གཞན་ཕན་གྱི་བསམ་བློ་བསྐྱེད་ཀྱི་རེད། དེས་སེམས་ཅན་གཞན་ལ་ཕན་ཐོགས་འབྱུང་གི་རེད་ལ། ཁྱེད་རང་དང་ཁྱེད་ཀྱིས་དགྲ་རུ་འཛིན་པའི་སེམས་ཅན་དེ་ཚོར་ཡང་ཕན་ཐོགས་འབྱུང་གི་རེད།”
མཁན་པོ་མུན་སེལ་གྱིས་འདི་ལྟ་བུའི་བཟོད་སྒོམ་དང་འཆར་སྣང་གསལ་འདོན་གྱི་བྱམས་བརྩེའི་བཀའ་སློབ་ཚར་གཅིག་གཉིས་ཙམ་གནང་བ་མ་ཡིན་པར། རྗེས་སུ་ང་ལ་དགོས་པའི་གདམས་ངག་དེ་ཚོ་ཡང་ནས་ཡང་དུ་སྐྱར་ཟློས་གནང་སྟེ་གསུངས་བྱུང་།
དོན་དངོས་སུ། ངས་མི་ཚང་མས་སྡུག་བསྔལ་ག་འདྲ་བྱས་ནས་མྱོང་གི་ཡོད་པ་དེ་ང་རང་གི་མིག་གིས་མཐོང་བྱུང་། བཙོན་མ་ཚོ་ཙམ་ཞིག་མ་ཡིན་པར་དམག་མི་ཚོ་དང་ལས་བྱེད་ཚོ་ཡང་དེ་བཞིན་རེད།
ལས་འབྲས་ནི་ནོར་འཁྲུལ་མེད་པ་ཞིག་ཡིན་པ་དང་། ནམ་ཞིག་དེ་མི་རྟག་པ་དང་མཉམ་དུ་བསྡོངས་དུས། དེས་གནས་སྟངས་ཡོད་ཚད་བསྐྲུན་ཐུབ།
ངས་ནམ་རྒྱུན་ཁྱེད་ཚོར་རྗོད་ཀིན་ཡོད་པ་དེ་ཚོ་ལྟར། ང་ཚོས་སུ་ཞིག་ང་ཚོའི་གྲོགས་དང་གང་ཞིག་རང་གི་དགྲ་ཡིན་པ་དེ་གཏན་ཁེལ་ཐུབ་ཀི་མ་རེད། མི་ཞིག་མི་ཚེ་འདིར་དགྲ་རུ་སྣང་གི་ཡོད་ན་ཡང་ཚེ་སྔོན་མ་ཚོར་དེ་ནི་ཁྱེད་རང་གི་བརྩེ་བའི་ཕ་མ་དང་དགའ་ས་དེ་ཡིན་པ་རེད། ཁོང་ཚོས་ང་ཚོར་བཟོད་བསྲན་དང་ཟོལ་མེད་ཀྱི་བྱམས་བརྩེས་གཅེས་སྐྱོང་གནང་ཡོད་པ་རེད།
ཚད་ངེས་ཅན་ཞིག་གི་སྟེང་ནས་ང་ཚོས་ཁོ་ཚོ་དོར་བ་དང་མགོ་སྐོར་བཏང་བ་རེད། ཁོ་ཚོའི་སེམས་ནང་འཁོན་འཛིན་དང་ཁོང་ཁྲོ་ཆེ་རུ་ཕྱིན་ཡོད། བརྩེ་བ་དང་བཟོད་སྒོམ་ནི་སེམས་ཀྱི་དུག་ཆེན་རིགས་ཤིག་ཏུ་གྱུར། དེར་བརྟེན། ཁོ་ཚོས་སྐྱེ་བ་སྔོན་མར་ང་ཚོར་སྤྲད་པ་དེ་དག་ཕྱིར་ལེན་རྩིས་བྱས་པ་ཇི་བཞིན། ལས་ཀྱི་འཁོར་ཤུགས་ཀྱིས་ཁོ་ཚོ་ང་ཚོའི་མདུན་དེར་བསྐྱལ་པ་རེད། ཡིན་ན་ཡང་དེ་ནས། ལས་ཀྱི་ནུས་པ་མ་ཟད་བར་དུ་ཕན་ལྡན་གྱི་གནས་བབ་ནི་མིག་རྡེབ་མཚམས་སུ་ཇེ་ངན་དུ་འགྱུར་སྲིད།
དྭངས་གསལ་གྱི་ཉིན་མོ་ཞིག་ལ། རྒྱ་མིའི་དམག་མི་ཞིག་ང་རང་སྡོད་སའི་བཙོན་པའི་སྡོད་ཁང་དེར་བཅུག་བྱུང་། ངས་སྐབས་དེར་རྒྱ་མིའི་སྐད་བཤད་ཤེས་ཀྱི་མེད། ཡིན་ན་ཡང་། བོད་པའི་བཙོན་མ་རེ་ཟུང་གིས་རྒྱ་སྐད་ཕྲན་བུ་ཞིག་བཤད་ཤེས་ཀྱི་ཡོད། རྒྱ་མི་དམར་པོའི་དམག་མི་དེས་ཁོས་འདས་པའི་དུས་ཚོད་ནང་ཅི་ཞིག་བྱས་པ་དེ་ང་ཚོར་བརྗོད་བྱུང་། ཟིང་འཁྲུག་སྐབས་ཁོ་རང་ནང་ཆེན་དུ་ཡོད་པ་དང་། ཁོ་ནི་གནམ་གྲུའི་ཁ་ལོ་བ་ཞིག་ཡིན་པ་དང་གནམ་གྲུ་ལས་འབར་རྫས་གཡུག་གི་ཡོད་འདུག ཁོ་ནི་རྒྱ་མིར་རྒྱབ་སྐྱོར་བ་ཞིག་སྟེ། རྒྱ་མི་དམར་པོའི་སྲིད་གཞུང་ལ་རང་སྲོག་བློས་གཏོང་གི་ལས་ཀ་བྱས་ཏེ་བོད་རིགས་མི་དམངས་བཅིངས་འགྲོལ་གཏོང་མཁན་ཞིག་རེད། ཡིན་ན་ཡང་ད་ལྟ་ལས་ཀྱི་འབྲས་བུ་སྨིན་པ་དང་གློ་བུར་མི་རྟག་པའི་དབང་གིས། འཇིགས་སྐྲག་མེད་པ་དང་སྤོབས་པ་ཅན་གྱི་དམག་མི་འདི་ཡང་། ཁོ་རང་གིས་འབར་རྫས་གཡུགས་སའི་མི་དེ་ཚོ་དང་མཉམ་དུ་ཁང་པ་གཅིག་ཏུ་སྡོད་དགོས་བྱུང་འདུག
(མུ་འགོད།)
