འདས་པའི་བདུན་ཕྲག་གཅིག་རིང་རྒྱ་གར་དང་བལ་ཡུལ་ནང་ཁྱོན་བོད་མི་ ༣༦ ལ་ཏོག་དབྱིབས་ན་ཚ་ཕོག་ཡོད་པ་དང་བོད་མི་འདུས་སྡོད་ཀྱི་ས་གནས་ཁ་ཤས་ནང་ཏོག་དབྱིབས་ནད་པ་ཇེ་མང་དུ་འགྲོ་ཡི་ཡོད་པས་ཚང་མས་ཡིད་གཟབ་དགོས་པའི་འབོད་སྐུལ་གནང་འདུག
དེ་རིང་ཉིན་རྒྱབ་ཆུ་ཚོད་ ༤ ཙམ་གྱི་སྟེང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༧༧ སྤེལ་བ་ལྟར་ན། འདས་པའི་བདུན་གཅིག་ནང་རྒྱ་གར་གྱི་ས་གནས་ ༡༣ དང་བལ་ཡུལ་གྱི་ས་གནས་ ༥ ཡི་ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༥༠༤ དང་ཚོགས་སྡེའི་ཟུར་བཀག་ཁང་དུ་མི་ ༤༦༥ བཅས་ཁྱོན་བསྡོམས་མི་གྲངས་ ༩༦༩ ཟུར་བཀག་འོག་ཡོད་པ་དང་། རྒྱ་གར་ནང་ཏོག་དབྱིབས་ནད་གཞི་གསར་དུ་འཕོག་མཁན་བོད་མི་ ༣༦ བྱུང་བའི་ཁྲོད་ནས་ལོ་ན་མཐོ་ཤོས་ ༨༣ དང་ལོ་ན་ཆུང་ཤོས་བྱིས་པ་ལོ་གཉིས་ཅན་ཞིག་ཡིན་འདུག
གསར་འགོད་གསལ་བསྒྲགས་སྐབས་སྨན་པ་མཚམས་གཅོད་ལགས་ཀྱིས། རྡ་ས་ཁུལ་དང་གཞིས་ཆགས་ཁ་ཤས་སུ་ཏོག་དབྱིབས་རིམས་ནད་འཕོག་མཁན་ཇེ་མང་དུ་འགྲོ་མུས་ཡིན་པས། ཏོག་དབྱིབས་རིམས་ནད་ཀྱི་དུས་སུ་ཟས་བཅུད་ཚད་ལྡན་ལ་བསྟེན་དགོས་པ་དང་། ཉིན་རེའི་ཀུན་སྤྱོད་སོགས་ལ་ཡིད་འཇོག་བྱ་དགོས་པ་ལྟར། བོད་མི་ཚོས་སྤྱི་ཚོགས་རྒྱང་སྐྱེད་ཀྱི་ཐོག་ནས་མི་དང་མིའི་བར་ལ་བར་ཐག་འཇོག་དགོས་པ་དང་། ཁ་རས་སྤུས་ལེགས་རིགས་གྱོན་དགོས་ཤིང། ལྷག་པར་མང་ཚོགས་ཀྱི་ཁྲོད་དུ་འགྲིམ་འགྲུལ་བྱ་དགོས་ཁེལ་ཚེ་ཁ་རས་ཉིས་རྩེག་གྱོན་དགོས། དེ་བཞིན་རིམས་ནད་འགོས་མཁན་ཡོད་ཚེ། ས་གནས་སོ་སོའི་ཏོག་དབྱིབས་རིམས་ནད་ཀྱི་ཛ་དྲག་ཚོགས་ཆུང་ལ་འབྲེལ་བ་བྱས་ནས་བོད་ལུགས་དང་ཕྱི་ལུགས་ཀྱི་སྨན་སོགས་བསྟེན་དགོས་པ་དང་། གནམ་གཤིས་སོགས་འགྱུར་ལྡོག་འགྲོ་མུས་ཡིན་པས་ཆམ་ནད་རིགས་ཕོག་སླ་སྟབས། སོ་སོའི་ལུས་ཕུང་ལ་བདག་གཅེས་བགྱིས་ནས་འཚོ་བཅུད་ལ་བསྟེན་དགོས་པ་དང། སེམས་ཞུམ་མི་ཉན་པར་ནད་ཡམས་མ་འགོས་གོང་ནས་དོགས་ཟོན་བྱ་དགོས་སྐོར་གྱི་ལམ་སྟོན་སོགས་གནང་འདུག
ཡང་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། རྒྱལ་སྤྱིའི་ཆེད་མཁས་པ་རྣམས་ཀྱིས་ཟླ་བ་ ༡༠ པའི་ནང་རྒྱ་གར་དུ་ཏོག་དབྱིབས་རིམས་ནད་ཀྱི་ནད་རླབས་གསུམ་པ་ཡོང་ཉེན་ཡོད་པའི་ཚོད་དཔག་བྱེད་ཀྱི་ཡོད་པ་ལྟར། རྒྱ་གར་གྱི་ས་གནས་ཁ་ཤས་སུ་ནད་པ་མང་དུ་འགྲོ་མུས་ཡིན་པ་དང་། བོད་པའི་གཞིས་ཆགས་ཁ་ཤས་ཀྱི་ནང་དུའང་ནད་པ་མང་དུ་འགྲོ་མུས་ཡིན་པས། ཚང་མས་སོ་སོའི་འཕྲོད་བསྟེན་ལ་བདག་གཅེས་ཀྱིས་སྔོན་འགོག་སྨན་ཁབ་བརྒྱག་དགོས་སྐོར་གྱི་ལམ་སྟོན་སོགས་གནང་འདུག
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་བར་རྒྱ་གར་ནང་ཏོག་དབྱིབས་འགོག་ཁབ་ཐེངས་གཉིས་བརྒྱབ་ཟིན་པའི་མི་གྲངས་ ༣༣༢༠༦ དང་ཐེངས་དང་པོ་བརྒྱབ་ཟིན་པའི་གྲངས་འབོར་ཁྱོན་ ༡༧༠༤༦ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པ་མི་ ༣༡༩༡ དང་འགོག་ཁབ་ཚར་དང་པོ་ཐོབ་མཁན་མི་གྲངས་ ༥༣༣ ཆགས་ཡོད་འདུག
ཕྱི་ལོ་ ༢༠༡༩ ལོའི་ལོ་མཇུག་ནས་བཟུང་རྒྱ་ནག་ཝུའུ་ཧན་གྱི་ཏོག་དབྱིབས་གཉན་རིམས་དེ་འཛམ་གླིང་གང་སར་ཁྱབ་པའི་མགོ་བརྩམས་ཡོད་པ་དང་། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་ ༦༣༡༠ བྱུང་བའི་ཁྲོད་དྲག་སྐྱེད་ཟིན་པ་ ༦༡༠༥ དང་། འདས་གྲོངས་སུ་ཕྱིན་པ་ ༡༥༠། ད་ལྟ་ཏོག་ནད་ཀྱིས་མནར་བཞིན་པ་བོད་མི་ ༥༥ ཡོད་འདུག
དཔལ་ལྡན།
