ཨ་རིས་མུ་མཐུད་བོད་དང་ཡུ་གུར་སོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཡིན་འདུག

ཨ་རིའི་རྒྱབ་སྐྱོར་འོག་རྒྱལ་ཚོགས་ཀྱི་མདུན་ཐང་དུ་ཡུ་གུར་བར་དྲག་གནོན་མཚོན་པའི་པར་རིས་འགྲེམས་སྟོན་བྱས་པ་དང་བསྟུན་ཨ་རིས་བོད་དང་ཡུ་གུར། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུ་ཡིན་སྐོར་བརྗོད་འདུག

The display at a United States-backed Uighur photo exhibit of dozens of people who are missing or alleged to be held in Chinese-run camps in Xinjiang, China in front of the United Nations in Geneva, Switzerland, September 16, 2021.
Reuters/Denis Balibouse

དེ་རིང་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཡུ་རོབ་རྒྱལ་ཁབ་སིད་སིའི་ནང་ཤིན་ཅང་ཁུལ་དུ་གར་སོང་ཆ་མེད་དུ་གྱུར་བ་དང་སློབ་གསོ་སྒྱུར་བཀོད་ཁང་ཟེར་བའི་ནང་བཀག་ཉར་བྱས་ཡོད་པའི་ཡུ་གུར་བའི་གནས་སྟངས་མཚོན་པའི་འགྲེམས་སྟོན་ཞིག་བྱས་ཡོད་པ་དང་། སྐབས་དེར་ཨ་རིའི་གཞུང་ཚབ་མི་སྣས། ཨ་རིས་མུ་མཐུད་རྒྱ་ནག་གི་དྲག་གནོན་སྲིད་ཇུས་འོག་རྡོག་རོལ་ཐེབས་བཞིན་པའི་བོད་དང་ཡུ་གུར། ཧོང་ཀོང་སོགས་ཀྱི་འགྲོ་བ་ཐོབ་ཐང་སྲུང་སྐྱོབ་བྱ་རྒྱུ་ཡིན་སྐོར་བརྗོད་ཡོད་པ་རེད།

དེ་འབྲེལ་ཐད་ཨ་རིའི་སྐུ་ཚབ་མི་སྣ་བྷན་ཇཱ་མེན་ (Benjamin Moeling) ལགས་ཀྱིས། ང་ཚོས་རྒྱ་ནག་ཐོག་འཛིན་པའི་སྲིད་ཇུས་ཀྱི་ཡང་སྙིང་གཙོ་བོ་ནི་འགྲོ་བ་མིའི་ཐོབ་ཐང་ཆགས་ཀྱི་ཡོད། ང་ཚོས་མུ་མཐུད་རྒྱ་ནག་གིས་རྒྱ་ནག་རྒྱལ་ཡོངས་དང་། བོད་དང་ཡུ་གུར། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་བཞིན་པའི་གནས་སྟངས་ཡོངས་བསྒྲགས་བྱེད་ཀྱི་ཡིན། ཞེས་བརྗོད་ཡོད་པ་རེད།

ཐེངས་འདིའི་འགྲེམས་སྟོན་གྱི་ཁ་བྱང་ལ་ ༼ཡུ་གུར་བའི་འབོད་སྒྲ། འགྲོ་བ་མིའི་ཐོབ་ཐང་གི་འགྲེམས་སྟོན་༽ཞེས་བཏགས་ཡོད་ཅིང་། འགྲེམས་སྟོན་དེའི་སྟེང་རྒྱ་ནག་གི་བཙན་གནོན་འོག་གར་སོང་ཆ་མེད་དུ་གྱུར་བ་དང་འཛིན་བཟུང་བཀག་ཉར་བྱས་པ། དེ་བཞིན། ཤིན་ཅང་ཁུལ་གྱི་ངལ་སྩོལ་དང་སློབ་གསོ་སྒྱུར་བཀོད་ཁང་ནས་བྲོས་ཐར་བྱུང་ཞིང་། སྐྱེ་སྒོ་འགོག་ཐབས་ཀྱི་སྡུག་སྦྱོང་གི་མནར་གཅོད་མྱོང་མཁན་ལ་ཡིག་བརྙན་གཉིས་ཀྱི་ཐོག་ནས་བཅར་འདྲི་བྱས་པ་སོགས་འགྲེམས་སྤེལ་བྱས་ཡོད་འདུག

གནད་དོན་དེའི་ཐད་སུད་སིར་ཡོད་པའི་རྒྱ་ནག་གི་སྐུ་ཚབ་ཇི་ཨན་ཏཱོན་ (Jiang Duan) ཟེར་བས། ཨ་རིས་རང་གི་སྟོབས་ཤུགས་གཞིར་བཟུང་ཨ་རི་བའི་བདེ་སྡུག་དང་འགྲོ་བ་མིའི་ཐོབ་ཐང་གི་གནས་སྟངས་ཇེ་ལེགས་སུ་གཏོང་དགོས་པ་མ་གཏོགས། རྒྱལ་ཁབ་གཞན་གྱི་མི་མང་གི་འགྲོ་བ་མིའི་ཐོབ་ཐང་ལ་རྡོག་རོལ་དང་ཆབ་སྲིད་ཀྱི་གཡོ་ཇུས་བཤམ་རྒྱུ་མེད། ཅེས་ལན་འདེབས་བྱས་ཡོད་འདུག

Zumretay Arkin, Program and Advocacy Manager at the World Uighur Congress, in front of the exhibit outside the United Nations.
Reuters/Denis Balibouse

འཛམ་གླིང་ཡུ་གུར་མཐུན་ཚོགས་ཀྱི་དྲིལ་བསྒྲགས་དང་ལས་གཞིའི་འགན་འཛིན་ ( Zumretay Arkin) ལགས་ཀྱིས། ང་ཚོས་ཡུ་གུར་བའི་གནས་སྟངས་འགྲེམས་སྟོན་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། མི་མང་པོ་ཞིག་གིས་རྒྱ་ནག་གི་དྲག་གནོན་འོག་གནས་པའི་ཡུ་གུར་བའི་གྲངས་འབོར་དྲན་པ་བརྗེད་སླ་སྲིད་ཀྱང་། ཁོ་ཚོས་འགྲེམས་སྟོན་ལས་མི་དེ་དག་གི་ངོ་གདོང་མཐོང་བ་བརྒྱུད། ཡུ་གུར་བའི་གནས་སྟངས་ཛ་དྲག་ཡིན་པ་ཚོར་ཐུབ་པའི་རེ་བ་ཡོད། ཅེས་བརྗོད་ཡོད་པ་དང་། ཡུ་གུར་བའི་འགྲེམས་སྟོན་དེར་ཨ་རིས་འགྲོ་གྲོན་གཏོང་གི་ཡོད་ཅིང་། ཡུ་རོབ་རྒྱལ་ཁབ་སྦེལ་འཇམ་དང་འཇར་མན་སོགས་སུ་མུ་མཐུད་འགྲེམས་སྟོན་བྱེད་རྩིས་ཡོད་འདུག

ཤིན་ཅང་ཁུལ་གྱི་ཡུ་གུར་མི་མང་གི་དྲག་གནོན་གནས་སྟངས་མཚོན་པའི་འགྲེམས་སྟོན་དེ་ནི། ད་ལྟ་སིད་སིའི་ནང་མཉམ་འབྲེལ་རྒྱལ་ཚོགས་ཀྱི་ལྷན་ཚོགས་ཐེངས་ ༦༧ པ་འཚོགས་བཞིན་པའི་སྐབས་དང་བསྟུན། གྲོང་ཁྱེར་ཇི་ནེ་བའི་རྒྱལ་ཚོགས་ཀྱི་མདུན་ཐང་དུ་འགྲེམས་སྟོན་བྱས་ཡོད་ཅིང་། ད་ལྟ་སིད་སིའི་གྲོང་ཁྱེར་ཇི་ནེ་བའི་ནང་བོད་མི་རིགས་གཙོ་བྱས་པའི་རྒྱ་ནག་གི་དྲག་གནོན་དབང་སྒྱུར་འོག་གནས་པའི་མི་རིགས་ཁག་གི་ཚབ་མཚོན་ཚོགས་སྡེ་ཁག་དང་རྒྱབ་སྐྱོར་བ་སོགས་ནས་རྒྱ་ནག་བཙན་གནོན་དབང་སྒྱུར་ལ་ངོ་རྒོལ་དང་རྒྱལ་ཚོགས་ནང་དྲང་བདེན་ལ་རྒྱབ་སྐྱོར་ཡོང་སླད་ཞུ་གཏུག་གི་ལས་འགུལ་སྤེལ་མཁན་མང་པོ་འབྱུང་གི་ཡོད་འདུག

གསར་འགོད་པ། སྐལ་བཟང་སྦྱིན་པ།