བོད་མདོ་སྨད་རྔ་བ་ཁུལ་འཛམ་ཐང་རྫོང་རྫོང་མདའ་ཡུལ་ཚོའི་སྤང་ཐོག་དགོན་པའི་རྡོ་བརྐོས་བཀའ་འགྱུར་ཁྲི་ལྔ་བཅུ་ཙམ་ཡོད་པ་དེ་འཛམ་གླིང་གི་ཆེས་ཆེ་བའི་རྡོ་བརྐོས་བཀའ་འགྱུར་ཆེན་མོ་རུ་ངོས་འཛིན་བྱས་ཡོད་འདུག
དེ་རིང་རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། ཉེ་སྔོན་སི་ཁྲོན་རིག་གནས་དང་ཡུལ་སྐོར་འཕེལ་རྒྱས་ཚོགས་པ་ཁག་ཅིག་འཛམ་ཐང་རྫོང་རྡོ་བརྐོས་སྤྱི་གླིང་དུ་སོང་ནས། རྡོ་བརྐོས་སྤྱི་གླིང་གི་རྡོ་བརྐོས་བཀའ་འགྱུར་ཁྲི་ལྔ་བཅུ་ཙམ་ཡོད་པ་དེར། འཛམ་གླིང་གི་ཆེས་ཆེ་བའི་རྡོ་བརྐོས་བཀའ་འགྱུར་ཆེན་མོ་རུ་ངོས་འཛིན་བྱས་ཏེ། འཛམ་གླིང་གི་ཟིན་ཐོ་གསར་བའི་ཁོངས་སུ་དང་ལེན་བྱས་ནས་རྒྱལ་སྤྱིའི་ཟིན་ཐོ་གསར་བའི་ངོས་འཛིན་ལག་ཁྱེར་( WRCA ) སྤྲད་ཡོད་པ་རེད་འདུག
རྒྱ་ནག་གཞུང་གིས་འཛམ་ཐང་རྫོང་ནི་བོད་ཀྱི་སྣ་མང་རིག་གནས་གཅིག་འདུས་ཀྱི་ས་ཚིགས་ཡིན་སྐོར་གྱི་དྲིལ་བསྒྲགས་བྱེད་ཀྱི་ཡོད་པ་ལྟར། བོད་མདོ་དབུས་ཁམས་གསུམ་གྱི་ཁྱད་ཆོས་ལྡན་པའི་བོད་ཀྱི་རིག་གནས་མཉམ་སྤུངས་ཀྱི་ཐང་ག་དང་། ཟློས་གར། རྡོ་བརྐོས་སོགས་གནའ་ཤུལ་རིག་གནས་ཀྱི་བསྟི་གནས་སུ་ངོས་འཛིན་བྱེད་མུས་ཡིན་སྟབས། རྒྱ་ནག་གི་འབྲེལ་ཡོད་ཚན་པས་ཀྲུང་གོའི་དམངས་ཁྲོད་རིག་གནས་སྒྱུ་རྩལ་གྱི་ཕ་ཡུལ་དང་། ཀྲུང་གོའི་བོད་རིགས་དམངས་ཁྲོད་རིག་གནས་སྲུང་སྐྱོང་རྒྱུན་འཛིན་གྱི་རྟེན་གཞི་ཞེས་པའི་མིང་ཡང་བཏགས་ཡོད་པ་རེད་འདུག
འཛམ་ཐང་སྤང་ཐོག་རྡོ་བརྐོས་ནི་རྒྱ་ནག་གི་བགོས་པའི་སི་ཁྲོན་ཞིང་ཆེན་རྔ་བ་བོད་རིགས་རང་སྐྱོང་ཆའང་བོད་རིགས་རང་སྐྱོང་ཁུལ་འཛམ་ཐང་རྫོང་རྫོང་མདའ་ཡུལ་ཚོའི་སྤང་ཐོག་དགོན་དུ་ཡོད་ཅིང་། ཕྱི་ལོ་ ༢༠༡༡ ལོའི་འཛམ་ཐང་བཀའ་འགྱུར་རྡོ་བརྐོས་ལག་རྩལ་དེར་སི་ཁྲོན་ཞིང་ཆེན་གྱི་གཟུགས་འདས་ཤུལ་བཞག་རིག་གནས་(Intangible cultural heritage) ཞེས་པའི་མིང་བྱང་ཞིག་སྤྲད་ཡོད་འདུག་ལ། འཛམ་ཐང་གི་རྡོ་བརྐོས་སུ་མ་ཎིའི་གཟུངས་སྔགས་དང་བཀྲ་ཤིས་རྟགས་བརྒྱད་དང་ནོར་ལྷ་སོགས་ཀྱི་བརྐོས་རིས་མང་པོ་ཞིག་ཀྱང་ཡོད་པ་རེད་འདུག
དཔལ་ལྡན།
