བཙོན་ཁང་ནང་དུ་མཁན་པོ་མུན་སེལ་རིན་པོ་ཆེར་མཇལ་བ། བཞི་པ།

ཀླུ་སྨྱོན་ཧེ་རུ་ཀའམ་སྤྲུལ་སྐུ་ཆོས་དབྱིངས་ཡེ་ཤེས་ཀྱིས་དབྱིན་ཡིག་ནས་བསྒྱུར།

དེ་ནི་མཁན་པོ་མུན་སེལ་གྱིས་ང་ལ་གནང་བའི་བསླབ་བྱ་ཐོག་མ་དེ་རེད། འདི་ནི་ཧ་ཅང་གཏིང་ཟབ་མོ་ཞིག་ཡིན། བླ་མ་གཞན་པ་ཚོས་འགྲེལ་བཤད་འདི་ལྟར་བསྐྱོན་མ་བྱུང་།

“གལ་སྲིད་ཁྱོད་ཀྱིས་གཞན་གྱི་སྡུག་བསྔལ་ལེན་པ་དང་རང་གི་བདེ་སྐྱིད་གཞན་ལ་གཏོང་བའི་དུས་སུ་གཏོང་ལེན་དེ་སྐབས་དོན་སྤྱིར་བཏང་བ་ཞིག་ཏུ་མཐོང་བ་ཡིན་ན། དེ་དུས་ད་དུང་རང་དང་གཞན་གྱི་འཛིན་པ་དེ་མཁྲེགས་པོར་གནས་ཡོད། དེ་རུ་ད་དུང་ཁྱོད་ཅེས་པ་གཏོང་མཁན་དང་ལེན་མཁན་ཞིག་ཡོད་པ་རེད། དེ་ནས་དེ་རུ་མི་གཞན་ཞིག་གི་སྡུག་བསྔལ་ཞེས་པ་ཞིག་ཁྱོད་ཀྱིས་ལེན་རྒྱུ་ཡོད་པ་དང་། ཁྱོད་ཅེས་པ་ཞིག་གི་བདེ་སྐྱིད་གཏོང་རྒྱུ་ཞིག་ཡོད་པ་རེད། ཁྱོད་ཀྱིས་གཏོང་ལེན་འདི་ལྟར་ཉམས་ལེན་མ་བྱེད།” མཁན་པོ་མུན་སེལ་གྱིས་དེ་ལྟར་གསུངས།

“ཡིན་ན་ཡང་། གལ་སྲིད་ཁྱོད་ཀྱིས་ང་ཚོའི་སེམས་ཀྱི་གནས་ལུགས་གཅིག་པ་ཡིན་པ་སྟེ། ཁྱོད་ཀྱི་སེམས་ཀྱི་གནས་ལུགས་དང་མི་གཞན་པའི་སེམས་ཀྱི་གནས་ལུགས་དེ་གཅིག་པ་ཡིན་པ་དེ་རྟོགས་པ་ཡིན་ན། དེ་ནས་ཁྱོད་ཀྱིས་དོན་དམ་པའི་ལྟ་བ་དེ་རྟོགས་ཐུབ། ཁྱོད་ཀྱིས་གཏོང་ལེན་དེ་དོན་དམ་པའི་ལྟ་བ་དང་སྦྱར་ནས་ཉམས་ལེན་བྱེད་དགོས།” མཁན་པོ་མུན་སེལ་གྱིས་དེ་ལྟར་གསལ་བསྒྲགས་གནང་བྱུང་།

“ཁ་གསང་ནས་བཤད་ན།” ཁོང་གིས་ང་ལ་འགྲེལ་བཤད་འདི་ལྟར་བསྐྱོན་བྱུང་། “སྡུག་བསྔལ་ལ་མི་འདྲ་བ་མང་པོ་ཞིག་ཡོད་ན་ཡང་། དོན་དངོས་སུ་སྡུག་བསྔལ་ཞེས་པ་གཅིག་ལས་མེད། ཁྱོད་ཀྱིས་སྡུག་བསྔལ་དྲག་པོ་ཞིག་མྱོང་དུས། ཁྱོད་ཀྱིས་ཁྱོད་རང་གི་སེམས་ཀྱི་གནས་ལུགས་དང་སེམས་ཅན་ཐམས་ཅད་ཀྱི་སེམས་ཀྱི་གནས་ལུགས་གཅིག་མཚུངས་ཡིན་ལུགས་བསམ་དགོས། དེ་རུ་སེམས་གཅིག་ཙམ་མ་གཏོགས་མེད། ཁམས་གསུམ་སེམས་ཅན་ཐམས་ཅད་ཀྱི་སྡུག་བསྔལ་མྱོང་བའི་སེམས་དེ་ཚོ་དང་ཁྱོད་རང་གི་སེམས་གཉིས་གཅིག་མཚུངས་ཡིན།

ཁྱོད་ཀྱིས་ད་དུང་སེམས་ཅན་ཐམས་ཅད་ཀྱི་སྡུག་བསྔལ་གྱི་རང་བཞིན་དང་ཁྱོད་རང་གི་སྡུག་བསྔལ་གྱི་རང་བཞིན་གཉིས་གཅིག་པ་དང་མཚུངས་པ་ཡིན་ལུགས་བསམ་དགོས། དེ་རུ་སྡུག་བསྔལ་གཅིག་ལས་མེད། ནམ་ཞིག་ཁྱོད་ཀྱིས་དེ་ཚོ་གཅིག་པར་མཐོང་དུས། ཁྱོད་དང་སེམས་ཅན་ཐམས་ཅད་རང་བཞིན་གྱིས་དབྱེར་མེད་དུ་གྱུར་པ་རེད། སྐད་ཅིག་མ་དེའི་རིང་ལ། ཁྱོད་རང་དང་སེམས་ཅན་ཐམས་ཅད་ཀྱི་སེམས་ཀྱི་གནས་ལུགས་དེའི་སྟེང་དུ་ཡོད་པའི་སྡུག་བསྔལ་གྱི་སྟེང་དུ་དམིགས་པ་གཏོད།

རྣམ་རྟོག་ཅིག་སྐྱེས་པའི་སྐབས་སུ་དེ་བཅིང་འགྲོལ་ཐོངས། ཁྱོད་རང་གི་མཉམ་བཞག་དང་སེམས་ཀྱི་སྟངས་འཛིན་བརྒྱུད་ནས་སྡུག་བསྔལ་དེ་ཚོ་སྤོང་ཐུབ་ཀི་རེད། ཉོན་མོངས་དེ་ཚོ་བཅིང་བགྲོལ་བཏང་བ་ཡིན་ན་དེ་ཚོ་ཡེ་ཤེས་སུ་འགྱུར་གྱི་རེད། ཁྱོད་ཀྱི་ཉོན་མོངས་བཅིང་འགྲོལ་བཏང་བ་དེ་ཡིས། ཁྱོད་ཀྱིས་ཚད་ངེས་ཅན་ཞིག་གི་སྟེང་ནས་སེམས་ཅན་ཐམས་ཅད་སྡུག་བསྔལ་ལས་བཅིང་འགྲོལ་བྱས་པ་རེད། གལ་སྲིད་ཁྱོད་རང་རི་ཆེན་པོ་ཞིག་གི་འོག་ཏུ་མནན་བསྡད་ཡོད་ན། ཁྱོད་ཀྱིས་རི་དེ་ལས་རྡོ་བ་ཆུང་ཆུང་ཞིག་བླངས་པ་ཡིན་ཡང་དེས་ཁྱོད་ཀྱི་སྡུག་བསྔལ་ཇེ་ཡང་དུ་འགྲོ་བར་ཕན་ཐོགས་ཡོད་པ་བཞིན་དུ། སྐད་ཅིག་མ་དེའི་རིང་ལ། ཁྱོད་དང་སེམས་ཅན་ཐམས་ཅད་ཀྱི་སྡུག་བསྔལ་ཉུང་དུ་འགྲོ་ཐུབ།

གལ་སྲིད་ཁྱོད་ཀྱིས་སེམས་ཀྱི་རང་བཞིན་རྟོགས་ན། ཁྱོད་ཀྱིས་སྡུག་བསྔལ་དང་སྡུག་བསྔལ་གྱི་ཚོར་བ་ཇི་འདྲ་ཞིག་ཡིན་ཡང་དེའི་རང་བཞིན་དེ་ནི་སྟོང་པ་ཉིད་ཡིན་པ་རྟོགས་ཡོང་། དེ་ཚོ་རྐྱེན་དང་འཕྲད་ན་ལྡང་ཡོང་བ་མ་གཏོགས་ཚུགས་ཐུབ་ཏུ་གྲུབ་མེད། ནམ་ཞིག་སྡུག་བསྔལ་གྱིས་ཁྱོད་ལ་གནོད་མི་ཐུབ་པའི་སྐབས་སུ་ཁྱོད་ཀྱི་སེམས་ལ་བདེ་བ་ཆེན་པོ་ཞིག་ཡོང་། གལ་སྲིད་སྐབས་དེར་ཁྱོད་ཀྱིས་རང་གཞན་གཉིས་དབྱེར་མེད་དུ་སྒོམ་པ་ཡིན་ན། བདེ་བ་དེ་ཡིས་སེམས་ཅན་ཐམས་ཅད་ཀྱི་ངར་འཛིན་ཇེ་ཉུང་དུ་གཏོང་གི་རེད། བདེ་སྐྱིད་དེ་ནི་གཟུང་འཛིན་གཉིས་སྟོང་དང་སྣང་སེམས་རོ་གཅིག་གི་གཏོང་ལེན་ལ་ཉམས་ལེན་བྱས་པ་ལས་བྱུང་བའི་བདེ་བ་དེ་རེད།”

མཐའ་མཇུག་ཏུ་གཏོང་ལེན་དེ་ནི་ངའི་བཙོན་ཁང་ནང་གི་ཉམས་ལེན་ལྟེ་བ་དེར་གྱུར་སོང་།

ལོ་མང་པོ་ཞིག་གི་རྗེས་སུ་ངས་གལ་སྲིད་ང་ཚོའི་སེམས་ནང་དུ། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག ཅེས་པའི་འདུན་པ་ཞིག་ཡོད་པ་ཡིན་ན། དེས་འགྲོ་བ་མིའི་རིགས་ཧྲིལ་བོར་ཕན་ཐོགས་འབྱུང་གི་རེད། གལ་སྲིད་འདུན་པ་དེ་ང་ཚོའི་སེམས་ནང་ཡོད་པ་ཡིན་ན། དེ་ནས་ང་ཚོས་སྨོན་ལམ་འདོན་དུས་སུ་དེ་ཚོ་ང་རང་ཚོའི་ཆ་ཤས་དངོས་གནས་ཤིག་ཏུ་འགྱུར་གྱི་རེད། དེ་ནི་དོན་དམ་པའི་གཏོང་ལེན་གྱི་ཉམས་ལེན་དེ་རེད། གལ་སྲིད་ང་ཚོའི་སྨོན་ལམ་དེ་ནི་སེམས་ཅན་ཐམས་ཅད་ལ་བདེ་བ་འདྲེན་པ་དང་སྡུག་བསྔལ་སྤོང་བ་དེ་ཡིན་ན། གལ་སྲིད་དེ་ང་ཚོའི་སེམས་ནང་རྒྱུན་ཆགས་སུ་གནས་པ་ཡིན་ན། དེ་ནས་དེ་ནི་གཏོང་ལེན་གྱི་ཉམས་ལེན་དངོས་མ་དེར་འགྱུར་གྱི་ཡོད་པ་དེ་རྟོགས་བྱུང་།

གང་ལྟར་ཡང་། བཙོན་ཁང་དུ་སྡོད་པའི་སྐབས་དེར་དགོང་མོར་ང་ཚོ་མར་ཉལ་ནས་གཉིད་ཁུག་དགོས་ཀྱི་ཡོད་པ་རེད། ང་ཚོ་རང་གི་སྡོད་ཁང་དེ་ཚོའི་ནང་དུ་ཙོག་པུར་སྡོད་ཆོག་གི་མ་རེད། དེའི་རྐྱེན་གྱིས་དགོང་མོ་རྟག་པར། ང་རང་འགུལ་ཙམ་ཡང་མེད་པར་ངའི་ཉལ་གོས་ཀྱི་ནང་དུ་ཉལ་ཏེ་གཉིད་ཁུག་རྫུ་བྱེད་ཀི་ཡོད་ན་ཡང་། ངས་དུས་ཚོད་དེ་ཚོ་ཕལ་ཆེ་བ་གཏོང་ལེན་དང་རྡོ་རྗེ་བཟླས་པའི་ཉམས་ལེན་ལ་བཀོལ་གྱི་ཡོད།

ངས་ད་དུང་མཁན་པོ་མུན་སེལ་གྱི་ལམ་སྟོན་བཞིན་རྨི་ལམ་ནང་སེམས་གསལ་རིག་དང་འོད་གསལ་ཕྲ་མོའི་སྟེང་དུ་མཉམ་པར་འཇོག་གི་ཡོད། འདི་ལ་འབད་བརྩོན་དྲག་པོ་ཞིག་བྱས་ན་གཞི་ནས་གཉིད་པའི་སྐབས་སུ་འོད་གསལ་ངོས་འཛིན་ཐུབ། དེ་ནི་མི་ཞིག་གིས་ཉིན་མོའི་གནས་སྐབས་སུ་རང་གི་གཟུགས་པོའི་ནུས་པ་འདོན་སྤེལ་བྱས་ཡོད་ན་ལེགས་པོ་ཡོད།

“གང་ལྟར།” མཁན་པོ་མུན་སེལ་གྱིས། “དེ་ནི་ཅུང་ཟད་ལས་སླ་བོ་ཡོད།”

“ཁྱོད་རང་གཉིད་ཁུགས་ཤིག” ཁོང་གིས་རྒྱས་བཤད་གནང་བྱུང་། “ཁྱོད་རང་ཐད་ཀར་རང་གི་སེམས་ནང་གི་དོན་སྤྱི་དེ་ཚོའི་བར་དུ་གནས་པར་གྱིས། གཉིད་ཁུག་དུས། ཀུན་རྫོབ་དང་བྲལ་ནས་རིག་པ་རྒྱུན་སྐྱོང་དགོས། འོད་གསལ་རྒྱུན་སྐྱོང་བ་དང་དེ་རྗེས་གཟུང་འཛིན་གཉིས་སྟོང་གི་རིག་པའི་ངང་ལས་སད་དགོས། དེས་འཆི་བ་བར་དོ་སྦྱོང་གི་རེད། གང་ལྟར། དེ་ནི་ག་ལེར་གཉིད་ཁུག་པའི་སྐབས་ཀྱི་བསམ་བློར། ཨོ། ད་ནི་ང་རང་གཉིད་ཀྱི་གནས་སྐབས་སུ་བསླེབས་འདུག ད་ནི་ང་རང་གཉིད་བཞིན་འདུག་ལྟ་བུའི་རིགས་དེ་དང་མི་འདྲ་བ་ཞིག་ཡིན།”

གཟའ་ཉི་མར། བཙོན་ཁང་ནང་གི་རང་དབང་གི་ཉིན་མོ། ང་ཚོས་རང་རང་གི་གྱོན་ཆས་དག་བཀྲུ་བ་དང་ཟ་མ་མཉམ་དུ་བཟའ་གི་ཡོད། ངའི་ཤག་རོགས་ཚོས་ཁ་བརྡ་བྱེད་པ་དང་རྩེད་མོ་རྩེ་བ་དེ་འདྲ་བྱེད་ཀི་ཡོད། ང་ཚོ་ཚང་མར་གད་མོ་དགོད་པ་དང་སྐད་ཅིག་མ་རེ་རེར་སྐྱིད་སྣང་དོད་པའི་དུས་ཚོད་ཡག་པོ་ཞིག་ཡོད། ཉིན་ཞིག་རྒྱ་མིའི་ལས་བྱེད་པ་ཚོ་བསླེབས་ནས་ང་ཚོར་གཤེ་གཤེ་བཏང་བྱུང་།

“ག་རེ་བྱེད་ཀི་ཡོད། ག་རེ་བྱས་ནས་ཁྱོད་ཚོ་གད་མོ་འདི་འདྲ་ཞིག་དགོད་ཀྱི་ཡོད། ཁྱོད་ཚོས་རང་ཉིད་གང་དུ་ཡོད་པ་ཤེས་སམ། འདི་ནི་བཙོན་ཁང་རེད། ཁྱོད་ཚོ་འདིར་རང་དབང་གང་ཡང་མེད་པར་སྡོད་དགོས་པ་རེད། མི་གཞན་པ་ཚོས་དེ་མ་བཟོད་པར་རང་ཤི་རྒྱག་གི་ཡོད་པ་རེད། ཡིན་ན་ཡང་ཁྱོད་ཚོ་གད་མོ་བགད་ནས་སྣང་བ་སྐྱིད་པོ་བྱེད་ཀི་འདུག ཁྱོད་ཚོར་དེ་འདྲའི་དུས་ཚོད་ཡག་པོ་ཞིག་ཇི་ལྟར་བྱས་ནས་ཡོད་པ་རེད།”

ལས་བྱེད་དེ་ཚོས་ང་ཚོས་འཁྲབ་སྟོན་ཞིག་བྱེད་ཀི་ཡོད་ས་རེད་བསམས་འདུག ཡིན་ན་ཡང་ང་ཚོས་དེ་ལྟར་བྱས་མེད། གཞི་རྩའི་ཆ་ནས་ང་ཚོས་རང་རང་ས་ནས་སྣང་བ་སྐྱིད་པོ་ཞིག་བྱས་པ་ཡིན། དེ་བཞིན་བཙོན་རོགས་ཚང་མ་གནས་གཅིག་ཏུ་སྡོད་པ་དང་ལོ་མང་རིང་མཉམ་དུ་ལས་ཀ་བྱེད་དགོས་བྱུང་བ་རེད། ང་ཚོས་རང་གི་སེམས་ནང་དུ་ཚོགས་སྡེ་མི་འདྲ་བ་གཉིས་འབྱེད་ཀི་ཡོད་པ་རེད། ཚོགས་སྡེ་གཅིག་ནི་ནམ་རྒྱུན་སྐྱོ་བ་དང་སྡུག་བསྔལ་ཡོད་པ་རེད། གཞན་པ་དེས་གནས་ཚུལ་ག་རེ་བྱུང་ན་ཡང་བདེ་སྐྱིད་ཀྱིས་འཚོ་ཐབས་བྱེད་ཀི་ཡོད་པ་རེད། དེའི་ཕྱིར། དུས་ཚོད་དེ་འདྲ་བ་ཞིག་གི་སྐབས་སུ། ང་ནི་བཙོན་པ་བདེ་སྐྱིད་འཚོལ་ཐབས་བྱེད་མཁན་དེ་ཚོའི་ཁོངས་སུ་གཏོགས་ཀི་ཡོད། ངའི་བླ་མའི་བྱིན་རླབས་ལ་བརྟེན་ནས་ངས་རང་ཉིད་ཀྱི་ལས་དབང་དང་ལེན་བྱེད་ཐུབ། ངས་ཁོང་ཁྲོ་དང་འཁོན་འཛིན་སྐྱེ་མཚམས་འཇོག་རྒྱུའི་ཐག་གཅོད་བྱས་པ་ཡིན། སྒྱུར་བཅོས་འདིའི་གྲུབ་འབྲས་ལ་བརྟེན་ནས། ངའི་སེམས་ནང་གི་རྡོ་ཆེན་པོ་དེ་དབྱུགས་ཐུབ་པ་ཞིག་བྱུང་སོང་བས། རང་ཉིད་ཀྱི་གྲོགས་པོ་ཚོར་གད་མོ་དགོད་ཐུབ་པ་ཞིག་བྱུང་།

རྗེས་སུ། ངས་གཟའ་ཉི་མ་ཆ་ཚང་ལ་ཉམས་ལེན་བྱེད་རྒྱུའི་ཐག་གཅོད་བྱས་པ་ཡིན། ངས་ཉིན་གང་བོར་མཉམ་པར་འཇོག་པ་དང་སྒྲོལ་མ་ཉེར་གཅིག་གི་བསྟོད་པ་བཏོན་པ་ཡིན། ང་ཚོས་ཙོག་བུར་བསྡད་ནས་ཉམས་ལེན་བྱེད་ཆོག་གི་མེད་པས། གལ་སྲིད་བཙོན་སྲུང་བས་ང་ཚོས་སྒོམ་རྒྱག་གི་ཡོད་པ་དེ་མཐོང་བ་ཡིན་ན། དེ་ཚོས་རྙོག་དྲ་ཆེ་ཐག་ཆོད་ཅིག་བཟོ་གི་ཡོད་པ་རེད། དེའི་རྐྱེན་གྱིས། ང་མར་ཉལ་ཏེ་རང་ཉིད་ཉལ་གོས་ཀྱི་འོག་ཏུ་སྦས་ཏེ་གཉིད་རྫུ་བྱེད་ཀི་ཡོད་ལ། དེ་ནས་ག་ལེར་རྡོ་རྗེ་བཟླས་པ་སྟེ་ཨོྃ་ཨྰཿཧྰུྃ ་ ཞེས་པ་དེ་སྒོམ་སྒྲུབ་བྱེད་ཀི་ཡོད། ངས་ད་གིན་ནས་ཁྱེད་ལ་བརྗོད་ཟིན། ངས་བརྗོད་མ་སོང་ངམ། བཙོན་ཁང་ནང་དུ། ངས་རང་གིས་གཅིན་པ་གཏོང་དུས་སྒོམ་ཡག་ཐག་ཆོད་དེ་རྒྱག་གི་ཡོད།

ཐེངས་མང་པོ་ཞིག་ལ། ངའི་གྲོགས་པོ་ཚོས་གཟའ་ཉི་མར་ཏག་སེ་རྩེད་ཀི་ཡོད་པ་རེད། ཁོ་ཚོས་ངའི་གཟུགས་པོའི་སྟེང་དུ་པང་ལེབ་གཅིག་འཇོག་གི་ཡོད་པ་དང་། ང་རང་ཁོ་ཚོའི་རྩེད་མོའི་ཅོག་ཙེ་རུ་འགྱུར་གྱི་ཡོད། ཁོ་ཚོ་ཏག་སེ་རྩེད་མོ་རྩེ་བའི་རིང་དེར་ང་རང་མར་ཉལ་ནས་ཆུ་ཚོད་མང་པོའི་རིང་སྒོམ་རྒྱག་པའམ་ཨ་ཏི་ཤས་མཛད་པའི་སྒྲོལ་མའི་གསོལ་འདེབས་དེ་ཤུབ་བུར་འདོན་གྱི་ཡོད། ཁོ་ཚོས་མུ་མཐུད་ངའི་མཐའ་སྐོར་དུ་ཀུ་རེ་རྩེ་བའམ་གད་མོ་དགོད་བཞིན་ཡོད། ཐེངས་ཤིག ངས་རང་གི་གཟུགས་པོར་ཏོག་ཙམ་འཕྲུག་དགོས་བྱུང་བ་དང་ལམ་སེང་ཁོ་ཚོས། “དཀོན་མཆོག་རྒྱལ་མཚན། འགུལ་སྐྱོད་མ་གཏོང་། ཙོག་གེ་སྡོད་དང་། ཙོག་གེ་སྡོད་དང་།”

མཁན་པོ་མུན་སེལ་ངའི་ཡར་རྒྱས་ལ་ཐུགས་མཉེས་པོ་བྱུང་བ་དང་འབྲེལ། ད་དུང་མུ་མཐུད་དུ་ང་ལ་སེམས་བཟང་པོ་བྱེད་དགོས་པའི་བསླབ་བྱ་གནང་བྱུང་།

“བག་ཡོད་པར་གྱིས། ལས་ཀ་དྲང་པོར་ལས། སེམས་བཟང་པོ་ཡོད་པ་གྱིས།”

དེ་ཚོ་ནི་མཁན་པོ་མུན་སེལ་གྱིས་ང་ལ་ཡང་ཡང་གདམས་པ་དེ་རེད།

ངས་ཐེངས་མང་པོར་སོ་ཕག་བཟོས་རྗེས་དེ་ཚོ་བསྲེགས་ཁུང་དུ་དབོར་དགོས། མཁན་པོ་མུན་སེལ་གྱིས་དེ་ལ་དམིགས་ནས་ང་ལ།

“གཟབ་གཟབ་བྱོས། ས་ཕག་དེ་ཚོ་མ་ཆག་པ་ཞིག་བྱོས།”

ཐེངས་མང་པོར། ང་ཚོར་ལག་ཆ་རྙིང་པའམ་ཆག་ཚར་བ་དེ་འདྲ་སྤྲོད་ཀྱི་འདུག ཡིན་ན་ཡང་ང་ཚོས་ལས་ཀ་ཡག་པོ་བྱེད་རྒྱུའི་རེ་བ་བཅང་གི་ཡོད། ནམ་རྒྱུན་ང་ཚོས་རྡོ་གཅོགས་པའམ་ལོ་ཏོག་རྔོ་དུས། ངས་ལག་ཆ་སྡུག་ཤོས་དེ་ཚོ་འཁྱེར་གི་ཡོད་ལ་ལག་ཆ་བདེ་ཤོས་དེ་ཚོ་རང་གི་གྲོགས་པོ་ཚོར་སྤྲོད་ཀྱི་ཡོད། གལ་སྲིད་མི་ཞིག་གིས་ཁོ་རང་ངའི་ཅ་ལག་ཅིག་ལ་དགའ་བོ་ཡོད་ལུགས་བརྗོད་ཚེ། དེ་ནི་སྟོད་གོས་སམ་ལག་ཆའམ་ཕོར་བ་གང་ཞིག་ཡིན་ཡང་ངས་ལམ་སེང་དེ་ཁོ་ལ་སྤྲོད་ཀྱི་ཡོད། ངས་རང་གི་ལས་ཀའི་ས་གནས་སུ་འོས་འགན་དེ་ཚར་བའི་རྗེས་སུ། ཉེ་འཁྲིས་སུ་ཡོད་པའི་མི་དེའི་སར་སོང་ནས་ཁོ་ལ་རོགས་རམ་བྱེད་ཀྱི་ཡོད།

ཉི་མ་རེ་རེར་ང་ཚོས་འདྲུད་འཁོར་ཞིག་གི་ནང་དུ་ས་ཕུང་དབོར་དགོས། ང་ཚོ་མི་རེ་རེར་ས་ཅི་ཙམ་ཞིག་དབོར་དགོས་པའི་འགན་ཁུར་ཡོད། ང་ཚོའི་གྲས་སུ་བླ་མ་བགྲེས་པོ་སྐུ་གཟུགས་ཉམ་ཆུང་ཞིག་ཡོད་པ་དེས་ནམ་ཡང་ཁོང་གི་འདྲུད་འཁོར་དེ་འདེད་ཐུབ་ཀྱི་མེད། ངས་ཁོང་གི་འདྲུད་འཁོར་དེ་ངའི་འདྲུད་འཁོར་གྱི་སྔོན་དེར་འདེད་རྒྱུའི་ཐག་གཅོད་བྱས་པ་ཡིན། ཉི་མ་དེ་ནས་བཟུང་སྟེ་ངས་དུས་རྟག་ཏུ་ཁོང་གི་ས་དེ་དབོར་གྱི་ཡོད་ལ། ངས་རང་གི་ལས་ཀ་དེ་ནམ་ཡང་ཚར་གྱི་མི་འདུག་པས། བཙོན་སྲུང་བས་ང་ལ་དེའི་རྐྱེན་གྱིས་སྐྱོན་བརྗོད་བྱེད་ཀིན་འདུག དེའི་རྐྱེན་གྱིས་བླ་མ་ཉམ་ཆུང་དེས་ང་ལ་ཞུ་བ་འཐེན་ནས། “སྐུ་མཁྱེན། ཁྱོད་རང་གི་ས་དེ་ཐོག་མར་དབོར་རོགས། དེ་ནས་ང་ལ་རོགས་རམ་གནང་ན་འགྲིག་གི་རེད།”

གང་ལྟར། ངས་དེ་ལ་ཁ་ཡ་བྱེད་ཀི་མེད། དེས་ངོ་མས་གང་ཡང་བྱེད་ཀྱི་མ་རེད། ངས་འདི་ལྟར་བསམས་བྱུང་། “ང་ཚོ་ཚང་མ་བཙོན་ཁང་ནང་དུ་ཡོད་པ་རེད། བསྟོད་བསྔགས་དང་སྐྱོན་བརྗོད་གཉིས་ཀས་གང་ཡང་བྱེད་ཀྱི་མ་རེད། ངས་ཁོ་ཚོས་ང་ལ་བསྟོད་བསྔགས་བྱེད་པའམ་འཁང་ར་བྱེད་པ་དེ་ཚོར་ཇུས་གཏོགས་བྱེད་ཀྱི་མེད། ངས་བྱས་པ་དེ་ཚོ་ཚང་མ་ནི་བླ་མ་ཉམ་ཆུང་དེར་རོགས་རམ་ཞིག་བྱེད་འདོད་པ་དེ་ཡིན།” ངས་ལྷག་བསམས་བཅངས་ནས་རང་གི་ནུས་པ་ཡོད་ཚད་བཏོན་ཏེ། ཆེས་ཆུང་བའི་རོགས་རམ་གྱིས་མི་གཞན་ལ་བདེ་སྐྱིད་བསྐྲུན་རྒྱུ་དང་ཁོ་ཚོ་ངའི་སྔོན་དུ་འཇོག་རྒྱུའི་རེ་བ་བྱེད་ཀི་ཡོད། ངས་ཞེ་དྲགས་བྱེད་ཐུབ་ཀྱི་མི་འདུག ཡིན་ན་ཡང་ངས་ཁོ་ཚོར་རོགས་རམ་ཕྲན་བུ་རེ་བྱེད་ཐུབ་པ་དེས་ང་རང་ཧ་ཅང་སྐྱིད་པོ་ཡོང་གི་འདུག

ངས་ད་དུང་བཙོན་ཁང་ནང་གི་མི་ཚང་མར་ “ཨ་བྷེ་” ཞེས་འབོད་མགོ་བཙུགས་པ་ཡིན། དེ་ནི་བོད་སྐད་ཀྱི་ནང་དུ་གཅེས་མིང་ཞིག་སྟེ་བརྩེ་བའི་མི་དེ་ཞེས་པར་གོ མི་མང་པོ་ཞིག་གིས་ང་ལ་ཡང་ཕྱིར་ “ཨ་བྷེ་” ཞེས་བོས་བྱུང་། དེ་ནས་ཅང་མ་འགོར་བར་དེ་ནི་ངའི་མིང་ཚབ་ཅིག་ཏུ་ཡང་གྱུར་སོང་། གལ་སྲིད་མི་ཞིག་གིས་ང་ལ་ “ཨ་བྷེ་” ཞེས་བོས་ཏེ། “ཁྱོད་ལ་སྟོད་གོས་ཡག་པོ་ཞིག་འདུག” ཅེས་བརྗོད་ཚེ། ངས་དེ་མ་ཐག་ཏུ་དེ་ཕུད་ནས་སྤྲོ་བ་དང་བཅས་ཁོ་ལ་སྤྲོད་ཀི་ཡོད།

ཉིན་ཞིག མི་ཞིག་གིས་ང་ལ་མཁན་པོ་མུན་སེལ་གྱིས་ཁོ་ལ། མགར་ཆེན་རིན་པོ་ཆེ་ནི་བྱང་ཆུབ་སེམས་དཔའ་ཞིག་རེད་ཅེས་གསུངས་ལུགས་བརྗོད་བྱུང་། ངས་མཁན་པོ་མུན་སེལ་གྱིས་ང་ལ་དེ་ལྟར་གསུངས་པ་ནམ་ཡང་ཐོས་མ་མྱོང་། ཡིན་ན་ཡང་། དེ་ལ་བརྟེན་ནས། མི་མང་པོ་ཞིག་གིས་ང་ལ་མཁན་པོ་མུན་སེལ་གྱིས་གསུངས་པ་བཞིན་བོས་བྱུང་།

ངས་དེ་ནས་བཟུང་བཙོན་ཁང་དུ་སྡུག་བསྔལ་མ་མྱངས་ཞེས་བརྗོད་ཆོག་གི་འདུག ངོ་མ་བརྗོད་ཆོག་གི་འདུག རྫོགས་སོ།།