བོད་ཀྱི་ན་གཞོན་གློག་བརྙན་འཁྲབ་འཁྲིད་པ་འཇིགས་མེད་འཕྲིན་ལས་ཀྱི་གློག་བརྙན་གཅིག་དང་བཞི་ཞེས་པ་དེ། ཊོག་ཡོ་རྒྱལ་སྤྱིའི་གློག་བརྙན་དུས་སྟོན་དུ་ཚུད་དེ་མི་འགྱང་བར་སྟོན་འཆར་ཡོད་འདུག
ཊོག་ཡོ་རྒྱལ་སྤྱིའི་གློག་བརྙན་སྟོན་དུས་སྟོན་ཐེངས་སོ་བཞི་པ་ ( 34th Tokyo International film festival ) དེ། ཟླ་ ༡༠ ཚེས་ ༣༠ ནས་ཟླ་ ༡༡ ཚེས་ ༨ བར་ཉིན་གྲངས་བཅུ་ཡི་རིང་ཉི་ཧོང་གི་རྒྱལ་སའི་ཁུལ་དུ་འཚོག་གཏན་ཁེལ་བ་ལྟར། རྒྱལ་སྤྱིའི་གློག་བརྙན་དུས་སྟོན་དེའི་ཁྲོད་རྒྱལ་ཁབ་འདྲ་མིན་གྱི་གློག་བརྙན་འཁྲབ་འཁྲིད་པས་བཟོ་སྐྲུན་བྱས་པའི་བརྩམས་ཆོས་མང་པོ་ཞིག་འདེམས་སྒྲུག་བྱས་ཡོད་པའི་ཁྲོད། བོད་ཀྱི་ན་གཞོན་གློག་བརྙན་འཁྲབ་འཁྲིད་པ་འཇིགས་མེད་འཕྲིན་ལས་ལགས་ཀྱི་གློག་བརྙན་གཅིག་དང་བཞི་ ( One and four) ཞེས་པ་དེའང་འདེམས་ཐོན་བྱུང་ཡོད་པ་རེད་འདུག
བོད་ཀྱི་གློག་བརྙན་གཅིག་དང་བཞི་ནི་རྩོམ་པ་པོ་འཇམ་དབྱངས་ཚེ་རིང་ལགས་ཀྱིས་བརྩམས་པའི་གཅིག་དང་བཞི་ཞེས་པའི་བརྩམས་སྒྲུང་དེར་གཞི་བཅོལ་ནས་ཕབ་སྐྲུན་བྱས་པ་ཞིག་ཡིན་ཞིང་། གློག་བརྙན་དེ་ ༢༠༡༩ ལོའི་ཟླ་ ༡༢ ནས་ཕབ་སྐྲུན་བྱེད་མགོ་བཙུགས་ཡོད་པ་དང་། ནད་ཡམས་ཀྱི་རྐྱེན་གྱིས་བརྙན་ལེན་ཕབ་སྒྲིག་བྱེད་ཐུབ་མེད་ཀྱང་། ཕྱི་ལོ་ ༢༠༢༠ ལོའི་ལོ་མཇུག་ཏུ་ཡང་བསྐྱར་གློག་བརྙན་ཕབ་སྐྲུན་གྱི་ལས་གཞི་མགོ་བཙུགས་ཏེ། ལོ་མཇུག་ཏུ་གློག་བརྙན་ཕབ་སྒྲིག་གི་ལས་གཞི་ཚང་མ་བསྒྲུབས་ཡོད་པ་རེད་འདུག་ལ། གློག་བརྙན་དེར་བོད་ཀྱི་གློག་བརྙན་འཁྲབ་འཁྲིད་པ་གྲགས་ཅན་པདྨ་ཚེ་བརྟན་གྱིས་ལམ་སྟོན་གནང་ཡོད་ཅིང་། གློག་བརྙན་དེའི་བརྙན་ལེན་པའང་པདྨ་ཚེ་བརྟན་གྱི་བརྙན་ལེན་པ་ལིས་སུང་ཡེ་ཟེར་བའི་རྒྱ་མི་དེ་ཡིན་པ་རེད་འདུག
རྒྱ་ནག་གི་གསར་ཁང་ཁག་གིས་བསྒྲགས་པའི་གནས་ཚུལ་ལྟར་ན། གློག་བརྙན་དེ་ནི་བོད་ཀྱི་གློག་བརྙན་འཁྲབ་འཁྲིད་པས་ཕབ་སྒྲིག་བྱས་པའི་གློག་བརྙན་གཞན་དག་ལས། སྒྱུ་རྩལ་གསལ་སྟོན་གྱི་ནུས་པ་གཅིག་པུར་དམིགས་པ་ཙམ་མ་ཡིན་པར་གློག་བརྙན་བརྩམས་ཆོས་ཀྱི་ཕྱོགས་ཡོངས་ནས་ཡར་རྒྱས་ཕྱིན་པ་དང་། གློག་བརྙན་དེ་རུ་བོད་ནས་བྱུང་བའི་ཁུངས་མེད་དང་། དོགས་གཞི་རང་བཞིན་ཅན་གྱི་གཏམ་རྒྱུད་ཅིག་བརྗོད་ཐབས་བྱས་ཡོད་དེ། ནགས་སྲུང་བའི་སྤྱི་གླིང་ཞིག་གི་ནང་དུ་གར་ཡོང་མི་ཤེས་པའི་མི་གསུམ་ཐོན་རྗེས། ནགས་སྲུང་བ་ཁོང་རང་ཇི་ཡིན་འདི་ཡིན་མེད་པར། རྔོན་ཇག་གི་འཇིགས་སུ་ཡེར་བའི་དོན་རྐྱེན་དུ་ཚུད་པའི་གཏམ་རྒྱུད་ཅིག་ཡིན་པ་རེད་འདུག
བོད་ཀྱི་ན་གཞོན་གློག་བརྙན་འཁྲབ་འཁྲིད་པ་འཇིགས་མེད་འཕྲིན་ལས་ལགས་ནི་རྒྱ་ནག་རྒྱལ་ས་པེ་ཅིན་གྱི་གློག་བརྙན་སློབ་གླིང་གི་འཁྲབ་ཁྲིད་སྡེ་ཚན་ནས་སློབ་མཐར་ཕྱིན་ཡོད་པ་དང་། དེ་སྔོན་ཁོང་གིས་སློབ་གྲྭའི་གུང་སེང་དང་བསྟུན་ནས་བོད་ཀྱི་གློག་བརྙན་སྒྱུ་རྩལ་བ་པདྨ་ཚེ་བརྟན་གྱི་དབུགས་ལྒང་དང་། རྒྱ་ནག་གི་གློག་བརྙན་འཁྲབ་ཁྲིད་པ་ཀོམ་ཧོའི་འཁྱག་པ་སོགས་ཀྱི་གློག་བརྙན་ཕབ་སྐྲུན་གྱི་ལས་གཞིར་མཉམ་ཞུགས་བྱས་མྱོང་ཡོད་པ་དང་། ཁོང་གིས་ ༢༠༡༧ ལོར་ཁོང་ཚོས་མཐོ་སྒང་ན་གློག་བརྙན་ལས་བཞིན་འདུག་ཅེས་པའི་དངོས་བྱུང་གློག་བརྙན་ཐུང་གྲས་ཤིག་ཕབ་སྒྲིག་བྱས་ཡོད་པ་དང་། ད་ལོར་ཕབ་སྒྲིག་བྱས་པའི་གཅིག་དང་བཞི་ཞེས་པ་དེ་ནི་ཁོང་གིས་བཟོ་སྐྲུན་བྱས་པའི་གློག་བརྙན་རིང་གྲས་ཀྱི་བརྩམས་ཆོས་ཐོག་མ་ཡིན་པ་དང་། གློག་བརྙན་དེ་ཟླ་ ༡༠ ཚེས་ ༣༠ ཉིན་གྱི་ཞོགས་པའི་ཆུ་ཚོད་ ༩ དང་ཕྱེད་ཀའི་ཐོག་ཏུ་གཟིགས་འབུལ་ཞུ་རྒྱུ་ཡིན་པ་རེད།
ཊོག་ཡོ་རྒྱལ་སྤྱིའི་གློག་བརྙན་དུས་སྟོན་ནི་ ༡༩༨༥ ལོར་ནས་མགོ་བཙུགས་ཡོད་ཅིང་། དེ་ནི་རྒྱལ་སྤྱིའི་གློག་བརྙན་བཟོ་སྐྲུན་མཐུན་ཚོགས་ཀྱི་ཆོག་ཡིག་ཐོབ་པའི་རྒྱལ་སྤྱིའི་ཚད་ལྡན་རང་བཞིན་ཅན་གྱི་གློག་བརྙན་དུས་སྟོན་ཞིག་ཡིན་པ་དང་། འདི་ལོའི་གློག་བརྙན་དུས་སྟོན་དེ་ནི་ཉི་ཧོང་གི་རྒྱལ་སའི་ཁུལ་དུ་འཚོག་འཆར་ཡོད་པ་རེད་འདུག
དཔལ་ལྡན།
