འདེམས་ཐོན་སྤྱི་འཐུས་རྣམ་པས་༧གོང་ས་མཆོག་ལ་རང་གི་བྱས་ཉེས་འགེབ་སྲུང་བྱེད་དགོས་པའི་རེ་བ་བཏོན་ཡོད།

ལཱ་མོ་ཚུལ་ཁྲིམས།

ཉེ་ཆར་འདེམས་ཐོན་སྤྱི་འཐུས་རྣམ་པས་ནང་མོལ་ཚོགས་འདུ་ཞིག་ཚོགས་རྗེས། ཐུན་མོང་གི་ཐག་གཅོད་ཅི་ཡང་བྱེད་མ་ཐུབ་པར། མཐའ་མཇུག་ཁོང་ཚོའི་བྱས་ཉེས་དེ་༧གོང་ས་མཆོག་ནས་ཐག་གཅོད་གནང་དགོས་པའི་སྙན་ཞུ་ཕུལ་ཡོད་འདུག ཁོང་ཚོའི་བྱས་ཉེས་ནི་ཚང་མས་ཤེས་གསལ་ལྟར། མདོ་སྟོད་སྤྱི་འཐུས་ཚོས་བཙན་བྱོལ་བོད་མིའི་བཅའ་ཁྲིམས་དོན་ཚན་  ༤༧ ལ་ངོས་ལེན་མ་བྱས་པ་དེ་ལས་བྱུང་བ་ཞིག་རེད། བཅའ་ཁྲིམས་ཀྱི་ནང་དུ། སྤྱི་འཐུས་ཀྱི་དམ་འབུལ་བྱེད་ཕྱོགས་སྐོར་གསལ་ཞིང་གསལ་བོར་འཁོད་ཡོད། བཅའ་ཁྲིམས་དེ་ནི་༧གོང་ས་མཆོག་དབུ་བཞུགས་ཐོག་གཏན་ལ་ཕབ་པའི་བཙན་བྱོལ་བོད་མིའི་བཅའ་ཁྲིམས་གཅིག་པོ་དེ་རེད། བཙན་བྱོལ་བོད་མིའི་སྒྲིག་འཛུགས་ཀྱི་མ་ལག་སྐོར་བ་འཁོར་བྱེད་ཀྱི་འཕྲུལ་འཁོར་གཅིག་པུའང་དེ་ལས་གཞན་ཡོད་པ་མ་རེད། བཅའ་ཁྲིམས་འདི་ནི། ༧གོང་ས་མཆོག་སྐུ་དངོས་ཀྱིས་གནང་བའི་དམངས་གཙོའི་གསོལ་རས་ཟེར་བ་དེ་རེད།

ཁོང་ཚོས༧གོང་ས་མཆོག་གིས་གཏན་ལ་ཕབ་པའི་བཅའ་ཁྲིམས་ལ་ཁས་ལེན་མི་བྱེད་པར་བཀའ་ལ་གྱེན་ལྡོག་བྱས་ཤིང་། བཀའ་ལ་མི་བརྩི་བར། ད་དུང་ཡང་བསྐྱར་འགྲེལ་བཤད་ཞིག་གནང་དགོས་ཟེར་ན། དེ་ནི་ཤེས་བཞིན་དུ་༧གོང་ས་མཆོག་ལ་ཁྱད་གསོད་དང་། རྐང་བཙུགས་ནས་བཙན་བྱོལ་བོད་མིའི་མང་གཙོ་རྡོག་རོལ་གཏོང་བཞིན་ཡོད་པ་མ་རེད་དམ།  ཁོང་ཚོའི་བྱ་སྤྱོད་འདི་ལ། ད་ནི་ཁྲིམས་ཀྱི་མདུན་སར་བཀའ་ཆད་གཏོང་རྒྱུ་ལས་ཐབས་གཞན་ཡོད་པར་མི་རིགས་བསམ།

འདེམས་ཐོན་སྤྱི་འཐུས་རྣམ་པས་ཐེངས་འདིར། བཅའ་ཁྲིམས་སུ་འཁོད་པའི་ ྋགོང་ས་ྋསྐྱབས་མགོན་ཆེན་པོ་མཆོག་གིས་དགོས་གལ་ནམ་གཟིགས་སྐབས་དང༌། འགོ་འཁྲིད་རྣམས་ཀྱིས་གསོལ་འདེབས་ནམ་ཞུས་ལ་བོད་མི་རིགས་དང༌། སྤྱི་ཚོགས། བསྟན་སྲིད་ཀྱི་གལ་ཆེའི་ལས་དོན་ཐོག་གྲོས་ཚོགས་དང་བཀའ་ཤག་གི་དགོངས་པའི་དཔྱད་གཞིར་དགོངས་འཆར་གནང་རྒྱུ། ཞེས་པའི་ཁྲིམས་ལུགས་དེ་རྒྱུ་མཚན་དུ་དྲངས་ཏེ། ༧གོང་ས་མཆོག་ལ་ཁོང་ཚོའི་བྱས་ཉེས་ཐག་འདི་གཅོད་གནང་དགོས་རྒྱུའི་འགན་དབང་ཡོད་པར་བཤད་ཡོད།

བཅའ་ཁྲིམས་སུ་འཁོད་པའི་མགོན་སྐྱབས་དང་མཚོན་རྟགས་འདི་ནི། ༧གོང་ས་མཆོག་གི་རང་ཆས་སུ་ཡོད་པའི་སྐུ་དབང་དང་། བོད་མིའི་ཆིག་སྒྲིལ་མདུན་སྐྱོད་བྱེད་པའི་འཕྲུལ་ཆས་ཀྱི་སྒུལ་ཤུགས་ཡིན་པ་ལས། ཐེངས་འདིའི་སྤྱི་འཐུས་ཁག་ཅིག་གིས་ཤེས་བཞིན་དུ། རྐང་བཙུགས་ནས་བཙན་བྱོལ་བོད་མིའི་སྒྲིག་འཛུགས་གཏོར་བཅོམ་དང་། བཅའ་ཁྲིམས་རིན་པོ་ཆེ་ལ་རྡོག་རོལ། ཆོལ་གསུམ་རྡོག་རྩ་གཅིག་སྒྲིལ་རྩ་གཏོར་གཏོང་བཞིན་ཡོད་པའི་བྱས་ཉེས་ཀྱི་བདུད་ཀྱི་གཡབ་མོ་ལ། རྒྱབ་རོགས་དང་སྲུང་སྐྱོབ་བྱེད་སྤྱད་ཀྱི་ཁྲིམས་ཡིག་ཅིག་རྩ་བ་ནས་མ་རེད།

མ་གཞི་ནས། ད་ལྟའི་འདེམས་ཐོན་སྤྱི་འཐུས་འདི་ཚོ། ད་དུང་འདེམས་ཐོན་སྤྱི་འཐུས་ཀྱི་གནས་སྐབས་རང་ཡིན་པས། ཁོང་ཚོ་ལ་ ༧གོང་ས་མཆོག་གི་སྐུ་དབང་གི་ཁྲིམས་ལུགས་འདི་ལག་བསྟར་བྱེད་ཆོག་པའི་དབང་ཆ་ཡོད་མི་སྲིད། ཁྲིམས་ལུགས་སུ་འགོ་འཁྲིད་རྣམས་ཀྱིས་གསོལ་འདེབས་ནམ་ཞུས་ལ་ཞེས་གསལ་བོར་གསུངས་ཡོད་པས་ཕྱིར་རོ། །

དེ་བཞིན་དུ། ཁོང་ཚོ་ནི། བཙན་བྱོལ་བོད་མིའི་བཅའ་ཁྲིམས་རྡོག་རོལ་གཏོང་ཞིང་།  བོད་མིའི་སྒྲིག་འཛུགས་ལ་འགོག་རྐྱེན་ཚབས་ཆེན་བཟོ་མཁན་གྱི་ཉེས་ཅན་པའི་གཏེ་དཔོན་རྐྱང་རྐྱང་ཡིན་པས། ཁོང་ཚོའི་བྱས་ཉེས་འདི། བོད་མི་རིགས་དང༌། སྤྱི་ཚོགས། བསྟན་སྲིད་ཀྱི་གལ་ཆེའི་ལས་དོན་ཞིག་ཏུ་ཇི་ལྟར་ཆགས། ༧གོང་ས་མཆོག་ནས་བྱས་ཉེས་འདིར་ཐག་གཅོད་དང་དགོངས་འཆར་གནང་དགོས་རྒྱུའི་རྒྱུ་མཚན་ཅི་ཡང་མཐོང་མ་སོང་། འདི་ནི་དངོས་ནས་བཤད་ན་༧གོང་ས་མཆོག་ལ་ཁོང་ཚོའི་བྱས་ཉེས་འགེབས་སྲུང་དང་harboring criminals དགོས་པའི་རེ་བ་བཏོན་པ་དེ་རེད། འདི་ནི་ང་ཚོའི་བོད་པའི་ཁ་རྒྱུན་དུ་མགོ་ལེན་བསྟེན་བསྐྱིལ། རྐུན་མར་དཔའ་དར། སྤྱང་ཀི་ཚེ་ཐར་གཏོང་དགོས་པ་ཞེས་པ་དེ་ལས་ཅི་ཡང་མིན།

མདོ་དབུས་གཉིས་ཀྱི་འདེམས་ཐོན་སྤྱི་འཐུས་རྣམས་ལ་མཚོན་ན་བཅའ་ཁྲིམས་ཨང་ ༤༧ ལྟར་དམ་འབུལ་ལེགས་གྲུབ་བྱུང་ཡོད་པས། ཁྱེད་ཚོས་རང་ཉིད་ཁྲིམས་མཐུན་ཡིན་པའི་ཐོབ་དབང་སྲུང་སྐྱོབ་བྱེད་རྒྱུ་ལས། ཉེས་ཅན་གཏེ་དཔོན་མདོ་སྟོད་སྤྱི་འཐུས་རྣམས་ཀྱི་རྗེས་སུ་རི་བོང་བཅལ་འདྲོགས་བྱེད་དགོས་དོན་མི་འདུག་སྙམ།

ཁོང་ཚོས་འདི་ལྟར་བཅའ་ཁྲིམས་ཀྱི་དོན་སྙིང་ལོག་པར་སྤྱད་པ་དང་། ༧གོང་ས་མཆོག་ལ་ཁྱད་གསོད་དང་། བཙན་བྱོལ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་ལ་འགོག་རྐྱེན་བཟོ་བཞིན་ཡོད་པ་འདི་ལ། ཉེས་ཁྲིམས་ཀྱི་རལ་གྲི་དམར་བོས་ཁྲིམས་ཀྱི་མདུན་སར་ཐག་གཅོད་བྱེད་རྒྱུའི་ཆ་རྐྱེན་ཡོངས་སུ་ཚང་ཞིང་། ད་ནི་བོད་པའི་ཁ་རྒྱུན་ལ། གོ་བ་མེད་པའི་གླང་རྒན་ལ། རྒྱལ་བའི་བཀའ་ལས་དབྱུག་པ་བཙན། ཞེས་པའི་དཔེ་ལྟར། ཉེས་ཅན་གཏེ་དཔོན་འདི་དག་ཁྲིམས་ཀྱི་མདུན་སར་བསྐྱལ་དགོས་པའི་དུས་ལ་བབ་འདུག་པ་ལས། ཚོགས་འདུ་དང་གྲོས་མོལ་ཡང་ཡང་བྱེད་པ་དང་། འགྲེལ་བཤད་ཡང་ཡང་རྒྱག་རྒྱུའི་ཚོད་ཅིག་རེད་མི་འདུག

ཁོང་ཚོའི་བྱས་ཉེས་འདི་ནི་ཁྲིམས་ལུགས་སུ། མང་གཙོ་ལ་འགོག་རྐྱེན་(Anti-democratic)བཟོས་པ་དང་སྲིད་གཞུང་མགོ་རྟིང་སློག་ (Subverting the government)  པ་སོགས་ཀྱི་ཁྲིམས་ཆད་གཅོད་ཆོག་པའི་ཆ་རྐྱེན་ཡོངས་སུ་གྲུབ་ཡོད།

༡། མང་གཙོ་ལ་འགོག་རྐྱེན་བཟོ་བ་ཞེས་པ་ནི་ཡོངས་ཁྱབ་ཏུ་ opposed to the principles or practice of democracyanti མང་གཙོ་དང་མང་གཙོའི་རྩ་དོན་ལག་བསྟར་བྱེད་པ་ལ་འགོག་རྐྱེན་བཟོ་བ་ཞིག་ལ་བརྗོད་ཅིང་། ད་ལྟ་ཁོང་ཚོས་བཙན་བྱོལ་བོད་མིའི་སྤྱི་འཐུས་ལྷན་ཚོགས་ཚོགས་སུ་འཇུག་བཞིན་མེད་པ་འདི་དང་། བཙན་བྱོལ་བོད་མིའི་བཅའ་ཁྲིམས་ལ་ངོས་ལེན་བྱེད་བཞིན་མེད་པ་འདི་དག མང་གཙོའི་མདུན་སྐྱོད་ལ་ཐད་ཀར་འགོག་རྐྱེན་བཟོ་བཞིན་ཡོད་པ་རེད།

༢། སྲིད་གཞུང་མགོ་རྟིང་སློག་པ་ནི་ (Subverting the government) རྩ་འཛུགས་དང་འཆར་གཞི་ཡོད་པའི་སྒོ་ནས་རྒྱལ་ཁབ་ཀྱི་སྲིད་དབང་དང་ལམ་ལུགས་མགོ་རྟིང་སློག་པར་བྱེད་པ་འདི་ལ་གོ་བ་དང་། ཐེངས་འདིར་ཆོལ་ཁ་གཅིག་སྟེ། མདོ་སྟོད་ཆོལ་ཁ་གཅིག་པུས། རྩ་འཛུགས་དང་འཆར་གཞི་ཡོད་པའི་སྒོ་ནས་བཙན་བྱོལ་བོད་མིའི་སྒྲིག་འཛུགས་ལ་འགོག་རྐྱེན་བཟོ་བཞིན་པ་འདི་སྲིད་གཞུང་མགོ་རྟིང་སློག་པའི་ཁྲིམས་ཆད་དུ་ཐག་གཅོད་བྱ་ཆོག་པའི་ཆ་རྐྱེན་ཡོངས་སུ་ལྡན་ཡོད།

ཐེངས་འདིའི་ཁོང་ཚོའི་བྱེད་སྟངས་འདི་ནི།  ༧གོང་ས་མཆོག་གི་སྐུ་དབང་ལ་ཁྱད་གསོད་དང་། བཙན་བྱོལ་བོད་མིའི་བཅའ་ཁྲིམས་ལ་རྡོག་རོལ། མང་གཙོ་ལ་འགོག་རྐྱེན། བོད་མིའི་སྒྲིག་འཛུགས་མགོ་རྟིང་སློག་པ། བོད་མིའི་རྡོག་རྩ་གཅིག་སྒྲིལ་ལ་གནོད་སྐྱོན་ཚབས་ཆེན་གཏོང་བཞིན་ཡོད་པ། བོད་མི་མང་སྤྱི་འཐུས་ལྷན་ཚོགས་ཚོགས་སུ་འཇུག་བཞིན་མེད་པ་འདི་དག་ལས་བདེན་དཔང་ར་སྤྲོད་གསལ་བོ་བྱེད་ཐུབ། ད་ནི་འདེམས་ཐོན་མདོ་སྟོད་སྤྱི་འཐུས་གཏེ་དཔོན་ཉེས་ཅན་པ་འདི་དག་ལ། རྒྱལ་ཁྲིམས་གསེར་གྱི་གཉའ་ཤིང་སྐོན་ཞིང་། ཆོས་ཁྲིམས་དར་གྱི་མདུད་པས་བསྡམ། ཡུལ་ཁྲིམས་ལྕགས་ཀྱི་གོང་བུའི་ནང་འཇུག་རྒྱུའི་དུས་ལ་བབ་ཞིང་། ཁྲིམས་སུ་མཐུན་པ་ལས་ཐབས་གཞན་ཡོད་པར་མི་སེམས།

མཆན། གོང་གི་རྩོམ་ཡིག་འདི་རྩོམ་པ་པོ་རང་གི་བསམ་ཚུལ་ཡིན་པ་ལས་འདི་གའི་གསར་ཁང་གི་བསམ་ཚུལ་ཡིན་པས་མ་ཁྱབ།