དེ་རིང་ཉིན་རྒྱབ་བོད་མི་མང་སྤྱི་འཐུས་རྣམ་པས་བཅའ་ཁྲིམས་ཀྱི་དགོངས་དོན་གཞིར་བཟུང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་གནང་སོང་།
དེ་རིང་ཉིན་རྒྱབ་ཆུ་ཚོད་ ༢ སྟེང་སྤྱི་འཐུས་རྒྱུན་ལས་ཁང་དུ་བཙན་བྱོལ་བོད་མིའི་བཅའ་ཁྲིམས་དོན་ཚན་ ༤༥ བའི་དགོངས་དོན་གཞིར་བཟུང་། སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱི་ཚོགས་གཙོ་དང་ཚོགས་གཞོན་གྱི་གསང་བའི་འོས་བསྡུ་བྱས་ཏེ། ཚོགས་གཙོའི་འོས་དམིགས་སུ་ཆོས་བརྒྱུད་སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་དང་དབུས་གཙང་སྤྱི་འཐུས་སྒྲོལ་མ་ཚེ་རིང་ལགས་རྣམ་གཉིས་བར་མང་མོས་འོས་བསྡུ་བྱས་སྐབས། སྤྱི་འཐུས་སྒྲོལ་མ་ཚེ་རིང་ལགས་སུ་འོས་གྲངས་༢༢ ཐོབ་སོང་བ་དང་། སྤྱི་འཐུས་མཁན་པོ་བསོད་ནམས་བསྟན་འཕེལ་ལགས་སུ་འོས་གྲངས་ ༢༣ ཐོབ་སྟེ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོར་འདེམས་ཐོན་བྱུང་སོང་།
དེ་རྗེས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་འོས་འདེམས་ཁྲོད། སྤྱི་འཐུས་སྒྲོལ་མ་ཚེ་རིང་ལགས་དང་སྤྱི་འཐུས་དབུ་དཀར་ཚང་གཡུ་སྒྲོན་ལགས། སྤྱི་འཐུས་ལྷ་རྒྱལ་རི་རྣམ་རྒྱལ་སྒྲོལ་དཀར་ལགས་བཅས་ཡོད་པ་ལས། སྤྱི་འཐུས་སྒྲོལ་མ་ཚེ་རིང་ལགས་སུ་འོས་གྲངས་ ༢༣ དང་རྣམ་རྒྱལ་སྒྲོལ་དཀར་ལགས་སུ་འོས་ ༡༨ ། དེ་བཞིན་དབུ་དཀར་ཚང་གཡུ་སྒྲོན་ལགས་སུ་འོས་གྲངས་ ༢ དང་རྩིས་མེད་དུ་ཕྱིན་པའི་འོས་ ༢ བཅས། སྤྱི་འཐུས་སྒྲོལ་མ་ཚེ་རིང་ལགས་སུ་མང་མོས་ཐོག་ནས་སྤྱི་འཐུས་ལྷན་ཚོགས་ཀྱི་ཚོགས་གཞོན་ལ་འདེམས་ཐོན་བྱུང་སོང་།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་སྐོར་འཁོད་པའི་བཙན་བྱོལ་བོད་མིའི་བཅའ་ཁྲིམས་དོན་ ༤༥ བའི་ནང་། ༡ སྤྱི་འཐུས་སྐབས་སོ་སོའི་ཚོགས་ཐེངས་དང་པོའི་ཐོག་སྤྱི་འཐུས་རང་ཁོངས་ནས་ཚོགས་གཙོ་གཅིག་དང་། ཚོགས་གཙོ་གཞོན་པ་གཅིག་སྒྲིག་གཞི་ལྟར་གསང་བའི་ཐོག་ནས་འོས་བསྡུ་བྱེད་དགོས། ༢ ཚོགས་གཙོ་དང་། ཚོགས་གཙོ་གཞོན་པ་འོས་བསྡུ་ཟིན་འཕྲལ་ལས་དོན་དུ་མ་ཞུགས་གོང་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་མདུན་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་ཞུ་དགོས། ༣ ཚོགས་གཙོ་དང་། ཚོགས་གཙོ་གཞོན་པ་སུ་རུང་སྤྱི་འཐུས་ནས་བུད་པའམ། ཡང་ན་ཚོགས་གཙོའམ། ཚོགས་གཙོ་གཞོན་པ་འཕོ་འགྱུར་དགོས་པའི་སྤྱི་འཐུས་རྩ་འབོར་གསུམ་ཆ་གཉིས་ཡན་གྱིས་མོས་མཐུན་གྲོས་ཆོད་བྱུང་ན། དེ་ཉིན་ནས་རང་གི་ལས་འཁུར་བཤོལ་དགོས། ༤ ལྷན་ཚོགས་སུ་ཚོགས་གཙོ་དང་། ཚོགས་གཙོ་གཞོན་པ་སུ་རུང་འཕོ་འགྱུར་བྱེད་དགོས་སྐོར་གྲོས་བསྡུར་བྱུང་བ་ཡིན་ན་དེའི་རིང་རང་ཉིད་ནས་གཙོ་སྐྱོང་བྱེད་མི་ཆོག ༥ དགོངས་ཞུས་སམ་འཕོ་འགྱུར། དུས་ཆོས་སུ་གྱུར་པ་བཅས་ཀྱིས་ཚོགས་གཙོ་དང་། ཚོགས་གཙོ་གཞོན་པའི་གོ་ཡུལ་སྟོང་པ་ནམ་བྱུང་ལ་གང་མྱུར་ཚབ་གསར་སྒྲིག་གཞི་ལྟར་འོས་བསྡུ་བྱེད་དགོས། ཞེས་འཁོད་འདུག
གསར་འགོད་པ། སྐལ་བཟང་སྦྱིན་པ།
མགོ་རིལ་བོང་མགོ་བསོད་ནམས་བསྟན་འཕེལ་ནི་ནང་ཆོས་ལ་རྨོངས་བའི་གླང་མགོ་དམར་པོ་དང་། གྲོས་ཚོགས་ནང་དུ་གླང་མགོ་དམར་པོ་འདི་རིགས་མང་དྲག་ནས་སྤྱི་ཚོགས་ནང་དུ་གླེང་སློང་དཀའ་རྙོག་མུ་མཐུད་དུ་ཡོང་གི་རེད།