བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་འདས་པའི་བདུན་ཕྲག་གཅིག་ནང་བོད་མི་ ༥༥ ལ་ཏོག་དབྱིབས་ནད་ཡམས་འགོས་ཡོད་པ་དང་བོད་མི་ ༡ འདས་གྲོངས་སུ་གྱུར་ཡོད་སྐོར་གསལ་བསྒྲགས་གནང་འདུག
དེ་རིང་ཉིན་རྒྱབ་ཆུ་ཚོད་ ༤ ཙམ་གྱི་སྟེང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་ ༨༡ སྤེལ་བ་ལྟར་ན། འདས་པའི་བདུན་གཅིག་ནང་རྒྱ་གར་གྱི་ས་གནས་ ༡༣ དང་བལ་ཡུལ་གྱི་ས་གནས་ ༡ གི་ནང་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༡༥༦ དང་ཚོགས་སྡེའི་ཟུར་བཀག་ཁང་དུ་མི་ ༢༥༦ བཅས་ཁྱོན་བསྡོམས་མི་གྲངས་ ༤༡༢ ཟུར་བཀག་འོག་ཡོད་པ་དང་། རྒྱ་གར་ནང་ཏོག་དབྱིབས་ནད་གཞི་གསར་དུ་འཕོག་མཁན་བོད་མི་ ༥༥ བྱུང་བའི་ཁྲོད་ནས་ལོ་ན་མཐོ་ཤོས་ ༩༣ ཡིན་འདུག་ལ། བོད་མི་ ༡ རྐྱེན་འདས་སུ་ཕྱིན་ཡོད་འདུག
གསལ་བསྒྲགས་སྐབས་ཕྱི་ལུགས་སྨན་པ་བརྩོན་འགྲུས་ལགས་ཀྱིས། ཉེ་ལམ་ཏོག་དབྱིབས་རིམས་ནད་ཀྱི་གནས་ཚུལ་ཇེ་ལེགས་ཕྱིན་ཡོད་ཀྱང་། ས་གནས་ཁག་གི་ཏོག་དབྱིབས་ནད་ཡམས་ཀྱི་ཚོགས་ཆུང་ཚོས་ནད་ཡམས་འགོས་ཡོད་མེད་ཀྱི་བརྟག་དཔྱད་མང་ཙམ་བྱེད་ཚེ། ཏོག་དབྱིབས་ཁྱབ་གདལ་མི་འགྲོ་བའི་ཁེ་ཕན་ཡོད་པ་དང་། བོད་མི་མང་པོ་ཞིག་དགུན་ཚོང་ལ་སྐྱོད་མུས་ཡིན་སྟབས། ཚང་མས་རང་འགན་རང་སྲུང་གིས་ནད་ཡམས་མི་འགོས་པའི་དོགས་ཟོན་བྱ་དགོས་པ་དང་། དེ་བཞིན་ཉེ་ལམ་གནམ་གཤིས་འགྱུར་ལྡོག་འགྲོ་མུས་ཡིན་པའི་ཁར། ཆམ་ནད་སོགས་འགོས་སླ་བས་ཚང་མས་སྤྱི་ཚོགས་རྒྱང་སྐྱེད་ཀྱིས། ལག་པ་མང་ཙམ་བཀྲུ་བ་དང་། ཁ་རས་སོགས་གྱོན་གལ་ཆེན་པོ་ཡིན་པ་རེད། རྒྱ་གར་ནང་དུ་བྱིས་པ་ལོ་གཉིས་ཡན་ལ་ཛ་དྲག་གི་ཏོག་དབྱིབས་སྔོན་འགོག་སྨན་ཁབ་བརྒྱག་རྒྱུའི་ཆོག་མཆན་ཚང་མ་ཐོབ་མེད་ཀྱང་། མགྱོགས་པོ་གྲ་སྒྲིག་བྱེད་མུས་ཡིན་པས་རིམ་པས་ཆོག་མཆན་ཐོབ་ཚེ་འཕྲོད་བསྟེན་ལས་ཁུངས་ཀྱིས་ལམ་སྟོན་བྱ་རྒྱུ་ཡིན་པ་དང་། སློབ་གྲྭ་ཁག་དང་དགོན་སྡེ་ཁག་གིས་བྱིས་པ་རྣམས་ཀྱི་མིང་ཐོ་བསྡུ་རུབ་ཀྱིས། འཕྲོད་བསྟེན་ལས་ཁུངས་ལ་གང་མགྱོགས་དབུལ་ཐུབ་ཚེ། འཕྲོད་བསྟེན་ལས་ཁུངས་ཀྱིས་སྨན་ཁབ་སོགས་གྲ་སྒྲིག་བྱེད་བདེ་བར་ཡོད་སྐོར་གྱི་ལམ་སྟོན་གནང་བྱུང་།
ཡང་ཕྱི་ལུགས་སྨན་པ་བསྟན་འཛིན་ཀུན་བཟང་ལགས་ཀྱིས། ཏོག་དབྱིབས་ནད་ཡམས་དེ་བདུན་ཕྲག་སྔ་མ་ལས་བཟང་དུ་ཕྱིན་ཡོད་ཀྱང་། ཏོག་དབྱིབས་ནད་རླབས་གཉིས་པའི་སྐབས་སུ་ནད་ཡམས་ཁྱབ་གདལ་ཤུགས་ཆེན་ཕྱིན་ཡོད་པ་ལྟར། ནད་རླབས་གསུམ་པ་ཁྱབ་གདལ་མི་འགྲོ་སླད་ཚང་མས་དོགས་ཟོན་ཆེན་པོ་བགྱིས་ཏེ། ནད་ཡམས་ལས་གྲོལ་ཐབས་བྱ་དགོས་པ་དང་། ཆེད་མཁས་མི་སྣ་མང་པོ་ཞིག་གིས་མི་འགྱངས་བར་རྒྱ་གར་ནང་དུས་ཆེན་མང་པོ་ཞིག་བསླེབ་གྲབས་ཡོད་སྟབས། སྐབས་དེར་ནད་ཡམས་ཁྱབ་གདལ་འགྲོ་རྒྱུའི་ཚོད་དཔག་དང་སེམས་འཚབ་ཆེན་པོ་བྱེད་མུས་ཡིན་པ་ལྟར། འཕྲོད་བསྟེན་ལས་ཁུངས་ཀྱིས་ལམ་སྟོན་རབ་དང་རིམ་པ་གནང་བ་བཞིན། ཚང་མས་རང་རང་གི་འཕྲོད་བསྟེན་སོགས་ལ་དོ་སྣང་དང་དོགས་གཟབ་བྱ་དགོས་པ་དང་། ཉེ་ལམ་སྤྱི་ཚོགས་བྲེལ་ཟིང་གི་རྐྱེན་གྱིས་མི་མང་པོ་ཞིག་ལ་སེམས་ཁམས་འཕྲོད་བསྟེན་གྱི་དཀའ་ངལ་ཕྲད་དང་འཕྲད་མུས་ཡིན་པ་ལྟར། སེམས་ཁམས་འཕྲོད་བསྟེན་སོགས་ལ་ཕན་རླབས་ཡོང་ཆེད། སེམས་ཁམས་བློ་སྦྱོང་བྱ་དགོས་པ་དང་། ༧གོང་ས་མཆོག་གཙོས་བོད་ཀྱི་བླ་ཆེན་ཁག་གི་བཀའ་སློབ་མཉན་ཚེ། ཕན་ཐོགས་ཆེན་པོ་ཡོད་སྐོར་དང་དགུན་ཚོང་ལ་སྐྱོད་མཁན་ཚོས་རྒན་འཁོགས་ནད་པ་དང་བྱིས་པ་རྣམས་ཁྲོམ་སར་མི་འཁྲིད་རྒྱུའི་ལམ་སྟོན་སོགས་གནང་སོང་།
ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་བར་རྒྱ་གར་ནང་ཏོག་དབྱིབས་འགོག་ཁབ་ཐེངས་གཉིས་བརྒྱབ་ཟིན་པའི་མི་གྲངས་ ༣༩༩༨༤ དང་ཐེངས་དང་པོ་བརྒྱབ་ཟིན་པའི་གྲངས་འབོར་ཁྱོན་ ༡༡༤༦༧ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པ་མི་ ༦༦༩༧ དང་འགོག་ཁབ་ཚར་དང་པོ་ཐོབ་མཁན་མི་གྲངས་ ༥༡ ཆགས་ཡོད་འདུག
ཕྱི་ལོ་ ༢༠༡༩ ལོའི་ལོ་མཇུག་ནས་བཟུང་རྒྱ་ནག་ཝུའུ་ཧན་གྱི་ཏོག་དབྱིབས་གཉན་རིམས་དེ་འཛམ་གླིང་གང་སར་མཆེད་པའི་མགོ་བརྩམས་ཡོད་པ་དང་། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་ ༦༦༦༨ བྱུང་བའི་ཁྲོད་དྲག་སྐྱེད་ཟིན་པ་ ༦༤༡༧ དང་། འདས་གྲོངས་སུ་ཕྱིན་པ་ ༡༥༢། ད་ལྟ་ཏོག་ནད་ཀྱིས་མནར་བཞིན་པ་བོད་མི་ ༩༩ ཡོད་འདུག
གསར་འགོད་པ། དཔལ་ལྡན།
