ཧི་མ་ཅལ་མངའ་སྡེའི་བློན་ཆེན་ཟུར་པ་ཞིག་སྐུ་གྲོངས།

མདང་དགོང་རྒྱ་གར་གྱི་རྒྱལ་ས་ལྡི་ལིའི་ཨེམ་སི་(AIIMS)སྨན་ཁང་དུ་བོད་དོན་རྒྱབ་སྐྱོར་བ་ཧི་མ་ཅལ་མངའ་སྡེའི་ཟ་འབྲུ་དང་སྐྱེལ་འདྲེན་བློན་ཆེན་ཟུར་པ་གུ་རུ་མུག་སིང་བྷ་ལི་མཆོག་དགུང་གྲངས་ ༦༧ ཐོག་སྙུང་གཞིའི་རྐྱེན་གྱིས་སྐུ་གྲོངས་ཡོད་འདུག

དེ་རིང་ཞོགས་པར་དམ་པ་ཁོང་གི་བུ་རཱ་ཧོ་བྷིར་སིང་བྷ་ལི་(Raghubir Singh Bali)ལགས་ཀྱིས་སྤྱི་ཚོགས་དྲ་ལམ་ངོ་དེབ་བརྒྱུད་ཕ་དམ་པ་སྐུ་གྲོངས་བའི་ཡིད་སྐྱོའི་གནས་ཚུལ་ཡོངས་བསྒྲགས་གནང་བ་དང་འབྲེལ། དམ་པ་ཁོང་གིས་རྒྱུན་དུ་ཁོང་འཇིག་རྟེན་འདིར་གནས་ཡོད་མེད་གང་ཡིན་ཡང་ཁོང་མི་མང་གི་སེམས་སུ་ནམ་ཡང་གནས་ཐུབ་རྒྱུ་ཡིན་སྐོར་གསུང་གི་ཡོད་པ་ལྟར། ཁོང་འཇིག་རྟེན་འདིར་བཞུགས་མེད་ནའང་ཁོང་གི་དགོངས་འཆར་དང་ལམ་སྟོན་རྣམས་དུས་ནམ་ཡང་ང་ཚོ་དང་མཉམ་དུ་ཡོད་སྐོར་བརྗོད་འདུག

བློན་ཆེན་དམ་པ་གུ་རུ་མུག་སིང་བྷ་ལི་མཆོག་ནི་༧གོང་ས་མཆོག་གི་དབུས་པའི་བོད་མིའི་སྒྲིག་འཛུགས་དང་བཙན་བྱོལ་བོད་མི་རྣམས་ལ་ཐུགས་ཐག་ཉེ་བོའི་ཐོག་ནས་རྒྱབ་སྐྱོར་དང་ཐུགས་འཁུར་གནང་མཁན་ཞིག་ཡིན་འདུག ཕྱི་ལོ་ ༢༠༡༤ ལོ་ནི་བཀའ་ཤག་གིས་༧གོང་ས་རྒྱལ་བ་རིན་པོ་ཆེ་མཆོག་ལ་བཀའ་དྲིན་རྗེས་དྲན་ཞུ་བའི་ལོར་སྲུང་གཙི་ཞུས་ཡོད་པ་ལྟར། ལོ་དེའི་འཁྲུངས་སྐར་གྱི་གཞུང་འབྲེལ་མཛད་སྒོའི་ཐོག་བློན་ཆེན་དམ་པ་ཁོང་སྐུ་མགྲོན་གཙོ་བོར་ཆེད་བཅར་གནང་སྟེ། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གི་དབུས་མངའ་སྡེའི་གཞུང་དམངས་གཉིས་ནས་༸གོང་ས་མཆོག་གི་སྐུ་ཚེ་ཡུན་རིང་བརྟན་པའི་སྨོན་ལམ་འདེབས་བཞིན་ཡོད་ལ། མངའ་སྡེའི་མི་མང་གིས་༸གོང་ས་མཆོག་ནམ་ཡང་མངའ་སྡེ་འདིའི་ནང་བཞུགས་པར་གསོལ་འདེབས་ཞུ་ཡི་ཡོད་སྐོར་དང་། ཕྱི་ལོ་ ༢༠༡༥ ་ཟླ་ ༦ ཚེས་ ༢༡ ཉིན་ནི་༸གོང་ས་མཆོག་བོད་ལུགས་ཀྱི་དགུང་གྲངས་ ༨༠ ཕེབས་པའི་དགའ་སྟོན་གྱི་ཉིན་མོ་ཡིན་སྟབས། ཧི་མ་ཅལ་མི་མང་གིས་ཉིན་མོ་གལ་ཆེན་དེར་རེ་སྒུག་བྱེད་ཀྱིན་ཡོད་སྐོར་དང་། སྐུའི་འཁྲུངས་སྐར་གྱི་ཉིན་མོ་དེ་དང་བསྟུན་ཧི་མ་ཅལ་མངའ་སྡེ་གཞུང་གིས་རྒྱ་གར་རྒྱལ་ཡོངས་ཟས་རིགས་བདེ་འཇགས་ཀྱི་སྲིད་ཇུས་(The National Food Security Act)ཞེས་པའི་ཟས་རིགས་གཟིགས་སྐྱོང་(Ration)འོག ཧི་མ་ཅལ་ནང་གནས་སྡོད་བོད་མི་ཚང་མས་གྲོ་ཀེ་ལོ་གཅིག་ལ་ཧིན་སྒོར་ ༢ དང་། འབྲས་ཀེ་ལོ་གཅིག་ལ་ཧིན་སྒོར་ ༣ བྱས་ཏེ་ཉོ་ཆོག་པའི་ཐོབ་ཐང་གནང་བ་དང་། དེ་བཞིན་དྷ་ཤོད་ནས་མེག་ལོར་བར་གྱི་གཞུང་ལམ་བཟོ་བར་ཧིན་སྒོར་འབུམ་ ༣༠༠ གཏོང་འཆར་ཡོད་ལུགས། བློན་ཆེན་མཆོག་སྐུ་སྒེར་ནས་བོད་ཁྱིམ་སློབ་གྲྭ་ཁག་ལ་ཧིན་སྒོར་འབུམ་ ༡ ཞལ་འདེབས་སུ་གནང་རྒྱུའི་ཞལ་བཞེས་གནང་བ་སོགས་བཙན་བྱོལ་བོད་མི་རྣམས་ལ་ཐུགས་འཁུར་ཆེ་བཞེས་གནང་མཁན་ཞིག་ཡིན་འདུག

Mr G S Bali, Transport, Food, Civil Supplies & Consumer Affairs and Technical Education Minister in Himachal Pradesh government presents a bouquet from the Chief Minister to Sikyong Dr. Lobsang Sangay as a tribute to His Holiness the Dalai Lama on his 79th birthday celebrations in Dharamsala, India, 6 July 2014/DIIR Photo/Tenzin Phende

དམ་པ་ཁོང་ནི་ཕྱི་ལོ་ ༡༩༥༤ ཟླ་ ༧ ཚེས་ ༢༧ ཉིན་ཧི་མ་ཅལ་ཀང་ར་རྫོང་ཁོངས་སུ་འཁྲུངས་ཤིང་། ཕྱི་ལོ་ ༡༩༩༨ ནས་༢༠༡༢ བར་དུ་ཧི་མ་ཅལ་མངའ་སྡེའི་གྲོས་ཚོགས་འཐུས་མིར་འདེམས་ཐོན་བྱུང་ཡོད་པ་མ་ཟད། ཕྱི་ལོ་ ༢༠༠༣ ལོར་ཧི་མ་ཅལ་མངའ་སྡེའི་ཟ་འབྲུ་དང་སྐྱེལ་འདྲེན་བློན་ཆེན་དུ་བསྐོ་བཞག་བྱུང་ཡོད་འདུག དེ་བཞིན་ཁོང་ནི་ཧི་མ་ཅལ་གྱི་སྤྱི་ཚོགས་ཡར་རྒྱས་ལ་དམིགས་པའི་(Himachal Nagrik Sudhar Sabha)ཚོགས་པ་གསར་འཛུགས་གནང་མཁན་དང་། ཧི་མ་ཅལ་སྤྱི་ཚོགས་མཉམ་འབྲེལ་མཐུན་ཚོགས་(Himachal Social Bodies Federation)ཀྱི་ཚོགས་གཙོ་སོགས་གནང་མྱོང་ཡོད་འདུག