བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཨ་རིའི་རྒྱལ་ཡོངས་སིལ་སྤོལ་རྩེད་འགྲན་པ་གྲགས་ཅན་ཨེ་ནེ་སི་ཀན་ཊིར་ལགས་ནས་དྲང་བདེན་ལ་རྒྱབ་སྐྱོར་གནང་བར་བོད་མི་ཡོངས་ཀྱི་ཚབ་གནང་སྟེ་ཐུགས་རྗེ་ཆེ་ཞུས་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་སིལ་སྤོལ་རྩེད་འགྲན་པ་གྲགས་ཅན་ཨེ་ནེ་སི་ཀན་ཊིར་(Enes Kanter)ལགས་ལ་ཕྱི་ཟླ་ ༡༠ ཚེས་ ༢༩ ཉིན་བསྐུར་གནང་བའི་གསུང་འཕྲིན་ནང་དུ། ཁྱེད་ཀྱིས་དྲང་བདེན་ལ་རྒྱབ་སྐྱོར་གནང་བ་དེར་བཀའ་དྲིན་ཆེ་ཞུ་རྒྱུ་དང་། དེས་ང་ཚོར་དགའ་སྤོབས་ཆེན་པོ་སྦྱིན་བྱུང་། ཁྱེད་ཀྱིས་བསྒྲགས་པའི་འབོད་སྒྲ་དེས་ཁྱེད་ཀྱིས་དྲང་བདེན་ལ་ཇི་ཙམ་རྒྱབ་སྐྱོར་གནང་གི་ཡོད་པ་མཚོན་ཐུབ། ཕྱི་ལོ་ ༡༩༥༩ ལོར་རྒྱ་ནག་གིས་ཁྲིམས་འགལ་གྱི་ཐོག་ནས་བོད་ལ་བཙན་འཛུལ་བྱས་ཏེ། བོད་མི་རྣམས་ཀྱི་གཞི་རྩའི་འགྲོ་བ་མིའི་རང་དབང་སོགས་བཙན་གྱིས་འཕྲོག་ཡོད་པ་དང་། བོད་མི་རྣམས་ངལ་རྩོལ་ར་བ་སོགས་སུ་བཅུག་སྟེ་ཆབ་སྲིད་སློབ་གསོ་སྤྲད་དེ་བསམ་བློ་བསྒྱུར་བཅོས་བྱེད་ཐབས་སོགས་བྱེད་བཞིན་ཡོད་པ་མ་ཟད། བོད་མི་གནས་སྡོད་བྱས་ཡོད་པའི་ས་ཁུལ་ཁག་ཏུ་བརྙན་མིག་སོགས་བཙུགས་ནས་བོད་མིའི་འཚོ་བར་བཙན་གནོན་སུན་གཙེར་གཏོང་གི་ཡོད་སྟབས། བོད་མི་ཚོས་འཇིགས་སྣང་གི་ཁྲོད་ནས་འཚོ་བ་སྐྱེལ་མུས་ཡིན་པ་རེད། ཅེས་གསུངས་འདུག
ཡང་ཚོགས་གཙོ་མཆོག་གིས། རྒྱ་ནག་གཞུང་གིས་དེ་སྔོན་ཤིན་ཅང་ཡུ་གུར་མི་རིགས་རང་སྐྱོང་ཁུལ་གྱི་དམར་ཤོག་དྲུང་ཆེ་གཞོན་པ་རྒྱ་མི་ཝང་ཅིན་ཀྲིན་(Wang Junzheng)ཟེར་བ་ཞིག་བོད་ནང་དུ་གནས་སྤོར་བཏང་བ་དེས། བོད་ནང་གི་བོད་མི་ཚོས་རང་ཉིད་བོད་པ་ཞིག་ཡིན་བསམ་པའི་དགའ་སྤོབས་དང་འབྲེལ་བའི་ལས་འགུལ་ཚང་མར་དྲག་གནོན་བྱ་རྒྱུ་ཡིན་པ་གསལ་པོ་ཡིན་པ་དང་། རྒྱ་ནག་གཞུང་གིས་བོད་ནང་གི་བོད་མི་ཚོར་ཚད་ལས་འདས་པའི་མནར་གཅོད་གཏོང་བཞིན་ཡོད་པའི་སྐབས་འདིར། ང་ཚོས་ཁྱེད་ཀྱིས་བོད་དོན་རྒྱབ་སྐྱོར་གྱི་ཆེད་དུ་བསྒྲགས་པའི་འབོད་སྒྲ་དེ་རིན་ཐང་ཅན་ཞིག་ཏུ་ངོས་འཛིན་བྱེད་ཅིང་། ང་ཚོས་ཁྱེད་ཀྱིས་མུ་མཐུད་འགྲོ་བ་མིའི་རིགས་ཀྱི་ངག་མེད་ཀྱི་མགྲིན་ཚབ་པ་ཞིག་གནང་རྒྱུར་འབོད་སྐུལ་ཞུ་ཡི་ཡོད་ལ། ཁྱེད་ཀྱི་འབོད་སྒྲ་དེས་ཁོང་ཚོར་རེ་བའི་འོད་སྣང་ཞིག་བསྐྲུན་ཐུབ། ཅེས་གསུངས་འདུག
ཨ་རིའི་རྒྱལ་ཡོངས་སིལ་སྤོལ་རྩེད་འགྲན་པ་གྲགས་ཅན་ཨེ་ནེ་སི་ཀན་ཊིར་(Enes Kanter)ལགས་ཀྱིས་འདི་ལོའི་ཕྱི་ཟླ་ ༡༠ ཚེས་ ༢༠ ཉིན་རྒྱ་ནག་གཞུང་དང་རྒྱ་ནག་མི་མང་གིས་སྐྱོན་བརྗོད་ངོ་རྒོལ་བྱེད་མིན་ལ་མ་ལྟོས་པར་བོད་ཀྱི་བདག་པོ་བོད་མི་ཡིན་ཞེས་རྒྱ་ནག་གཞུང་གི་གདུག་རྩུབ་འོག་མནར་གཅོད་གཏོང་བཞིན་པ་མཚམས་འཇོག་བྱས་ཏེ་བོད་ལ་རང་དབང་དགོས་པའི་གཏམ་བཤད་འཛེམ་ཟོན་མེད་པར་ཡོངས་ཁྱབ་ཏུ་སྤེལ་ཡོད་པ་དང་། རེས་གཟའ་སྤེན་པ་ཕྱི་ཚེས་ ༣༠ ཉིན་ལའང་ཨ་རིའི་གྲོས་ཚོགས་ཀྱི་ཚོགས་ཁང་གི་མདུན་གྱི་རྒྱལ་ཡོངས་ཐང་ཆེན་དུ། བོད་རང་བཙན་སློབ་ཕྲུག་ཚོགས་པ་དང་ཡུ་གུར་ཨ་རབ་བྷི་ཡའི་མཐུན་ཚོགས། ཨ་རིའི་རྒྱབ་སྐྱོར་ཚོགས་པ་སོགས་ཀྱི་གོ་སྒྲིག་འོག ཡུ་གུར་བ་དང་བོད་པ། ཧོང་ཀོང་བ་བརྒྱ་ཕྲག་མང་པོ་མཉམ་རུབ་ཀྱི་འབོད་སྐུལ་ལས་འགུལ་སྤེལ་སྐབས། ཨེ་ནེ་སི་ཀན་ཊིར་ལགས་མཉམ་ཞུགས་གནང་སྟེ་ཨ་རིའི་གྲོས་ཚོགས་འོག་མའི་ནང་ཡུ་གུར་བ་རྣམས་བཙན་པོའི་ངལ་རྩོལ་དུ་བཀོལ་བཞིན་པ་སྔོན་འགོག་གི་ཁྲིམས་འཆར་ལ་རྒྱབ་སྐྱོར་དང་གདུང་སེམས་མཉམ་སྐྱེད་ཀྱི་གཏམ་བཤད་གནང་ཡོད་འདུག 
ལས་འགུལ་སྐབས་སིལ་སྤོལ་རྩེད་མོ་བ་ཨེ་ནེ་སི་ཀན་ཊིར་ལགས་ཀྱིས། ཁོང་རང་ཨ་རིའི་རྒྱལ་ཡོངས་སིལ་སྤོལ་ལྷན་ཚོགས་ཀྱི་རྩེད་འགྲན་པ་ཡིན་པའི་ཆ་ནས། འགྲོ་བ་མིའི་ཐོབ་ཐང་ལ་རྡོག་རོལ་གྱི་གནད་དོན་དང་འབྲེལ་བ་ཆེན་པོ་ཡོད་པའི་རྒྱ་ནག་གི་ཐོག་ལ་སྐད་ཆ་མ་བཤད་པར་བསྡད་པ་ནི་ངོ་ཚ་དགོས་པ་ཞིག་ཆགས་ཀྱི་ཡོད་པར་བརྟེན། གནད་དོན་འདིའི་ཐོག་ལ་ང་ནམ་ཡང་ཁུ་སིམ་པོར་སྡོད་ཀྱི་མིན་ལ། གདུག་རྩུབ་ཅན་གྱི་མགོ་ཁྲིད་ཞི་ཅིན་ཕིང་གིས་སྣེ་འཁྲིད་དེ་རྒྱ་ནག་གཞུང་གིས་ཡི་ཤུ་དང་། ནང་པ། ཁ་ཆེ་སོགས་ཆོས་དད་བྱེད་མཁན་ཚང་མར་གདུག་རྩུབ་དང་དྲག་གནོན་བྱེད་ཀྱི་ཡོད་པས། རྒྱ་ནག་གཞུང་འདི་ངོ་ཚ་དགོས་པ་ཞིག་ཏུ་གྱུར་ཡོད་རེད་ཅེས་དང་། ཞི་ཅིན་ཕིང་གིས་ངའི་སྐད་ཆ་འདི་ཉན་གྱི་ཡོད་ན། འདི་ནི་མི་རབས་གསར་པའི་རེ་བ་བྱེད་སའི་འཐབ་རྩོད་ཅིག་ཡིན་སྐོར་དང་། མི་མང་གིས་འདེམས་བསྐོ་བྱས་པའི་མགོ་ཁྲིད་ཚོས་ཚིག་སྐམ་པོ་སྟོང་བཤད་གཅིག་པོས་མི་འགྲིག་པར་རྒྱ་ནག་གི་ནང་དུ་གདུག་རྩུབ་མྱངས་དང་མྱོང་བཞིན་པའི་མི་རིགས་དེ་དག་གི་ཆེད་དུ། ནུས་པ་ལྡན་པའི་ལས་དོན་བརྩམ་དགོས་པའི་འབོད་སྐུལ་གནང་འདུག་ལ། རྒྱ་ནག་གི་ཕྱི་སྲིད་ལྷན་ཁང་གི་མགྲིན་ཚབ་པ་ཝང་ཝུན་པིན་(Wang Wenbin)གྱིས། ཀན་ཊིར་གྱིས་ཡུ་གུར་བ་དང་བོད་པ། ཧོང་ཀོང་བ་སོགས་ལ་རྒྱབ་སྐྱོར་གྱི་སྐད་ཆ་བཤད་པ་དེ་ནི་ཁོ་རང་ལ་གཞན་གྱིས་དམིགས་བསལ་གྱི་དོ་སྣང་བསླེབ་ཆེད་ཡིན་སྐོར་སྐྱོན་བརྗོད་བྱས་འདུག
ད་དུང་ཀན་ཊིར་ལགས་ཀྱི་སྤྱི་ཚོགས་དྲ་ལམ་(Instagram)ནང་ ༢༠༢༢ ལོའི་པེ་ཅིན་ཨོ་ལོམ་པིག་ལ་ངོ་རྒོལ་གྱི་ལྷམ་སྣ་ཚོགས་ཁྱབ་བསྒྲགས་གནང་སྟེ། ཞི་ཅིན་ཕིང་ནི་མི་རིགས་རྩ་གཏོར་བྱེད་མཁན་གྱི་རྒྱ་ནག་གི་གཞུང་དང་དྲག་སྤྱོད་དབང་འཛིན་པ་ཞིག་ཡིན་པར་བརྟེན། ཕྱི་ལོ་ ༢༠༢༢ ལོའི་ཨོ་ལིམ་པིག་སྐོང་ཚོགས་དང་གོ་སྒྲིག་བྱེད་ཆོག་གི་མེད་ཅེས་བརྗོད་ཡོད་པ་མ་ཟད། ཁོང་གིས་ཨ་རིའི་རྒྱལ་སར་སིལ་སྤོལ་རྩེད་འགྲན་སྐབས་ལྷམ་དེ་རྣམས་ཁྱབ་བསྒྲགས་གནང་ཡོད་འདུག
གསར་འགོད་པ། བསྟན་འཛིན་ཕུར་བུ། དཔལ་ལྡན།
