རྒྱ་ནག་གི་སྲིད་བློན་གཞོན་པ་ཟུར་པ་ཞིག་ལ་འཁྲིག་སྤྱོད་ཀྱི་ནག་ཉེས་བཙུགས།

རྒྱ་ནག་གི་ཊེ་ནེ་སི་རྩེད་མཁན་གྲགས་ཅན་ཞིག་གིས་རྒྱ་ནག་གི་སྲིད་བློན་གཞོན་པ་ཟུར་བ་ཞིག་ལ་འཁྲིག་སྤྱོད་ཀྱི་ཉེས་འཛུགས་བྱས་པ་དང་རྒྱ་ནག་གི་དྲ་ལམ་ཁག་ཏུ་དེ་འབྲེལ་གྱི་གནས་ཚུལ་ཚང་མ་བཀག་སྡོམ་བྱས་ཡོད་པ་རེད།

ཁ་སང་རྒྱ་ནག་གི་ཊེ་ནེ་སི་རྩེད་མཁན་གྲགས་ཅན་པཱང་ཧྲའེ་ (Peng Shuai) ཡིས། རང་ཉིད་ཀྱི་ཝེ་པོ་དྲ་རྒྱའི་སྟེང་གནས་ཚུལ་ཞིག་བཀོད་དེ། རྒྱ་ནག་གི་སྲིད་བློན་གཞོན་པ་ཟུར་བ་ཀྲང་ཀོ་ལི་ (Zhang Gaoli) ཡིས། ཁོ་མོར་བཙན་གྱིས་འཁྲིག་སྤྱོད་བྱས་པའི་གནས་ཚུལ་ཕྱིར་བསྒྲགས་བྱས་ཡོད་པ་དང་། དེ་ནི་ད་སྔ་བར་རྒྱ་ནག་གི་ཆེས་གནས་རིམ་མཐོ་བའི་མགོ་ཁྲིད་ཅིག་ལ་བུད་མེད་རྩིབ་སྤྱོད་ཀྱི་ཉེས་འཛུགས་བྱས་པ་ཐོག་མ་ཆགས་ཀྱི་ཡོད་འདུག

ཝེ་པོ་དྲ་རྒྱའི་སྟེང་ཊེ་ནེ་སི་རྩེད་མཁན་གྲགས་ཅན་པཱང་ཧྲའེ་ཡིས་ཀྲང་ཀོ་ལི་ལ།  ཁྱེད་ཀྱིས་ཕྱི་ལོ་ ༢༠༡༨ ལོར་ང་ཊེ་ནེ་སི་རྩེད་སླད་ཁྱེད་ཀྱི་ཁྱིམ་དུ་སྐད་བཏང་རྗེས་བཙན་གྱིས་འཁྲིག་སྤྱོད་བྱས་ཡོད། སྐབས་དེར་ངས་ངུ་མཚམས་འཇོག་མ་ཐུབ། ཅེས་བརྗོད་ཡོད་པ་མ་ཟད། ཀྲང་ཀོ་ལི་གོ་གནས་མཐོ་བའི་རྒྱ་ནག་གི་དཔོན་རིགས་ཤིག་ཡིན་པ་དང་མོས་རང་གི་བྱེད་ཚུལ་དེ་ནི་སྲིལ་འབུ་ཞིག་གིས་མེར་རྒོལ་བ་ལྟ་བུ་ཡིན་ཡང་མོས་བདེན་པ་བཤད་པར་སྐྲག་སྣང་གང་ཡང་མེད་སྐོར་སོགས་བརྗོད་ཡོད་པ་རེད།

ད་རེས་པཱང་ཧྲའེ་ཡིས་ཝེ་པོ་དྲ་རྒྱའི་སྟེང་རྒྱ་ནག་གི་མཐོ་རིམ་མགོ་ཁྲིད་ཅིག་ལ་ནག་ཉེས་བཙུགས་པའི་གནད་དོན་དེ། ཝེ་པོ་དྲ་ཚིགས་སྟེང་བཀོད་དེ་ཆུ་ཚོད་དང་ཕྱེད་ཀ་ཙམ་ལས་མ་འགོར་བར་ནག་བསུབ་བཏང་ཡོད་པ་དང་། དེ་ནི་པཱང་ཧྲའེ་མོ་རང་གིས་བསུབ་པ་དང་ཡང་ན་རྒྱ་ནག་གི་དྲ་རྒྱའི་ཉེན་རྟོག་པས་བསུབ་པ་གང་ཡིན་གསལ་བོ་མེད་ཀྱང་། དབྱེ་ཞིབ་པ་ཚོས། ད་ལྟའི་ཆར་རྒྱ་ནག་གི་སྲིད་འཛིན་ཞི་ཅིན་ཕིན་རྒྱལ་སྤྱིའི་ཚོགས་འདུ་གལ་ཆེན་འགའི་ཐོག་མཉམ་ཞུགས་བྱས་མེད་པ་དེས་ཞི་ཅིན་ཕིན་མུ་མཐུད་རྒྱ་ནག་གི་སྲིད་འཛིན་བྱས་ནས་གནས་རྒྱུ་ཡིན་མིན་དང་འབྲེལ་རྒྱ་ནག་ནང་ལོགས་ཀྱི་ཆབ་སྲིད་ཀྱི་གནས་བབ་ཛ་དྲག་ཅིག་ཏུ་བསླེབས་ཡོད་པ་དང་། ཆེས་དམ་དྲག་ཆེ་བའི་རྒྱ་ནག་གི་དྲ་རྒྱའི་སྒྲིག་ཁྲིམས་ཀྱིས་རྒྱ་ནག་གི་མཐོ་རིམ་མགོ་ཁྲིད་ཅིག་ལ་ཉེས་འཛུགས་བྱེད་དུ་འཇུག་མི་སྲིད་པ་ཞིག་ཡིན་སྐོར་སོགས་བརྗོད་འདུག་པ་མ་ཟད། ད་ལྟ་རྒྱ་ནག་ནང་པཱང་ཧྲའེ་དང་འབྲེལ་བའི་གནས་ཚུལ་གཅིག་ཀྱང་འཚོལ་ཞིབ་བྱ་མི་ཐུབ་པར་བཟོས་ཡོད་འདུག

སྤྱིར་རྒྱ་ནག་གིས་པཱང་ཧྲའེ་ཡི་ཝེ་པོ་དྲ་རྒྱ་དང་མོའི་མིང་དང་འབྲེལ་བའི་གནས་ཚུལ་ཡོངས་རྫོགས་བཀག་སྡོམ་བྱས་ཡོད་ཀྱང་། མོས་དབུས་ཆབ་སྲིད་རྒྱུན་ལས་ཀྱི་འཐུས་མི་ཟུར་བ་ཞིག་ལ་ཉེས་འཛུགས་བྱས་པའི་སྙིང་སྟོབས་ལ་རྒྱ་ནག་གི་མོ་གཙོ་རིང་ལུགས་ཀྱི་ལས་འགུལ་བ་ཚོས་ཡི་རངས་དང་འབྲེལ། རྒྱ་ནག་གི་བུད་མེད་རྣམས་ཀྱིས་བཙན་གཡེམ་གྱི་གཉའ་གནོན་དང་ཕམ་ཁ་འཁུར་རྒྱུ་མིན་པའི་བརྡ་ལན་བཏང་ཡོད་པ་རེད་ལ། བཙན་གཡེམ་གྱི་གནད་དོན་དང་འབྲེལ་ནས་རྒྱ་ནག་གཞུང་གིས་གང་འདོད་དུ། མཚམས་རེར་མོ་གཙོ་རིང་ལུགས་ཀྱི་ལས་འགུལ་བ་དང་རྩུབ་སྤྱོད་ཕོག་མཁན་འཛིན་བཟུང་དང་ཡང་མཚམས་རེར་རྒྱ་ནག་གཞུང་གི་ཁ་གཏད་དུ་ལངས་མཁན་དམར་ཤོག་ཚོགས་པའི་ཚོགས་མི་སོགས་འཛིན་བཟུང་བྱས་དང་བྱེད་མུས་ཡིན་པ་རེད།

རྒྱ་ནག་ནང་བུད་མེད་ཀྱི་ཐོབ་ཐང་འདྲ་མཉམ་ཡོང་གི་མེད་པ་ནི། རྒྱ་ནག་དམར་ཤོག་ཚོགས་པས་སྒེར་གཅོད་འོག་རྒྱ་ནག་ལ་དབང་སྒྱུར་བྱེད་བཞིན་ཡོད་པའི་རྐྱེན་གྱི་ཡིན་པ་དང་། ད་སྔ་བར་རྒྱ་ནག་དམར་ཤོག་ཚོགས་པའི་དབུས་ཆབ་སྲིད་རྒྱུན་ལས་བདུན་གྱི་ནང་བུད་མེད་གཅིག་ཀྱང་བསླེབས་མ་མྱོང་བ་དང་། དབུས་སྲིད་གྲོས་ཀྱི་འཐུས་མི་ ༢༥ ཡི་གྲས་སུ་བུད་མེད་གཅིག་མ་གཏོགས་བྱུང་མེད་པ་རེད། དེར་བརྟེན། རྒྱ་ནག་གི་ཆབ་དཔལ་རིག་གསུམ་དང་འབྲེལ་བའི་སྲིད་ཇུས་གཏན་འབེབ་སྐབས།  བུད་མེད་ཀྱི་ཐོབ་ཐང་དང་ཕོ་མོ་འདྲ་མཉམ་གྱི་ཁོར་ཡུག་ཅིག་ཡུན་ནས་ཡོང་གི་མེད་པ་རེད། འདི་ལོ་ལོ་མགོར་མ་གཏོགས་དེ་སྔ་རྒྱ་ནག་ནང་བུད་མེད་ལ་རྩུབ་སྤྱོད་ཀྱི་གནད་དོན་དང་འབྲེལ་བའི་ཁྲིམས་ཤིག་མེད་པ་རེད་འདུག

རྒྱ་ནག་ནང་ཆེས་ཉེ་བའི་རྩུབ་སྤྱོད་ཀྱི་གྱོད་དོན་ནི་རྒྱ་ནག་གི་བུ་མོ་ཀྲའོ་ཞོ་ཤན་ (Zhou Xiaoxuan) གྱིས། རྒྱ་ནག་གཞུང་འབྲེལ་གྱི་མདོ་འཛིན་པ་དང་འཁྲབ་སྟོན་པ་ (Zhu Jun) གཏུགས་བཤེར་བྱས་པ་དེ་ཡིན་ཞིང་། བུ་མོ་ཀྲའོ་ཞོ་ཤན་གྱིས་ཕྱི་ལོ་ ༢༠༡༨ ནས་ལོ་ངོ་གསུམ་རིང་ཁྲིམས་གཏུགས་བྱས་པའི་མཐར། འདི་ལོའི་ཕྱི་ཟླ་ ༩ པའི་ནང་རྒྱ་ནག་གཞུང་གི་ཁྲིམས་ཁང་ཞིག་གིས་མོའི་གཏུགས་བཤེར་ལ་དཔང་རྟགས་འདང་ངེས་མེད་པའི་ངོས་འཛིན་འོག་གྱོད་དོན་དེ་མཚམས་འཇོག་བྱས་ཡོད།

ད་རེས་པཱང་ཧྲའེ་ཡིས་རྩིབ་སྤྱོད་ཀྱི་གྱོད་དོན་ཐེར་འདོན་བྱས་པ་དེར་རྒྱ་ནག་དང་རྒྱལ་སྤྱིའི་ནང་དོ་སྣང་ཤུགས་ཆེན་བྱེད་ཀྱི་ཡོད་དོན་ནི། རྩུབ་སྤྱོད་སྤེལ་མཁན་རྒྱ་ནག་དམར་ཤོག་ཚོགས་པའི་དབུས་རྒྱུན་དང་སྲིད་བློན་གཞོན་པ་ཟུར་བ་ཀྲང་ཀོ་ལི་ཡིན་པས་རེད་ལ། དམིགས་བསལ་ཀྲང་ཀོ་ལི་ནི་ཞི་ཅིན་ཕིན་གྱི་མཐུན་གྲོགས་ཉེ་བོ་ཞིག་ཡིན་པ་དང་། ཁོས་ཕྱི་ལོ་ ༢༠༡༣ ནས་ ༢༠༡༨ བར་རྒྱ་ནག་དབུས་ཆབ་སྲིད་རྒྱུན་ལས་དང་སྲིད་བློན་གཞོན་པའི་ལས་འགན་འཁུར། ཕྱི་ལོ་ ༢༠༡༨ ཟླ་ ༣ པའི་ནང་རྒས་ཡོལ་ཞུས། ད་ལྟ་རང་ལོ་ ༧༥ ཡིན་པ་རེད།

པཱང་ཧྲའེ་ནི་ཕྱི་ལོ་ ༡༩༨༦ ལོར་སྐྱེས་ཤིང་ད་ལྟ་རང་ལོ་ ༣༥ ཡིན་པ་དང་། ཁོ་མོ་ཆུང་དུས་ནས་ཊེ་ནེ་སི་རྩེད་རྒྱུར་དགའ་ཞིང་། ལོ་ན་ ༨ ཀྱི་སྟེང་ནས་རང་གི་ཨ་ཞང་གི་རྒྱབ་སྐྱོར་འོག་ཊེ་ནེ་སི་རྩེད་མགོ་བརྩམས་ཏེ། ལོ་ན་ ༡༥ སྟེང་རྒྱལ་སྤྱིའི་ཊེ་ནེ་སི་རྩེད་འགྲན་ (International Tennis Federation) ཨང་རིམ་དང་པོ་དང་གཉིས་པ་བཅས་ཀྱི་བྱ་དགའ་བསྟུད་མར་བླངས། ཕྱི་ལོ་ ༢༠༡༣ ལོར་རྒྱལ་སྤྱིའི་ཊེ་ནེ་སི་རྩེད་འགྲན་གྱི་ཁྲོད་བུད་མེད་ཀྱི་ (Wimbledon ladies doubles) ཞེས་པའི་མཚན་སྙན་བླངས་ཤིང་། ཕྱི་ལོ་ ༢༠༡༤ ལོར་ཧྥ་རན་སིའི་རྒྱལ་སྤྱིའི་ཊེ་ནེ་སིའི་ (French Open) རྩེད་འགྲན་ཁྲོད་ཨང་དང་པོ་བླངས་ཡོད་པ་སོགས་རྒྱལ་སྤྱིའི་ཊེ་ནེ་སི་རྩེད་མཁན་གྲགས་ཅན་ཞིག་ཡིན་པ་རེད།

གསར་འགོད་པ། སྐལ་བཟང་སྦྱིན་པ།