ཉེ་སྔོན་ལྷ་སའི་འབྲིང་རིམ་མི་མང་ཁྲིམས་ཟེར་བས་ཁ་བྲལ་གྱི་ཁྲིམས་འགལ་ལས་ཀ་བྱས་ཡོད་པའི་ཉེས་མིང་འོག་བོད་ནང་གི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་སུ་ལོ་བཅུའི་བཙོན་འཇུག་ཁྲིམས་ཐག་བཅད་ཡོད་འདུག
འདས་ལོའི་ཟླ་ ༡༠ ཚེས་ ༢༦ ཉིན་རྒྱ་ནག་གཞུང་གི་ཉེན་རྟོག་པས་རྩོམ་པ་པོ་སྒོ་ཤེས་རབ་རྒྱ་མཚོ་ལགས་འཛིན་བཟུང་བཙན་འཁྲིད་བྱས་ཏེ་ལོ་གཅིག་དང་ཟླ་གཅིག་ལྷག་འགོར་རྗེས། ད་གཞི་ནས་ལྷ་སའི་འབྲིང་རིམ་མི་མང་ཁྲིམས་ཁང་ཟེར་བས་ཁོང་ལ་ལོ་བཅུ་བཙོན་འཇུག་ཁྲིམས་ཐག་བཅད་ཡོད་པ་ཤེས་རྟོགས་བྱུང་ཡོད་པ་དང་། ད་ལྟའི་ཆར་ཁོང་ལྷ་སའི་ཉེ་འཁྲིས་ཀྱི་བཙོན་ཁང་ཞིག་ཏུ་བཅུག་ཡོད་པའི་གནས་ཚུལ་ཙམ་ལས་སྐུ་གཟུགས་གནས་སྟངས་དང་ཁོང་ལ་ག་དུས་ཁྲིམས་ཐག་བཅད་པ་དང་། ནག་ཉེས་ག་རེ་བཙུགས་ཡོད་མེད་སོགས་གང་ཡང་གསལ་ཁ་མེད་པ་རེད།
ཧྥ་རན་སིར་གནས་སྡོད་སྐྱེས་ས་ཀླུ་སྒྲུབ་ལགས་ཀྱིས་འདི་གའི་གསར་འགོད་པར། འདས་ལོའི་ཕྱི་ཟླ་ ༡༠ ཚེས་ ༢༦ ཉིན་སྒོ་ཤེས་རབ་རྒྱ་མཚོ་ལགས་འཛིན་བཟུང་བྱས་ཡོད་པ་དང་། ལྷ་སར་ཡོད་པའི་སྒོ་ཤེས་རབ་ལགས་ཀྱི་སྲིང་མོ་གཉིས་ནས་ད་ལྟ་བར་དུ་རྩམ་པ་རྒྱ་མ་ལྔ་ཙམ་ལས་གཞན་ཟས་གོས་སོགས་གང་ཡང་མཁོ་སྤྲོད་ཐུབ་མེད་ལུགས་བརྗོད་བྱུང་།
བོད་ཀྱི་སློབ་གསོ་བ་དང་རྩོམ་པ་པོ་གྲགས་ཅན་སྒོ་ཤེས་རབ་རྒྱ་མཚོ་ལགས་སུ་ལོ་བཅུའི་ཁྲིམས་ཐག་བཅད་པའི་གནས་ཚུལ་ཕྱིར་ཁྱབ་དུས། བོད་ཕྱི་ནང་གཉིས་ཀྱི་བོད་མི་ཚོས་སྒེར་གྱི་དྲ་ལམ་སོགས་སུ་ཁོང་གི་སྐུ་པར་བཏང་སྟེ། ཁོང་ལ་མྱ་ངན་དང་གདུང་སེམས་མཉམ་སྐྱེད་བྱེད་བཞིན་འདུག་ལ། ལྷག་པར་བོད་ནང་གི་ན་གཞོན་ཤེས་ཡོན་པ་མང་པོ་ཞིག་གིས། རང་རང་གི་སྐད་འཕྲིན་རྒྱབ་ངོས་སུ་རྩོམ་པ་པོ་ཁོང་གི་སྐུ་པར་བཞག་སྟེ། ཁོང་གིས་མི་རིགས་ལ་བཟུང་བའི་འདུ་ཤེས་སོགས་ལ་བསྔགས་བརྗོད་དང་ཡི་རང་བྱས་ཡོད་པའི་ཁྲོད། བོད་མི་ཞིག་གིས། འགའ་རེས་མི་ཤེས་ཤེས་ཁུལ་དང་མ་རིག་རིག་ཁུལ་བྱེད་ཅིང་། ཁོ་ཚོའི་སེམས་ནས་ཀྱང་ནག་ཉེས་ཅན་ཞིག་རེད་དོ་སྙམ་པའི་འདུ་ཤེས་གཏིང་ཟིན་པར་གནས། འདི་ནི་ཆེས་འཇིགས་སུ་རུང་བའི་གནས་ཤིག་ལགས། དམ་པ་ཁོང་ཉིད་ཁྲི་མུན་གྱི་དོང་དུ་བགྲང་བྱ་བཅུ་རུ་བཞུགས་དགོས་བྱུང་བ་གོ་ཐོས་བྱུང་བས་སེམས་སུ་སྐྱོ་བ་དང་སྡང་བ་ལྷན་དུ་ལྡོང་ཞེས་བྲིས་ཡོད་པ་དང་། ཡང་གཞན་ཞིག་གིས། མི་རིགས་ཀྱི་ཆག་སྒོ་ཟེར་བ་ནི་མཐའ་གཅིག་ཏུ་མཚོན་ཆའི་ཁ་རུ་མེད་པར། བདེན་པའི་ལམ་མཐོང་བའི་བློ་མིག་ཅན་དག་བཀག་ཉར་བྱས་པའི་ཁྲོད་དུའང་འདུག ཅེས་བྲིས་ཡོད་འདུག
ད་ལྟ་རང་ལོ ༤༦ ཡིན་པའི་སྒོ་ཤེས་རབ་རྒྱ་མཚོ་ལགས་ནི། ཕྱི་ལོ ༡༩༧༦ ཟླ་ ༩ ཚེས ༩ ཉིན་རྒྱ་ནག་གཞུང་གིས་དབྱེ་བགོས་བྱས་པའི་སི་ཁྲོན་ཞིང་ཆེན་རྔ་བ་རང་སྐྱོང་ཁུལ་རྔ་བ་རྫོང་དུ་སྐྱེས་ཤིང་། དགུང་ལོ ༡༠ སྟེང་རྔ་བ་ཀིརྟི་དགོན་དུ་ཆོས་ཞུགས་གནང་། ཁོང་ནི་བོད་ཕྱི་ནང་གཉིས་སུ་སྐད་གྲགས་ཡོད་པའི་རྩོམ་པ་པོ་དང་། ཤེས་ཡོན་པ། དགེ་རྒན་ཞིག་ཡིན་ལ། ཁོང་ལ་རྒྱུན་ཤེས་དང་ལམ། ང་ཚོ་སད་རན། བསམ་གཞིག་པའི་སེམས་སྒྲ། དཔྱད་འཚོལ་ལྟ་ཚུལ། སྐྱེས་ཆེན་གྱི་བཞུད་ལམ། ཧི་མ་ལ་ཡའི་ཕར་ཚུར། རང་ལམ་རང་འཚོལ། བླང་དོར་ལྟ་ཚུལ། འགྱུར་ལྡོག་ཁྲོད་ཀྱི་བསམ་གཞིག་སོགས་བརྩམས་ཆོས་དེབ་ཉུང་མཐར་ ༩ ལྷག་ཡོད་འདུག
རྒྱ་ནག་གཞུང་གིས་ཕྱི་ལོ་༡༩༩༨ ལོར་བོད་རྔ་བའི་ཁུལ་དུ་རྒྱལ་གཅེས་ཆོས་གཅེས་ཟེར་བའི་ཆབ་སྲིད་ལས་འགུལ་སྤེལ་སྐབས་དང་། ༢༠༠༨ལོའི་ས་བྱི་ཞི་རྒོལ་ཆེན་མོ། དེ་བཞིན་ཕྱི་ལོ་༢༠༡༡ བཅས་སུ་ཁོང་ལ་ཆབ་སྲིད་ཀྱི་ཉེས་མིང་སྣ་ཚོགས་གཡོགས་ཏེ་དེ་སྔོན་ཡང་ཐེངས་གསུམ་ལ་འཛིན་བཟུང་བཙོན་འཇུག་བྱས་མྱོང་ཡོད་འདུག
གསར་འགོད་པ། དཔལ་ལྡན།
