ད་ལྟ་རྒྱ་བལ་གཉིས་ནང་ཏོག་དབྱིབས་ན་བཞིན་པའི་བོད་མི་ ༡༥ ཡོད་འདུག

རྒྱ་གར་ནང་དུ་བྱིས་པ་རྣམས་ལ་ཏོག་དབྱིབས་འགོག་ཁབ་བརྒྱག་རྒྱུར་གྲ་སྒྲིག་བྱེད་མུས་ཡིན་པས་ཕ་མ་ཚོས་སོ་སོའི་བྱིས་པ་རྣམས་ཀྱི་མིང་དང་རྒྱ་གར་གྱི་ཨཱ་ཌར་(Aadhar Card)། དེ་བཞིན་དཔྱ་ཁྲལ་ལག་དེབ་ཡོད་ཚེ་ཨང་གྲངས་མ་ནོར་བ་ཞིག་སློབ་གྲྭར་མཁོ་སྤྲོད་དགོས་ཀྱི་ཡོད་འདུག

ཁ་སང་ཉིན་རྒྱབ་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ལས་དོན་ཚོགས་ཆུང་གིས་གསར་འགོད་གསལ་བསྒྲགས་ཐེངས་  ༩༠ པ་སྤེལ་སྐབས། འདས་པའི་བདུན་ཕྲག་གཅིག་ནང་ཏོག་དབྱིབས་ནད་པ་གསར་པ་ ༡༡  བྱུང་ཡོད་པ་དང་། དེ་བཞིན་རྒྱ་གར་ནང་གི་ས་གནས་ ༧ ལ་རང་ཁྱིམ་ལ་ཟུར་བཀག་ཏུ་སྡོད་མཁན་བོད་མི་ ༡༠༠ དང་། ཚོགས་སྡེའི་ཟུར་བཀག་ཁང་དུ་མི་གྲངས་ ༩ བཅས་ཁྱོན་བསྡོམས་ཟུར་བཀག་ཏུ་སྡོད་མཁན་མི་གྲངས་ ༡༠༩  ཡོད་འདུག ད་ལྟ་བཙན་བྱོལ་བོད་མིའི་སྤྱི་ཚོགས་ནང་རིམ་གྱིས་ནད་པ་གསར་པ་དང་ཟུར་བཀག་ཏུ་སྡོད་མཁན་ཉུང་དུ་འགྲོ་བཞིན་འདུག

འཕྲོད་བསྟེན་ལས་ཁུངས་ཀྱི་ལས་བྱེད་བསྟན་འཛིན་ཀུན་བཟང་ལགས་ཀྱིས། འདས་པའི་བདུན་ཕྲག་ཁ་ཤས་ཀྱི་ནང་བོད་མིའི་སྒྲིག་འཛུགས་ཀྱི་ཏོག་དབྱིབས་ཛ་དྲག་ཚོགས་ཆུང་གིས། སློབ་གྲྭ་ཁག་གི་སྨན་ཁང་འགན་འཛིན་དང་།  ས་གནས་མགོ་འཛིན་ལྷན་དུ་དྲ་ལམ་ནས་ཚོགས་འདུ་འཚོགས་པ་བརྒྱུད། རྒྱ་གར་ནང་དུ་མི་འགྱངས་བར་བྱིས་པ་རྣམས་ལ་ཏོག་དབྱིབས་རིམས་ནད་ཀྱི་སྔོན་འགོག་བརྒྱག་རྒྱུ་གྲ་སྒྲིག་བྱེད་མུས་ཡིན་སྟབས། འཕྲོད་བསྟེན་མི་སྣ་རྣམས་ཀྱིས་བྱིས་པ་རྣམས་ཀྱི་མིང་གཞུང་བསྡུ་རུབ་བྱ་རྒྱུ་ཡིན་སྟབས།  ཕ་མ་རྣམས་ཀྱིས་ཐུགས་འགན་ཆེན་པོས་བྱིས་པ་རྣམས་ཀྱི་མིང་ཐོ་དུས་ཐོག་ཏུ་སྤྲད་དགོས་པ་དང་། དེ་བཞིན་བོད་མི་མང་པོ་ཞིག་དགུན་ཚོང་ལ་བསྐྱོད་ནས་ཕྱིར་རང་རང་གི་ས་གནས་སུ་ལོག་གྲབས་ཡོད་སྟབས། དགུན་ཚོང་ལ་འགྲོ་མཁན་ཚོས་རང་གཞན་ཚང་མའི་བདེ་འཇགས་ཀྱི་སླད་དུ། ཏོག་ནད་བརྟག་དཔྱད་དང་གཞིས་ཆགས་སོ་སོར་ཟུར་བཀག་སོགས་བསྡད་དགོས་པའི་རེ་སྐུལ་ཞུས་སོང་།

གསལ་འགོད་གསལ་བསྒྲགས་སྟེང་སྨན་པ་མཚམས་གཅོད་ལགས་ཀྱིས། འཛམ་གླིང་ས་ཕྱོགས་གང་སར་ལྷོ་ཨ་ཧྥི་རི་ཁ་ནས་མཆེད་པའི་ཏོག་ནད་ཀྱི་གཉན་སྲིན་གསར་པ་དེ་ཁྱབ་གདལ་འགྲོ་མུས་ཡིན་པ་ལྟར། ད་ལྟ་རྒྱ་གར་ནང་དུ་ཨོ་མི་ཁུ་རོན་ན་མཁན་མི་གྲངས་ ༧༨ ཙམ་བྱུང་ཡོད་ཀྱང་། ཏོག་ནད་གསར་བ་དེར་དམིགས་བསལ་ཉེན་ཚབས་ཆེན་པོ་མེད་ཀྱང་།  བོད་མི་ཚོས་སྔོན་འགོག་དང་འཕྲོད་བསྟེན་ལ་དོ་དབྱིངས་ཀྱིས་དོགས་གཟབ་བྱ་དགོས་པ་དང་། ལྷག་པར་ཡི་ཤུའི་ལོ་སར་དང་། སློབ་གྲྭ་ཁག་གི་དགུན་ཁའི་གུན་སེང། དེ་བཞིན་མི་མང་པོ་ཞིག་དགུན་ཚོང་གྲོལ་ཏེ་གཞིས་ཆགས་ཁག་ཏུ་ལོག་འགྲོ་ཡི་ཡོད་སྟབས། འགྲུལ་བཞུད་ཀྱི་བྲེལ་ཟིང་ཆེ་བའི་དུས་དེར། བོད་མི་ཚང་མས་སོ་སོའི་སྔོན་འགོག་གི་ཐབས་ལམ་སོགས་བསྟེན་དགོོས་པའི་ལམ་སྟོན་གནང་སོང་།

དེའི་རྗེས་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་ཀྱིས། ཡུ་རོབ་ཀྱི་རྒྱལ་ཁབ་ཁག་གི་ནང་དུ་ཏོག་ནད་གསར་བ་དེ་ཁྱབ་གདལ་ཤུགས་ཆེན་འགྲོ་མུས་ཡིན་ཡང་། ད་བར་ཏོག་ནད་གསར་བ་དེས་དམིགས་བསལ་གནོད་འཚེ་ཆེན་པོ་མེད་ཀྱང་། ཚང་མས་སྔོན་ཚོད་ནས་སྔོན་འགོག་གི་ཐབས་ལམ་ལ་བསྟེན་རྒྱུ་གལ་ཆེན་ཆེན་པོ་ཡིན་པ་དང་། ལྷག་པར་ཏོག་དབྱིབས་རིམས་ནད་སོགས་ལ་འགོག་རྒོལ་སླད་དུ། གཉིད་ཏག་ཏག་ཉལ་རྒྱུ་དང་། འཚོ་བཅུད་ལྡན་པའི་ཟས་རིགས་བསྟེན་རྒྱུ་གལ་ཆེན་པོ་ཡིན་པའི་ལམ་སྟོན་སོགས་གནང་སོང་།

ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསལ་བསྒྲགས་ལྟར་ན། ད་ལྟ་བར་དུ་རྒྱ་བལ་གཉིས་ནང་བོད་མི་ཏོག་དབྱིབས་ནད་པ་མི་གྲངས་  ༦༩༦༩ བྱུང་བའི་ཁྲོད་དྲག་སྐྱེད་ཟིན་པ་ ༦༧༩༢   དང་། རྐྱེན་འདས་སུ་ཕྱིན་པ་ ༡༦༢། ད་ལྟ་ཏོག་ནད་ཀྱིས་མནར་བཞིན་པའི་བོད་མི་གྲངས་ ༡༥ ཡོད་འདུག དེ་བཞིན་རྒྱ་གར་ནང་ཏོག་དབྱིབས་འགོག་ཁབ་གཉིས་ཀ་བརྒྱབ་ཟིན་པའི་མི་གྲངས་ ༤༦༤༨༢ དང་། དང་པོ་བརྒྱབ་ཟིན་པའི་མི་གྲངས་ ༣༧༢༥ ཆགས་ཡོད་པ་དང་། བལ་ཡུལ་ནང་འགོག་ཁབ་གཉིས་ཀ་བརྒྱབ་ཟིན་པའི་མི་ ༦༩༨༠ ཡོད་འདུག དང་པོ་བརྒྱབ་ཟིན་པའི་མི་གྲངས་ ༤༨  ཙམ་ཡོད་འདུག