ཨ་རིའི་གྲོས་ཚོགས་ཀྱིས་རྒྱལ་སྤྱིའི་ཆོས་དད་རང་དབང་གི་སྐུ་ཚབ་གསར་བ་ཞིག་བསྐོ་གཞག་བྱུང་བར་བྱང་ཨ་རིའི་སྐུ་ཚབ་དོན་གཅོད་ལས་ཁུངས་ཀྱིས་འཚམས་འདྲི་ཞུས་གནང་ཡོད་འདུག
ཨ་རིའི་གྲོས་ཚོགས་གོང་མའི་ནང་འོས་བསྡུ་བྱས་པ་བརྒྱུད། གྲོས་ཚོགས་འཐུས་མི་ ༥ ཡིས་དགག་བྱ་བཏོན་པ་དང་འཐུས་མི་ ༨༥ ཡི་མང་མོས་རྒྱབ་སྐྱོར་ཐོབ་པར་བརྟེན། ཁ་སང་ཨ་རིའི་མི་སེར་ཁ་ཆེ་བ་ཞིག་རྒྱལ་སྤྱིའི་ཆོས་དད་རང་དབང་དར་སྤེལ་གྱི་སྐུ་ཚབ་མི་སྣར་བསྐོ་གཞག་བྱུང་བ་ཡོངས་བསྒྲགས་བྱས་ཡོད་འདུག་
དེ་འབྲེལ་ཐད་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ (USCIRF) ཀྱིས་དགའ་བསུའི་བསྒྲགས་གཏམ་ཞིག་སྤེལ་བའི་ནང་། འཛམ་གླིང་ཁྱོན་ཡོངས་སུ་ཆོས་དད་རང་དབང་གི་ཐོབ་ཐང་ལ་རྡོག་རོལ་ཐེབས་བཞིན་ཡོད་པ་དང་། རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་སྐུ་ཚབ་མི་སྣས། ཨ་རིའི་ཆོས་དད་རང་དབང་གི་གཞི་རྩའི་ཐོབ་ཐང་སྲུང་སྐྱོབ་བྱེད་པའི་ལས་འགན་གལ་ཆེན་ཞིག་འཁུར་གྱི་ཡོད་དུས། སྐུ་ཞབས་རཱ་ཤི་ཌི་ཧོ་སེན་ལགས་ཀྱིས། ལོ་མང་རིང་གི་རང་ཉིད་ཀྱི་ཉམས་མྱོང་དང་ཤེས་ཡོན་གཞི་རྩར་བཞག་སྟེ། ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་དར་སྤེལ་གྱི་ལས་དོན་ཧུར་ཐག་བསྒྲུབ་རྒྱུ་དང་། མ་འོངས་པར་ལྷན་དུ་མཉམ་ལས་དང་གཞོལ་འདེགས་ཡོང་བའི་རེ་བ་དང་ཡིད་ཆེས་ཡོད། ཅེས་བརྗོད་འདུག་པ་དང་། སྐུ་ཞབས་རཱ་ཤི་ཌི་ཧོ་སེན་ལགས་ནི་ཨ་རིའི་ཁ་ཆེ་མི་སེར་ཞིག་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་སྐུ་ཚབ་མི་སྣར་བདམས་པ་ཐོག་མ་ཆགས་ཀྱི་ཡོད་འདུག
ཡང་ཆོས་དད་རང་དབང་གི་སྐུ་ཚབ་མི་སྣ་གསར་བསྐོས་དང་འབྲེལ་ནས། བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་ཀྱིས་༧གོང་ས་མཆོག་དང་བོད་མིའི་སྒྲིག་འཛུགས་ཀྱི་ཚབ་བྱས་ཏེ། ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་གསར་བ་སྐུ་ཞབས་རཱ་ཤི་ཌི་ཧོ་སེན་ལགས་སུ་འཚམས་འདྲི་དང་སྦྲགས། མ་འོངས་པར་སྐུ་ཚབ་ཁོང་དང་ལྷན་དུ་བོད་དང་། ཧོང་ཀོང་། ལྷོ་སོག་དང་རྒྱ་ནག་སོགས་ཀྱི་ནང་ཆོས་དད་རང་དབང་ཡོང་སླད་མཉམ་ལས་གནང་འཆར་ཡོད་སྐོར་དང་། ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སཱམ་བྷི་རོན་བྷག་(Sam Brownback) ལགས་ཀྱིས་བོད་ནང་གི་ཆོས་དད་རང་དབང་ཆེད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་གནང་ཡོད་འདུག
ཕྱི་ལོ་ ༢༠༡༩ ཟླ་ ༡༠ བའི་ནང་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་ཟུར་བ་སཱམ་བྷི་རོན་བྷག་ལགས་ཀྱིས་དབུ་འཁྲིད་པའི་ཨ་རིའི་སྐུ་ཚབ་ཚོགས་པ་ཞིག་བཞུགས་སྒར་དྷ་རམ་ས་ལར་ཕེབས་ཏེ། ཟླ་དེིའི་ཕྱི་ཚེས་ ༢༦ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་བཅར་ཞུས་ཡོད་པ་དང་། བོད་ཀྱི་ཟློས་གར་ཚོགས་པ་དབུ་བརྙེས་ནས་ལོ་ངོ་ ༦༠ ཧྲིལ་པོ་འཁོར་བའི་དུས་དྲན་ཐོག་ཕེབས་ཏེ། རྒྱ་ནག་གཞུང་གིས་ཆོས་དད་རང་དབང་ཐོག་དྲག་གནོན་ཚད་མེད་བྱེད་བཞིན་པར་བློ་འཚབ་ཡོད་པ་མ་ཟད། རྒྱ་ནག་གཞུང་གིས་མི་སྒེར་གྱི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་སྲུང་བྱེད་དགོས་པར་ནན་སྐུལ་བྱེད་བཞིན་ཡོད་སྐོར་དང་། བོད་ཀྱི་ཆོས་ལུགས་དབུ་འཁྲིད་འདེམ་རྒྱུ་དེ་༧གོང་ས་མཆོག་དང་། བོད་བརྒྱུད་ནང་བསྟན་གྱི་དབུ་འཁྲིད་དང་བོད་མི་ཁོ་ནའི་ལག་ཏུ་ཡོད་སྐོར་གསུངས་ཡོད།
གསར་དུ་བསྐོ་གཞག་བྱུང་བའི་ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་མི་སྣ་སྐུ་ཞབས་རཱ་ཤི་ཌི་ཧོ་སེན་ལགས་ནི། སྲིད་འཛིན་བྷའེ་ཌན་གྱི་སྐབས་སུ་ཨ་རིའི་ཕོ་བྲང་དཀར་པོའི་སྲིད་ཇུས་སློབ་སྟོན་པ་དང་། སྲིད་འཛིན་ཟུར་བ་ཨོ་བྷ་མའི་སྐབས་སུ་དམིགས་བསལ་སྐུ་ཚབ་མི་སྣ། དེ་བཞིན་ཁྲིམས་རྩོད་པ་དང་ཆེད་མཁས་མི་སྣ་བཅས་ཡིན་པ་རེད། ད་ལྟ་ཁོང་རང་ལོ་ ༤༢ ཡིན་པ་དང་ཕྱི་ལོ་ ༡༩༧༩ ལོར་ཨ་རིའི་ནུབ་རྒྱུད་མངའ་སྡེ་ (Wyoming) ནང་རྒྱ་གར་ནས་གནས་སྤོ་བྱས་པའི་ཁྱིམ་རྒྱུད་ཞིག་ཏུ་སྐྱེས་ཡོད་འདུག
གསར་འགོད་པ། སྐལ་བཟང་སྦྱིན་པ།
