ཉེ་བའི་ཟླ་གཉིས་ཙམ་རིང་རྒྱ་ནག་གཞུང་གིས་རྒྱ་དཀར་ནག་གི་ཐིག་མཚམས་དང་ཧ་ཅང་ཐག་ཉེ་བའི་སྤང་གོང་མཚོ་ཐོག་ཏུ་ཟམ་པ་ཞིག་འཛུགས་སྐྲུན་བྱེད་བཞིན་པའི་ཐད། རྒྱ་གར་གྱི་ཁ་གཏད་སྲིད་དོན་ཚོགས་པས་གཞུང་ལ་སྐྱོན་བརྗོད་བྱེད་ཀྱི་འདུག
རྒྱ་དཀར་ནག་གཉིས་བར་ས་མཚམས་རྩོད་རྙོག་ཤུགས་ཇེ་ཆེར་འགྲོ་བཞིན་ཡོད་པ་དང་བསྟུན། ཉེ་ལམ་རྒྱ་ནག་གཞུང་གིས་ཧིན་བོད་ཀྱི་མཐའ་མཚམས་སུ་ཆགས་པའི་སྤང་གོང་མཚོ་ཐོག་ཏུ་ཟམ་པ་ཞིག་གསར་དུ་བསྐྲུན་མགོ་བརྩམས་ཏེ། ད་ལྟ་ཟླ་ལྷག་ཙམ་འགྲོ་ཡི་ཡོད་པ་དང་། ཟམ་པ་དེ་ནི་ལ་དྭགས་ཀྱི་མཐའ་མཚམས་ས་ཐིག་ (LAC) ཏུ་ཁེལ་བའི་སྤང་གོང་མཚོ་ཡི་བྱང་ཕྱོགས་ནས་ལྷོ་ཕྱོགས་བར་དུ། རྒྱ་ནག་གི་དམག་མི་རྣམས་ཀྱི་མཚོན་ཆ་དང་དམག་དཔུང་དཔུང་འཇུག་སྟབས་བདེ་དང་མགྱོགས་མྱུར་ཆེད་དུ་ཡིན་པ་དང་། རྒྱ་གར་གྱི་ཁ་གཏད་སྲིད་དོན་ཚོགས་པས། མུ་དྷིའི་གཞུང་གིས་རྒྱ་ནག་ཐོག་སྐད་ཆ་གང་ཡང་མ་བཤད་པར་ཁུ་སིམ་གནས་བར་སྐྱོན་བརྗོད་ཤུགས་ཆེན་བྱེད་ཀྱི་ཡོད་འདུག
ཟླ་འདིའི་ཚེས་ ༡ ཉིན་ཏེ་ཕྱི་ལོ་གསར་པ་དང་བསྟུན། རྒྱ་ནག་གཞུང་གིས་ས་མཚམས་ཀྱི་ཁྲིམས་ཡིག་གསར་པ་ཞིག་ལག་ལེན་མགོ་འཛུགས་དང་འབྲེལ་ནས། ཉིན་དེར་རྒྱ་ནག་གཞུང་གིས་ཧིན་བོད་མཐའ་མཚམས་ཀྱི་གྷལ་ཝན་རི་གཤོངས་(Galwan)སུ་རྒྱ་ནག་གི་རྒྱལ་དར་སྒྲེང་འཛུགས་བྱས་ཡོད་པའི་བརྙན་ཐུང་ཞིག་མཐོང་རྒྱུ་ཡོད་ཅིང་། རྒྱ་ནག་གཞུང་གིས་བདེ་སྲུང་གི་སླད་དུ་ཧིན་བོད་ས་མཚམས་སུ་མུ་མཐུད་དུ་རྒྱ་སྐྱེད་ནས་འཛུགས་སྐྲུན་གྱི་ལས་གཞི་སྤེལ་འཆར་ཡོད་པ་མ་ཟད། ཉེ་ལམ་རྒྱ་ནག་གཞུང་གིས་ས་ཁྲ་གསར་པ་ཞིག་བཏོན་ཡོད་པའི་ནང་དུ་རྒྱ་གར་ཨ་རུ་ཎ་ཅལ་མངའ་སྡེའི་ཁུལ་གྱི་ས་གནས་ཁག་ ༡༥ ཙམ་གྱི་མིང་གསར་བ་བཏགས་ཏེ། རྒྱ་ནག་རང་ཁོངས་སུ་བསྡུ་རྒྱུའི་ལྐོག་ཇུས་ཤིག་འཐེན་ཡོད་པ་དང་། རྒྱ་གར་གཞུང་གིས། རྒྱ་ནག་གིས་ཨ་རུ་ན་ཅལ་གྱི་ས་གནས་ ༡༥ ལ་མིང་བཏགས་པ་ནི་གཞུང་འབྲེལ་རྒྱལ་མཚམས་ལས་བརྒལ་བ་ཡིན་པའི་སྐྱོན་བརྗོད་བྱས་ཡོད།
ད་རེས་རྒྱ་ནག་གིས་སྤང་གོང་མཚོ་ཐོག་ཏུ་ཟམ་པ་བསྐྲུན་གྱིན་པའི་ཐད། རྒྱ་གར་གཞུང་གིས་དམིགས་བསལ་ལན་འདེབས་གང་ཡང་བྱས་མེད་ཀྱང་། བརྒྱུད་ལམ་དུ་བོད་པ་དང་རྒྱ་གར་གྱི་དམག་མི་ཚོས་བོད་ཀྱི་རྒྱལ་དར་དང་རྒྱ་གར་རྒྱལ་དར་ཟུང་འབྲེལ་བྱས་ནས། མཐའ་མཚམས་ནས་སྒྲེང་འཛུགས་བྱས་པའི་པར་རིས་ཤིག་བརྒྱུད་སྐུར་བྱེད་ཀྱི་འདུག་ལ། མང་པོ་ཞིག་གིས་དེ་ནི་ཉེ་ལམ་ཕྱི་ལོ་གསར་ཚེས་སྐབས། རྒྱ་གར་དམག་གིས་རྒྱ་ནག་ལ་བརྡ་ལན་སློག་པ་ཞིག་ཡིན་སྐོར་རྗོད་ཀྱིན་འདུག
སྤང་གོང་མཚོ་ནི་ཧིན་བོད་ས་མཚམས་སུ་ཆགས་ཡོད་ཅིང་། དེ་ནི་དེང་སྐབས་རྒྱ་དཀར་ནག་གཉིས་ཀྱི་ས་མཚམས་རྩོད་རྙོག་བྱུང་སའི་ས་ཚིགས་གཙོ་བོ་དེ་ཆགས་ཡོད་ལ། སྤང་གོང་མཚོའི་ཁུལ་དུ་རྒྱ་དཀར་ནག་གཉིས་ཀྱི་དམག་མིས་དཔུང་འཇུག་བྱེད་རེས་བྱས་ཏེ། དེང་སྐབས་ཁུལ་དེར་རྒྱ་དཀར་ནག་གཉིས་ཀྱིས་དམག་མི་མང་པོ་བགོ་འགྲེམས་བྱས་ནས། རང་རང་གི་མངའ་ཁུལ་དུ་འཛུགས་སྐྲུན་དང་དམག་སྦྱོང་བྱེད་མུས་ཡིན་པ་རེད།
འདས་ལོའི་ཟླ་བ ༡ ནང་རྒྱ་དཀར་ནག་བར་གྱི་ས་མཚམས་རྩོད་རྙོག་དང་འབྲེལ་ནས་ཕྱོགས་གཉིས་ཀྱི་འབྲེལ་ལམ་ཆེས་ཛ་དྲག་ཏུ་གྱུར་མིན་ལ་མ་ལྟོས་པར། རྒྱ་ནག་གཞུང་གིས་བོད་དང་ས་འབྲེལ་དུ་འཁེལ་བའི་རྒྱ་གར་གྱི་བྱང་ཤར་ཨ་རུ་ན་ཅལ་མངའ་སྡེའི་བྱང་ཕྱོགས་སུ་ཁང་པ་ ༡༠༡ ལྷག་ཡོད་པའི་གྲོང་གསེབ་གསར་པ་ཞིག་འཛུགས་སྐྲུན་བྱས་པའི་གནས་ཚུལ་ཐོན་པ་བསྟུན། རྒྱ་གར་གྱི་ཕྱི་སྲིད་ལྷན་ཁང་ངོས་ནས་རྒྱལ་ཁབ་ཀྱི་བདེ་སྲུང་དང་འབྲེལ་བའི་གནད་དོན་ཡོངས་རྫོགས་ལ་ལྟ་ཞིབ་བྱེད་ཀྱི་ཡོད་པ་མ་ཟད། རྒྱ་གར་གྱི་ས་ཁོངས་བདག་དབང་དང་གཅིག་གྱུར་གྱི་ཐད་ལ་ཐབས་ཇུས་ཇི་མཁོ་སྤེལ་རྒྱུ་ཡིན་སྐོར་གྱི་བརྡ་ལན་སྤྲད་ཡོད་འདུག
ཕྱི་ལོ་ ༢༠༢༠ ཕྱི་ཟླ་ ༦ ཚེས་ ༡༥ ཉིན་བོད་དང་རྒྱ་གར་གྱི་ས་མཚམས་སུ་ཁེལ་བའི་གྷལ་ཝན་རི་གཤོངས་ (Galwan Valley) སུ་རྒྱ་དཀར་ནག་གཉིས་ཀྱི་དམག་མིའི་བར་དྲག་པོའི་འཁྲུག་འཛིང་ཤོར་ཏེ། རྒྱ་གར་གྱི་མཐའ་སྲུང་དམག་མི་ ༢༠ དང་ཉུང་མཐར་རྒྱ་ནག་གི་མཐའ་སྲུང་དམག་མི་ ༤ ཡི་ཚེ་སྲོག་ཤོར་ཡོད་སྟབས། རྒྱ་དཀར་ནག་གཉིས་ཀྱིས་རང་རང་གི་མཐའ་མཚམས་ས་ཐིག་བར་གྱི་མངའ་ཁོངས་དག་སྲུང་སྐྱོབ་ནན་མོ་བྱས་ཏེ། སོ་སོའི་མཐའ་མཚམས་ཀྱི་བདེ་འཇགས་དང་སྲུང་སྐྱོབ་ཀྱི་ཆེད། ཧིན་བོད་མཐའ་མཚམས་སུ་རྒྱ་དཀར་ནག་གཉིས་ཀས་འཛུགས་སྐྲུན་དང་མཐའ་མཚམས་དམག་དོན་ལ་དོ་དབྱིངས་ཆེན་པོས་ཡར་རྒྱས་གཏོང་མུས་ཡིན་པ་རེད།
གསར་འགོད་པ། དཔལ་ལྡན།
