བོད་རིགས་ལས་བྱེད་བསོད་ནམས་རིན་ཆེན་ལ་ཞིབ་བཤེར་བྱེད་ཀྱི་འདུག

གཞུང་དངུལ་སྤྱད་ནས་སྤྲོ་སྐྱིད་མི་གཏོང་བ་དང་གཉེན་སྟོན་འདས་མཆོད་སོགས་ནས་རྒྱུ་ནོར་མི་ལེན་པ། ཡུལ་གྲོགས་སློབ་གྲོགས་སོགས་ཀྱི་འདུ་ཚོགས་ལ་གཏན་ནས་ཞུགས་མི་ཆོག་པ་སོགས་ཀྱི་གཏན་འབེབ་དོན་ཚན་བརྒྱད་དང་འགལ་བའི་ཉེས་མིང་འོག་བོད་མངའ་རིས་ས་ཁུལ་གྱི་བོད་རིགས་ལས་བྱེད་ཅིག་ལ་ཞིབ་བཤེར་བྱེད་བཞིན་ཡོད་འདུག

ཁ་སང་རྒྱ་ནག་གཞུང་འབྲེལ་དྲ་ལམ་དུ་གནས་ཚུལ་ཐོན་པ་ལྟར་ན། བོད་མངའ་རིས་ས་ཁུལ་རུ་ཐོག་རྫོང་གི་ཐན་ཞོད་གནོད་འཚེ་སྔོན་འགོག་ལྟེ་གནས་ཟེར་བའི་ལས་བྱེད་བསོད་ནམས་རིན་ཆེན་ཞེས་པ་ཞིག་གིས།  རྒྱ་ནག་དབུས་གཞུང་གིས་གཏན་འབེབ་དོན་ཚན་བརྒྱད་ཀྱི་དགོངས་དོན་ཟེར་བ་དང་འགལ་བའི་ཉེས་མིང་འོག་ལས་གནས་ནས་ཕྱིར་འབུད་བཏང་སྟེ། ཞིབ་བཤེར་ལས་ཁུངས་ནས་ཞིབ་བཤེར་བྱེད་ཀྱི་ཡོད་འདུག་ལ། འདས་པའི་ལོ་ཤས་ནང་རྒྱ་ནག་གཞུང་གིས་གཏན་འབེབ་དོན་ཚན་བརྒྱད་ཟེར་བའི་འོག་ནས་བོད་མི་མང་པོ་གནས་དབྱུང་དང་བཙོན་འཇུག་ཉེས་ཆད་བཅད་ཡོད་པ་རེད།

དེ་རིང་འདི་གའི་གསར་འགོད་པས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་ཉི་འོད་ལགས་སུ། རྒྱ་ནག་གཞུང་གིས་ད་ལྟ་བར་དུ་བོད་མི་མང་པོར་ཉེས་འཛུགས་བྱས་པའི་གཏན་འབེབ་དོན་ཚན་བརྒྱད་དང་འགལ་འདུག་ཟེར་བའི་དོན་ཚན་དེ་དག་གང་ཡིན་པ་དང་། དེ་དག་ཁྲིམས་མཐུན་ཞིག་ཡིན་མིན་དྲིས་པར་ཁོང་གིས། སྤྱིར་བཏང་གིས་རྒྱ་ནག་དབུས་གཞུང་གིས་གཏན་འབེབ་བྱས་ཡོད་པའི་དོན་ཚན་བརྒྱད་དེ་དག་ཁྲིམས་དང་མ་མཐུན་པ་དམིགས་བསལ་ཡོད་མ་རེད། དོན་ཚན་བརྒྱད་པོ་དེ་དག་ཁོ་རང་ཚོའི་གཞུང་གི་ལས་བྱེད་ཡིན་ན། གཞུང་གི་བྱེད་སྒོ་ཁག་དང་ལས་འགུལ་མང་པོ་ཡོད་པ་དང་། གཞུང་གི་རྒྱུ་དངོས་ལྐོག་ཟ་རུལ་སུངས་བཏང་བ་དང་བེད་སྤྱོད་ལོག་པ་གཏོང་བ་བཀག་འགོག་ཆེད་དུ་གཞུང་གི་རྒྱུ་དངོས་བེད་སྤྱོད་གཏོང་བར་ཚད་གཞི་ཡོད་ཅིང་། འདིའི་སྒང་ལ་ངའི་ངོས་ནས་དམིགས་བསལ་གྱིས་ཁྲིམས་དང་འགལ་བ་དང་ལྷག་པར་དུ་འགྲོ་བ་མིའི་ཁྲིམས་དང་འགལ་བ་མཐོང་མ་སོང་། ཅེས་བརྗོད་བྱུང་།

ཡང་ཁོང་གིས། སྤྱིར་བཏང་གིས་བོད་ནང་དང་རྒྱ་ནག་ཁོ་རང་ཚོའི་ནང་ཁུལ་ལའང་ལས་བྱེད་མང་པོ་ཞིག་ལ་ཉེས་ཆད་གཏོང་གི་ཡོད་རེད་ལ། ཁྲིམས་དེ་ག་རང་ལ་བལྟས་པ་ཡིན་ན་དམིགས་བསལ་གྱིས་ཁྲིམས་འདི་མི་རུང་བ་དེ་འདྲ་མི་འདུག་ཀྱང་། རྒྱ་ནག་གི་བྱེད་སྟངས་སྤྱོད་སྟངས་ག་རེ་ཡོད་རེད་ཟེར་ན། ད་ལྟ་གཏན་འབེབ་དོན་ཚན་བརྒྱད་ནང་བཞིན་གྱི་ཁྲིམས་མང་པོ་ཞིག་ལག་ཆར་བེད་སྤྱོད་བྱ་རྒྱུའི་ཐབས་ཤེས་མང་པོ་གཏོང་གི་འདུག དཔེར་ན་ལས་བྱེད་གཅིག་གིས་༧གོང་ས་མཆོག་ལ་དད་པ་བྱེད་པ་དང་ཆོས་ལུགས་ལ་དད་པ་བྱེད་པ་དེ་འདྲ་བྱུང་བ་ཡིན་ན། དོན་ཚན་བརྒྱད་དེ་བེད་སྤྱོད་བྱས་ཏེ་འབུར་འཇོམས་གཏོང་རྒྱུའི་གནས་སྟངས་ཀྱང་མཚམས་མཚམས་འཕྲད་སྲིད་པ་ཞིག་རེད་འདུག དེ་མིན་དོན་ཚན་བརྒྱད་པོ་དེ་དག་ཁྲིམས་དང་འགལ་བ་མི་འདུག་ཀྱང་། བེད་སྤྱོད་གཏོང་སྟངས་ཀྱི་ཆ་ནས་ལག་བསྟར་བྱེད་སྐབས་ཁོ་ཚོས་དམིགས་ཡུལ་གཞན་པ་བཅངས་ཏེ་དོན་ཚན་བརྒྱད་ལ་ཁ་གཡར་ནས་བོད་པའི་ལས་བྱེད་མང་པོ་ཞིག་ལ་ཉེས་བཅད་བཏང་བའི་གནས་ཚུལ་ཕྲན་བུ་བྱུང་གི་འདུག ཅེས་བརྗོད་བྱུང་།

དེ་འབྲེལ་གྱི་རྒྱ་ནག་གཞུང་གི་གནས་ཚུལ་ནང་། བསོད་ནམས་རིན་ཆེན་གཞུང་ཞབས་པ་ཞིག་ཡིན་ནའང་། གཏན་འབེབ་དོན་ཚན་བརྒྱད་ཟེར་བར་འགལ་བ་དང་། ཁྲིམས་ལུགས་ཁྲིམས་སྲོལ་དང་འགལ་བ། ལྐོག་རྔན་བླངས་པའི་དོགས་གཞིའི་འོག རྒྱ་ནག་དམར་ཤོག་གཞུང་གི་ལྟ་ཞིབ་བཅའ་ཁྲིམས་དང་གཞུང་ཞབས་པའི་སྲིད་དོན་ཆད་གཅོད་བཅའ་ཁྲིམས་ཟེར་བ་སོགས་ཀྱི་འབྲེལ་ཡོད་གཏན་འབེབ་གཞིར་བཟུང་། བསོད་ནམས་རིན་ཆེན་གཞུང་གི་ལས་གནས་ནས་ཕྱིར་འབུད་གཏང་རྒྱུ་དང་། ཁྲིམས་འགལ་གྱི་ཐོབ་ཆ་འཕྲོག་སྟེ། ཞིབ་དཔྱོད་ལས་ཁུངས་ལ་རྩིས་སྤྲོད་ཀྱི་ཐག་གཅོད་བྱས་ཡོད་སྐོར་བཀོད་འདུག

རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་ཕྱི་ལོ་ ༢༠༡༢ ལོ་ནས་ཏང་ཡོན་ལས་བྱེད་ཀྱིས་བྱེད་མི་ཆོག་པའི་དོན་ཚན་ ༨ ཅེས་པ་གཏན་འབེབ་བརྒྱུད་བསྒྲགས་བྱས་ཡོད་པ་དང་། ཏང་ཡོན་ལས་བྱེད་པས་བྱེད་མི་ཆོག་པ་ནི། གཅིག སྒྲིག་སྲོལ་ལས་འགལ་ཏེ་གཞུང་དངུལ་སྤྱད་ནས་བཟའ་བཏུང་དང་། ཡུལ་སྐོར། མཐོ་རིམ་འཛད་སྤྱོད་རོལ་རྩེད་ལུས་སྦྱོང་བྱེད་སྒོར་ཞུགས་གཏན་ནས་མི་ཆོག་པ་དང་། གཉིས། གཞུང་དངུལ་སྤྱད་ནས་ལོ་གསར་རྟེན་འབྲེལ་ཁུག་དམར་དང་ཤོག་སྦག་སོགས་གཏན་ནས་ཉོ་མི་ཆོག གསུམ། གཞུང་དངུལ་སྤྱད་ནས་སྣེ་ལེན་འཚམས་འདྲི་དང་ཡུལ་སྐོར་སོགས་གཞུང་དོན་མ་ཡིན་པའི་བྱེད་སྒོ་གཏན་ནས་སྤེལ་མི་ཆོག བཞི། གཞུང་འཁོར་སྒེར་སྤྱོད་དམ་ཡང་སྒེར་འཁོར་གཞུང་གསོའི་རིགས་གཏན་ནས་བྱེད་མི་ཆོག ལྔ།  སྒྲིག་སྲོལ་ལས་འགལ་ནས་ལག་རྟགས་དངོས་པོ་དང་། དངུལ། འཛད་སྤྱོད་ཁུག་དམར་སོགས་གཏན་ནས་ལེན་མི་ཆོག དྲུག སྒེར་གྱི་སྤྲོ་རྩེད་འདུ་ཁང་ནང་གཏན་ནས་འཛུལ་མི་ཆོག བདུན། སྒྲིག་སྲོལ་ལས་འགལ་བའི་ཐོག་ནས་གཉེན་སྟོན་དང་འདས་མཆོད་སོགས་ལ་ཁ་གཡར་ནས་རྒྱུ་ནོར་ལེན་ཐབས་གཏན་ནས་བྱས་མི་ཆོག བརྒྱད། ཡུལ་གྲོགས་འདུ་ཚོགས་དང་། སློབ་གྲོགས་འདུ་ཚོགས། འཐབ་གྲོགས་འདུ་ཚོགས་ལ་གཏན་ནས་ཞུགས་མི་ཆོག་པ་བཅས་རེད་འདུག

གསར་འགོད་པ། བསྟན་འཛིན་ཕུར་བུ།