ཟླ་འདིའི་ཕྱི་ཚེས་ ༡༥ ཉིན་གྱི་ཞོགས་པར་སྐྱབས་རྗེ་འདུད་འཇོམས་སྐུ་ཕྲེང་གསུམ་པ་སངས་རྒྱས་པདྨ་བཞད་པ་མཆོག་དགུང་གྲངས་ ༣༢ ཐོག་གཟིམ་ཤག་ཏུ་ཞི་བར་སྐུ་གཤེགས་ཏེ་ཐུགས་དམ་དུ་བཞུགས་ཡོད་འདུག
དེ་རིང་བདུད་འཇོམས་རིན་པོ་ཆེ་མཆོག་གི་བླ་བྲང་ནས་བོད་རྒྱ་དབྱིན་གསུམ་སྟེང་ནས་གསལ་བསྒྲགས་ཤིག་སྤེལ་བའི་ནང་། བོད་ལྕགས་གླང་ཟླ ༡༢ ཚེས་ ༡༤ ཉིན་གྱི་ཞོགས་པའི་གསོལ་ཚོགས་སུ་ཕེབས་བསུར་བཅར་སྐབས་བློ་ཡུལ་དུ་ཤོང་དཀའ་བ་ཞིག་ལ་ཁོང་དགོངས་པ་གཞན་དོན་དུ་གཤེགས་ཏེ། གདུལ་བྱ་རྟག་འཛིན་ཅན་རྣམས་ཀྱི་ངོར་ཕྱི་གསལ་གཟུགས་སྐུའི་བཀོད་པ་ནང་བཞིན་ཀ་དག་ཆེན་པའི་ཀློང་དུ་བསྡུས་ཚུལ་བསྟན་དེང་གི་ཆར་ཞལ་མདངས་མ་ཉམས་པར་ཐུགས་དམ་དུ་བཞུགས་མུས་ལ། རྗེས་སུ་ཐུགས་དམ་ལས་གྲོལ་རྗེས་ཞེའུ་དགོན་དུ་གདན་འདྲེན་ནས་དགུང་ཞག་ཞེ་དགུའི་རིང་རྡོར་སེམས་བླ་མ་མཆོད་པའི་སྒོ་ནས་དགོངས་རྫོགས་ཞུ་རྒྱུ་ལགས་ན། རྒྱ་གར། བལ་ཡུལ། འབྲས་ལྗོངས། བོད་ཡུལ་གཙོས་འཛམ་གླིང་ཡུལ་གྲུ་ཁག་གི་རང་ལུགས་དགོན་སྡེ་སློབ་ཚོགས་ཀུན་གྱིས་བླ་མའི་རྣམ་འབྱོར་དང་། བླ་མ་མཆོད་པའི་ཆོ་ག་སོགས་རྣམ་དཀར་དགོངས་རྫོགས་ཀྱི་ལས་ལ་ཅི་ནུས་སུ་འབད་པ་དང་བཅས་ཐུགས་སྨོན་གནང་བར་ཞུ། ཞེས་སོགས་འཁོད་འདུག
སྐྱབས་རྗེ་བདུད་འཇོམས་སྐུ་ཕྲེང་གསུམ་པ་སངས་རྒྱས་པདྨ་བཞད་པ་མཆོག་ནི། ཕྱི་ལོ་ ༡༩༩༠ ལོར་བདུད་འཇོམས་འཇིགས་བྲལ་ཡེ་ཤེས་རྡོ་རྗེའི་རིགས་སྲས་ཡབ་མདོ་བླ་འཇིགས་མེད་ཆོས་ཀྱི་ཉི་མ་རིན་པོ་ཆེ་དང་ཡུམ་པདྨ་མཁའ་འགྲོ་རྣམ་གཉིས་ཀྱི་སྲས་སུ་སྐུ་འཁྲུངས་ཡོད་པ་དང་། ༸སྐྱབས་རྗེ་གོང་མས་མ་འོངས་མངོན་གཟིགས་ཀྱིས་འདས་ཁའི་ཞལ་ཆེམས་ལས་སླར་རང་གི་ཁྱིམ་རྒྱུད་དུ་འབྱོན་པར་ལུང་བསྟན་པ་དང་། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་རིན་པོ་ཆེ་དང་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་རྣམ་གཉིས་ཀྱི་གསུང་འཕྲིན་ཕེབས་དོན་བཞིན། བྱ་བྲལ་རིན་པོ་ཆེ། ༸དཔལ་ས་སྐྱའི་སྒྲོལ་མ་ཕོ་བྲང་གོང་མ་ཁྲི་ཆེན་རིན་པོ་ཆེ་དང་། ས་སྐྱའི་བདག་ཆེན་དང་འབྲི་གུང་༸སྐྱབས་མགོན་ཆེ་ཚང་རིན་པོ་ཆེ། དིལ་མགོ་མཁྱེན་བརྩེ་རིན་པོ་ཆེ་སོགས་གསར་རྙིང་གི་བླ་ཆེན་མཁས་གྲུབ་དམ་པ་རྣམས་ཀྱིས་མགྲིན་གཅིག་ཏུ་བདུད་འཇོམས་རིན་པོ་ཆེ་སྐུ་ཕྲེང་གཉིས་པའི་ཡང་སྲིད་དུ་ངོས་འཛིན་མཛད་ཡོད་འདུག ཕྱི་ལོ་ ༡༩༩༤ ལོར་བྱ་བྲལ་རིན་པོ་ཆེས་དངོས་སུ་གསུང་འཕྲིན་སྩལ་ཏེ་ཡང་སྲིད་རིན་པོ་ཆེ་མཆོག་བལ་ཡུལ་དུ་གདན་འདྲེན་ཞུས་ཡོད་པ་དང་། ཕྱི་ལོ་ ༢༠༡༨ ནས་རིན་པོ་ཆེ་མཆོག་ཨ་རི་དང་ཁེ་ན་ཌ། ཡུ་རོབ་རྒྱལ་ཁབ་སི་པེན། སུད་སི། ཧྥ་རན་སི་སོགས་སུ་ཆིབས་བསྒྱུར་བསྐྱངས་ཏེ་ཆོས་ཕྱོགས་ཀྱི་མཛད་པ་བསྐྱངས་གནང་ཡོད་འདུག
གསར་འགོད་པ། དཔལ་ལྡན།
