རྒྱ་ནག་གཞུང་གིས་བོད་ནང་ཚད་བཀག་མེད་པའི་ཐེམ་ཐོའི་སྲིད་ཇུས་ལག་བསྟར་བྱེད་བཞིན་པའི་དམིགས་ཡུལ་གཙོ་བོ་ནི་བོད་མི་རིགས་ཀྱི་ངོ་བོ་རྩ་གཏོར་དང་བོད་མི་རྣམས་རྒྱའི་ཁོངས་སུ་འཐིམ་ཐབས་སོགས་བོད་རྒྱུ་བསྒྱུར་གྱི་སྲིད་ཇུས་ཤིག་ཡིན་སྐོར་བརྗོད་བྱུང་།
ཁ་སང་རྒྱ་ནག་གཞུང་ཕྱོགས་ཀྱིས་སྤེལ་བའི་གནས་ཚུལ་ལྟར་ན། ལྷ་ས་གྲོང་ཁྱེར་གྲྭ་བཞི་མངགས་གཏོང་ཁང་ཟེར་བ་ཞིག་གིས་བསྡུས་པའི་ཚོགས་འདུ་ཐོག ཐེམ་ཐོ་ལས་དོན་སྤེལ་མཁན་གྱི་མི་དམངས་ཉེན་རྟོག་པས། བོད་ཀྱི་རྒྱལ་ས་ལྷ་སར་གནས་སྡོད་པ་རྣམས་ལ་ཚད་བཀག་མེད་པའི་ཐེམ་ཐོའི་སྲིད་ཇུས་ཟེར་བ་ཞིག་དྲིལ་བསྒྲགས་བྱས་ཏེ། ལོ་བཅོ་བརྒྱད་ཡན་གྱི་མི་ཞིག་ཡིན་ཕྱིན་སྤྱི་ཚོགས་ཞབས་ཞུ་སྒྲུབ་ཀྱི་ཡོད་མེད་ཁྱད་པར་གང་ཡང་མེད་ཁར། ལྷ་སའི་ས་ཁུལ་གྱི་གྲོང་ཁྱེར་དང་གྲོང་རྡལ་གང་རུང་དུ་གཏན་འཇགས་གནས་སྡོད་ཀྱི་ཐེམ་ཐོ་འགོད་ཆོག་པ་མ་ཟད། མི་གང་དེའི་བཟའ་ཟླ་དང་བུ་ཕྲུག ཁྱོ་ཤུག་གཉིས་ཀྱི་ཕ་མ་བཅས་ཐེམ་ཐོའི་ནང་ཐོ་འགོད་བྱ་ཆོག་གི་ཡོད་སྐོར་སོགས་བསྒྲགས་འདུག
དེའི་ཐད་བོད་ཀྱི་སྲིད་ཇུས་ཉམས་ཞིབ་ཁང་གི་ཉམས་ཞིབ་པ་ཉི་འོད་ལགས་ཀྱིས། ཉེ་བའི་ཆར་རྒྱ་ནག་གཞུང་གིས་བོད་ནང་དུ་མི་རིགས་མཐུན་སྒྲིལ་དང་རྒྱ་ནག་མི་དམངས་གཅིག་འགྱུར་གྱི་འདུ་ཤེས་བསྐྲུན་དགོས་ཟེར་ནས། བོད་ཀྱི་སྐད་ཡིག་དང་སློབ་གསོ་སོགས་ཀྱི་ཐད་ནས་བོད་རྒྱ་བསྒྱུར་གྱི་སྲིད་ཇུས་མང་པོ་ཞིག་ལག་བསྟར་བྱེད་མུས་ཡིན་པ་དང་། ད་ཐེངས་ཀྱི་ཚད་བཀག་མེད་པའི་ཐེམ་ཐོའི་སྲིད་ཇུས་དེའི་དགོས་དམིགས་གཙོ་བོ་ཡང་བོད་ནང་དུ་རྒྱ་རིགས་ཀྱི་འདུ་སྡོད་ཚུགས་ཐབས། བོད་མི་རིགས་ཀྱི་ངོ་བོ་སོགས་རྩ་གཏོར་དང་། རིམ་པས་བོད་མི་རྣམས་རྒྱ་མིའི་ཁོངས་སུ་འཐིམ་ཐབས་ཀྱི་སྲིད་ཇུས་ངན་པ་ཞིག་བསྟིང་མགོ་བཙུགས་ཡོད་པ་དང་། དེ་བཞིན་བོད་ནང་གི་མི་རིགས་རང་སྐྱོང་གི་ཐོབ་ཐང་སོགས་ལ་དོ་ཕོག་ཆེན་པོ་ཡོད་པ་རེད། འཕྲད་ཕུགས་གཉིས་ཀྱི་ཐོག་ནས་བོད་མི་རིགས་ཀྱི་ངོ་བོ་དང་བོད་མིའི་འདུ་སྡོད་ས་གནས་ཁག་ཏུ་རྒྱ་མི་གཏན་སྡོད་ཚུགས་ཐབས་ཀྱི་སྲིད་ཇུས་ཞིག་ཡིན་པའི་ཚོད་དཔག་བྱེད་ཀྱི་ཡོད་སྐོར་སོགས་འགྲེལ་བརྗོད་བྱས་སོང་།
བོད་ཀྱི་རྒྱལ་ས་ལྷ་སའི་ཕྱོགས་སུ་གཏན་འཇགས་གནས་སྡོད་ཀྱི་ཁྱིམ་ཐོ་འགོད་པའི་གནས་ཚུལ་དེ་ཐོག་མར། འདས་ལོའི་ཟླ ༡༠ ཚེས་ ༢༡ ཉིན་དོན་ཚན་བཞིའི་འོག་ནས་བོད་ཀྱི་རྒྱལ་ས་ལྷ་ས་རུ་དྲིལ་བསྒྲགས་བྱས་ཡོད་པ་དང་། དོན་ཚན་དེ་དག་གི་ནང་དུ་ལོ་བཅོ་བརྒྱད་ཡན་ཡིན་དགོས་པ་དང་། གྲོང་ཁྱེར་དང་གྲོང་རྡལ་གང་དུ་གནས་སྡོད་བྱས་པའི་གཏན་ཁེལ་དུས་ཡུན་མི་དགོས་པ། ཁྱིམ་ཐོ་འགོད་པར་ཆ་རྐྱེན་གྱི་ཚད་བཀག་མེད་པར་གང་འདོད་ཀྱིས་ས་ཆ་འདེམས་ཆོག་པ། གྲོང་ཁྱེར་ནས་ཡུལ་གཞན་དང་ཡུལ་གཞན་ནས་གྲོང་ཁྱེར་དུ་གཞིས་ཆགས་མཁན་རྣམས་ལ་གནས་སྤོས་དབུལ་སྐྱོར་གྱི་རོགས་རམ་ཡོད་པ། ལྷ་སར་གཞིས་ཆགས་པར་ཁྲིམས་མཐུན་གྱི་གཏན་འཇགས་སྡོད་གནས་དང་ལས་ཞུགས་བརྟན་པོ་དགོས་པའི་གཞི་རྩའི་ཆ་རྐྱེན་སོགས་གང་ཡང་མི་དགོས་པ་བཅས་གང་ལ་གང་འདོད་དུ་ཁྱིམ་ཐོ་བཀོད་ནས་གཞིས་ཆགས་པ་དང་གཞིས་སྤོས་ཆོག་གི་ཡོད་པ་མ་ཟད། ལྷ་སར་ཚོང་ལས་ཀྱི་སླད་དུ་གནས་བཞིན་པའི་ལྷ་སའི་ཉེ་འཁོར་གྱི་གྲོང་གསེབ་ཁག་གི་མི་མང་གིས་གྲོང་གསེབ་ཀྱི་ཁྱིམ་ཐོ་བློས་གཏོང་བྱས་ནས་ལྷ་སར་ཁྱིམ་ཐོ་འགོད་པ་འམ། ཡང་ན་ལྷ་སའི་ཁྱིམ་ཐོ་གྲོང་གསེབ་དུ་གནས་སྤོར་དགོས་པ་སོགས་ཁྱིམ་ཐོ་གཅིག་ལས་ལྷག་ཉར་མི་ཆོག་པར་བཟོས་ཡོད་འདུག
གསར་འགོད་པ། དཔལ་ལྡན།
