ཕྱི་དྲིལ་བཀའ་བློན་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པར་ཐུག་འཕྲད་གནང་།

ཁ་སང་ཕྱི་ཚེས་ ༢༤ ཉིན་ཨ་རིའི་ཕྱི་སྲིད་ལྷན་ཁང་དུ་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛི་ར་ཛེ་ཡ་ (Uzra Zeya) ལགས་སུ་ཐུག་འཕྲད་གནང་ཡོད་འདུག

L-R: OoT Secretary Tashi Dhondup, Representative Namgyal Choedup, Special Coordinator Under Secretary Uzra Zeya, DIIR Kalon(Minister) Norzin Dolma, and DIIR Secretary Karma Choeying.

སྐབས་དེར་ཕྱི་དྲིལ་བཀའ་བློན་མཆོག་གིས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་ཚབ་ཞུས་ཏེ། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛི་ར་ཛེ་ཡ་ལགས་ལ་འཚམས་འདྲི་ཞུས་ཤིང་། བཀའ་ཤག་གསར་པའི་ངོས་ནས་དབུ་མའི་ལམ་གྱི་སྲིད་ཇུས་བརྒྱུད་བོད་རྒྱའི་དཀའ་རྙོག་སེལ་ཐབས་གནང་རྒྱུའི་ཆོད་སེམས་བརྟན་པོ་ཡོད་སྐོར་དང་། ལྕམ་སྐུ་ཨུ་ཛི་ར་ཛེ་ཡ་ལགས་ལ་མཛད་འཕྲིན་རྒྱས་པོ་ཡོད་ཀྱང་མཇལ་འཕྲད་ཀྱི་དུས་ཚོད་དང་བོད་མིར་རྒྱབ་སྐྱོར་གནང་དང་གནང་མུས་ཡིན་པར་ཐུགས་རྗེ་ཆེ་ཞུས་ཡོད་འདུག

ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛི་ར་ཛེ་ཡ་ལགས་ཀྱིས་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཀའ་བློན་དུ་བསྐོ་གཞག་བྱུང་བར་དགའ་བསུ་ཞུས་གནང་ཡོད་འདུག་ལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་ལྷན་དུ་གང་མགྱོགས་མཇལ་འཕྲད་ཞུ་འདོད་ཀྱི་འདུན་པ་ཤུགས་ཆེ་ཡོད་སྐོར་གསུངས་ཡོད་འདུག

Kalon with Rashad Hussein, US Ambassador-at-large for International Religious Freedom.

ད་ལན་ཕྱི་དྲིལ་བཀའ་བློན་མཆོག་དང་དྲུང་ཆེ་ཀརྨ་ཆོས་དབྱིངས་ལགས་རྣམ་གཉིས་བདུན་ཕྲག་གཅིག་རིང་ཨ་རིའི་ཕྱི་སྲིད་ལྷན་ཁང་དང་། ཨ་རིའི་རྒྱལ་ས་ཝ་ཤིང་ཊོན་ཁུལ་གྱི་གནད་ཡོད་མི་སྣ་ཁག་ཅིག་དང་ཐུག་འཕྲད་སླད། ཟླ་འདིའི་ཕྱི་ཚེས་ ༢༠ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་གནང་ཡོད་འདུག་ལ། ཐེངས་འདིའི་མཇལ་འཕྲད་ཀྱིས་འབྱུང་འགྱུར་ཨ་རིའི་གཞུང་དང་བོད་མིའི་སྒྲིག་འཛུགས་དབར་བོད་རྒྱའི་དཀའ་རྙོག་སེལ་ཐབས་ཀྱི་ཕྱག་ལས་ཐད་གཞི་རྟེན་གང་ལེགས་བསྐྲུན་ཐབས་གནང་གི་ཡོད་འདུག

བོད་མིའི་སྒྲིག་འཛུགས་ཀྱི་དྲ་བའི་སྟེང་གནས་ཚུལ་བཀོད་པ་ལྟར་ན། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་གཙོས་པའི་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་དང་བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས། དྲུང་ཆེ་བཀྲ་ཤིས་དོན་གྲུབ་ལགས་བཅས་ཀྱིས། ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་སྐུ་ཞབས་ར་ཤཌ་ཧུ་སེན་ (Rashad Hussain) ལགས་དང་། ཨ་རིའི་ཕྱི་སྲིད་ལྷན་ཁང་གི་མི་འབོར་དང་། སྐྱབས་བཅོལ་བ། གཞིས་སྤོས་བཅས་ཀྱི་ལས་དོན་ཚན་པའི་ཕྱི་སྲིད་དྲུང་ཆེའི་ཕྱག་རོགས་ལྕམ་སྐུ་ནན་སི་ཨི་ཛོ་ཇེག་སན་ (Nancy Izzo Jackson-A) ལགས། དེ་བཞིན་ཨ་རིའི་ཕྱི་སྲིད་ལྷན་ཁང་གི་དམངས་གཙོ་དང་ཆོས་ལུགས། ངལ་རྩོལ་བཅས་ཀྱི་ཚན་པའི་ཨ་རིའི་ཕྱི་སྲིད་དྲུང་ཆེའི་ཕྱག་རོགས་སྐུ་ཞབས་སི་ཁོ་ཊི་བྷུ་སི་བྷེ་ (Scott Busby-A) ལགས་བཅས་དང་མཇལ་འཕྲད་གནང་ཡོད་འདུག

Kalon with Nancy Izzo Jackson, A/Assistant Secretary of State, PRM(Population, Refugee and Migration), and staffers.

བཀའ་བློན་ནོར་འཛིན་སྒྲོལ་མ་མཆོག་གི་ཐེངས་འདིའི་གཟིགས་སྐོར་དེ་ནི། འདས་ལོའི་ཕྱི་ཟླ་ ༡༡ ཚེས་ ༡༠ ཉིན་བཀའ་བློན་མཆོག་གིས་ལས་འཁུར་དམ་འབུལ་ཞུས་རྗེས་ཕྱི་རྒྱལ་ཡུལ་གྲུའི་ནང་གཞུང་འབྲེལ་གཟིགས་སྐོར་དུ་ཕེབས་པ་ཐེངས་དང་པོ་ཆགས་ཀྱི་ཡོད་ཅིང་། བོད་མིའི་སྒྲིག་འཛུགས་ཀྱི་བཀའ་བློན་ཞིག་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛི་ར་ཛེ་ཡ་ (Uzra Zeya) ལགས་དང་དངོས་སུ་མཇལ་འཕྲད་གནང་བ་ཐོག་མ་དེ་ཆགས་ཀྱི་ཡོད་པ་རེད་འདུག

གསར་འགོད་པ། བསྟན་འཛིན་ཕུར་བུ།