སྟག་ལོའི་ནང་གི་བོད།

ཕུན་ཚོགས་དབང་རྒྱལ། བོད་ནང་སྐུ་ཚབ་ཐེངས་གཉིས་པ་ཕེབས་སྐབས་ཀྱི་ཁོངས་མི་ཞིག

བོད་པས་བོད་ཀྱི་ལོ་གསར་ (ཕྱི་ཟླ་གསུམ་པའི་ཚེས་གསུམ་) གྱི་རྟེན་འབྲེལ་བྱེད་བཞིན་པ་རེད། ལོ་གསར་རྙིང་བརྗེ་བའི་སྐབས་འདིར་སྔོན་བྱུང་གི་གནས་སྟངས་དང་། བོད་མིས་རང་གི་རྩ་དོན་སྐོར་ལ་ག་རེ་བྱེད་ཐུབ་པ་དང་མི་ཐུབ་པ། རྒྱ་མིས་ཁོ་ཚོའི་དགྲ་བོ་ལ་ཇི་ལྟར་དབང་དུ་བསྡུད་པ་བཅས་ལ་ཕྱིར་མིག་ཞིག་ལྟ་རྒྱུའི་དུས་སྐབས་བཟང་པོ་ཞིག་རེད། ངས་ག་རེ་ཞུས་པ་དེ་མཁྱེན་ཐབས་སུ་ར་སྤྲོད་ཀྱི་དངོས་བྱུང་གློག་བརྙན་ཁྱད་དུ་འཕགས་པ་གཉིས་ལ་བལྟ་དགོས། དང་པོ་དེ་བྷི་བྷི་སིས་ཐབས་ཕྱོགས་གཅིག་གྱུར་གྱི་ལས་ཁུངས་ (United Front Works Department) ནི་ “རྒྱ་ཡི་མིག་འཕྲུལ་གྱི་གོ་མཚོན་”རེད་ཅེས་པ་དེ་རེད། (BBC Iplayer ནང་ཡོད། ) འཐབ་ཕྱོགས་གཅིག་གྱུར་གྱི་ལས་ཁུངས་(United Front Works Department) ནི་རྒྱ་ནག་གི་ནང་འཁྲུག་སྐབས་གསར་འཛུགས་བྱས་པ་དང་། དེ་ནས་བཟུང་ཐབས་ཕྱོགས་གཅིག་གྱུར་ཁང་ནི་རྒྱ་ནག་དམར་ཕྱོགས་ཚོགས་པར་ཁ་གཏད་བྱེད་མཁན་རང་ཕྱོགས་སུ་འགུག་ཐབས་དང་གདོང་ལེན་བྱེད་ཕྱོགས་ཀྱི་སྲིད་བྱུས་གལ་ཆེན་ལག་བསྟར་བྱེད་མཁན་ཞིག་ཆགས་པ་རེད། དངོས་བྱུང་གློག་བརྙན་གཞན་དེ་ནི་“ཁྲུང་ཁྲུང་དཀར་པོའི་གློག་བརྙན་འདོན་སྤེལ་ཁང”ནས་བཟོས་པའི་ “ཉི་མ་སྤྲིན་པའི་འོག་” ཞེས་པ་དེ་ཡིན།  དེ་ནི་བོད་མིས་རང་དབང་གི་འཐབ་རྩོད་སྐོར་གྱི་གློག་བརྙན་ཞིག་རེད། གཤམ་གསལ་གྱི་དྲ་ཐོག་ནས་གཟིགས་ཐུབ། https://nobeijing2022.org/iwillnotwatch/

ད་ལོའི་ལོ་གསར་འདི་ནི་སྟག་ལོ་རེད། ལོ་ ༥༠ གོང་ང་རང་ལྷ་སར་རྒྱ་མིའི་སློབ་གྲྭ་ཞིག་ཏུ་ཡོད་སྐབས་ “ཤོག་གུའི་སྟག་” ཞེས་ལྷ་སའི་བར་སྐོར་ནང་འབོད་ཚིག་བསྒྲགས་པའི་སྐོར་གྱི་གནས་ཚུལ་དེ་ངས་རྣམ་པ་ཚོར་ཞུ་འདོད་བྱུང་། ལོ་ ༣༠ རྗེས་སུ་ང་ཐེངས་གཅིག་བོད་ཀྱི་ལྷ་སའི་མཐོ་རིམ་སློབ་གྲྭ་དེར་བསྐྱོད་སྐབས། རང་ཉིད་སྔོན་ཆན་སོང་མྱོང་སའི་སློབ་གྲྭ་དེ་ནི་རྒྱ་མིའི་ལས་བྱེད་པའི་སློབ་གྲྭ་ཞིག་རེད་འདུག ངས་རང་ཉིད་གང་འདྲ་བྱས་ནས་སློབ་གྲྭ་དེའི་ཞུགས་པ་དྲན་གྱི་མི་འདུག

ངས་ཞུ་རྒྱུའི་གནས་ཚུལ་ནི་ “ཨ་མི་རི་ཀ་ནི་ཤོག་གུའི་སྟག་ཅིག་རེད་” ཅེས་པའི་འབོད་ཚིག་ཅིག་རེད། ང་ཚོ་སློབ་ཕྲུག་ཚོ་ཡང་དང་བསྐྱར་དུ་སྲང་ལམ་དུ་ཐོན་ནས་ “ཁྲོ་ཤན་མི་དམངས་ལ་རྒྱབ་སྐྱོར་ཡོད།” “བཙན་རྒྱལ་ཨ་མི་རི་ཀ་ཤོག་གུའི་སྟག་རེད།” “བཅིངས་གྲོལ་དམག་མི་རྒྱལ་ལོ་”ཞེས་དར་དམར་ལག་ཏུ་འཁྱེར་ཏེ་སྐད་འབོད་ཁྲོམ་སྐོར་བྱ་དགོས་པ་རེད། སྐབས་དེར་ཁྲོ་ཤན་ཟེར་བའི་རྒྱལ་ཁབ་དེ་གང་ཡིན་པ་དང་། ཨ་མི་རི་ཀ་འཛམ་གླིང་གི་ས་ཕྱོགས་ག་བར་ཡོད་མེད་ང་ཚོས་ཤེས་ཀྱི་མེད། ཡིན་ན་ཡང་སྟག་ནི་ཤེས་ཀྱི་ཡོད། དེ་ནི་ང་ཚོས་ཡང་ཡང་མཐོང་བའི་བོད་ཀྱི་རླུང་རྟའི་རི་མོའི་ནང་གི་མཐུ་རྩལ་ཆེ་བའི་རྟགས་མཚོན་ཞིག་རེད། སྐབས་དེར་རྒྱ་ནག་གིས་ཨ་མི་རི་ཀ་ནི་ཤོག་གུའི་སྟེང་བྲིས་པའི་སྟག་གི་རི་མོ་རྫིག་པོ་ཙམ་ཞིག་ཡིན་པ་ལས། དོན་དངོས་ཀྱི་ནུས་པ་མེད་པ་རེད་ཞེས་རྗོད་ཀྱིན་ཡོད།

ཕར་ཕྱིར་བལྟས་ཤིག་སློག་སྟེ། སྔ་མོ་ཁྲོ་ཤན་དམག་འཐབ་སྐབས་བཅིངས་གྲོལ་དམག་ལ་རྒྱལ་ཁ་ཐོབ་པ། ཝི་ཏི་ནམ་དང་ཨཕ་གྷན་གྱི་དམག་འཐབ་སྐབས་ཨ་རིས་ཕམ་ཁ་ལེན་དགོས་བྱུང་བ། ཧོང་ཀོང་དུ་བར་ལམ་རྐྱེན་ངན་བྱུང་སྐབས་ཨ་རིས་རོགས་སྐྱོར་མ་ཐུབ་པ་དེ་དག་ཚང་མར་བལྟ་དུས། ཨ་རི་དོན་དངོས་ཀྱི་སྟོབས་ཆེན་རྒྱལ་ཁབ་ཅིག་ཡིན་མིན། ཨ་རིའི་མི་མང་རང་ལ་རང་ཉིད་སྲུང་སྐྱོབ་ཐུབ་པའི་གདེང་འཇགས་དང་གདེང་ཚོད་མེད་པ་སོགས་ཀྱི་དོགས་གཞི་མང་པོ་ཞིག་ཡོང་གི་ཡོད་པས། བོད་མི་རྣམས་ཚུད་པའི་ང་ཚོ་མང་པོ་ཞིག་ལ་རང་རང་གི་དམིགས་ཡུལ་དང་བློ་བརྟན་མེད་པར་ཨ་རིའི་རྒྱབ་སྐྱོར་ལ་བློ་གཏད་བྱས་ཆོག་གམ།

སྟག་ལོ་འདིའི་སྐབས་ནུབ་ཕྱོགས་པའི་སྟག་དེ་སྟག་ངོ་མ་ཡིན་པ་ར་སྤྲོད་བྱེད་པའི་དུས་སྐལ་ཞིག་རེད། སྟག་དེ་རྒྱའི་འབྲུག་དང་ཨུ་རུ་སུའི་དོམ་གྱི་ཁ་གཏད་དུ་ལངས་ནས་དམངས་གཙོ་དང་རང་དབང་སྲུང་སྐྱོབ་བྱེད་པའི་ལོ་ཞིག་རེད་ལ། བོད་མི་དམངས་དང་སྒྲིག་འཛུགས་གཉིས་ཀྱིས་དམིགས་ཡུལ་གཅིག་གི་ཐོག་ནུས་ཤུགས་ཆིག་སྒྲིལ་གྱིས་ཡར་ལངས་ཐུབ་པའི་ར་སྤྲོད་ཁུངས་སྐྱེལ་བྱེད་རྒྱུའི་དུས་ཚོད་ཡག་པོ་ཞིག་ཀྱང་རེད།

དྲི་བ་གཞན་དེ་ནི། ང་ཚོས་གུང་ཁྲན་ཏང་གིས་“མིག་འཕྲུལ་གྱི་གོ་མཚོན་”ནམ་འཐབ་ཕྱོགས་གཅིག་གྱུར་ཁང་བརྒྱུད་ནས་ལས་དོན་ག་འདྲ་སྒྲུབ་ཀྱི་ཡོད་པ་ཤེས་སམ།  ང་ཚོས་ཉི་ཧོང་དང་རྒྱ་ནག་གི་དམག་འཁྲུག་སྐབས། གོ་མིང་ཏང་དང་གུང་ཁྲན་མཉམ་འབྲེལ་གྱིས་རྒྱ་ནག་གི་”མིག་འཕྲུལ་གྱི་གོ་མཚོན་”ལ་རྒྱལ་ཁ་ཐོབ་ཡོད་པ་དྲན་གསོ་བྱ་དགོས།  དེའི་མཐའ་མཇུག་ཏུ་གོ་མན་ཏང་གི་དབང་ཆའང་གུང་ཁྲན་ཏང་ལ་ཤོར་བ་དང་གུང་ཁྲན་ཏང་ལ་རྒྱལ་ཁ་ཐོབ་པ་རེད། རྒྱའི་མིག་འཕྲུལ་གྱི་གོ་མཚོན་དེས། ཨ་རིར་རྒྱ་ནག་མི་དམངས་སྤྱི་མཐུན་རྒྱལ་ཁབ་བདམས་བཅུག་ནས་མཉམ་འབྲེལ་རྒྱལ་ཚོགས་ཀྱི་སྲུང་སྐྱོབ་ལྷན་ཁང་དུ་རྒྱ་ནག་ཞུགས་བཅུག་པ་རེད་ལ། དེའི་མཇུག་འབྲས་སུ་རྒྱ་ནག་གིས་སྟོབས་ཤུགས་རྒྱ་སྐྱེད་ཀྱིས། ནུབ་ཕྱོགས་པའི་དམངས་གཙོའི་ལམ་ལུགས་ཉེན་ཁ་ཚབས་ཆེན་བསྐྲུན་ཐུབ་ཡོད། རྒྱ་ནག་གི་ “མིག་འཕྲུལ་གྱི་གོ་མཚོན་”དེས་བོད་མིའི་སྒྲིག་འཛུགས་ལོག་ལམ་དུ་འཁྲིད་ནས་རང་བཙན་འཐབ་རྩོད་བྱེད་ཀྱི་མེད་པ་དང་།  མཐའ་མར་བོད་དང་འབྲེལ་བའི་གནད་དོན་ཚང་མ་རྒྱ་ནག་ནང་ཁུལ་གྱི་གནས་ཚུལ་ཞིག་ལ་གྱུར་སོང་བ་རེད། དེ་བཞིན་མི་སྒེར་རང་རང་སོ་སོས་རང་ནུས་ཅི་ལྕོགས་ཀྱིས་ངོ་རྒོལ་དང་རང་སྲོག་བློས་བཏང་ནའང་།”མིག་འཕྲུལ་གྱི་གོ་མཚོན་”དེས་བོད་མི་རྣམས་ནས་རང་གི་དགྲ་བོར་ཁ་གཏད་གཅོག་ཐབས་ཐད་ནུས་ཤུགས་འདོན་པར་འཕྲུལ་སྣང་བསྐྲུན་གྱི་ཡོད།

“ཉི་མ་སྤྲིན་པའི་འོག་”ཞེས་པའི་གློག་བརྙན་གྱིས་གསལ་བོར་བསྟན་པ་ཞིག་ལ་གལ་ཏེ་བོད་མི་དམངས་དང་སྒྲིག་འཛུགས་ཐུན་མོང་གིས་དམིགས་ཡུལ་གཅིག་གི་ཐོག་ཆིག་སྒྲིལ་གྱིས་འཐབ་རྩོད་བྱེད་མ་ཐུབ་པ་ཡིན་ན། རྒྱ་ནག་བདེན་པའི་ལམ་བུའི་སྟེང་གི་བོད་དོན་བདེན་མཐའ་སྤྲིན་པས་སྒྲིབ་པ་དང་བོད་ཀྱི་ཉི་མ་ནུབ་པར་སྒུག་ནས་བསྡད་ཡོད།