དབུས་གཙང་ཆོལ་ཁའི་ཚོགས་ཆེན་ཐེངས་ ༡༥ པ་དབུ་འཛུགས་གནང་།

བོད་མི་མང་སྤྱི་འཐུས་ཚོགས་གཞོན་མཆོག་ནས་བོད་མིའི་སྒྲིག་འཛུགས་ཀྱི་སློབ་ཡོན་མ་ཐོབ་པའི་དབུས་གཙང་གི་ན་གཞོན་ཁྲོད་དུ་བོད་ཀྱི་སྐད་ཡིག་རིག་གཞུང་ལ་དོ་སྣང་ཡོད་མཁན་ཚོར་ཆེད་མངག་སློབ་ཡོན་ཕུལ་ཏེ་སྐྱེད་སྲིད་བྱེད་ཐབས་དགོས་སྐོར་གསུང་བཤད་གནང་།

དེ་རིང་སྔ་དྲོར་བཞུགས་སྒར་དྷ་སའི་བོད་་ཀྱི་ཟློས་གར་ཚོགས་པའི་ཚོགས་ཁང་དུ། ཉིན་གྲངས་ ༤ རིང་གི་དབུས་གཙང་ཆོལ་ཁའི་ཚོགས་ཆེན་ཐེངས་ ༡༥ པ་དབུ་འཛུགས་ཀྱི་མཛད་སྒོ་འཚོགས་སོང་བ་དང་། མཛད་སྒོའི་སྟེང་སྐུ་མགྲོན་གྱི་གཙོ་བོར་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་གཙོས་སྤྱི་འཐུས་ལས་ཐོག་དང་ཟུར་པ་རྣམ་པ། དེ་བཞིན་ཚོགས་སྐྱིད་ཀྱི་སྐུ་ཚབ་དང་དབུས་གཙང་ཆོལ་ཁའི་ས་གནས་ ༢༥ ལྷག་གི་སྐུ་ཚབ་བཅས་འཛོམས་འདུག

མཛད་སྒོའི་སྟེང་བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། ཁ་སང་ང་ཚོ་ཚང་མས་གསུམ་བཅུའི་དུས་དྲན་ ༦༣ པ་དེ་སྲུང་གཙི་ཞུས་པ་རེད། དེས་ང་ཚོར་ག་རེ་དྲན་གསོ་གསོ་ཐེབས་དགོས་ཀྱི་རེད་ཟེར་ན། བོད་རྒྱལ་ཁབ་དེ་ཤོར་ནས་ལོ་ ༦༣ འཁོར་བའི་སེམས་ནང་གི་ན་ཚ་དེ་བསྐྱར་སློང་བྱ་དགོས་པ་རེད། དེ་བསྐྱར་སློང་བྱས་ནས་ང་བོད་གངས་ཅན་པ་ཞིག་ཡིན་པའི་ཆ་ནས། ངས་ལོ་གཅིག་གི་ནང་ལ་ལེགས་སྐྱེས་ག་རེ་ཕུལ་འདུག ངས་ཞབས་གང་འདྲ་འདྲེན་འདུག ངས་༧སྐྱབས་མགོན་རིན་པོ་ཆེ་མཆོག་གི་བཀའ་རྩིས་མེད་གང་འདྲ་བཏང་འདུག ཁོང་གི་བཀའ་སློབ་ཀྱི་རྗེས་སུ་ག་ཚོད་འབྲངས་ཡོད་མེད་བཅས་བསྐྱར་གསོ་(དྲན་གསོ་)བྱ་རྒྱུ་དེ་ཧ་ཅང་གལ་ཆེན་པོ་རེད་བསམ་གྱི་འདུག ང་ཚོ་ཆབ་སྲིད་ཀྱི་སྐྱབས་བཅོལ་བ་ཡིན་ཟེར་ནས་མིའི་ལུང་པར་བསྡད་པ་དེས། ང་ཚོར་ཆབ་སྲིད་ཀྱིས་བསྐུར་བའི་ལས་འགན་ཞིག་ཡོད་པ་རེད། དབུས་པ་དང་གཙང་པ། མདོ་དང་སྨད་ཅེས་མ་ལབ་པའི་གོང་ལ་ང་ཚོར་བོད་མི་རིགས་ཀྱི་ཆབ་སྲིད་ཀྱིས་བསྐུར་བའི་ལས་འགན་དེ་ལ་ང་ཚོས་ནུས་པ་ག་ཚོད་སྤུང་གི་འདུག་གམ། འདི་ང་ཚོས་རང་ཉིད་ལ་དྲི་བ་གཏོང་དགོས་པ་ཞིག་ཆགས་ཡོད། ཅེས་དང་། གསུམ་བཅུའི་དུས་དྲན་ཉིན་མོར་བོད་ཀྱི་དཔའ་བོ་དཔའ་མོ་རྣམས་ཀྱི་བློས་གཏོང་དེ་དག་སེམས་ལ་དྲན་གསོ་བྱས་པའི་ཐོག་ནས། ཁོང་ཚོའི་བློས་གཏོང་དེ་ཆུད་ཟོས་གཏང་གི་མིན་བསམ་པའི་ཐོག་ནས་འཕྲལ་ཕུགས་དང་རྒྱུན་དུ་གནང་རྒྱུའི་བྱ་བ་ཁག་ངོས་ཟིན་པ་གནང་དགོས། མཚམས་རེར་ང་ཚོས་འཕྲལ་སེལ་གྱི་གནང་རྒྱུ་དེ་ལ་ཞེ་དྲགས་བྱས་ཡོད་བསམ་ནས། རྒྱུན་དུ་དང་ཕུགས་ཀྱི་གནང་རྒྱུའི་རིགས་དེ་འཐུས་ཤོར་བ་ཡིན་ན། ང་ཚོ་བསླེབ་ས་གང་ལའང་སླེབས་ཀྱི་ཡོད་པ་མ་རེད། ཅེས་གསུངས་སོང་།

ཡང་མི་རབས་རྒན་པ་ཚོས་ན་གཞོན་ཚོ་གསུམ་གསུའི་དུས་དྲན་ལ་འཁྲིད་རྒྱུ་གལ་ཆེན་ཡིན་པའི་སྐོར་ཁོང་མོས། ན་གཞོན་ཚོའི་སེམས་ནང་ལ་ངའི་མི་རབས་དེ་ལ་སྡུག་བསྔལ་དེ་འདྲ་བྱུང་འདུག་ཨང་། ད་ལྟ་ཡུ་ཀེ་རེན་ལ་ག་རེ་བྱུང་བ་དེ་ང་ཚོའི་སྤོ་པོ་རྨོ་མོ། ཨ་ཕ་ཨ་མ། ཨ་ཁུ་ཨ་ནེ་ལ་བྱུང་ཡོད་པ་ར་སྤྲོད་བྱ་རྒྱུ་དེ་ང་ཚོ་མི་རིབས་རྒན་པ་ཚང་མའི་འགན་ཆགས་ཀྱི་ཡོད་རེད། རྩ་བས་སློབ་གྲྭའི་ནང་ལ་ཆོས་རྒྱལ་མེས་དབོན་རྣམ་གསུམ་ནས་བོད་རང་དབང་ཤོར་བའི་དབར་དུ་རྒྱལ་རབས་སློབ་ཀྱི་ཡོད་ནའང་། སེམས་ནང་ན་ཟུག་དེ་ག་དུས་གཏོང་གི་རེད་ཟེར་ན། སོ་སོའི་མི་རྒྱུད་དེ་ལ་ག་རེ་བྱུང་ཡོད་མེད། བོད་ནས་ཡོང་དུས་དཀའ་ལས་གང་འདྲ་བརྒྱབ་ཡོད་མེད། ག་ཚོད་ཤི་ཡོད་མེད་དང་། མཐར་མི་ག་ཚོད་ལྷག་ཡོད་མེད་སོགས་དེའི་རིགས་དེ་ང་ཚོའི་བུ་རྒྱུད་རྣམས་ལ་བཤད་དགོས་པ་དང་བག་ཆགས་འཇོག་དགོས་པ་རེད། ཅེས་གསུངས་སོང་ལ། ཁྱིམ་ཚང་རེ་རེས་རང་རང་གི་ནང་མི་བགྲེས་སོང་རྣམ་པའི་ལོ་རྒྱུས་ཡིག་ཐོག་ལ་མེད་ནའང་། སྒྲ་འཇུག་བྱས་ཏེ་ཉར་ཚགས་བྱ་རྒྱུ་གལ་འགངས་ཆེན་པོ་ཡིན་སྐོར་གསུངས་སོང་།

ཡང་དེང་སྐབས་བོད་མིའི་སྤྱི་ཚོགས་ནང་འཆལ་གཏམ་མང་པོ་ཐོན་བཞིན་པར་དཔྱད་པ་བྱ་དགོས་སྐོར་ལ་ཚོགས་གཞོན་མཆོག་གིས། དེང་སང་ཚང་མས་བཤད་ཀྱི་ཡིན་ཟེར་བ་ལས། དེ་ལ་དཔྱད་པ་བྱས་ཏེ་ངས་གང་བཤད་པ་དེས་༧སྐྱབས་མགོན་རིན་པོ་ཆེ་མཆོག་གིས་སྐུ་ཚེ་གང་བོའི་རིང་ལ་སྐུ་ལས་བསྐྱོན་པའི་ཆིག་སྒྲིལ་དེ་ལ་དོ་ཕོག་འགྲོ་ཡི་འདུག་དང་མི་འདུག་བསམ་བློ་གཏོང་མཁན་ག་ཚོད་འདུག དེ་ལ་ཉན་མཁན་ཚོས་དཔྱད་པ་བྱེད་དགོས་ཀྱི་ཡོད་པ་རེད། བཤད་མཁན་གྱིས་བཤད་བསྡད་པ་ཡིན་ནའང་། ཉན་མཁན་གྱིས་ཉན་གྱི་མེད་ཟེར་ན་གླེང་སྟེགས་དེ་སྤྲོད་ཀྱི་ཡོད་པ་མ་རེད། དེ་དཔེ་གལ་ཆེན་པོ་རེད། ང་ཚོ་མི་རེ་རེའི་ཁ་གང་དུ་འགོག་པར་འགྲོ་དགོས་ཀྱི་རེད་དམ། དེ་ལས་གླེང་སྟེགས་མི་སྤྲོད་རྒྱུ་དེ། ཁྱེད་རང་གི་བོད་མིའི་ཆིག་སྒྲིལ་དང་། ༧སྐྱབས་མགོན་རིན་པོ་ཆེ་མཆོག་གི་བཀའ་སློབ། བོད་མིའི་འཐབ་རྩོད་བཅས་ལ་ཆིག་སྒྲིལ་གྱི་ནུས་པ་སྤུང་དགོས་ན། ཁྱེད་ཀྱིས་དེ་ལ་དཔྱད་པ་བྱེད་དགོས་པ་རེད། མཚམས་རེར་ང་ཚོའི་ཕྱག་ནང་ལ་གཟིགས་རྒྱུ་འབེལ་དྲགས་ནས། སྔོན་མ་ཡིན་ན་ཆང་གིས་ར་བཟི་ཟེར་རྒྱུ་ཞིག་ཡོད་རེད་པ། དེང་སང་འཆལ་གཏམ་གྱིས་ར་བཟི་ནས་དུས་ཚོད་སྐྱེལ་གྱི་ཡོད། དེ་ནས་གནད་དོན་དེར་དགེ་མཚན་ཡོད་མེད་དང་། ང་ཚོའི་མི་རིགས་ཀྱི་འཐབ་རྩོད་ལ་ཕན་མིན་དཔྱད་པ་མེད་པའི་ཐོག་ནས་གནས་ཚུལ་གྱི་ཆུ་ལོག་བརྒྱབ་ཏེ་སྤྱི་ཚོགས་འདི་འཐོར་ཞིག་ཏུ་འགྲོ་རྒྱུའི་ཉེན་ཁ་ཆེན་པོ་ཡོད་པའི་གནས་སྟངས་ཆགས་ཀྱི་འདུག དེར་བརྟེན། ང་ཚོ་མི་རེ་ངོ་རེ་ལ་དེ་དག་ཐད་དཔྱད་པ་བྱ་རྒྱུའི་དུས་ཚོད་ཧ་ཅང་ཛ་དྲག་ཐོག་ལ་སླེབས་ཡོད་པ་རེད། ཚང་མའི་སྣ་ཁུང་ལ་ཐག་པ་བཏགས་ནས་གང་དུའང་འཁྲིད་འཁྲིད་ཅིག་ཡོད་ན། ཀླད་པ་ཡོད་ནའང་ག་རེ་འདུག ༧སྐྱབས་མགོན་རིན་པོ་ཆེ་མཆོག་གིས་མི་དང་དུད་འགྲོའི་ཁྱད་པར་དེ་རྣམ་དཔྱོད་ཀྱི་ཐོག་ལ་ཡོད་རེད། རྣམ་དཔྱོད་ཀྱིས་ལེགས་ཉེས་དབྱེ་བ་འབྱེད་ཐུབ་པའི་སྒོ་ནས། སོ་སོས་ཤེས་ཀྱི་མེད་ན་ཡིད་ཆེས་ཡོད་སའི་མི་ལ་སྐད་ཆ་དྲིས་ནས་མཐའ་མཇུག་དེར་སོ་སོས་ཐག་གཅོད་དགོས་པ་རེད་ཅེས་ཡང་ནས་ཡང་དུ་བཀའ་ཕེབས་ཀྱི་ཡོད་པ་རེད། ཅེས་གསུངས་སོང་།

དེ་བཞིན་ཆབ་སྲིད་ཀྱི་ལངས་ཕྱོགས་མི་འདྲ་བ་ལ་ཁྱད་པར་མེད་པར་རྒྱ་ནག་ལ་གདོང་ལེན་དགོས་གལ་ཆེ་བའི་སྐོར་ཁོང་མོས། ༧སྐྱབས་མགོན་རིན་པོ་ཆེ་མཆོག་གིས་ནང་སེམས་དེ་འདུལ་དགོས་པའི་བཀའ་སློབ་མང་པོ་ཕེབས་ཡོད་པ་རེད། ང་རང་ཚོ་ནང་ཁུལ་ལ་ཆབ་སྲིད་ཀྱི་ལྟ་བ་སྐམ་པོ་གཅིག་ལ་འཐམས་ནས་ཕན་ཚུན་ལ་མཛུ་གུ་འཛུགས་རེས་བྱེད་པ་དེ་ཆོ་འདྲ་འདུག་གམ། གལ་སྲིད་ང་ཚོས་གདོང་ལེན་བྱ་དགོས་ཀྱི་ཡོད་ན། ཧི་མ་ལ་ཡའི་རྒྱབ་ལ་རྒྱ་ནག་གིས་བོད་ནང་སྲིད་ཇུས་གང་འདྲ་སྤེལ་གྱི་ཡོད་མེད་ལ་དོ་སྣང་དང་སློབ་སྦྱོང་བྱས་ནས་དགག་ལན་དང་བཤད་ཐུབ་ན་འཇོན་པོ་རེད། ཕོ་རྒོད་ཟེར་ན་དེ་རེད་ལ་མོ་རྒོད་ཟེར་ནའང་དེ་རེད། དེ་མིན་པའི་ནང་ཚགས་བོད་མི་རིགས་གཅིག་པ་ལ་སོ་སོའི་ལངས་ཕྱོགས་ལ་བརྟེན་པའི་བཤད་རེས་བྱས་བསྡད་པ་ཡིན་ན་ནམ་ཡང་ངོས་ལེན་བྱེད་ཐུབ་ཀྱི་མ་རེད། དབུ་མ་རྩོད་ཀྱི་ཡོད་ན་འདྲ། རང་བཙན་རྩོད་ཀྱི་ཡོད་ནའང་འདྲ། བོད་རང་བཙན་གྱི་ཁུངས་དེ་མི་རེ་ངོ་རེའི་སེམས་ནང་ལ་ཡོད་པ་བཟོ་དགོས་པ་དེ་ང་ཚོའི་ཆབ་སྲིད་ལྟ་བ་གང་ཡིན་ལ་མ་ལྟོས་པར་ཚང་མའི་ལས་འགན་རེད། ང་ཚོས་དབུ་མ་རྩོད་པའི་སྐབས་དེར་ང་ཚོ་རང་བཙན་མིན་རྩ་བ་ནས་བཤད་ཀྱི་ཡོད་པ་མ་རེད། བོད་ཀྱི་ལོ་རྒྱུས་ཐོག་ནས་ནམ་ཡང་རྒྱ་ནག་གི་ཆ་ཤས་མིན་ཟེར་བ་དེ་སྒྲུབ་པ་ལ་རང་བཙན་ཡིན་པ་ཤེས་དགོས་ཀྱི་ཡོད་པ་རེད། དེ་ཤེས་པའི་ཐོག་ནས་ད་ཆ་བོད་འདི་རྒྱ་ནག་འོག་ལ་ཚུད་ཚར་བ་ཡིན་དུས། རྒྱ་མི་ཕུད་ཐུབ་བསམ་པའི་རྨི་ལམ་གཏོང་མཁན་དེ་འདྲ་ཡོད་ཆོག་གི་རེད་པ། ༧སྐྱབས་མགོན་རིན་པོ་ཆེའི་སྐུ་མདུན་ལ་རྒྱ་མི་ཕུད་ཐུབ་ཀྱི་རེད་གསུང་མཁན་བྱུང་ཡོད་རེད་པ། རྨི་ལམ་དེ་འདྲ་གཏོང་ཆོག་ནའང། འཛམ་གླིང་ཡོངས་རྫོགས་ཁོ་ལ་བསྟུན་མཁས་བྱས་ནས་སྡོད་པའི་དུས་ཚོད་ལ་སུས་ཕུད་ཐུབ་ཀྱི་རེད་དམ། ཅེས་སོགས་གསུངས་སོང་།

མཇུག་ཏུ་ཚོགས་གཞོན་མཆོག་ནས་དབུས་གཙང་ཆོལ་ཁའི་སྒྲིག་འཛུགས་ཀྱི་དབུས་རྒྱུན་ལས་གཅིག་པུ་མིན་པར་ས་གནས་ངོས་ནས་ཀྱང་ས་གནས་མི་མང་གི་བདེ་སྡུག་ཐོག་ལས་ཀ་བྱ་དགོས་པ་དང་། དེའི་ཆེད་དུ་ས་གནས་ལ་དངུལ་ལོགས་སུ་འབུལ་དགོས་སྐོར། དེ་བཞིན་བོད་མིའི་སྒྲིག་འཛུགས་ཀྱི་སློབ་ཡོན་མ་ཐོབ་པའི་དབུས་གཙང་གི་ན་གཞོན་ཁྲོད་དུ་བོད་ཀྱི་སྐད་ཡིག་རིག་གཞུང་ལ་དོ་སྣང་ཡོད་མཁན་ཚོར་ཆེད་མངག་སློབ་ཡོན་ཕུལ་ཏེ་སྐྱེད་སྲིད་བྱེད་ཐབས་དང་། གཞོན་ནུ་ལྷན་ཚོགས་སོགས་ཀྱིས་ལས་གཞི་སྤེལ་བཞིན་པ་ལྟར་དབུས་གཙང་གི་ན་གཞོན་ཆེད་དུ་ཚོགས་ཆེན་ལྟ་བུ་གོ་སྒྲིག་བྱ་རྒྱུ་དང་། དབུས་གཙང་གི་འབུམ་རམས་པ་རྣམས་ལ་ངོས་འཛིན་དང་སྦྲགས་ཁོང་ཚོའི་ཆེད་དུ་བགྲོ་གླེང་གོ་སྒྲིག་ཞུ་ཐབས་སོགས་གལ་ཆེན་པོ་ཡིན་སྐོར་སོགས་གསུངས་སོང་།

ད་ཐེངས་ཀྱི་དབུས་གཙང་ཆོལ་ཁའི་ཚོགས་ཆེན་ཐེངས་ ༡༥ པ་དེ་ཉིད་དེ་རིང་ནས་ཟླ་འདིའི་ཕྱི་ཚེས་ ༡༤ བར་བཅས་ཉིན་གྲངས་ ༤ རིང་འཚོག་རྒྱུ་ཡིན་ཞིང་། ཚོགས་ཐོག་ཏུ་ས་གནས་ཁག་མི་འདྲ་བ་ ༢༥ ལྷག་གི་སྐུ་ཚབ་ ༡༠༠ ལྷག་བཅར་འདུག ཐེངས་འདིའི་ཚོགས་ཆེན་གྱི་ཉིན་མཐའ་མར་དབུས་གཙང་དབུས་སྤྱི་ཁྱབ་རྒྱུན་ལས་ཁང་གི་རྒྱུན་ལས་གསར་པ་འོས་འདེམས་བྱ་འཆར་ཡོད་འདུག

གསར་འགོད་པ། པ་སངས་ཚེ་རིང་།