རྒྱལ་སྤྱིའི་བོད་རིག་པའི་ཞིབ་འཇུག་སློབ་མ་དང་ཉམས་ཞིབ་པ་སོགས་མཉམ་འབྲེལ་གྱིས་ཕན་ཚུན་གྱི་ཉམས་མྱོང་བརྗེ་རེས་དང་ཞིབ་འཇུག་གི་ཁ་ཕྱོགས། མཉམ་འབྲེལ་དང་འབྲེལ་ལམ་ཡར་རྒྱས་བཅས་ལ་དམིགས་ནས་དྲ་ལམ་བོད་རིག་པའི་བགྲོ་གླེང་ཐོག་མ་སྐོང་ཚོགས་བྱས།
ཟླ་འདིའི་ཕྱི་ཚེས་ ༡༡ ནས་ ༡༢ བར་ཉིན་གྲངས་གཉིས་ཀྱི་རིང་ཕྱི་ལོ་ ༢༠༢༢ ལོའི་དྲ་ལམ་བརྒྱུད་འབུམ་རམས་པའི་སློབ་མར་གོ་སྒྲིག་བྱས་པའི་རྒྱལ་སྤྱིའི་བོད་རིག་པའི་བགྲོ་གླེང་ཚོགས་འདུ་ཐོག་མ་བསྡུས་ཡོད་པ་ལྟར། དེ་རིང་འདི་གའི་གསར་འགོད་པས་ཁ་པར་བརྒྱུད་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་སུ་བགྲོ་གླེང་དེའི་སྐོར་ངོ་སྤྲོད་གནང་རོགས་ཞུས་པར། ཁོང་གིས་ལས་རིམ་འདིའི་དམིགས་ཡུལ་ནི་བརྡ་འཕྲིན་དུས་རབས་འདིར་གློག་ཀླད་སྒེའུ་ཁུང་གཅིག་གི་ནང་དུ་འཛམ་གླིང་སྤྱི་ཡོངས་ཀྱི་དགའ་སྐྱོ་ཆགས་སྡང་གི་ཚོར་བ་མྱོང་བཞིན་པ་ལྟར། རྒྱལ་སྤྱིའི་ཁྱོན་ཡོངས་སུ་བཞུགས་པའི་བོད་རིག་པའི་ཤེས་ཡོན་ཅན་སྤྱི་དང་ལྷག་པར་དུ་འབུམ་རམས་པའི་སློབ་མ་རྣམས་ཀྱིས་རང་གི་ཉམས་མྱོང་སྤེལ་རེས་དང་། ཞིབ་འཇུག་གི་ཁ་ཕྱོགས། མཉམ་འབྲེལ་དང་འབྲེལ་ལམ་བཅས་ཡར་རྒྱས་གོང་འཕེལ་ཆེད། དྲ་ལམ་ནས་ལེགས་བཤད་དང་ཉམས་མྱོང་སྤེལ་རེས་བྱ་རྒྱུ་ཧ་ཅང་གལ་ཆེ་བར་མཐོང་སྟེ། དྲ་ལམ་ནས་རྒྱལ་སྤྱིའི་བགྲོ་གླེང་ཚོགས་འདུ་འདི་གོ་སྒྲིག་བྱས་ན་ཕན་ཐོགས་ངེས་ཅན་ཡོང་ཐུབ་པར་མཐོང་བས། དྲ་ལམ་བགྲོ་གླེང་འདིར་འཛམ་གླིང་ཡུལ་གྲུ་གང་སར་བཞུགས་པའི་བོད་རིག་པའི་མཁས་པ་དང་ཞིབ་འཇུག་པ་སོགས་ཀྱིས་མཉམ་འབྲེལ་དང་མཉམ་ཞུགས་ཡོང་བའི་རེ་བ་བྱེད་ཀྱི་ཡོད་སྐོར་བརྗོད་བྱུང་།
ཡང་ཁོང་གིས། ལས་རིམ་འདི་ཧྥ་རན་སིར་རྟེན་གཞི་བྱས་པའི་ཨ་ནལ་གོ་གཙུག་ལག་སློབ་ཆེན་ (Inalco) དང་ཐའེ་ཝན་དུ་རྟེན་གཞི་བྱས་པའི་ཧྥོ་ཀོན་གཙུག་ལག་སློབ་གྲྭ་ཆེན་མོ་ (Fo Guang University)། ཨོ་སི་ཊོ་ལི་ཡར་རྟེན་གཞི་བྱས་ཡོད་པའི་ཋ་སི་མ་ནི་ཡ་གཙུག་ལག་སློབ་ཆེན་ (University of Tasmania)། ཉི་ཧོང་གི་ཧེ་རི་ཤི་མ་གཙུག་ལག་སློབ་ཆེན་ (Hiroshima University)། དེ་བཞིན་རྒྱ་གར་ནང་རྟེན་གཞི་བྱས་པའི་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་བཅས་ཀྱིས་གོ་སྒྲིག་གནང་ཡོད་སྐོར་སོགས་བརྗོད་བྱུང་།
འཛུལ་ཞུགས་པའི་ཆ་ནས་ཁོང་གིས་ཐེངས་འདིའི་ལས་རིམ་ནང་འབུམ་རམས་པའི་སློབ་མ་ ༢༠ དང་དེ་ལ་སློབ་སྟོན་གནང་མཁན་འཛམ་གླིང་ས་ཕྱོགས་གང་སར་ནས་དགེ་རྒན་ཆེན་མོ་ ༡༤ གདན་འདྲེན་ཞུས་ནས་སོ་སོའི་བརྗོད་གཞི་དང་འབྲེལ་བའི་ཐོག་ནས། དེ་ལ་ཆེད་ལས་མཁས་པའི་དགེ་རྒན་ཆེན་མོས་ལམ་སྟོན་གནང་ཡོད་རེད། གཞན་ཡང་ཟུར་ཞུགས་པ་ ༢༡ སོགས་ཀྱིས་མཉམ་ཞུགས་གནང་ཡོད་པ་རེད། ཅེས་བརྗོད་བྱུང་།
བོད་རིག་པའི་བགྲོ་གླེང་དེའི་བརྗོད་གཞིའི་ཁག་ནི་བོད་དང་འབྲེལ་བའི་ཞིབ་འཇུག་རང་བཞིན་གཙོ་བོར་གྱུར་པའི་སྣ་མང་ཤེས་རིག་དང་། ནང་ཆོས་དང་ལོ་རྒྱུས། རྩོམ་རིག་དང་སྐད་ཡིག བོད་དང་འབྲེལ་བའི་གློག་བརྙན་ལ་སོགས་ཀྱི་སྐོར་ཡིན་པ་དང་། འདི་གའི་གསར་འགོད་པས་མ་འོངས་པར་བགྲོ་གླེང་འཚོག་འཆར་ཡོད་མེད་སྐོར་དྲིས་པར། མ་འོངས་པར་རང་གཞན་གཉིས་ཕན་ཆེད་གཙུག་ལག་སློབ་ཆེན་དང་ཞིབ་འཇུག་པ་གང་མང་ཞིག་མཉམ་འབྲེལ་གྱིས་དྲ་ལམ་བགྲོ་གླེང་རེ་སྐོང་ཚོགས་ཐུབ་པའི་འཆར་གཞི་དང་དངོས་སུ་འཚོག་རྒྱུའི་འཆར་གཞི་ཡོད་སྐོར་སོགས་བརྗོད་བྱུང་།
གསར་འགོད་པ། བསྟན་འཛིན་ཕུར་བུ།
