སྒྲིག་གཞི་བསྐྱར་བཅོས་ཀྱི་ཁྲིམས་འཆར་དྲུག་ལས་བཞི་གཏན་འབེབས་བྱུང་སོང་།

ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་བསྐྱར་བཅོས་ཀྱི་ཁྲིམས་འཆར་དྲུག་ལས། དམིགས་བསལ་བསྐོ་གཞག་གི་ལས་བྱེད་ཀྱི་གྲངས་འབོར་ ༡༨ ནས་ ༩ ལ་མར་བཅག་པ་སོགས་སྒྲིག་གཞི་བསྐྱར་བཅོས་ཀྱི་ཁྲིམས་འཆར་བཞི་གཏན་འབེབས་བྱུང་།

ཁ་སང་སྲིད་སྐྱོང་སྤེན་པ་ཚེ་རིང་མཆོག་ནས་གྲོས་ཚོགས་ར་བའི་ནང་། དམིགས་བསལ་བསྐོ་གཞག་གིས་མཚོན་པའི་བོད་མིའི་སྒྲིག་འཛུགས་ཀྱི་ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་ ༦ ལ་བསྐྱར་བཅོས་ཁྲིམས་འཆར་བཏོན་པར། དེ་རིང་བོད་མི་མང་སྤྱི་འཐུས་ལྷན་ཚོགས་ཀྱིས་བགྲོ་གླེང་དང་འོས་བསྡུ་བརྒྱུད། སྒྲིག་གཞི་བསྐྱར་བཅོས་ཁྲིམས་འཆར་ ༢ ལ་སྤྱི་མོས་དང་། ཁྲིམས་འཆར་ ༢ ལ་མང་མོས་བཅས་ཀྱི་ཐོག་ནས་གཏན་འབེབས་གནང་སོང་ལ། ཞབས་གཡར་དང་ཆོད་དོན་བསྐོ་གཞག་དང་། དམིགས་བསལ་བསྐོ་གཞག་སྐོར་གྱི་སྒྲིག་གཞི་བསྐྱར་བཅོས་ ༢ ལ་སྤྱི་འཐུས་ངོ་ཡོད་ཀྱི་གསུམ་ཆ་གཉིས་ཀྱི་རྒྱབ་སྐྱོར་མ་ཐོབ་པའི་རྐྱེན་གྱིས་གཏན་འབེབས་བྱུང་ཐུབ་མ་སོང་།

དེ་ཡང་ད་ཡོད་ལས་བྱེད་འདེམས་ལྷན་གྱི་སྒྲིག་གཞི་དོན་ཚན་ ༡༩ པ་དམིགས་བསལ་བསྐོ་གཞག་སྐོར་གྱི་ནང་གསེས་དོན་ཚན་ ༤ པ། དམིགས་བསལ་དགོས་གལ་བྱུང་ཚེ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལྟར་བཀའ་ཤག་ནས་ལས་བྱེད་ས་མིག་རྩ་འབོར་གྱི་བརྒྱ་ཆ་ ༣ མམ་ལས་བྱེད་མི་གྲངས་ ༡༨ ལས་མ་མང་བ་ལོ་དུས་རྒྱས་བཅད་ཐོག་བཀའ་ཤག་སྐབས་སོ་སོའི་ལས་ཡུན་རིང་ལས་བྱེད་འདེམས་ལྷན་དང་གོ་བསྡུར་གྱིས་ཐད་བསྐོ་ཆོག་རྒྱུ། ལས་བྱེད་དེ་རིགས་བཀའ་ཤག་སྐབས་སོ་སོའི་ལས་ཡུན་འཁྱུར་རྗེས་ཟླ་གསུམ་ནང་ཚུན་ལས་མཚམས་འཇོག་དགོས། དེ་དག་གི་ལས་འགན་དང་། གནས་རིམ། ཕོགས་ཐོབ། ཁེ་ཕན་གཞན་བཅས་བཀའ་ཤག་གིས་གཏན་འབེབས་བྱ་རྒྱུ། ཞེས་པ་དེ་ཉིད། སྐུ་ཚབ་དོན་གཅོད་ཁག་ཏུ་རྒྱ་རིགས་འབྲེལ་མཐུད་པ་དང་། ལྟ་གྲུབ་དགེ་རྒན་གྱི་ས་མིག་ཏུ་ལས་བྱེད་བསྐོ་གཞག་དགོས་གལ་བྱུང་ཚེ། ཟུང་དྲུང་མན་གྱི་གནས་རིམ་དུ་འབྲེལ་ཡོད་བཀའ་བློན་ལས་ཁུངས་སོ་སོའི་འཆར་འབུལ་ལ་བཀའ་ཤག་གིས་རྒྱབ་གཉེར་བརྒྱུད་ལས་བྱེད་འདེམས་ལྷན་ལ་བཀའ་འཁྲོལ་ཞུས་ཏེ་མང་མཐར་ལས་ཡུན་ལོ་ལྔའི་རིང་དམིགས་བསལ་བསྐོ་གཞག་ཆོག་རྒྱུ། ལས་བྱེད་འདི་རིགས་བཀའ་ཤག་སྐབས་རེའི་ཡུན་ཚད་ནང་ས་མིག་རྩ་འབོར་གྱི་བརྒྱ་ཆ་ ༡།༥ ལས་བརྒལ་བ་བསྐོ་གཞག་མི་ཆོག ཅེས་བཀའ་ཤག་གིས་དམིགས་བསལ་ཐད་ཀར་བསྐོ་གཞག་ཆོག་པའི་ལས་བྱེད་ཀྱི་གྲངས་དེ་ ༡༨ ནས་ ༩ ལ་མར་བཅག་ཡོད་ཅིང་། བསྐྱར་བཅོས་ཁྲིམས་འཆར་དེར་མང་མོས་ཀྱི་ཐོག་ནས་གཏན་འབེབས་གནང་སོང་།

སྲིད་སྐྱོང་སྤེན་པ་ཚེ་རིང་མཆོག་ནས་དམིགས་བསལ་བསྐོ་གཞག་གི་གྲངས་ ༩ ལ་གཅོག་དགོས་དོན་ཅི་ཡིན་ཐད་ལ། དེ་སྔ་དམིགས་བསལ་བསྐོ་གཞག་གི་ནང་གསེས་དོན་ཚན་ ༤ པ་དེ་བཟོས་པའི་རྗེས་ལ་གནས་རིམ་དྲུང་འཕར་དང་དྲུང་ཆེའི་ཐོག་ལ་བསྐོས་པ་བྱུང་ཡོད་པར་སོང་། མ་འོངས་དེ་ལམ་ལུགས་ཀྱི་ངོ་བོ་ལ་བལྟས་ནས་དྲུང་འཕར་དང་དྲུང་ཆེའི་གནས་རིམ་ལ་བསྐོ་མི་སྲིད་པ་མིན་སྟབས། དེ་ལ་མཚམས་ཤིག་འཇོག་ཐུབ་ན་ཡག་པོ་མེད་དམ་བསམ་པ་རེད། ལས་བྱེད་འདེམས་བསྐོ་ལྷན་ཁང་གི་སྒྲིག་གཞི་ནང་དྲུང་ཆེ་དང་དྲུང་འཕར་ཟེར་བ་དེ། ལས་བྱེད་ཉམས་མྱོང་ཞེ་པོ་ཡོད་པ་ཞིག་ཕྱི་ལོགས་ནས་ཞབས་གཡར་ལ་གླ་རྒྱུ་དང་། དེ་ཡང་ལས་བྱེད་ཀྱི་བརྒྱ་ཆ་ ༥ མ་གཏོགས་འགེངས་ཆོག་གི་ཡོད་པ་མ་རེད། ལས་བྱེད་ ༩༥ ཐད་ཀར་བསྐོ་ཆོག་གི་ཡོད་པ་མ་རེད། སྒྲིག་གཞི་དེའི་དགོས་པ་དང་དམིགས་ཡུལ་གཙོ་བོ་དེ་བོད་མིའི་སྒྲིག་འཛུགས་ཀྱི་དྲུང་འཕར་དང་དྲུང་ཆེ་ཞིག་ཡིན་ན། གནས་ཚུལ་ཆ་ཚང་བ་ཤེས་དགོས་པའི་གནས་སྟངས་ཤིག་ཡིན་དགོས་སྟབས། ཕྱི་ལོགས་ནས་མི་འཁྲིད་ཡོང་རྒྱུ་དེ་ཏག་ཏག་ཅིག་སྡོད་ཀྱི་ཡོད་མེད་ཀྱི་གནས་སྟངས་ཆགས་ཀྱི་འདུག ཕྱོགས་གཞན་ནས་འདིར་(བོད་མིའི་སྒྲིག་འཛུགས་)ཡོད་མཁན་ཚོས་འཇོན་མ་འཇོན་གྱི་སྐད་ཆའང་ཡོང་གི་འདུག ཅེས་གསལ་བཤད་གནང་སོང་ལ། ད་ལྟའི་ཆར་དམིགས་བསལ་ ༡༨ ལ་ས་མིག་མེད་པར་གང་དུའང་བསྐོ་ཆོག་གི་ཡོད་སྟབས། ད་ལན་སྒྲིག་གཞི་ལ་བསྐྱར་བཅོས་བྱས་ཏེ་དམིགས་བསལ་བསྐོ་གཞག་རྣམས་ལས་གནས་གང་གི་ཐོག་ལ་བསྐོ་ཆོག་མིན་གྱི་གསལ་པོ་བཟོས་ཡོད་སྐོར་འགྲེལ་བརྗོད་གནང་སོང་།

འཛིན་སྐྱོང་གི་སྒྲིག་གཞི་བསྐྱར་བཅོས་ཁྲིམས་འཆར་ནང་། དམིགས་བསལ་བསྐོ་གཞག་གྱི་དོན་ཚན་སྔར་མེད་ ༢ གསར་འཇུག་བྱས་པའི་ནང་གི་དོན་ཚན་ ༥ པར། ཉེ་བའི་ཁྲིམས་ལུགས་རབ་འབྱམས་པ་ཐོན་པའི་ཆེས་མཐོའི་ཁྲིམས་ཁང་གི་རིམ་པ་འོག་མའི་ཁྲིམས་ཞིབ་པ་དང་། ཁྲིམས་དྲུང་། ཆེས་མཐོའི་ཁྲིམས་ཞིབ་ཁང་གི་ཡུལ་ཁྲིམས་དཔྱད་ཞིབ་པ་བཅས་ཁྲིམས་དོན་ལས་བྱེད་གསར་བསྐོ་དགོས་རིགས་ཀྱི་འོས་ཆོས་དང་། འདེམས་རྒྱུགས་ཆ་རྐྱེན་རྣམས་ཆེས་མཐོའི་ཁྲིམས་ཞིབ་ཁང་ནས་བཀའ་ཤག་བརྒྱུད་འཆར་འབུལ་བྱུང་བར། ལས་བྱེད་འདེམས་བསྐོ་ལྷན་ཁང་ནས་ཞིབ་འཇུག་གིས་ཡོངས་ཁྱབ་གསལ་བསྒྲགས་བརྒྱུད་འདེམས་སྒྲུག་བྱ་རྒྱུ། ཞེས་པ་དེ་ཉིད་ལ་སྤྱི་འཐུས་ངོ་ཡོད་ཀྱི་བརྒྱ་ཆ་གསུམ་ཆ་གཉིས་ཀྱི་རྒྱབ་སྐྱོར་མ་ཐོབ་པའི་རྐྱེན་གྱིས་མར་ཟགས་སོང་། དེ་བཞིན་དོན་ཚན་ ༦ པར། ལས་ཁུངས་གང་ཞིག་ཏུ་ཁྱད་ལས་ཀྱི་ལས་རིགས་གཏན་འཇགས་སུ་དགོས་མཁོ་ཡོད་པའི་ལས་དོན་ངེས་ཅན་ཞིག་གི་སླད་ཁྱད་ལས་པ་བསྐོ་གཞག་དགོས་གལ་བྱུང་ཚེ། ལས་ཁུངས་སོ་སོས་ལས་དོན་གྱི་ངོ་བོ་དང་དགོས་མཁོ་ཇི་ཆགས། ཤེས་ཚད་དང་ཉམས་མྱོང་གི་ཆ་རྐྱེན་ཇི་དགོས་འཆར་འབུལ་བྱུང་བསྟུན། བཀའ་ཤག་ནས་ཞིབ་འཇུག་གིས་རྒྱབ་གཉེར་བྱས་ཚེ། ལས་བྱེད་འདེམས་ལྷན་ནས་ལས་བྱེད་འདེམས་སྒྲུག་གི་རྒྱུགས་ལེན་སྒྲིག་གཞི་གཞིར་བཟུང་བསྐོ་གཞག་བྱ་རྒྱུ། ཁྱད་ལས་པ་འདི་རིགས་བཟློག་མེད་ཀྱི་རྒྱུ་མཚན་ཡོད་ན་མ་གཏོགས་བཀའ་ཤག་གིས་འབྲེལ་མེད་ལས་དོན་གཞན་ཐོག་གནས་སྤོས་སམ། འཛིན་སྐྱོང་གི་འགན་དབང་བསྐུར་མ་དགོས་པ་གཙོ་འདོན་བྱེད་དགོས། ཞེས་པ་འཁོད་ཡོད་འདུག

གཞན་ཡང་ད་ཐེངས་ཀྱི་སྒྲིག་གཞི་བསྐྱར་བཅོས་ནང་ལས་བྱེད་འདེམས་ལྷན་གྱི་སྒྲིག་གཞི་དོན་ཚན་ ༡༦ པ་ལས་བྱེད་གནས་སྤར་དང་། བཀོད་སྒྲིག འཕོ་ལེན་སྐོར་གྱི་ནང་གསེས་དོན་ཚན་ ༨ པ་ཞིག་གསར་སྣོན་བྱས་ཡོད་ཅིང་། དོན་ཚན་དེའི་ནང་། ས་མིག་བསྐང་རྒྱུར་དུས་ཡུན་འགོར་གཞི་ཡོད་པ་དང་། གནས་རིམ་གོང་མའི་ལས་འགན་ལེན་ཐུབ་པའི་འོས་འཕེར་ཅན་གྱི་ལས་བྱེད་ཡོད་ཚེ། སྡེ་ཚན་གཉིས་ཀའི་གནས་རིམ་གོང་མའི་ས་མིག་གང་རུང་དུ་གནས་རིམ་གཅིག་ལས་དམའ་བའི་ལས་བྱེད་ཅིག་མང་མཐའ་མོ་བཞི་ལས་མ་བརྒལ་བར་ལས་ཚབ་ཏུ་བསྐོ་གཞག་བྱེད་ཆོག་ཅིང་། ལས་ཚབ་ཀྱི་ལས་རྒྱུན་རིང་གནས་རིམ་གོང་མའི་ཕོགས་དང་ཐོབ་ཐང་ཇི་ཡོད་ཞུ་སྤྲོད་བྱེད་ཆོག ཅེས་འཁོད་པ་དེ་སྤྱི་མོས་ཀྱི་ཐོག་ནས་གཏན་འབེབས་གནང་སོང་།

གསར་འགོད་པ། པ་སངས་ཚེ་རིང་།