བོད་མི་ཞིག་གིས་རང་ལུས་མེ་བསྲེགས་གནང་རྗེས་ཤི་གསོན་དང་རྒྱབ་ལྗོངས་ལོ་རྒྱུས་སོགས་ཀྱི་གནས་ཚུལ་གང་ཡང་གསལ་པོ་ཤེས་རྟོགས་ཐུབ་ཀྱི་མི་འདུག
ཁ་སང་ཉིན་གུང་ཙམ་ལ་འདི་གའི་གསར་འགོད་པར་བོད་ནང་གི་བོད་མི་ཞིག་གིས་བརྗོད་པ་ལྟར་ན། ཁ་སང་བོད་ནང་གི་སྔ་དྲོའི་ཆུ་ཚོད་ ༡༠ ཡས་མས་ཙམ་ལ་ཁམས་སྐྱེ་རྒུ་མདོ་གྲོང་ཁྱེར་ཉེན་རྟོག་ལས་ཁུངས་ཀྱི་ཉེ་འཁྲིས་ཚོང་ཁང་ཞིག་གི་སྒོ་འགྲམ་དུ། ལོ་ཚོད་ཆེ་བའི་བོད་མི་སྐྱེས་པ་ཞིག་གིས་རང་ལུས་མེ་བསྲེགས་བཏང་ཡོད་འདུག
དེ་རིང་ཕྱི་ཚེས་ ༣༡ ཉིན་འདི་གའི་གསར་འགོད་པས་ཐད་ཀར་བོད་ནང་གི་བོད་མི་ཞིག་ལ་སྐད་ཆ་དྲིས་པར་ཁོང་གིས། རང་ལུས་མེ་བསྲེགས་བཏང་བའི་གནས་ཚུལ་བདེན་པ་ཡིན་པ་དང་། མི་དེ་སྐྱེས་པ་ཞིག་ཡིན་པ་འགྲེལ་བརྗོད་གནང་བྱུང་བ་མ་ཟད། བོད་ནང་གི་གནས་ཚུལ་ཡོངས་ཁུངས་གཞན་ཞིག་གིས། མི་དེས་རང་ལུས་མེ་བསྲེགས་གཏོང་དོན་ནི། ཁོང་ལ་ཁྲིམས་ཀྱི་གྱོད་གཞི་ཞིག་ཡོད་པ་དང་། ཁོང་གིས་ཡུན་རིང་ཁྲིམས་གཏུགས་བྱས་པའི་མཐར། ཁྲིམས་གཏུགས་ཤོར་བའམ་ཡང་ན་མཇུག་འབྲས་ཡག་པོ་ཞིག་མ་བྱུང་བར་བརྟེན། རང་ལུས་མེ་བསྲེགས་བཏང་བ་ཡིན་སྐོར་བརྗོད་བྱུང་ལ། ད་ལྟ་རྒྱ་ནག་གཞུང་གི་དམ་དྲག་འོག་བོད་མི་ཁོང་ལ་ཁྲིམས་ཀྱི་གྱོད་གཞི་ག་རེ་ཡོད་པ་དང་རང་ལུས་མེ་བསྲེགས་གཏོང་དགོས་པའི་རྒྱབ་ལྗོངས་ཀྱི་ཞིབ་ཕྲའི་གནས་ཚུལ་སོགས་གང་ཡང་གསལ་པོ་ཤེས་རྟོགས་ཐུབ་ཀྱི་མི་འདུག
ཡང་དེ་རིང་གྲོས་ཚོགས་ཚོགས་དུས་གསུམ་པའི་ལས་ཉིན་མཐའ་མའི་སྟེང་སྲིད་སྐྱོང་སྤེན་པ་ཚེ་རིང་མཆོག་གིས་རང་ལུས་མེ་བསྲེགས་བཏང་བའི་གནས་ཚུལ་དེ་བོད་མི་མང་སྤྱི་འཐུས་རྣམ་པའི་མཁྱེན་རྟོགས་སླད་གྲོས་ཚོགས་ལ་སྙན་སེང་ཞུས་སོང་བ་དང་ཞིབ་ཕྲའི་གནས་ཚུལ་ཐོག་རྩད་གཅོད་གནང་རྒྱུ་ཡིན་སྐོར་གསུངས་སོང་།
ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་བསྡོམས་གསུང་བཤད་སྐབས། ཁ་སང་ཕྱི་ཚེས་ ༣༠ རེས་གཟའ་ལྷག་པའི་ཉིན་བོད་ཁམས་སྐྱེ་རྒྱུ་མདོ་ཡི་དམག་སྒར་གྱི་ཉེ་འགྲམ་དུ་བོད་མི་ཞིག་གིས་རང་ལུས་མེ་བསྲེགས་བཏང་བར་དངོས་བདེན་བྱུང་འདུག ང་ཚོས་གྲོས་ཚོགས་ཚོགས་དུས་གཉིས་པའི་སྐབས་སུ་ཕྱི་ཟླ ༢ ཚེས་༢༥ ཉིན་གཞས་པ་ཚེ་དབང་ནོར་བུས་རང་ལུས་མེ་བསྲེགས་བཏང་ནས་འདས་གྲོངས་སུ་གྱུར་བར་མྱ་ནང་གུས་འདུད་ཀྱི་གྲོས་ཆར་ཞིག་ཁུར་ཡོད་པ་རེད། ད་ལྟ་སྐྱེ་རྒུ་མདོ་རུ་རང་ལུས་མེར་སྲེག་མཁན་གྱི་མཚན་དང་ལོ་རྒྱུས་སོགས་གསལ་ཁ་གང་ཡང་རག་གི་མི་འདུག ཡིན་ན་ཡང་། ཁོང་རྣམ་པ་ཡིས་བོད་བསྟན་སྲིད་ཀྱི་དོན་དུ་བློས་བཏང་ཆེན་པོ་ཞིག་གནང་བ་ཡིན་དུས། ང་ཚོས་ཁོང་རྣམ་པས་བློས་བཏང་དེ་དག་དོན་དང་ལྡན་པར་ཡོང་བར་ཤོག་དང་། ལྷག་པར་སོ་སོས་བོད་བསྟན་སྲིད་ཀྱི་ཆེད་དུ་ལྷག་བསམ་འཇུག་པ་ཆེར་སྐྱེད་ཀྱི་ཐོག་ནས་ཞབས་འདེགས་ཞུ་ཐུབ་དགོས་རྒྱུའི་ཆོས་སེམས་དམ་བཅའ་ཞིག་བླང་ཐུབ་པ་ཡིན་ན། ངས་མྱ་ངན་གུས་འདུད་ཀྱི་གྲོས་ཆོད་ཡིན་ན་འདྲ། གདུང་སེམས་མཉམ་སྐྱེད་དོན་དང་ལྡན་པ་ཞིག་ཆགས་ཀྱི་ཡོད་རེད་ཅེས་སྙན་གསེང་ཞུ་རྒྱུ་ཡིན། ཞེས་གསུངས་སོང་།
གསར་འགོད་པ། སྐལ་བཟང་སྦྱིན་པ།
