བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་མཆོག་དང་མཇལ་ཏེ་༧གོང་ས་མཆོག་གི་འཚམས་འདྲིའི་གསུང་འཕྲིན་སྤྱན་འབུལ་ཞུས་པ་དང་བོད་ནང་གི་ཛ་དྲག་གནས་སྟངས་སོགས་ངོ་སྤྲོད་གནང་ཡོད་འདུག
ཁ་སང་ཕྱི་ཚེས་ ༢༨ ཉིན་ཨ་རིའི་རྒྱལ་ས་ཝ་ཤིན་ཊོན་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནན་སི་པེ་ལོ་སི་ (Nancy Pelosi) མཆོག་དང་། ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ཚོགས་མི་སྐུ་ཞབས་མེག་ཁོལ་ (Michael McCaul)ལགས། དེ་བཞིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་སྐུ་ཞབས་ (James E. Risch) ལགས་བཅས་དང་མཇལ་འཕྲད་གནང་སྟེ། སྲིད་སྐྱོང་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོས་ཚོགས་ཀྱི་ཚོགས་གཙོ་ལྕམ་སྐུ་ནན་སི་པེ་ལོ་སི་མཆོག་ལ་སྩལ་བའི་འཚམས་འདྲིའི་གསུང་འཕྲིན་ཞིག་སྤྱན་འབུལ་གནང་རྗེས། ད་བར་ལྕམ་སྐུ་ནན་སི་པེ་ལོ་སི་མཆོག་གིས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། བོད་ནང་གི་ཛ་དྲག་གནས་སྟངས་སྐོར་ངོ་སྤྲོད་དང་། བོད་རྒྱའི་དཀའ་རྙོག་སེལ་ཐབས་སོགས་ཀྱི་སྐོར་ལ་བཀའ་བསྡུར་ལྷུག་པོ་གནང་ཡོད་འདུག ལྕམ་སྐུ་ནན་སི་པེ་ལོ་སི་མཆོག་གིས་བོད་དོན་དཀའ་རྙོག་མ་སེལ་བར་དུ་མུ་མཐུད་ནས་རྒྱབ་སྐྱོར་གནང་གི་ཡིན་སྐོར་གསུངས་འདུག
སྲིད་སྐྱོང་མཆོག་དང་མཉམ་བཅར་གནང་བའི་བྱེས་ཀྱི་གདན་ས་བཀྲ་ཤིས་ལྷུན་པོ་དགོན་པའི་མཁན་པོ་གཟིག་རྒྱབ་རིན་པོ་ཆེ་ཡིས། ད་བར་གར་སོང་ཆ་མེད་དུ་གྱུར་བའི་༧པཎ་ཆེན་མཆོག་སྤྲུལ་རིན་པོ་ཆེའི་གནས་སྟངས་ངོ་སྤྲོད་དང་། ༧གོང་ས་མཆོག་བོད་ལ་ཕེབས་ཐུབ་པ་དང་། བོད་ཀྱི་དཀའ་རྙོག་སེལ་ཐབས་སུ་མུ་མཐུད་རྒྱབ་སྐྱོར་ཤུགས་ཆེ་གནང་རྒྱུ་དང་། ༧ཀུན་གཟིགས་པཎ་ཆེན་རིན་པོ་ཆེ་སྐུ་འཁོར་ནང་མི་རྣམས་ལ་རང་དབང་ཡོང་ཐབས་གནང་དགོས་བའི་འབོད་སྐུལ་ཞུས་གནང་ཡོད་འདུག
ཟླ་འདིའི་ཕྱི་ཚེས་ ༢༦ ཉིན་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་ཨ་རིའི་མང་གཙོ་གོང་སྤེལ་བསྟི་གནས་ཁང་ (National Endowment for Democracy) གིས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ལྷན་དུ་བཙན་བྱོལ་བོད་མིའི་དམངས་གཙོའི་འཕེལ་རིམ་སྐོར་ཚོགས་འདུ་ཞིག་གོ་སྒྲིག་ཞུས་ཡོད་པ་དང་། ཐོག་མར་ཨ་རིའི་དམངས་གཙོ་གོང་སྤེལ་བསྟི་གནས་ཁང་གི་འགན་འཛིན་སྐུ་ཞབས་ (Damon Wilson) ལགས་ཀྱིས། ༧གོང་ས་མཆོག་གིས་སྲོལ་གཏོད་མཛད་པའི་བཙན་བྱོལ་བོད་མིའི་དམངས་གཙོའི་འཕེལ་རིམ་ལ་རྗེས་སུ་ཡི་རངས་དང་། ༧གོང་ས་མཆོག་རྒྱ་གར་ལ་བཙན་བྱོལ་དུ་ཆིབས་སྒྱུར་བསྐྱངས་མ་ཐག་བཙན་བྱོལ་བོད་མིའི་དམངས་གཙོ་སྲོལ་གཏོད་དང་བསྒྱུར་བཅོས་མཛད་ཡོད་པ་དང་། ད་ལྟའི་ཆར་སྲིད་སྐྱོང་སྤེན་པ་ཚེ་རིང་མཆོག་གིས་མིག་དཔེ་ལྟ་སའི་བཙན་བྱོལ་བོད་མིའི་སྒྲིག་འཛུགས་ཀྱི་དབུ་ཁྲིད་གནང་གི་ཡོད་པ་རེད། ཅེས་དང་། ཨ་རིའི་དམངས་གཙོ་གོང་སྤེལ་བསྟི་གནས་ཁང་གིས་དེ་སྔ་༧གོང་ས་མཆོག་གདན་ཞུས་ཀྱིས་དམངས་གཙོའི་གཟེངས་རྟགས་ཕུལ་ཡོད་པ་དང་། བཙན་བྱོལ་བོད་མིའི་དམངས་གཙོའི་འཕེལ་རིམ་དང་བོད་མིའི་རང་དབང་འཐབ་རྩོད་ལ་རྒྱབ་སྐྱོར་གནང་ཡོད། བཙན་བྱོལ་བོད་མིའི་དམངས་གཙོའི་སྒྲིག་འཛུགས་ནི་སྐྱབས་བཅོལ་བའི་དམངས་གཙོའི་ལས་འགུལ་སྤེལ་མཁན་གཞན་རྣམས་ཀྱིས་ཀྱང་མིག་དཔེ་ལྟ་འོས་པ་ཞིག་རེད། ཅེས་གསུངས་ཡོད་འདུག
དེ་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་དམངས་གཙོ་གོང་སྤེལ་བསྟི་གནས་ཁང་གིས་བཙན་བྱོལ་བོད་མིའི་དམངས་གཙོ་འཕེལ་རིམ་དང་བོད་མིའི་དམངས་གཙོའི་ལས་འགུལ་ལ་རྒྱབ་སྐྱོར་གནང་དང་གནང་མུས་ཡིན་པར་རྗེས་སུ་ཡི་རངས་དང་ཐུགས་རྗེ་ཆེ་ཞུས་ཡོད་དང་སྦྲགས། ༧གོང་ས་མཆོག་གི་ཡང་དག་པའི་དབུ་ཁྲིད་འོག་བཙན་བྱོལ་བོད་མིའི་དམངས་གཙོ་གོང་འཕེལ་འགྲོ་བཞིན་ཡོད་པའི་སྐོར་དང་། རྒྱ་ནག་གཞུང་གིས་བཙན་བྱོལ་བོད་མིའི་སྤྱི་ཚོགས་གཏོར་བཤིག་གི་ལས་འགུལ་སྤེལ་བཞིན་ཡོད་ཀྱང་། བཙན་བྱོལ་བོད་མི་རྣམས་ཀྱིས་ལྟ་བ་ལངས་ཕྱོགས་འཛིན་སྟངས་ལ་ཁྱད་པར་ཡོད་མེད་ལ་མ་ལྟོས་པར་རྡོག་རྩ་གཅིག་སྒྲིལ་ཐོག་བོད་དོན་འཐབ་རྩོད་བྱ་རྒྱུའི་ཆོད་སེམས་བརྟན་པོ་ཡོད་སྐོར་གསུངས་འདུག
ཨ་རིའི་དམངས་གཙོ་གོང་སྤེལ་བསྟི་གནས་ཁང་གི་འགན་འཛིན་གཞོན་པ་སྐུ་ཞབས་ (Brian Joseph) ལགས་ཀྱིས། བོད་དོན་སྤྱིའི་སྐོར་དང་། ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་གཞུང་གིས་༧པཎ་ཆེན་ཆུང་སྲིད་རིན་པོ་ཆེ་འཛིན་བཟུང་བཙན་འཕྲོག་བྱས་རྗེས་ད་བར་༧པཎ་ཆེན་ཆུང་སྲིད་རིན་པོ་ཆེ་གང་དུ་ཡོད་མེད་དང་སྐུ་གཟུགས་བདེ་ཐང་ཡིན་མིན་གྱི་གནད་དོན། དམངས་གཙོ། འཛམ་གླིང་ཞི་བདེ་དང་བདེ་འཇགས་སོགས་ཀྱི་བརྗོད་གཞི་ཁག་ཅིག་གི་སྐོར་གསུང་བཤད་གནང་ཡོད་འདུག
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་བ་སོགས་ནས་བསྡུས།
