བསྟན་འཛིན་གྱིས་སྐྱོན་བརྗོད་ཀྱི་མཆན་འགོད་མཁན་ཁག་ཅིག་ཁྲིམས་ལ་སྦྱར།

ཡོངས་གྲགས་སུ་ལི་ཐང་བསྟན་འཛིན་ཞེས་འབོད་པའི་བོད་རིགས་ཕོ་གཞོན་ཁོས་རང་ཉིད་ལ་རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་སྐྱོན་བརྗོད་བྱེད་མཁན་རྣམས་ཁྲིམས་ལ་གཏུགས་རྒྱུའི་ཉེན་བརྡ་བཏང་བ་མ་ཟད། མི་ཁག་ཅིག་ཁྲིམས་ལ་གཏུགས་ཟིན་ཡོད་འདུག

ཕྱི་ལོ་ ༢༠༢༠ ལོར་རྒྱ་ནག་ནང་སྐད་གྲགས་ཆེ་ཐག་ཆོད་ཅིང་རྒྱ་རིགས་བུ་མོ་ཁྲི་ཕྲག་གི་སེམས་ཀྱི་རྒྱལ་སྲས་ལྟ་བུར་གྱུར་བའི་བོད་རིགས་གཞོན་སྐྱེས་བསྟན་འཛིན་དོན་འགྲུབ་ལ། ད་ལྟའི་ཆར་རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་རྣམ་པ་ཙམ་ལས་རིག་རྩལ་གྱི་ཁྱད་ཆོས་གཞན་གང་ཡང་མེད་པ་སོགས་ཀྱི་སྐྱོན་བརྗོད་བྱེད་མཁན་མང་པོ་ཡོང་གི་ཡོད་སྟབས། ཉེ་ལམ་ཁོས་རང་ཉིད་ལ་དྲ་ལམ་ནས་སྐྱོན་བརྗོད་ཀྱི་མཆན་འགོད་མཁན་ཁག་ཅིག་ཁྲིམས་གཏུགས་བྱས་ཡོད་པ་མ་ཟད། དྲ་ལམ་ནས་སྐྱོན་བརྗོད་བྱེད་མཁན་སུ་ཞིག་ཡིན་ཡང་ཚང་མ་ཁྲིམས་ལ་སྦྱོར་རྒྱུ་ཡིན་པའི་ཉེན་བརྡ་བཏང་ཡོད་འདུག

དེ་འབྲེལ་རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གསར་ཁང་གི་གནས་ཚུལ་ནང་། སྐབས་ཤིག་ལ་རྒྱ་ནག་གི་ཕོ་གསར་རྫིག་ཤོས་སུ་ངོས་འཛིན་བྱས་པའི་བསྟན་འཛིན་དོན་འགྲུབ་ལ་མི་ཚང་མས་རྣམ་པ་ཙམ་ལས་གཞན་ཁྱད་ཆོས་གང་ཡང་མེད་པའི་སྐྱོན་བརྗོད་བྱེད་ཀྱི་ཡོད། ཅེས་བརྗོད་འདུག་པ་དང་། ཟླ་འདིའི་ཕྱི་ཚེས་ ༨ ཉིན་བསྟན་འཛིན་དོན་འགྲུབ་ཀྱིས་ཁྲིམས་རྩོད་པ་དང་རང་གི་ལས་ཁུངས་ཀྱི་ཡི་གེ་ཞིག་སྤྱི་བསྒྲགས་བྱས་ཏེ། མི་སུ་ཞིག་གིས་བརྙས་བཅོས་དང་འཇིགས་སྐུལ། འཆལ་གཏམ་དང་དམའ་འབེབ་སོགས་ཀྱི་ཚིག་དང་པར། དེ་བཞིན་སྐད་བཅས་བཀོལ་སྤྱད་ཀྱིས་སྐྱོན་བརྗོད་བྱས་ཚེ། ཐད་ཀར་ཁྲིམས་ལ་གཏུགས་རྒྱུ་ཡིན། ཞེས་ཉེན་བརྡ་བཏང་ཡོད་པ་མ་ཟད། དྲ་ལམ་ནས་སྐྱོན་བརྗོད་ཀྱི་མཆན་འདེབས་མཁན་ཁག་ཅིག་ཁྲིམས་གཏུགས་བྱས་ཟིན་ཡོད་འདུག

ཕྱི་ལོ་ ༢༠༢༠ ལོར་བསྟན་འཛིན་དོན་འགྲུབ་ཀྱིས་འཛུམ་མདངས་སྟོན་བཞིན་པའི་སྐར་ཆ་བདུན་ཅན་གྱི་བརྙན་ཞིག་རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་ཁྱབ་བརྡལ་དུ་ཕྱིན་པ་དང་། བསྟན་འཛིན་དོན་འགྲུབ་རྒྱ་ནག་རྒྱལ་ཡོངས་ཀྱི་དྲ་ཐོག་གི་ཤུགས་རྐྱེན་ཆེས་ཆེ་བའི་མི་སྣར་གྱུར་ཡོད་པ་དང་། སྐབས་དེར་ས་གནས་སྲིད་གཞུང་གིས་བསྟན་འཛིན་དོན་འགྲུབ་ཕ་ཡུལ་ལི་ཐང་གི་ཡུལ་སྐོར་ཕོ་ཉའི་ཚབ་མཚོན་མི་སྣར་བསྐོས་ཡོད་པ་རེད།

ཡང་ཕྱི་ལོ་ ༢༠༢༠ ལོར་རྒྱ་ནག་གི་རྩེད་རིགས་ཀྱི་གླེང་སྟེགས་ (Hupu) སྟེང་། མི་གྲངས་ ༣༣༠༠ ལྷག་ལ་བཅར་འདྲི་ཞུས་ཏེ་ཐོན་པའི་ཞིབ་འཇུག་གྲུབ་འབྲས་ལྟར་ན། མི་གྲངས་བརྒྱ་ཆ་ ༦༣ གྱིས་རང་ཉིད་བསྟན་འཛིན་དོན་འགྲུབ་ལས་ལྷག་གིས་ཕོ་ཉམས་དོད་པ་དང་རྫིག་པོ་ཡོད་པའི་ལན་འདེབས་བྱས་ཡོད་པ་རེད་ལ། ཁོ་ལ་སྐྱོན་བརྗོད་ཀྱི་མཆན་འདེབས་མཁན་ཁྲོད་སྐད་གྲགས་ཆོད་པའི་མཆན་ཞིག་ནི། ལོ་ངོ་བཅུའི་སློབ་སྦྱོང་གི་གྲུབ་འབྲས་ནི་དོན་འགྲུབ་ཀྱི་འཛུམ་མདངས་ཀྱི་ཟུར་ཙམ་ལའང་དོད་ཀྱི་མེད། ཅེས་དཀའ་སྤྱད་འབད་བརྩོན་བྱས་པའི་གྲུབ་འབྲས་ལས་རྣམ་པ་མཛེས་པོ་ཡོད་པར་རིན་ཐང་སྤྲོད་ཀྱི་འདུག་པའི་ཟུར་ཟ་བྱས་ཡོད་པ་རེད།

ད་ལྟ་རང་ལོ་ ༢༡ ལས་སོན་མེད་པའི་ཡོངས་གྲགས་སུ་ལི་ཐང་བསྟན་འཛིན་ཞེས་འབོད་པ་ཁོ་རྒྱ་ནག་རྒྱལ་ཡོངས་སུ་སྐད་གྲགས་ཆོད་རྗེས། ཕ་ཡུལ་ལི་ཐང་རྫོང་གཙོ་བྱས་པའི་དཀར་མཛེས་ཁུལ་སོགས་ཀྱི་ཡུལ་སྐོར་ལས་རིགས་ལ་ཕན་འབྲས་བྱུང་ཡོད་ཀྱང་། ཁོས་སྣེ་འཁྲིད་པའི་བོད་རིགས་གཞོན་སྐྱེས་ཁག་ཅིག་གིས་རྟ་ཞོན་ནས་རྒྱ་ནག་གི་རྒྱལ་སྟོན་དུས་ཆེན་བསུས་པ་དང་། དམིགས་བསལ་དུས་རྒྱུན་དུ་ཁོས་རང་ཉིད་རྒྱའི་མི་རིགས་ཡིན་ཚུལ་རྗོད་ཀྱིན་པ་དེས། རྒྱ་ནག་གཞུང་གིས་བསྟན་འཛིན་ལྟ་བུའི་བོད་རིགས་གཞོན་སྐྱེས་མང་པོ་ཞིག་ཆབ་སྲིད་ཀྱི་ལག་ཆར་བེད་སྤྱོད་གཏོང་གི་ཡོད་པ་མངོན་གསལ་ཆགས་ཡོད།

གསར་འགོད་པ། སྐལ་བཟང་སྦྱིན་པ།