རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་སུ་ཇི་ཊི་ཀུ་མར་མཆོག་གིས་ཟླ་འདིའི་ཕྱི་ཚེས་ ༡༥ ནས་ ༢༠ བར་རྒྱ་གར་ལྷོ་ཕྱོགས་ཀྱི་བོད་མིའི་གཞིས་ཆགས་ཁག་ལྔའི་ནང་འཚམས་གཟིགས་གནང་བཞིན་ཡོད་པ་རེད།
རྒྱ་གར་སྦེང་ལོར་ལྷོ་སྤྱི་ལས་ཁུངས་ཀྱི་གོ་སྒྲིག་འོག་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་རྒྱ་གར་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇི་ཊི་ཀུ་མར(Shiri Sujeet Kumar)མཆོག་གིས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་དང་དགོན་སྡེ་ཁག་ནང་འཚམས་གཟིགས་གནང་བཞིན་པ་ལྟར། དེ་རིང་ཕྱི་ཚེས་ ༡༨ ཉིན་མོན་གྷོ་གཞིས་ཆགས་ནང་འཚམས་གཟིགས་གནང་གི་ཡོད་འདུག་ལ། ཁོང་གིས་ཟླ་འདིའི་ཕྱི་ཚེས་༡༥ ཉིན་ནས་ཚེས་༡༩ བར་གྱི་ཉིན་གྲངས་ལྔ་རིང་ཀོ་ལི་གྷལ་དོན་ལྡན་གླིང་ནས་དབུ་འཛུགས་ཀྱིས་ལྷོ་གཞིས་ཁག་ལྔའི་ནང་འཚམས་གཟིགས་གནང་བཞིན་ཡོད་པ་དང་། འཚམས་གཟིགས་སྐབས་ལྷོ་སྤྱི་འཇིགས་མེད་ཚུལ་ཁྲིམས་ལགས་དང་ས་གནས་གཞིས་མགོ་རྣམ་པ། ཕྱོགས་བཞུགས་སྤྱི་འཐུས་རྣམ་པ་བཅས་ལྷན་བཅར་ཞུས་འདུག
ཁ་སང་ཕྱི་ཟླ་༥ ཚེས་༡༧ ཉིན་སྦེལ་ཀོབ་བོད་མིའི་གཞིས་ཆགས་ནང་གཟིགས་སྐོར་གནང་སྟེ་མི་མང་ལ་གསུང་བཤད་གནང་ཡོད་པ་དང་། སྐབས་དེར་ཁོང་གི་སྔོན་གྱི་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་རྣམ་པས་བོད་དོན་ཐད་འགན་འཁུར་ཆེན་པོ་ལེན་ཡོད་པ་བཞིན་ཁོང་གིས་ཀྱང་འགན་ཆེན་པོ་ལེན་རྒྱུ་ཡིན་སྐོར་དང་། རྒྱ་གར་གྲོས་ཚོགས་ནང་བོད་ཀྱི་གྲོགས་པོ་ཞིག་ཡོད་སྙམ་པའི་འདུ་ཤེས་དེ་ཁོང་ལ་ཡོད་པ་ནང་བཞིན་བོད་མི་ཚོའི་ངོས་ནས་ཀྱང་ཡིད་ཆེས་གནང་དགོས་པ་དང་། བོད་དོན་ཆབ་སྲིད་ཐོག་ནས་ཁོང་གིས་གང་ཐུབ་ཀྱིས་རྒྱབ་སྐྱོར་ཞུ་རྒྱུར་ཆོད་སེམས་བརྟན་པོ་ཡོད་སྐོར་གསུངས་འདུག
ཡང་ཁོང་གིས། རྒྱ་གར་གྲོས་ཚོགས་བོད་དོན་རྒྱབ་སྐྱོར་བ་ཚོས་༧གོང་ས་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་བྷ་རཏ་རཏྣ་འབུལ་ལམ་ཞུ་རྒྱུར་གྲོས་ཚོགས་འཐུས་མི་གཞན་དང་ལྷན་དུ་ལས་འགུལ་སྤེལ་དང་སྤེལ་མུས་ཡིན་ཞེས་དང་། རྒྱ་གར་ལ་ཆ་མཚོན་ན་དབྱིན་ཇིའི་འོག་ནས་རང་བཙན་ཐོབ་པར་ལོ་ངོ་༢༠༠ལྷག་འགོར་ཡོད་སྟབས། ང་ཚོའི་མི་རབས་འདིའི་ཐོག་བོད་དོན་བདེན་མཐའ་མ་གསལ་ཡང་མི་རབས་རྗེས་མའི་སྐབས་བོད་དོན་བདེན་མཐའ་གསལ་ངེས་ཡིན་པའི་རེ་བ་དང་ཡིད་ཆེས་མ་བརླག་པའི་ཐོག་ནས་བོད་ཀྱི་སྐད་ཡིག་དང་རིག་གཞུང་མི་ཉམས་རྒྱུན་འཛིན་གནང་རྒྱུ་ཤིན་ཏུ་གལ་ཆེན་པོ་རེད་གསུངས་སོང་།
མང་ཚོགས་ཀྱི་དྲི་བ་ཞིག་ལ་ལན་འདེབས་གནང་སྐབས་རྒྱ་གར་གཞུང་གིས་ད་བར་བོད་དོན་ཐད་རྒྱ་ནག་གཅིག་གི་ལངས་ཕྱོགས་སྲིད་ཇུས་འཛིན་བཞིན་ཡོད་ན་ཡང་སྲིད་བློན་མུ་དྷི་སྲིད་གཞུང་གི་འགོ་ཁྲིད་པའི་སྲིད་གཞུང་གིས་སྲིད་ཇུས་དེར་རིམ་པས་འགྱུར་བ་འགྲོ་རྒྱུའི་རྟགས་མཚན་མཐོང་གི་ཡོད་སྐོར་དང་། ས་མཚམས་ཐད་རྒྱ་དཀར་ནག་གི་ས་མཚམས་མ་ཡིན་པར་འཕགས་བོད་ས་མཚམས་ཞེས་བེད་སྤྱོད་བྱེད་བཞིན་ཡོད་པ་སོགས་གསུངས་སོང་།
ལྷོ་སྤྱི་འཇིགས་མེད་ཚུལ་ཁྲིམས་ལགས་ཀྱིས་འདི་གའི་གསར་འགོད་པར་ཁོང་ལྷོ་སྤྱིར་མ་བསླེབས་གོང་ལྡི་ལིར་རྒྱ་གར་བོད་དོན་དོན་རྒྱབ་སྐྱོར་ཚོགས་པའི་འབྲེལ་མཐུད་ལས་ཁུངས་ནང་ཞབས་ཕྱི་ཞུས་སྐབས། འདི་ལོའི་ཕྱི་ཟླ་གཉིས་པའི་ནང་ཁོང་གི་ལས་དྲུང་བརྒྱུད་ནས་ལྷོ་ཕྱོགས་ས་གནས་ལ་བཅར་རྒྱུའི་འཆར་གཞི་ཡོད་སྐོར་འགྲེལ་བརྗོད་བྱུང་བ་དང་ཕྱི་ཟླ་གསུམ་པའི་ནང་ལྷོ་སྤྱིར་བསྐོར་བཞག་བྱུང་རྗེས། ཟླ་འདིའི་ཕྱི་ཚེས་༡༥ ནས་༢༠ བར་ལྷོ་ཕྱོགས་གཞིས་ཆགས་ཁག་ལ་གཟིགས་སྐོར་གནང་རྒྱུ་གོ་སྒྲིག་ཞུས་པ་ཡིན། སུ་ཇེ་ཊི་ཀུ་མར་མཆོག་གིས་ཐེངས་འདིར་ལྷོ་ཕྱོགས་ལ་གཟིགས་ཞིབ་གནང་དགོས་པའི་དམིགས་ཡུལ་གཙོ་བོ་ནི་ལྷོ་ཕྱོགས་གཞིས་ཆགས་ཁག་གི་ནང་འདས་པའི་ལོ་ངོ་དྲུག་བཅུའི་ནང་དམིགས་ཡུལ་དང་པོ་བོད་དོན་བདེན་མཐའ་མ་གསལ་བར་དུ་བོད་མི་རིགས་དང་བོད་ཀྱི་ཆོས་དང་རིག་གཞུང་སྲུང་སྐྱོབ་སླད་གོམ་པ་ཇི་ལྟར་སྤོས་ཡོད་མེད་ཤེས་རྟོགས་ཆེད་དུ་ཡིན་སྐོར་འགྲེལ་བརྗོད་གནང་བྱུང་།
སྐུ་ཞབས་སུ་ཇི་ཊི་ཀུ་མར་མཆོག་ཕྱི་ལོ་༢༠༠༩ ལོར་བོད་ནང་ཕེབས་མྱོང་ཡོད་པ་མ་ཟད། ༧ གོང་ས་སྐྱབས་མགོན་ཆེན་པོ་མཆོག་དང་ཐེངས་གསུམ་མཇལ་མོལ་གནང་མྱོང་ཡོད་པ་དང་། སྔ་ལོ ་༢༠༢༡ ལོར་སྐབས་བཅུ་བདུན་པའི་བོད་མི་མང་སྤྱི་འཐུས་གྲོས་ཚོགས་ངོས་ནས་རྒྱལ་ས་ལྡི་ལིར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་སླར་གསོ་གནང་རྗེས་༢༠༢༡ཕྱི་ཟླ་༡༢ཚེས་༢༢ཉིན་ཁོང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོར་བསྐོ་བཞག་གནང་ཡོད་པ་རེད།
རྒྱ་གར་ལྷོ་ཕྱོགས་ཀྱི་གསར་འགོད་པ།
