དེ་རིང་འདི་གའི་གསར་འགོད་པས་ཁ་པར་བརྒྱུད་རྒྱ་གར་ལྷོ་ཕྱོགས་མོན་གྷོ་ཊིར་རྟེན་གཞི་བྱས་པའི་ར་སྟོད་གྲྭ་ཚང་གི་འབྲེལ་ཡོད་དགེ་འདུན་པ་ཞིག་ལ་བཀའ་འདྲི་ཞུས་སྐབས། ཁ་སང་བཞུགས་སྒར་དྷ་སར་རིན་པོ་ཆེ་དགུང་གྲངས་བརྒྱའི་སྟེང་དགོངས་པ་ཆོས་དབྱིངས་སུ་འཐིམས་ཡོད་པ་དང་། ཁོང་ལ་སྙུང་གཞི་གང་ཡང་མེད་པར་ཐུགས་ལྷོད་བཞུགས་ངང་དགོངས་པ་རྫོགས་ཡོད་སྐོར་གསུངས་བྱུང་།
འབྲེལ་ཡོད་དགེ་འདུན་པ་ཁོང་གིས་གསུངས་པ་ལྟར་ན། ར་སྟོད་སྐྱོང་བླ་སྐུ་ཕྲེང་བཅུ་གཅིག་པ་རིན་པོ་ཆེ་མཆོག་ལ་ཕྱི་ལོ་ ༢༠༡༩ ཙམ་ལ་༧གོང་ས་མཆོག་ནས་རྒྱ་གར་ནང་བཞུགས་ཚེ་ལེགས་པོ་ཡོད་པའི་བཀའ་སྩལ་དོན་ལྟར། བཞུགས་སྒར་དྷ་རམ་ས་ལར་བཞུགས་ནས་ལོ་གཉིས་ཡས་མས་འགྲོ་ཡི་ཡོད་པ་དང་། ཞིང་གཤེགས་དམ་པ་ཁོང་གི་བཞུགས་ཡུལ་ནས་༧གོང་ས་མཆོག་གི་ཕོ་བྲང་མཇལ་གྱི་ཡོད་སྟབས། འདས་པའི་ལོ་གཉིས་ཙམ་རིང་ཀིརྟིའི་བྱིས་པ་གྲྭ་ཚང་གི་ཉེ་འཁྲིས་མགྲོན་ཁང་ཞིག་ཏུ་བཞུགས་ཡོད་པ་རེད།
ར་སྟོད་སྐྱོང་བླ་རིན་པོ་ཆེ་མཆོག་ཕྱི་ལོ་ ༡༩༢༣ ལོར་བོད་མདོ་ཁམས་བྲག་གཡབ་ཏུ་སྐུ་འཁྲུངས་ཤིང་། དགུང་གྲངས་ལྔའི་སྟེང་༧གོང་ས་སྐུ་ཕྲེང་ ༡༣ པ་ཆེན་པོས་སྐྱོང་བླ་སྐུ་ཕྲེང་ ༡༠ བའི་ཡང་སྲིད་དུ་ངོས་འཛིན་གནང་། དགུང་ལོ་ ༦ གི་སྟེང་རབ་ཏུ་བྱུང་ནས་ར་སྟོད་གྲྭ་ཚང་དུ་ཆོས་ཞུགས་གནང་། འབྲས་སྤུངས་དུ་གཞུང་ཆེན་སློབ་གཉེར་གནང་སྟེ་དགུང་ལོ་ ༢༡ ཙམ་ལ་ཕེབས་སྐབས་དགེ་བཤེས་ལྷ་རམས་པའི་མཚན་གནས་བཞེས། ཁོང་བོད་ནས་རྒྱ་གར་ནང་བཙན་བྱོལ་དུ་ཕེབས་རྗེས་ཡོ་རོབ་དང་ཨ་རི་སོགས་སུ་ཕེབས། འདས་པའི་ལོ་ངོ་ ༣༠ རིང་ཆོས་ཕྱོགས་ཀྱི་མཛད་པ་རྒྱ་ཆེར་བསྐྱངས་གནང་མཛད། རྒྱ་གར་དུ་མོན་གྷོ་འདོད་དགུ་གླིང་ར་སྟོད་གྲྭ་ཚང་ཕྱག་བཏབ་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
