གཞོན་སྐྱེས་རྣམས་ལ་གཙོ་བོར་དམིགས་པའི་ཉིན་གྲངས་གཉིས་རིང་གི་བཀའ་ཆོས་ལེགས་པར་གྲུབ།

༧གོང་ས་རྒྱལ་བ་རིན་པོ་ཆེ་མཆོག་ནས་བོད་རིགས་གཞོན་སྐྱེས་དང་མི་མང་རྣམས་ལ་སྤྱན་རས་གཟིགས་ཀྱི་བཀའ་དབང་དང་རྟེན་འབྲེལ་བསྟོད་པའི་གསུང་ཆོས་སྩལ་སྐབས་ངོས་རང་སེམས་འཁྲུག་བསྡད་རྒྱུ་ཁྱོན་ནས་མེད་པར་སྐྱིད་པོ་བྱས་ནས་བསྡད་ཡོད་པ་དང་ཁྱེད་རང་ཚོའང་སྐྱིད་པོ་བྱས་ནས་སྡོད་ཅེས་གསུངས།

 དེ་རིང་བཀའ་ཆོས་ཉིན་གཉིས་ཀྱི་མཐའ་མར་༧གོང་ས་རྒྱལ་བ་རིན་པོ་མཆོག་གིས། སྤྱིར་འཕགས་པ་སྤྱན་རས་གཟིགས་སྙིང་རྗེའི་ལྷ་མཆོག་ཆགས་བསྡད་ཡོད་རེད། སེམས་ཅན་ཀུན་ལ་གཟིགས་མཁན་ཞིག་དང་།  དེའི་ནང་ཚན་ནས་ང་ཚོ་བོད་དེ་ལོ་རྒྱུས་ཀྱི་ཐོག་ནས་འཕགས་པ་སྤྱན་རས་གཟིགས་ཀྱི་ཐུན་མོང་མ་ཡིན་པའི་གདུལ་བྱ་ཡིན་པའི་ལོ་རྒྱུས་ཁུངས་བཙན་པོ་ཞེ་དྲགས་བཤད་རྒྱུ་འདུག  དེ་རིང་འདིར་སྤྱན་རས་གཟིགས་དང་། འཇིག་རྟེན་དབང་ཕྱུག ཕྱག་སྟོང་སྤྱན་སྟོང་། ཇོ་བོ་ཝ་ཏི་བཟང་པོ་ཡོད།  ལྷ་ས་རྩེ་པོ་ཏ་ལར་སྤྱན་རས་གཟིགས་སྟོན་འཁོར་གསུམ་ཡོད་རེད། དེ་དང་དེ་རིང་འདིར་བཞུགས་པའི་ཇོ་བོ་ཝ་ཏི་བཟང་པོ་གཉིས་ཞེ་ས་མ་ཞུས་ན་སྤུན་མཆེད་ནང་བཞིན་རེད་ཅེས་བཤད་རྒྱུ་ཡོད་པ་རེད། སྐུ་མདུན་སྐུ་གོང་མ་དང་། ཕལ་ཆེར་རྒྱལ་བ་སྐུ་གོང་མ་ཚོའང་མིན་འགྲོ། དམིགས་བསལ་གྱི་ལྗགས་བརྙན་དེ་འདྲ་གནང་བའི་ཁ་ཐུག་ལ། སྟོད་ནས་སྤྱན་རས་གཟིགས་འཇིག་རྟེན་དབང་ཕྱུག་འདི་ལྷ་སར་གདན་ཞུ་གནང་། དེ་ནས་ཟིང་འཁྲུག་ལངས་པའི་རྗེས་སུ་ཆུ་བཞི་སྒང་དྲུག་གི་གྲས་ཞེ་དྲགས་དྲིན་ཆེན་པོ་རེད། སྟོད་ནས་བལ་ཡུལ་བར་དུ་གདན་འདྲེན་ཞུས། བལ་ཡུལ་ནས་རྒྱ་གར་ལ་གདན་འདྲེན་ཞུས། ནམ་རྒྱུན་རྟེན་བཞུགས་ས་དེ་རྫོང་དཀར་ཆོས་སྡེ་ལ་རེད། རྫོང་དཀར་ཆོས་སྡེ་རྒྱ་གར་ལྷོ་ཕྱོགས་སུ་གཞིས་ཆགས་བསྡད་ཡོད་རེད། བྱས་ཙང་ཐུགས་རྗེ་ཆེན་པོ་དེ་རྒྱ་གར་ལྷོ་ཕྱོགས་སུ་གདན་འདྲེན་ཞུ་རྒྱུའི་རྩིས་བྱས་པ་རེད། ངོས་རང་ནས་ཐུགས་རྗེ་ཆེན་མོ་དྷ་རམ་ས་ལར་བཞུགས་དང་། ལྷོ་ཕྱོགས་སུ་གདན་འདྲེན་ཞུ་བར་གཟན་རྟགས་བསྒྲིལ་ཡིན། དྷ་རམ་ས་ལར་བཞག་རྒྱུར་གཟན་རྟགས་བཟང་པོ་བྱུང་སོང་། ངོས་རང་བསྡད་ས་དེར་ཐུགས་རྗེ་ཆེན་པོ་བཞུགས་བཞུགས་ཡོད་རེད། བྱས་ཙང་ངོས་རང་ཐུགས་རྗེ་ཆེན་པོའི་དཀོན་གཉེར་འདྲ་བོ་ཞིག་ཆགས་བསྡད་ཡོད་རེད་གདའ། ཐུགས་རྗེ་ཆེན་པོའི་སྐུ་དེ་མཇལ་བསྡད་དུས། ཡར་གད་མོ་བགད་ན། མར་ཞལ་ངོའི་མདངས་བསྟན་ཡོང་མཁན་ཞིག་འདུག གསོན་པོ་འདྲ་བོ་ཞིག་འདུག སྐྱབས་སུ་མཆི། དེ་རིང་རྟེན་ཁྱད་པར་ཅན་དེ་འདྲ་ཞིག་གི་ཐོག་ལ་ཐུགས་རྗེ་ཆེན་པོའི་དབང་གི་སྟ་གོན་ཁ་སང་གྲུབ་པ་བྱས་ཡོད་པ་རེད། ཅེས་གསུངས་སོང་།

 ༧གོང་ས་རྒྱལ་བ་རིན་པོ་ཆེ་མཆོག་གིས། ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་རེད། ལྷ་ས་གཙུག་ལག་ཁང་གི་ཇོ་བོའི་སྐུ་མདུན་དུ་ངོས་རང་གིས་བསྙེན་རྫོགས་བསྒྲུབས་པ་རེད། མཁན་པོ་ཡོངས་འཛིན་གླིང་རིན་པོ་ཆེ་རེད། སྐྱབས་སུ་མཆི། དེ་ནས་ངོས་རང་གིས་དཔེ་ཆ་གང་ཙམ་བལྟས་ཡོད་རེད་གདའ། མངོན་རྟོགས་རྒྱན་དང་དབུ་མ་འཇུག་པ་བློར་བཟུང་། དེ་དུས་དོ་སྣང་ཞེ་དྲགས་མེད། བར་སྐབས་དོ་སྣང་ཏོག་ཙམ་སླེབས་ནས་ཡོང་དུས། དབུ་མ་འཇུག་པ་དང་དབུ་མ་རྩ་བ་ཤེས་རབ་དེ་གཉིས་ཞེ་དྲགས་རྩ་ཆེན་པོ་རེད་འདུག ཅེས་དང་། སེམས་ལ་ཞི་བདེ་བསླེབས་པའི་རྒྱུ་རྐྱེན་གྱིས་ལུས་པོའི་འབྱུང་བ་འཁྲུག་བསྡད་པ་དེ་འདྲ་མེད་པར་བདེ་པོ་ཆགས་བསྡད་ཀྱི་ཡོད་པ་རེད། འཕྲོད་བསྟེན་ཟེར་བ་དེ་མ་གཞི་སྨན་བཟའ་རྒྱུ་དེ་འདྲ་ཡོང་གི་རེད་དེ། གཙོ་བོའི་གཙོ་བོ་དེ་སེམས་ཞི་བདེ་བྱུང་བ་ཡིན་ན། ལུས་པོའི་འཕྲོད་བསྟེན་ཡག་ཤོས་དེ་རེད་འདུག ཁྱེད་རང་བྱིས་པ་ཚོས་སེམས་ཀྱི་ཞི་བདེ་དེ་བསྒྲུབ་དགོས་རེད། སེམས་ཀྱི་ཞི་བདེ་ལ་དོ་སྣང་བྱ་དགོས་རེད། ངོས་རང་གིས་རྩེད་མོ་དང་སྦྲགས་ནས་བཤད་ན། ཁྱེད་རང་ཚོ་གདོང་ཏོག་ཙམ་རྣམ་པ་ཡག་པོ་ཡོད་ནའང་། ཁོང་ཁྲོ་ཟ་བསྡད་ན་རྣམ་པ་ཡག་པོ་མཐོང་གི་མ་རེད། རྣམ་པ་ཡག་པོ་དེའི་ཐོག་ལ་འཛུམ་ཤིག་ཤིག་བསྡད་ཡོང་དུས་སྙིང་རྗེ་མོ་འདུག བྱས་ཙང་མི་ཟེར་བ་དེ་སྤྱི་ཚོགས་ཤིག་རེད། དེའི་ནང་ལ་སེམས་པ་བཟང་པོ་བྱས། གཞན་ལ་ཕན་སེམས་བྱས། དེ་འདྲ་བྱས་ནས་བསྡད་པ་ཡིན་ན། སོ་སོ་སྐྱིད་པ། རོགས་པ་ཚོ་སྐྱིད་པ། གང་ལྟར་སེམས་སྐྱེད་བཟང་པོ་ཟེར་བ་དེ་ཞེ་དྲགས་གལ་ཆེན་པོ་རེད། ཁྱེད་རང་ཚོས་ངོས་རང་གི་གདོང་ག་དུས་མཐོང་ན་འཛུམ་ཤིག་ཤིག་བསྡད་པ་ལས། རླུང་ལངས་བསྡད་པའི་གདོང་མཐོང་མྱོང་ངམ། ཞེས་གསུངས་སོང་།

 ༧གོང་ས་རྒྱལ་བ་རིན་པོ་མཆོག་གིས། ངོས་རང་བཙན་བྱོལ་བ་ཆགས་ནས་ལོ་མང་དག་ཕྱིན་པ་རེད། རྒྱ་གར་ནང་བསྡད་ན་བོད་དུ་ཡོད་པ་ལས་ལྷག་པར་འགྲོ་དོན་རྒྱ་ཆེན་པོ་ཞིག་བྱེད་ཐུབ་ཀྱི་འདུག དེང་སང་འཕྲུལ་ཆས་ཀྱི་ཐོག་ནས་སྐད་ཆ་བཤད་རྒྱུ་ཡོད་དུས། ངོས་རང་གིས་སྐད་ཆ་བཤད་རྒྱུ་དང་འབྲེལ་བ་བྱེད་ཐུབ་ཀྱི་འདུག བོད་ནང་དུ་ཡོད་པ་ཡིན་ན་གཅིག་སྡུད་རིང་ལུགས་ཀྱི་འོག་ཏུ་བསྡད་ཡོད་དུས། དེ་འདྲ་བྱ་རྒྱུ་ཡོད་མ་རེད། ངོས་རང་རྒྱ་གར་རང་དབང་ལུང་པའི་ནང་བསྡད་ཡོད་རེད། ཕྱོགས་གཅིག་ནས་བསམ་བློ་བཏང་ན། ངོས་རང་བཙན་བྱོལ་བ་ཆགས། རྒྱ་གར་གཞུང་གི་སྐུ་མགྲོན་བྱས་ནས་བསྡད་རྒྱུ་དེས་འགྲོ་དོན་རྒྱ་ཆེན་པོ་ཞིག་བྱེད་ཐུབ་རྒྱུ་ཆགས་བསྡད་འདུག ཅེས་དང་། ༧མགོན་པོ་གང་ཉིད་ཀྱིས། ཆོས་འཁོར་སྐོར་ལབ་དུས་ཁྲི་འདྲ་བོ་ཞིག་གི་སྒང་དུ་བསྡད་དགོས་རྒྱུ་ཡོད་མ་རེད། སོ་སོའི་ངོ་ཤེས་པ། ནང་ཚགས་ཚོར་སྐད་ཆ་བཤད་དུས། སྐུ་མདུན་ནས་སེམས་པ་བཟང་པོ་བྱེད་དགོས་རེད། མ་ཎི་ཡག་པོ་བགྲོངས་གསུང་གི་འདུག་ལབ་ན། དེ་ཆོས་བཤད་རེད། ཁྱེད་རང་ཚོ་ཕྱོགས་མཐའ་ཚང་མ་ནས་ཡིན་པ་ཚོས་སོ་སོའི་ངོ་ཤེས་རོགས་པ་ཚོར་སེམས་པ་བཟང་པོ་བྱོས། ཀུན་ལ་ཕན་སེམས་ཡག་པོ་བྱོས། མ་ཎི་བགྲོངས་ལབ་ཤོག་ཨ། དེ་ངའི་ message ཡིན།  ཞེས་གསུངས་སོང་།

 ཡང་༧གོང་ས་རྒྱལ་བ་རིན་པོ་ཆེ་མཆོག་གིས། འཕགས་པ་སྤྱན་རས་གཟིགས་ཕྱག་སྟོང་སྤྱན་སྟོང་གི་དབང་དེ་ཁ་སང་སྟ་གོན་བྱས། དེ་རིང་དངོས་གཞི་བྱས་ནས་ལེགས་པར་གྲུབ་སོང་། ངོས་རང་གི་མིག་འོག་ལ་བོད་ནང་དུ་ཡོད་བསྡད་པའི་རྒྱ་ཆེ་མི་མང་། གང་ལྟར་༧རྒྱལ་བ་རིན་པོ་ཆེ་ལ་ཡིད་ཆེས་བྱེད་མཁན་དེ་དག་ལ་ངོས་རང་གིས་མོས་པ་བྱས་ནས་དབང་ཐོབ་ཡོད། དེ་བཞིན་རྒྱ་ནག་ནང་དུའང་རྒྱ་རིགས་མང་པོ་ཞིག་གིས་ངོས་རང་ལ་དགའ་པོ་བྱེད་ཀྱི་འདུག དེ་དག་ལའང་ངོས་རང་གིས་འཕགས་པ་སྤྱན་རས་གཟིགས་ཀྱི་བྱིན་རླབས་འཇུག་པར་ཤོག་ཅེས་སྨོན་ལམ་བརྒྱག་གི་ཡོད། གང་ལྟར་ང་རང་ཚོ་བོད་ལ་སྡུག་བསྔལ་མང་པོ་ཞེ་དྲགས་མྱངས་པ་རེད། དེ་དག་རིམ་པས་དྲག་ཏུ་དྲག་ཏུ་འགྲོ་བསྡད་ཀྱི་འདུག རིམ་པས་རྒྱ་ནག་ནང་དུའང་ནང་པའི་ཆོས་ཤུགས་ཆེ་རུ་འགྲོ་ཡི་ཡོད་པའི་གནས་ཚུལ་མང་པོ་འདུག ཁྱེད་རང་ཚོ་ཚང་མ་བློ་བདེ་པོ་བྱོས། སེམས་སྐྱིད་པོ་བྱས་ནས་སྡོད་ཨ། ༧རྒྱལ་བ་རིན་པོ་ཆེ་ལོ་༨༧ སླེབས་བསྡད་ཡོད་རེད་དེ། ངོས་རང་གི་གདོང་དེ་ད་ལྟ་སྤོར་ཏོ་ཞེ་དྲགས་མི་འདུག་གཱ  བྱས་ཙང་༧རྒྱལ་བ་རིན་པོ་ཆེ་ལོ་༡༥ ། ༢༠ དེ་འདྲ་ཞིག་གཏན་གཏན་བསྡད་ཀྱི་རེད། བློ་བདེ་པོ་བྱས་ནས་སྡོད་ཨ། ངོས་རང་རྒྱ་གར་གཞུང་གི་སྐུ་མགྲོན་བྱས་ནས་ལྷོད་ལྷོད་བྱས་ནས་སྡོད་ཀྱི་ཡོད། གང་ལྟར་པུས་མོ་ཡག་པོ་རང་མི་འདུག དེ་སྐྱོན་མི་འདུག བོད་ཀྱི་དཀའ་ངལ་དེ་ཕལ་ཆེར་སེལ་ཐུབ་ཀྱི་རེད། གཙོ་བོ་ས་ཆ་ག་བར་བསྡད་ཡོད་ནའང་། བྱང་ཆུང་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ་ག་ཚོད་ཐུབ་ཐུབ་ཅིག་བྱེད་ན།   ང་རང་ཚོའི་བསོད་ནམས་དང་ཡེ་ཤེས་ཀྱི་ཚོགས་གོང་ནས་གོང་དུ་འཕེལ་འགྲོ་རྒྱུ་ཞིག་ཆགས་ཡོང་གི་རེད། ཇི་ཙམ་གྱིས་ང་ཚོའི་བསོད་ནམས་དང་ཡེ་ཤེས་ཀྱི་ཚོགས་འཕེལ་བ་དེའི་ཚོད་ཀྱིས་བོད་ཀྱི་བདེན་མཐའ་གསལ་རྒྱུར་ཕན་ཐོགས་ཞེ་དྲགས་ཡོད་རེད། རྒྱ་ནག་འཛམ་གླིང་མི་འབོར་ཆེ་ཤོས་ཀྱི་རྒྱལ་ཁབ་ཆགས་བསྡད་ཡོད་རེད། དེའི་ནང་དུ་སངས་རྒྱས་པའི་ཆོས་ཀྱི་བག་ཆགས་སད་ནས་བྱུང་བ་ཡིན་ན། མི་མང་པོ་ཞིག་ལ་ཕན་གི་ཡོད་རེད། ཁྱེད་རང་ཚོས་ཏཱ་ལའི་བླ་མ་རྒྱ་གར་གཞུང་གི་སྐུ་མགྲོན་བྱས་ནས་བག་ཕེབས་པོ་བྱས་ནས་བསྡད་འདུག ཁྱེད་རང་ཚོའང་སྐྱིད་པོ་བྱས་ནས་སྡོད་ཨ། ངོས་རང་སེམས་འཁྲུག་བསྡད་རྒྱུ་ཁྱོན་ནས་མེད། ངོས་རང་སྐྱིད་པོ་བྱས་ནས་བསྡད་ཡོད་རེད། ཁྱེད་རང་ཚོས་ཏཱ་ལའི་བླ་མ་བག་ཕེབས་པོ་བྱས་ནས་བསྡད་ཡོད། ད་དུང་ལོ ༡༠ །༢༠ འགྲོ་དོན་བྱེད་ནས་བསྡད་ཀྱི་རེད། ཁྱེད་རང་ཚོ་བློ་བདེ་པོ་བྱས་ནས་སྡོད་ཅིག་ཅེས་གསུངས་སོང་།

གསར་འགོད་པ། དཔལ་ལྡན།