རྒྱ་ནག་གཞུང་གིས་རྒྱལ་ཁབ་ཀྱི་བདེ་འཇགས་ཟེར་བར་གནོད་འཚེ་གཏོང་མཁན་རྩིས་སྤྲོད་བྱས་ཏེ་ཁུངས་དག་ཁ་གསལ་ཡིན་ན་རྒྱ་སྒོར་ཁྲི་ ༡ ནས་འབུམ་ ༡ བར་སྤྲོད་རྒྱུ་ཡིན་སྐོར་བསྒྲགས་འདུག
རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱ་ནག་གཞུང་གིས་རྒྱལ་སྲུང་བདེ་འཇགས་ཟེར་བར་གནོད་འཚེ་བཏང་བའི་ཉེས་མིང་ཅན་རྣམས་ལ་སྔར་ལས་རྒོལ་རྡུང་གཏོང་རྒྱུ་ཡིན་ལུགས་བསྒྲགས་ཡོད་པ་མ་ཟད། དེ་རིགས་ཀྱི་ཉེས་དོན་རྩིས་སྤྲོད་བྱས་ན། རྒྱ་སྒོར་ཁྲི་གཅིག་ནས་འབུམ་གཅིག་བར་རིམ་པ་བཞི་ཡི་ཐོག་ནས་རྔན་པ་སྤྲོད་རྒྱུ་ཡིན་ལུགས་བསྒྲགས་ཡོད་འདུག་ལ། དུས་རྒྱུན་ནས་རྒྱ་ནག་གཞུང་གིས་གནད་དོན་འདྲ་མིན་ཐོག་ཉེས་ཅན་རྩིས་སྤྲོད་ཀྱི་བྱ་དགའ་ཟེར་བ་ཞིག་སྤྲོད་བཞིན་ཡོད་པ་རེད།
ད་ལན་གྱི་ལྐོག་རྔན་སྤྲོད་ཕྱོགས་ནང་། ཁུངས་ལྡན་གནས་ཚུལ་སྤྲོད་མཁན་ཚོར་ཉུང་མཐར་རྒྱ་སྒོར་ཁྲི་གཅིག་ནས་འབུམ་གཅིག་ལྷག་གི་ལྐོག་རྔན་སྤྲོད་རྒྱུ་ཡིན་སྐོར་དང་། རྩིས་སྤྲོད་བྱེད་སྐབས་ཉེས་ཅན་གྱི་མི་དང་གནས་ཚུལ་གང་ཞིག་ཏུ་མཉམ་ཞུགས་བྱས་ཡོད་པའི་ཞིབ་ཕྲའི་གནས་ཚུལ་འཁོད་དགོས་པ་མ་ཟད། རྒྱ་ནག་གཞུང་གིས་དེ་སྔ་ཤེས་རྟོགས་བྱུང་མེད་པའི་གནས་ཚུལ་གསར་པ་ཡིན་དགོས་སྐོར་དང་། གནས་ཚུལ་དེར་འབྲེལ་ཡོད་ལས་ཁུངས་ནས་རྟོག་ཞིབ་བྱས་པ་བརྒྱུད་ར་འཕྲོད་གསལ་པོ་བྱུང་རྗེས། གནས་ཚུལ་རྩིས་སྤྲོད་མཁན་ལ་རྔན་པ་སྤྲད་ན་འོས་འཚམ་ཡིན་ལུགས་བཀོད་འདུག
ཕྱི་ལོ ༢༠༡༨ ཟླ ༤ ཚེས་ ༡༥ ཉིན་ རྒྱ་ནག་བདེ་འཇགས་ལྷན་ཁང་གིས་དབྱིན་ཡིག་དང་རྒྱ་ཡིག་ནང་ཡོད་པའི་དྲ་རྒྱ་གསར་པ་(www.12339.gov.cn)ཟེར་བ་ཞིག་སྒོ་འབྱེད་བྱས་ཏེ། ཕྱིའི་རྒྱལ་ཁབ་ཁག་ཏུ་རྒྱ་ནག་གཅིག་གི་སྲིད་ཇུས་ལ་ངོ་ལོག་གིས་ཁ་བྲལ་ལས་འགུལ་སྤེལ་བ་དང་། རྒྱལ་ཁབ་ཀྱི་བདེ་འཇགས་ལ་ཉེན་ཁ་བསྐྲུན་པ། དེ་བཞིན་གསང་བའི་ལམ་ནས་རྒྱ་ནག་གི་མཐོ་རིམ་མི་སྣར་ལྐོག་རྔན་བརྫངས་ཏེ་གྱེས་ལོག་སོགས་རྒྱ་ནག་ལ་གནོད་སྐྱོན་བཟོ་འདོད་ཀྱི་གསང་བའི་གནས་ཚུལ་གང་ཤེས་རྣམས་གཞུང་ལ་རྩིས་སྤྲོད་བྱས་ཚེ་རྔན་པ་སྤྲོད་རྒྱུ་ཡིན་ཚུལ་བསྒྲགས་ནས་ལག་བསྟར་བྱེད་མུས་ཡིན་པ་རེད།
དུས་རྒྱུན་རྒྱ་ནག་གཞུང་གི་དབང་ཆ་གཅིག་སྡུད་རིང་ལུགས་ལ་སྐྱོན་བརྗོད་ངོ་རྒོལ་བྱེད་མཁན་དང་། ལྷག་པར་དུ་རྒྱ་ནག་གཞུང་གི་བཙན་བཟུང་འོག་ཡོད་པའི་གྲངས་ཉུང་མི་རིགས་བོད་དང་ཡུ་གུར་སོགས་ཀྱི་སྐད་ཡིག་རིག་གཞུང་དང་བཅས་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་པར་སྐྱོན་བརྗོད་བྱེད་མཁན་ཚོར་ཁ་གཏད་གཅོག་ཆེད། ཕྱི་རྒྱལ་ཡུལ་གྲུ་ཁག་གི་རྒྱ་ནག་དོན་གཅོད་ཁང་དང་འབྲེལ་བ་ཡོད་པའི་ཚོགས་སྡེ་སོགས་བརྒྱུད་ནས་ལྐོག་རྔན་སྤྲད་དེ་ངོ་རྒོལ་བྱེད་དུ་འཇུག་གི་ཡོད་པའི་གནས་ཚུལ་བསྟུད་མར་བརྒྱུད་ལམ་ཁག་ཏུ་ཐོན་ཡོད་པ་རེད།
གཞན་ཡང་། ཕྱི་ལོ ༢༠༡༥ ཙམ་ནས་རྒྱ་ནག་གཞུང་གིས་བདེ་སྲུང་དང་། ཆབ་སྲིད། དཔལ་འབྱོར། འཕྲུལ་རིགས་སོགས་ཚུད་པའི་རྒྱལ་ཁབ་ཀྱི་རྒྱལ་སྲུང་སྐོར་གྱི་ཁྲིམས་སྒྲིག་གསར་པ་ཞིག་གཏན་འབེབ་བྱས་ཏེ། རྒྱ་རིགས་ཚང་མས་རྒྱ་ནག་གཞུང་གི་བདེ་སྲུང་ལ་གནོད་འཚེ་གཏོང་མཁན་རིགས་རྩིས་སྤྲོད་བྱ་དགོས་པའི་བཙན་བཀའ་བཏང་ཡོད་པ་དང་། ཕྱི་ལོ ༢༠༡༦ ལོར་རྒྱ་ནག་གཞུང་གིས་རྒྱལ་ཡོངས་བདེ་འཇགས་སློབ་གསོའི་ཉིན་མོ ( Annual National Security Education Day) ཟེར་བ་ཞིག་འཚོགས་ཏེ། རྒྱ་ནག་གཞུང་གི་ཕྱི་ནང་གི་བདེ་སྲུང་ཐད་ལ་དོགས་ཟོན་ཤུགས་སྣོན་དང་། པེ་ཅིང་དུ་གནས་སྡོད་རྒྱ་རིགས་བུད་མེད་ཚོས་ཕྱི་རྒྱལ་གྱི་སྐྱེས་པ་ཚོར་འབྲེལ་འདྲིས་སོགས་བྱེད་པར་ཉེན་བརྡ་བཏང་ཡོད་འདུག འོན་ཀྱང་། ཕྱི་ལོ་ ༢༠༢༠ ལོར་རྒྱ་ནག་གཞུང་གིས་མི་རིགས་མཐུན་སྒྲིལ་ཡར་སྐུལ་དཔེ་བཟང་ཁུལ་འཛུགས་སྐྲུན་སྲོལ་ཡིག་ཟེར་བ་ཞིག་གཏན་འབེབ་བྱས་ཏེ་བོད་རང་སྐྱོང་ལྗོངས་སོགས་བོད་ཁུལ་དུ་ལག་བསྟར་བྱས་ཡོད་པ་མ་ཟད། དཔེ་བཟང་ཁྱིམ་ཚང་གི་མིང་ཐོག་ནས་བོད་དང་རྒྱ་རིགས་ཕན་ཚུན་གཉེན་སྡེབ་བྱེད་པར་སྐུལ་འདེད་བཏང་ཡོད་པ་མ་ཟད། ཁྱིམ་ཚང་དེ་རིགས་ལ་གཟེངས་བསྟོད་དང་དམིགས་བསལ་ལྟ་སྐྱོང་སོགས་བྱེད་ཀྱི་ཡོད་འདུག
གསར་འགོད་པ། དཔལ་ལྡན།
